| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. கச்சானகொ³த்தஸுத்தவண்ணனா
5. Kaccānagottasuttavaṇṇanā
15. யஸ்மா இத⁴ ஜானந்தாபி ‘‘ஸம்மாதி³ட்டீ²’’தி வத³ந்தி அஜானந்தாபி பா³ஹிரகாபி ஸாஸனிகாபி அனுஸ்ஸவாதி³வஸேனபி அத்தபச்சக்கே²னபி, தஸ்மா தங் ப³ஹூனங் வசனங் உபாதா³ய ஆமேடி³தவஸேன ‘‘ஸம்மாதி³ட்டி² ஸம்மாதி³ட்டீ²தி, ப⁴ந்தே, வுச்சதீ’’தி ஆஹ. ததா²னித்³தி³ட்ட²தாத³ஸ்ஸனத்த²ங் ஹிஸ்ஸ அயங் ஆமேடி³தபயோகோ³. அயஞ்ஹெத்த² அதி⁴ப்பாயோ – ‘‘அபரேஹிபி ஸம்மாதி³ட்டீ²தி வுச்சதி, ஸா பனாயங் ஏவங் வுச்சமானா அத்த²ஞ்ச லக்க²ணஞ்ச உபாதா³ய கித்தாவதா நு கோ², ப⁴ந்தே, ஸம்மாதி³ட்டி² ஹோதீ’’தி. அட்ட²கதா²யங் பன ‘‘ஸம்மாதி³ட்டீ²’’தி வசனே யஸ்மா விஞ்ஞூ ஏவ பமாணங், ந அவிஞ்ஞூ, தஸ்மா ‘‘யங் பண்டி³தா’’திஆதி³ வுத்தங். த்³வே அவயவா அஸ்ஸாதி த்³வயங், து³வித⁴ங் தி³ட்டி²கா³ஹவத்து², த்³வயங் தி³ட்டி²கா³ஹவஸேன நிஸ்ஸிதோ அபஸ்ஸிதோதி த்³வயனிஸ்ஸிதோ. தேனாஹ ‘‘த்³வே கொட்டா²ஸே நிஸ்ஸிதோ’’தி. யாய தி³ட்டி²யா ‘‘ஸப்³போ³யங் லோகோ அத்தி² விஜ்ஜதி ஸப்³ப³காலங் உபலப்³ப⁴தீ’’தி தி³ட்டி²க³திகோ க³ண்ஹாதி, ஸா தி³ட்டி² அத்தி²தா, ஸா ஏவ ஸதா³ ஸப்³ப³காலங் லோகோ அத்தீ²தி பவத்தகா³ஹதாய ஸஸ்ஸதோ, தங் ஸஸ்ஸதங். யாய தி³ட்டி²யா ‘‘ஸப்³போ³யங் லோகோ நத்தி² ந ஹோதி உச்சி²ஜ்ஜதீ’’தி தி³ட்டி²க³திகோ க³ண்ஹாதி, ஸா தி³ட்டி² நத்தி²தா, ஸா ஏவ உச்சி²ஜ்ஜதீதி உப்பன்னகா³ஹதாய உச்சே²தோ³, தங் உச்சே²த³ங். லோகோ நாம ஸங்கா²ரலோகோ தம்ஹி க³ஹேதப்³ப³தோ. ஸம்மப்பஞ்ஞாயாதி அவிபரீதபஞ்ஞாய யதா²பூ⁴தபஞ்ஞாய. தேனாஹ ‘‘ஸவிபஸ்ஸனா மக்³க³பஞ்ஞா’’தி. நிப்³ப³த்தேஸு த⁴ம்மேஸூதி யதா² பச்சயுப்பன்னேஸு ரூபாரூபத⁴ம்மேஸு. பஞ்ஞாயந்தே ஸ்வேவாதி ஸந்தானநிப³ந்த⁴னவஸேன பஞ்ஞாயமானேஸு ஏவ. யா நத்தீ²தி யா உச்சே²த³தி³ட்டி² தத்த² தத்தே²வ ஸத்தானங் உச்சி²ஜ்ஜனதோ வினஸ்ஸனதோ கோசி டி²தோ நாம ஸத்தோ த⁴ம்மோ வா நத்தீ²தி ஸங்கா²ரலோகே உப்பஜ்ஜெய்ய. ‘‘நத்தி² ஸத்தா ஓபபாதிகா’’தி பவத்தமானாபி மிச்சா²தி³ட்டி² ததா²பவத்தஸங்கா²ராரம்மணாவ. ஸா ந ஹோதீதி கம்மாவிஜ்ஜாதண்ஹாதி³பே⁴த³ங் பச்சயங் படிச்ச ஸங்கா²ரலோகஸ்ஸ ஸமுத³யனிப்³ப³த்திங் ஸம்மப்பஞ்ஞாய பஸ்ஸதோ, ஸா உச்சே²த³தி³ட்டி², ந ஹோதி, நப்பவத்ததி அவிச்சே²தே³ன ஸங்கா²ரானங் நிப்³ப³த்தித³ஸ்ஸனதோ. லோகனிரோத⁴ந்தி ஸங்கா²ரலோகஸ்ஸ க²ணிகனிரோத⁴ங். தேனாஹ ‘‘ஸங்கா²ரானங் ப⁴ங்க³’’ந்தி. யா அத்தீ²தி ஹேதுப²லஸம்ப³ந்தே⁴ன பவத்தமானஸ்ஸ ஸந்தானானுபச்சே²த³ஸ்ஸ ஏகத்தக்³க³ஹணேன ஸங்கா²ரலோகே யா ஸஸ்ஸததி³ட்டி² ஸப்³ப³காலங் லோகோ அத்தீ²தி உப்பஜ்ஜெய்ய. ஸா ந ஹோதீதி உப்பன்னுப்பன்னானங் நிரோத⁴ஸ்ஸ நவனவானஞ்ச உப்பாத³ஸ்ஸ த³ஸ்ஸனதோ, ஸா ஸஸ்ஸததி³ட்டி² ந ஹோதி.
15. Yasmā idha jānantāpi ‘‘sammādiṭṭhī’’ti vadanti ajānantāpi bāhirakāpi sāsanikāpi anussavādivasenapi attapaccakkhenapi, tasmā taṃ bahūnaṃ vacanaṃ upādāya āmeḍitavasena ‘‘sammādiṭṭhi sammādiṭṭhīti, bhante, vuccatī’’ti āha. Tathāniddiṭṭhatādassanatthaṃ hissa ayaṃ āmeḍitapayogo. Ayañhettha adhippāyo – ‘‘aparehipi sammādiṭṭhīti vuccati, sā panāyaṃ evaṃ vuccamānā atthañca lakkhaṇañca upādāya kittāvatā nu kho, bhante, sammādiṭṭhi hotī’’ti. Aṭṭhakathāyaṃ pana ‘‘sammādiṭṭhī’’ti vacane yasmā viññū eva pamāṇaṃ, na aviññū, tasmā ‘‘yaṃ paṇḍitā’’tiādi vuttaṃ. Dve avayavā assāti dvayaṃ, duvidhaṃ diṭṭhigāhavatthu, dvayaṃ diṭṭhigāhavasena nissito apassitoti dvayanissito. Tenāha ‘‘dve koṭṭhāse nissito’’ti. Yāya diṭṭhiyā ‘‘sabboyaṃ loko atthi vijjati sabbakālaṃ upalabbhatī’’ti diṭṭhigatiko gaṇhāti, sā diṭṭhi atthitā, sā eva sadā sabbakālaṃ loko atthīti pavattagāhatāya sassato, taṃ sassataṃ. Yāya diṭṭhiyā ‘‘sabboyaṃ loko natthi na hoti ucchijjatī’’ti diṭṭhigatiko gaṇhāti, sā diṭṭhi natthitā, sā eva ucchijjatīti uppannagāhatāya ucchedo, taṃ ucchedaṃ. Loko nāma saṅkhāraloko tamhi gahetabbato. Sammappaññāyāti aviparītapaññāya yathābhūtapaññāya. Tenāha ‘‘savipassanā maggapaññā’’ti. Nibbattesu dhammesūti yathā paccayuppannesu rūpārūpadhammesu. Paññāyante svevāti santānanibandhanavasena paññāyamānesu eva. Yā natthīti yā ucchedadiṭṭhi tattha tattheva sattānaṃ ucchijjanato vinassanato koci ṭhito nāma satto dhammo vā natthīti saṅkhāraloke uppajjeyya. ‘‘Natthi sattā opapātikā’’ti pavattamānāpi micchādiṭṭhi tathāpavattasaṅkhārārammaṇāva. Sā na hotīti kammāvijjātaṇhādibhedaṃ paccayaṃ paṭicca saṅkhāralokassa samudayanibbattiṃ sammappaññāya passato, sā ucchedadiṭṭhi, na hoti, nappavattati avicchedena saṅkhārānaṃ nibbattidassanato. Lokanirodhanti saṅkhāralokassa khaṇikanirodhaṃ. Tenāha ‘‘saṅkhārānaṃ bhaṅga’’nti. Yā atthīti hetuphalasambandhena pavattamānassa santānānupacchedassa ekattaggahaṇena saṅkhāraloke yā sassatadiṭṭhi sabbakālaṃ loko atthīti uppajjeyya. Sā na hotīti uppannuppannānaṃ nirodhassa navanavānañca uppādassa dassanato, sā sassatadiṭṭhi na hoti.
லோகோ ஸமுதே³தி ஏதஸ்மாதி லோகஸமுத³யோதி ஆஹ ‘‘அனுலோமபச்சயாகார’’ந்தி. பச்சயத⁴ம்மானஞ்ஹி அத்தனோ ப²லஸ்ஸ பச்சயபா⁴வோ அனுலோமபச்சயாகாரோ. படிலோமங் பச்சயாகாரந்தி ஆனெத்வா ஸம்ப³ந்தோ⁴. தங்தங்ஹேதுனிரோத⁴தோ தங்தங்ப²லனிரோதோ⁴ ஹி படிலோமபச்சயாகாரோ. யோ ஹி அவிஜ்ஜாதீ³னங் பச்சயத⁴ம்மானங் ஹேதுஆதி³பச்சயபா⁴வோ, ஸோ நிப்பரியாயதோ லோகஸமுத³யோ. பச்சயுப்பன்னஸ்ஸ ஸங்கா²ராதி³கஸ்ஸ. அனுச்சே²த³ங் பஸ்ஸதோதி அனுச்சே²த³த³ஸ்ஸனஸ்ஸ ஹேது. அயம்பீதி ந கேவலங் க²ணதோ உத³யவயனீஹரணனயோ, அத² கோ² பச்சயதோ உத³யவயனீஹரணனயோபி.
Loko samudeti etasmāti lokasamudayoti āha ‘‘anulomapaccayākāra’’nti. Paccayadhammānañhi attano phalassa paccayabhāvo anulomapaccayākāro. Paṭilomaṃ paccayākāranti ānetvā sambandho. Taṃtaṃhetunirodhato taṃtaṃphalanirodho hi paṭilomapaccayākāro. Yo hi avijjādīnaṃ paccayadhammānaṃ hetuādipaccayabhāvo, so nippariyāyato lokasamudayo. Paccayuppannassa saṅkhārādikassa. Anucchedaṃ passatoti anucchedadassanassa hetu. Ayampīti na kevalaṃ khaṇato udayavayanīharaṇanayo, atha kho paccayato udayavayanīharaṇanayopi.
உபக³மனட்டே²ன தண்ஹாவ உபயோ. ததா² தி³ட்டு²பயோ. ஏஸேவ நயோதி இமினா உபயேஹி உபாதா³னாதீ³னங் அனத்த²ந்தரதங் அதிதி³ஸதி. ததா² ச பன தேஸு து³வித⁴தா உபாதீ³யதி. நனு ச சத்தாரி உபாதா³னானி அஞ்ஞத்த² வுத்தானீதி? ஸச்சங் வுத்தானி, தானி ச கோ² அத்த²தோ த்³வே ஏவாதி இத⁴ ஏவங் வுத்தங். காமங் ‘‘அஹங் மம’’ந்தி அயதா²னுக்கமேன வுத்தங், யதா²னுக்கமங்யேவ பன அத்தோ² வேதி³தப்³போ³. ஆதி³-ஸத்³தே³ன பரோபரஸ்ஸ ஸுப⁴ங் அஸுப⁴ந்திஆதீ³னஞ்ச ஸங்க³ஹோ வேதி³தப்³போ³. தே த⁴ம்மேதி தேபூ⁴மகத⁴ம்மே. வினிவிஸந்தீதி விரூபங் நிவிஸந்தி, அபி⁴னிவிஸந்தீதி அத்தோ². தாஹீதி தண்ஹாதி³ட்டீ²ஹி. வினிப³த்³தோ⁴தி விரூபங் விமுச்சிதுங் வா அப்பதா³னவஸேன நியமெத்வா ப³த்³தோ⁴.
Upagamanaṭṭhena taṇhāva upayo. Tathā diṭṭhupayo. Eseva nayoti iminā upayehi upādānādīnaṃ anatthantarataṃ atidisati. Tathā ca pana tesu duvidhatā upādīyati. Nanu ca cattāri upādānāni aññattha vuttānīti? Saccaṃ vuttāni, tāni ca kho atthato dve evāti idha evaṃ vuttaṃ. Kāmaṃ ‘‘ahaṃ mama’’nti ayathānukkamena vuttaṃ, yathānukkamaṃyeva pana attho veditabbo. Ādi-saddena paroparassa subhaṃ asubhantiādīnañca saṅgaho veditabbo. Te dhammeti tebhūmakadhamme. Vinivisantīti virūpaṃ nivisanti, abhinivisantīti attho. Tāhīti taṇhādiṭṭhīhi. Vinibaddhoti virūpaṃ vimuccituṃ vā appadānavasena niyametvā baddho.
‘‘அபி⁴னிவேஸோ’’தி உபயுபாதா³னானங் பவத்திஆகாரவிஸேஸோ வுத்தோதி ஆஹ ‘‘தஞ்சாயந்தி தஞ்ச உபயுபாதா³ன’’ந்தி. சித்தஸ்ஸாதி அகுஸலசித்தஸ்ஸ. பதிட்டா²னபூ⁴தந்தி ஆதா⁴ரபூ⁴தங். தோ³ஸமோஹவஸேனபி அகுஸலசித்தப்பவத்தி தண்ஹாதி³ட்டா²பி⁴னிவேஸூபனிஸ்ஸயா ஏவாதி தண்ஹாதி³ட்டி²யோ அகுஸலஸ்ஸ சித்தஸ்ஸ அதி⁴ட்டா²னந்தி வுத்தா. தஸ்மிந்தி அகுஸலசித்தே. அபி⁴னிவிஸந்தீதி ‘‘ஏதங் மம, ஏஸோ மே அத்தா’’திஆதி³னா அபி⁴னிவேஸனங் பவத்தெந்தி. அனுஸெந்தீதி தா²மக³தா ஹுத்வா அப்பஹானபா⁴வேன அனுஸெந்தி. தது³ப⁴யந்தி தண்ஹாதி³ட்டி²த்³வயங். ந உபக³ச்ச²தீதி ‘‘ஏதங் மமா’’திஆதி³னா தண்ஹாதி³ட்டி²க³தியா ந உபஸங்கமதி ந அல்லீயதி. ந உபாதி³யதீதி ந த³ள்ஹக்³கா³ஹங் க³ண்ஹாதி. ந அதி⁴ட்டா²தீதி ந தண்ஹாதி³ட்டி²கா³ஹேன அதி⁴ட்டா²ய பவத்ததி. அத்தனியகா³ஹோ நாம ஸதி அத்தகா³ஹே ஹோதீதி வுத்தங் ‘‘அத்தா மே’’தி. இத³ங் து³க்க²க்³க³ஹணங் உபாதா³னக்க²ந்தா⁴பஸ்ஸயங் தப்³பி³னிமுத்தஸ்ஸ து³க்க²ஸ்ஸ அபா⁴வாதி வுத்தங் ‘‘து³க்க²மேவாதி பஞ்சுபாதா³னக்க²ந்த⁴மத்தமேவா’’தி. ‘‘ஸங்கி²த்தேன பஞ்சுபாதா³னக்க²ந்தா⁴ து³க்கா²’’தி (தீ³॰ நி॰ 2.387; ம॰ நி॰ 1.120; 3.373; விப⁴॰ 190) ஹி வுத்தங். கங்க²ங் ந கரோதீதி ஸங்ஸயங் ந உப்பாதே³தி ஸப்³ப³ஸோ விசிகிச்சா²ய ஸமுச்சி²ந்த³னதோ.
‘‘Abhiniveso’’ti upayupādānānaṃ pavattiākāraviseso vuttoti āha ‘‘tañcāyanti tañca upayupādāna’’nti. Cittassāti akusalacittassa. Patiṭṭhānabhūtanti ādhārabhūtaṃ. Dosamohavasenapi akusalacittappavatti taṇhādiṭṭhābhinivesūpanissayā evāti taṇhādiṭṭhiyo akusalassa cittassa adhiṭṭhānanti vuttā. Tasminti akusalacitte. Abhinivisantīti ‘‘etaṃ mama, eso me attā’’tiādinā abhinivesanaṃ pavattenti. Anusentīti thāmagatā hutvā appahānabhāvena anusenti. Tadubhayanti taṇhādiṭṭhidvayaṃ. Na upagacchatīti ‘‘etaṃ mamā’’tiādinā taṇhādiṭṭhigatiyā na upasaṅkamati na allīyati. Na upādiyatīti na daḷhaggāhaṃ gaṇhāti. Na adhiṭṭhātīti na taṇhādiṭṭhigāhena adhiṭṭhāya pavattati. Attaniyagāho nāma sati attagāhe hotīti vuttaṃ ‘‘attā me’’ti. Idaṃ dukkhaggahaṇaṃ upādānakkhandhāpassayaṃ tabbinimuttassa dukkhassa abhāvāti vuttaṃ ‘‘dukkhamevāti pañcupādānakkhandhamattamevā’’ti. ‘‘Saṃkhittena pañcupādānakkhandhā dukkhā’’ti (dī. ni. 2.387; ma. ni. 1.120; 3.373; vibha. 190) hi vuttaṃ. Kaṅkhaṃ na karotīti saṃsayaṃ na uppādeti sabbaso vicikicchāya samucchindanato.
ந பரப்பச்சயேனாதி பரஸ்ஸ அஸத்³த³ஹனேன. மிஸ்ஸகஸம்மாதி³ட்டி²ங் ஆஹாதி நாமரூபபரிச்சே²த³தோ பட்டா²ய ஸம்மாதி³ட்டி²யா வுத்தத்தா லோகியலோகுத்தரமிஸ்ஸகங் ஸம்மாதி³ட்டி²ங் அவோச. நிகூடந்தோதி நிஹீனந்தோ. நிஹீனபரியாயோ ஹி அயங் நிகூட-ஸத்³தோ³. தேனாஹ ‘‘லாமகந்தோ’’தி. பட²மகந்தி ச க³ரஹாயங் க-ஸத்³தோ³. ஸப்³ப³ங் நத்தீ²தி யதா²ஸங்க²தங் ப⁴ங்கு³ப்பத்தியா நத்தி² ஏவ, ஸப்³ப³ங் நத்தி² உச்சி²ஜ்ஜதி வினஸ்ஸதீதி அதி⁴ப்பாயோ. ஸப்³ப³மத்தீ²தி ச யதா² அஸங்க²தங் அத்தி² விஜ்ஜதி, ஸப்³ப³காலங் உபலப்³ப⁴தீதி அதி⁴ப்பாயோ. ஸப்³ப³ந்தி செத்த² ஸக்காயஸப்³ப³ங் வேதி³தப்³ப³ங் ‘‘ஸப்³ப³த⁴ம்மமூலபரியாய’’ந்திஆதீ³ஸு (ம॰ நி॰ 1.1) விய. தஞ்ஹி பரிஞ்ஞாஞாணானங் பச்சயபூ⁴தங். இதி-ஸத்³தோ³ நித³ஸ்ஸனே. கிங் நித³ஸ்ஸேதி? அத்தி²-ஸத்³தே³ன வுத்தங். ‘‘அத்தி²த’’ந்தி நிச்சதங். ஸஸ்ஸதக்³கா³ஹோ ஹி இத⁴ பட²மோ அந்தோதி அதி⁴ப்பேதோ. உச்சே²த³க்³கா³ஹோ து³தியோதி தது³ப⁴யவினிமுத்தா ச இத³ப்பச்சயதா. எத்த² ச உப்பன்னநிரோத⁴கத²னதோ ஸஸ்ஸததங், நிருஜ்ஜ²ந்தானங் அஸதி நிப்³பா³னப்பத்தியங் யதா²பச்சயங் புனூபக³மனகத²னதோ உச்சே²த³தஞ்ச அனுபக³ம்ம மஜ்ஜி²மேன ப⁴க³வா த⁴ம்மங் தே³ஸேதி இத³ப்பச்சயதானயேன. தேன வுத்தங் ‘‘ஏதே…பே॰… அந்தே’’திஆதி³.
Na parappaccayenāti parassa asaddahanena. Missakasammādiṭṭhiṃ āhāti nāmarūpaparicchedato paṭṭhāya sammādiṭṭhiyā vuttattā lokiyalokuttaramissakaṃ sammādiṭṭhiṃ avoca. Nikūṭantoti nihīnanto. Nihīnapariyāyo hi ayaṃ nikūṭa-saddo. Tenāha ‘‘lāmakanto’’ti. Paṭhamakanti ca garahāyaṃ ka-saddo. Sabbaṃ natthīti yathāsaṅkhataṃ bhaṅguppattiyā natthi eva, sabbaṃ natthi ucchijjati vinassatīti adhippāyo. Sabbamatthīti ca yathā asaṅkhataṃ atthi vijjati, sabbakālaṃ upalabbhatīti adhippāyo. Sabbanti cettha sakkāyasabbaṃ veditabbaṃ ‘‘sabbadhammamūlapariyāya’’ntiādīsu (ma. ni. 1.1) viya. Tañhi pariññāñāṇānaṃ paccayabhūtaṃ. Iti-saddo nidassane. Kiṃ nidasseti? Atthi-saddena vuttaṃ. ‘‘Atthita’’nti niccataṃ. Sassataggāho hi idha paṭhamo antoti adhippeto. Ucchedaggāho dutiyoti tadubhayavinimuttā ca idappaccayatā. Ettha ca uppannanirodhakathanato sassatataṃ, nirujjhantānaṃ asati nibbānappattiyaṃ yathāpaccayaṃ punūpagamanakathanato ucchedatañca anupagamma majjhimena bhagavā dhammaṃ deseti idappaccayatānayena. Tena vuttaṃ ‘‘ete…pe… ante’’tiādi.
கச்சானகொ³த்தஸுத்தவண்ணனா நிட்டி²தா.
Kaccānagottasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. கச்சானகொ³த்தஸுத்தங் • 5. Kaccānagottasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. கச்சானகொ³த்தஸுத்தவண்ணனா • 5. Kaccānagottasuttavaṇṇanā
