| Library / Tipiṭaka / திபிடக • Tipiṭaka / ஜாதகபாளி • Jātakapāḷi |
8. அட்ட²கனிபாதோ
8. Aṭṭhakanipāto
417. கச்சானிஜாதகங் (1)
417. Kaccānijātakaṃ (1)
1.
1.
ஓதா³தவத்தா² ஸுசி அல்லகேஸா, கச்சானி கிங் கும்பி⁴மதி⁴ஸ்ஸயித்வா 1;
Odātavatthā suci allakesā, kaccāni kiṃ kumbhimadhissayitvā 2;
பிட்டா² திலா தோ⁴வஸி தண்டு³லானி, திலோத³னோ ஹேஹிதி கிஸ்ஸ ஹேது.
Piṭṭhā tilā dhovasi taṇḍulāni, tilodano hehiti kissa hetu.
2.
2.
ந கோ² அயங் ப்³ராஹ்மண போ⁴ஜனத்தா² 3, திலோத³னோ ஹேஹிதி ஸாது⁴பக்கோ;
Na kho ayaṃ brāhmaṇa bhojanatthā 4, tilodano hehiti sādhupakko;
த⁴ம்மோ மதோ தஸ்ஸ பஹுத்தமஜ்ஜ 5, அஹங் கரிஸ்ஸாமி ஸுஸானமஜ்ஜே².
Dhammo mato tassa pahuttamajja 6, ahaṃ karissāmi susānamajjhe.
3.
3.
அனுவிச்ச கச்சானி கரோஹி கிச்சங், த⁴ம்மோ மதோ கோ நு தவேவ 7 ஸங்ஸி;
Anuvicca kaccāni karohi kiccaṃ, dhammo mato ko nu taveva 8 saṃsi;
ஸஹஸ்ஸனெத்தோ அதுலானுபா⁴வோ, ந மிய்யதீ த⁴ம்மவரோ கதா³சி.
Sahassanetto atulānubhāvo, na miyyatī dhammavaro kadāci.
4.
4.
த³ள்ஹப்பமாணங் மம எத்த² ப்³ரஹ்மே, த⁴ம்மோ மதோ நத்தி² மமெத்த² கங்கா²;
Daḷhappamāṇaṃ mama ettha brahme, dhammo mato natthi mamettha kaṅkhā;
யே யேவ தா³னி பாபா ப⁴வந்தி, தே தேவ தா³னி ஸுகி²தா ப⁴வந்தி.
Ye yeva dāni pāpā bhavanti, te teva dāni sukhitā bhavanti.
5.
5.
ஸுணிஸா ஹி மய்ஹங் வஞ்ஜா² அஹோஸி, ஸா மங் வதி⁴த்வான விஜாயி புத்தங்;
Suṇisā hi mayhaṃ vañjhā ahosi, sā maṃ vadhitvāna vijāyi puttaṃ;
ஸா தா³னி ஸப்³ப³ஸ்ஸ குலஸ்ஸ இஸ்ஸரா, அஹங் பனம்ஹி 9 அபவித்³தா⁴ ஏகிகா.
Sā dāni sabbassa kulassa issarā, ahaṃ panamhi 10 apaviddhā ekikā.
6.
6.
ஜீவாமி வோஹங் ந மதோஹமஸ்மி 11, தவேவ அத்தா²ய இதா⁴க³தொஸ்மி;
Jīvāmi vohaṃ na matohamasmi 12, taveva atthāya idhāgatosmi;
யா தங் வதி⁴த்வான விஜாயி புத்தங், ஸஹாவ புத்தேன கரோமி ப⁴ஸ்மங்.
Yā taṃ vadhitvāna vijāyi puttaṃ, sahāva puttena karomi bhasmaṃ.
7.
7.
ஏவஞ்ச 13 தே ருச்சதி தே³வராஜ, மமேவ அத்தா²ய இதா⁴க³தோஸி;
Evañca 14 te ruccati devarāja, mameva atthāya idhāgatosi;
அஹஞ்ச புத்தோ ஸுணிஸா ச நத்தா, ஸம்மோத³மானா க⁴ரமாவஸேம.
Ahañca putto suṇisā ca nattā, sammodamānā gharamāvasema.
8.
8.
ஏவஞ்ச தே ருச்சதி காதியானி, ஹதாபி ஸந்தா ந ஜஹாஸி த⁴ம்மங்;
Evañca te ruccati kātiyāni, hatāpi santā na jahāsi dhammaṃ;
துவஞ்ச 15 புத்தோ ஸுணிஸா ச நத்தா, ஸம்மோத³மானா க⁴ரமாவஸேத².
Tuvañca 16 putto suṇisā ca nattā, sammodamānā gharamāvasetha.
9.
9.
ஸா காதியானீ ஸுணிஸாய ஸத்³தி⁴ங், ஸம்மோத³மானா க⁴ரமாவஸித்த²;
Sā kātiyānī suṇisāya saddhiṃ, sammodamānā gharamāvasittha;
புத்தோ ச நத்தா ச உபட்ட²ஹிங்ஸு, தே³வானமிந்தே³ன அதி⁴க்³க³ஹீதாதி.
Putto ca nattā ca upaṭṭhahiṃsu, devānamindena adhiggahītāti.
கச்சானிஜாதகங் பட²மங்.
Kaccānijātakaṃ paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / ஜாதக-அட்ட²கதா² • Jātaka-aṭṭhakathā / [417] 1. கச்சானிஜாதகவண்ணனா • [417] 1. Kaccānijātakavaṇṇanā
