| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
மூலபண்ணாஸ-அட்ட²கதா²
Mūlapaṇṇāsa-aṭṭhakathā
(து³தியோ பா⁴கோ³)
(Dutiyo bhāgo)
3. ஓபம்மவக்³கோ³
3. Opammavaggo
1. ககசூபமஸுத்தவண்ணனா
1. Kakacūpamasuttavaṇṇanā
222. ஏவங் மே ஸுதந்தி ககசூபமஸுத்தங். தத்த² மோளியப²க்³கு³னோதி மோளீதி சூளா வுச்சதி. யதா²ஹ –
222.Evaṃme sutanti kakacūpamasuttaṃ. Tattha moḷiyaphaggunoti moḷīti cūḷā vuccati. Yathāha –
‘‘செ²த்வான மோளிங் வரக³ந்த⁴வாஸிதங்,
‘‘Chetvāna moḷiṃ varagandhavāsitaṃ,
வேஹாயஸங் உக்கி²பி ஸக்யபுங்க³வோ;
Vehāyasaṃ ukkhipi sakyapuṅgavo;
ரதனசங்கோடவரேன வாஸவோ,
Ratanacaṅkoṭavarena vāsavo,
ஸஹஸ்ஸனெத்தோ ஸிரஸா படிக்³க³ஹீ’’தி.
Sahassanetto sirasā paṭiggahī’’ti.
ஸா தஸ்ஸ கி³ஹிகாலே மஹதீ அஹோஸி, தேனஸ்ஸ மோளியப²க்³கு³னோதி ஸங்கா² உத³பாதி³. பப்³ப³ஜிதம்பி நங் தேனேவ நாமேன ஸஞ்ஜானந்தி. அதிவேலந்தி வேலங் அதிக்கமித்வா. தத்த² காலவேலா, ஸீமவேலா, ஸீலவேலாதி திவிதா⁴ வேலா. ‘‘தாயங் வேலாயங் இமங் உதா³னங் உதா³னேஸீ’’தி (த⁴ம்மபதே³ வக்³கா³னமுத்³தா³னங், கா³தா²னமுத்³தா³னங்; மஹாவ॰ 1-3) அயங் காலவேலா நாம. ‘‘டி²தத⁴ம்மோ வேலங் நாதிவத்ததீ’’தி (சூளவ॰ 384; உதா³॰ 45; அ॰ நி॰ 8.19) அயங் ஸீமவேலா நாம. ‘‘வேலாஅனதிக்கமோ ஸேதுகா⁴தோ’’தி (த⁴॰ ஸ॰ 299-301) ச, ‘‘வேலா சேஸா அவீதிக்கமனட்டே²னா’’தி ச, அயங் ஸீலவேலா நாம. தங் திவித⁴ம்பி ஸோ அதிக்கமியேவ. பி⁴க்கு²னியோ ஹி ஓவதி³துங் காலோ நாம அத்தி², ஸோ அத்த²ங்க³தேபி ஸூரியே ஓவத³ந்தோ தங் காலவேலம்பி அதிக்கமி. பி⁴க்கு²னீனங் ஓவாதே³ பமாணங் நாம அத்தி² ஸீமா மரியாதா³. ஸோ உத்தரிச²ப்பஞ்சவாசாஹி ஓவத³ந்தோ தங் ஸீமவேலம்பி அதிக்கமி. கதெ²ந்தோ பன த³வஸஹக³தங் கத்வா து³ட்டு²ல்லாபத்திபஹோனகங் கதே²தி, ஏவங் ஸீலவேலம்பி அதிக்கமி.
Sā tassa gihikāle mahatī ahosi, tenassa moḷiyaphaggunoti saṅkhā udapādi. Pabbajitampi naṃ teneva nāmena sañjānanti. Ativelanti velaṃ atikkamitvā. Tattha kālavelā, sīmavelā, sīlavelāti tividhā velā. ‘‘Tāyaṃ velāyaṃ imaṃ udānaṃ udānesī’’ti (dhammapade vaggānamuddānaṃ, gāthānamuddānaṃ; mahāva. 1-3) ayaṃ kālavelā nāma. ‘‘Ṭhitadhammo velaṃ nātivattatī’’ti (cūḷava. 384; udā. 45; a. ni. 8.19) ayaṃ sīmavelā nāma. ‘‘Velāanatikkamo setughāto’’ti (dha. sa. 299-301) ca, ‘‘velā cesā avītikkamanaṭṭhenā’’ti ca, ayaṃ sīlavelā nāma. Taṃ tividhampi so atikkamiyeva. Bhikkhuniyo hi ovadituṃ kālo nāma atthi, so atthaṅgatepi sūriye ovadanto taṃ kālavelampi atikkami. Bhikkhunīnaṃ ovāde pamāṇaṃ nāma atthi sīmā mariyādā. So uttarichappañcavācāhi ovadanto taṃ sīmavelampi atikkami. Kathento pana davasahagataṃ katvā duṭṭhullāpattipahonakaṃ katheti, evaṃ sīlavelampi atikkami.
ஸங்ஸட்டோ²தி மிஸ்ஸீபூ⁴தோ ஸமானஸுக²து³க்கோ² ஹுத்வா. ஸம்முகா²தி புரதோ. அவண்ணங் பா⁴ஸதீதி தா பன பசனகொட்டனாதீ³னி கரொந்தியோ தி³ஸ்வா நத்தி² இமாஸங் அனாபத்தி நாம, இமா பி⁴க்கு²னியோ அனாசாரா து³ப்³ப³சா பக³ப்³பா⁴தி அகு³ணங் கதே²தி. அதி⁴கரணம்பி கரோதீதி இமேஸங் பி⁴க்கூ²னங் இமா பி⁴க்கு²னியோ தி³ட்ட²காலதோ பட்டா²ய அக்கீ²னி த³ய்ஹந்தி, இமஸ்மிங் விஹாரே புப்ப²பூஜா வா ஆஸனதோ⁴வனபரிப⁴ண்ட³கரணாதீ³னி வா இமாஸங் வஸேன வத்தந்தி. குலதீ⁴தரோ ஏதா லஜ்ஜினியோ , தும்ஹே இமா இத³ஞ்சித³ஞ்ச வத³த², அயங் நாம தும்ஹாகங் ஆபத்தி ஹோதி, வினயத⁴ரானங் ஸந்திகங் ஆக³ந்த்வா வினிச்ச²யங் மே தே³தா²தி அதி⁴கரணங் ஆகட்³ட⁴தி.
Saṃsaṭṭhoti missībhūto samānasukhadukkho hutvā. Sammukhāti purato. Avaṇṇaṃ bhāsatīti tā pana pacanakoṭṭanādīni karontiyo disvā natthi imāsaṃ anāpatti nāma, imā bhikkhuniyo anācārā dubbacā pagabbhāti aguṇaṃ katheti. Adhikaraṇampi karotīti imesaṃ bhikkhūnaṃ imā bhikkhuniyo diṭṭhakālato paṭṭhāya akkhīni dayhanti, imasmiṃ vihāre pupphapūjā vā āsanadhovanaparibhaṇḍakaraṇādīni vā imāsaṃ vasena vattanti. Kuladhītaro etā lajjiniyo , tumhe imā idañcidañca vadatha, ayaṃ nāma tumhākaṃ āpatti hoti, vinayadharānaṃ santikaṃ āgantvā vinicchayaṃ me dethāti adhikaraṇaṃ ākaḍḍhati.
மோளியப²க்³கு³னஸ்ஸ அவண்ணங் பா⁴ஸதீதி நத்தி² இமஸ்ஸ பி⁴க்கு²னோ அனாபத்தி நாம. நிச்சகாலங் இமஸ்ஸ பரிவேணத்³வாரங் அஸுஞ்ஞங் பி⁴க்கு²னீஹீதி அகு³ணங் கதே²தி. அதி⁴கரணம்பி கரொந்தீதி இமேஸங் பி⁴க்கூ²னங் மோளியப²க்³கு³னத்தே²ரஸ்ஸ தி³ட்ட²காலதோ பட்டா²ய அக்கீ²னி த³ய்ஹந்தி. இமஸ்மிங் விஹாரே அஞ்ஞேஸங் வஸனட்டா²னங் ஓலோகேதும்பி ந ஸக்கா. விஹாரங் ஆக³தபி⁴க்கு²னியோ ஓவாத³ங் வா படிஸந்தா²ரங் வா உத்³தே³ஸபத³ங் வா தே²ரமேவ நிஸ்ஸாய லப⁴ந்தி, குலபுத்தகோ லஜ்ஜீ குக்குச்சகோ, ஏவரூபங் நாம தும்ஹே இத³ஞ்சித³ஞ்ச வத³த², ஏத² வினயத⁴ரானங் ஸந்திகே வினிச்ச²யங் தே³தா²தி அதி⁴கரணங் ஆகட்³ட⁴ந்தி.
Moḷiyaphaggunassa avaṇṇaṃ bhāsatīti natthi imassa bhikkhuno anāpatti nāma. Niccakālaṃ imassa pariveṇadvāraṃ asuññaṃ bhikkhunīhīti aguṇaṃ katheti. Adhikaraṇampi karontīti imesaṃ bhikkhūnaṃ moḷiyaphaggunattherassa diṭṭhakālato paṭṭhāya akkhīni dayhanti. Imasmiṃ vihāre aññesaṃ vasanaṭṭhānaṃ oloketumpi na sakkā. Vihāraṃ āgatabhikkhuniyo ovādaṃ vā paṭisanthāraṃ vā uddesapadaṃ vā therameva nissāya labhanti, kulaputtako lajjī kukkuccako, evarūpaṃ nāma tumhe idañcidañca vadatha, etha vinayadharānaṃ santike vinicchayaṃ dethāti adhikaraṇaṃ ākaḍḍhanti.
ஸோ பி⁴க்கு² ப⁴க³வந்தங் ஏதத³வோசாதி நேவ பியகம்யதாய ந பே⁴தா³தி⁴ப்பாயேன, அத்த²காமதாய அவோச. ஏகங் கிரஸ்ஸ அஹோஸி – ‘‘இமஸ்ஸ பி⁴க்கு²ஸ்ஸ ஏவங் ஸங்ஸட்ட²ஸ்ஸ விஹரதோ அயஸோ உப்பஜ்ஜிஸ்ஸதி. ஸோ ஸாஸனஸ்ஸாபி அவண்ணோயேவ. அஞ்ஞேன பன கதி²தோ அயங் ந ஓரமிஸ்ஸதி, ப⁴க³வதா த⁴ம்மங் தே³ஸெத்வா ஓவதி³தோ ஓரமிஸ்ஸதீ’’தி தஸ்ஸ அத்த²காமதாய ப⁴க³வந்தங் ஏதங், ‘‘ஆயஸ்மா, ப⁴ந்தே’’திஆதி³வசனங் அவோச.
Sobhikkhu bhagavantaṃ etadavocāti neva piyakamyatāya na bhedādhippāyena, atthakāmatāya avoca. Ekaṃ kirassa ahosi – ‘‘imassa bhikkhussa evaṃ saṃsaṭṭhassa viharato ayaso uppajjissati. So sāsanassāpi avaṇṇoyeva. Aññena pana kathito ayaṃ na oramissati, bhagavatā dhammaṃ desetvā ovadito oramissatī’’ti tassa atthakāmatāya bhagavantaṃ etaṃ, ‘‘āyasmā, bhante’’tiādivacanaṃ avoca.
223. ஆமந்தேஹீதி ஜானாபேஹி. ஆமந்தேதீதி பக்கோஸதி.
223.Āmantehīti jānāpehi. Āmantetīti pakkosati.
224. ஸத்³தா⁴தி ஸத்³தா⁴ய. தஸ்மாதி யஸ்மா த்வங் குலபுத்தோ சேவ ஸத்³தா⁴பப்³ப³ஜிதோ ச, யஸ்மா வா தே ஏதாஹி ஸத்³தி⁴ங் ஸங்ஸட்ட²ஸ்ஸ விஹரதோ யே தா அக்கோஸிஸ்ஸந்தி வா, பஹரிஸ்ஸந்தி வா, தேஸு தோ³மனஸ்ஸங் உப்பஜ்ஜிஸ்ஸதி, ஸங்ஸக்³கே³ பஹீனே நுப்பஜ்ஜிஸ்ஸதி, தஸ்மா. தத்ராதி தஸ்மிங் அவண்ணபா⁴ஸனே. கே³ஹஸிதாதி பஞ்சகாமகு³ணனிஸ்ஸிதா. ச²ந்தா³தி தண்ஹாச²ந்தா³பி படிக⁴ச²ந்தா³பி. விபரிணதந்தி ரத்தம்பி சித்தங் விபரிணதங். து³ட்ட²ம்பி, மூள்ஹம்பி சித்தங் விபரிணதங். இத⁴ பன தண்ஹாச²ந்த³வஸேன ரத்தம்பி வட்டதி, படிக⁴ச²ந்த³வஸேன து³ட்ட²ம்பி வட்டதி. ஹிதானுகம்பீதி ஹிதேன அனுகம்பமானோ ஹிதேன ப²ரமானோ. ந தோ³ஸந்தரோதி ந தோ³ஸசித்தோ ப⁴விஸ்ஸாமி.
224.Saddhāti saddhāya. Tasmāti yasmā tvaṃ kulaputto ceva saddhāpabbajito ca, yasmā vā te etāhi saddhiṃ saṃsaṭṭhassa viharato ye tā akkosissanti vā, paharissanti vā, tesu domanassaṃ uppajjissati, saṃsagge pahīne nuppajjissati, tasmā. Tatrāti tasmiṃ avaṇṇabhāsane. Gehasitāti pañcakāmaguṇanissitā. Chandāti taṇhāchandāpi paṭighachandāpi. Vipariṇatanti rattampi cittaṃ vipariṇataṃ. Duṭṭhampi, mūḷhampi cittaṃ vipariṇataṃ. Idha pana taṇhāchandavasena rattampi vaṭṭati, paṭighachandavasena duṭṭhampi vaṭṭati. Hitānukampīti hitena anukampamāno hitena pharamāno. Na dosantaroti na dosacitto bhavissāmi.
225. அத² கோ² ப⁴க³வாதி கஸ்மா ஆரபி⁴? ப²க்³கு³னஸ்ஸ கிர எத்தகங் ஓவாத³ங் ஸுத்வாபி, ‘‘பி⁴க்கு²னிஸங்ஸக்³க³தோ ஓரமிஸ்ஸாமி விரமிஸ்ஸாமீ’’தி சித்தம்பி ந உப்பன்னங், ப⁴க³வதா பன ஸத்³தி⁴ங் படாணீ விய படிவிருத்³தோ⁴ அட்டா²ஸி, அத²ஸ்ஸ ப⁴க³வதோ யதா² நாம ஜிக⁴ச்சி²தஸ்ஸ போ⁴ஜனே, பிபாஸிதஸ்ஸ பானீயே, ஸீதேன பு²ட்ட²ஸ்ஸ உண்ஹே து³க்கி²தஸ்ஸ ஸுகே² பத்த²னா உப்பஜ்ஜதி. ஏவமேவ இமங் து³ப்³ப³சங் பி⁴க்கு²ங் தி³ஸ்வா பட²மபோ³தி⁴யங் ஸுப்³ப³சா பி⁴க்கூ² ஆபாத²ங் ஆக³மிங்ஸு. அத² தேஸங் வண்ணங் கதே²துகாமோ ஹுத்வா இமங் தே³ஸனங் ஆரபி⁴.
225.Atha kho bhagavāti kasmā ārabhi? Phaggunassa kira ettakaṃ ovādaṃ sutvāpi, ‘‘bhikkhunisaṃsaggato oramissāmi viramissāmī’’ti cittampi na uppannaṃ, bhagavatā pana saddhiṃ paṭāṇī viya paṭiviruddho aṭṭhāsi, athassa bhagavato yathā nāma jighacchitassa bhojane, pipāsitassa pānīye, sītena phuṭṭhassa uṇhe dukkhitassa sukhe patthanā uppajjati. Evameva imaṃ dubbacaṃ bhikkhuṃ disvā paṭhamabodhiyaṃ subbacā bhikkhū āpāthaṃ āgamiṃsu. Atha tesaṃ vaṇṇaṃ kathetukāmo hutvā imaṃ desanaṃ ārabhi.
தத்த² ஆராத⁴யிங்ஸூதி க³ண்ஹிங்ஸு பூரயிங்ஸு. ஏகங் ஸமயந்தி ஏகஸ்மிங் ஸமயே. ஏகாஸனபோ⁴ஜனந்தி ஏகங் புரேப⁴த்தபோ⁴ஜனங். ஸூரியுக்³க³மனதோ ஹி யாவ மஜ்ஜ²ன்ஹிகா ஸத்தக்க²த்துங் பு⁴த்தபோ⁴ஜனம்பி இத⁴ ஏகாஸனபோ⁴ஜனந்தேவ அதி⁴ப்பேதங். அப்பாபா³த⁴தந்தி நிராபா³த⁴தங். அப்பாதங்கதந்தி நித்³து³க்க²தங். லஹுட்டா²னந்தி ஸரீரஸ்ஸ ஸல்லஹுகங் உட்டா²னங். ப³லந்தி காயப³லங். பா²ஸுவிஹாரந்தி காயஸ்ஸ ஸுக²விஹாரங். இமினா கிங் கதி²தங்? தி³வா விகாலபோ⁴ஜனங் பஜஹாபிதகாலோ கதி²தோ. ப⁴த்³தா³லிஸுத்தே பன ரத்திங் விகாலபோ⁴ஜனங் பஜஹாபிதகாலோ கதி²தோ. இமானி ஹி த்³வே போ⁴ஜனானி ப⁴க³வா ந ஏகப்பஹாரேன பஜஹாபேஸி. கஸ்மா? இமானேவ ஹி த்³வே போ⁴ஜனானி வட்டே ஸத்தானங் ஆசிண்ணானி. ஸந்தி குலபுத்தா ஸுகு²மாலா, தே ஏகதோ த்³வேபி போ⁴ஜனானி பஜஹந்தா கிலமந்தி. தஸ்மா ஏகதோ அபஜஹாபெத்வா ஏகஸ்மிங் காலே தி³வா விகாலபோ⁴ஜனங், ஏகஸ்மிங் ரத்திங் விகாலபோ⁴ஜனந்தி விஸுங் பஜஹாபேஸி. தேஸு இத⁴ தி³வா விகாலபோ⁴ஜனங் பஜஹாபிதகாலோ கதி²தோ. தத்த² யஸ்மா பு³த்³தா⁴ ந ப⁴யங் த³ஸ்ஸெத்வா தஜ்ஜெத்வா பஜஹாபெந்தி, ஆனிஸங்ஸங் பன த³ஸ்ஸெத்வா பஜஹாபெந்தி, ஏவஞ்ஹி ஸத்தா ஸுகே²ன பஜஹந்தி. தஸ்மா ஆனிஸங்ஸங் த³ஸ்ஸெந்தோ இமே பஞ்ச கு³ணே த³ஸ்ஸேஸி. அனுஸாஸனீ கரணீயாதி புனப்புனங் ஸாஸனே கத்தப்³ப³ங் நாஹோஸி. ‘‘இத³ங் கரோத², இத³ங் மா கரோதா²’’தி ஸதுப்பாத³கரணீயமத்தமேவ அஹோஸி. தாவத்தகேனேவ தே கத்தப்³ப³ங் அகங்ஸு, பஹாதப்³ப³ங் பஜஹிங்ஸு, பட²மபோ³தி⁴யங், பி⁴க்க²வே, ஸுப்³ப³சா பி⁴க்கூ² அஹேஸுங் அஸ்ஸவா ஓவாத³படிகராதி.
Tattha ārādhayiṃsūti gaṇhiṃsu pūrayiṃsu. Ekaṃ samayanti ekasmiṃ samaye. Ekāsanabhojananti ekaṃ purebhattabhojanaṃ. Sūriyuggamanato hi yāva majjhanhikā sattakkhattuṃ bhuttabhojanampi idha ekāsanabhojananteva adhippetaṃ. Appābādhatanti nirābādhataṃ. Appātaṅkatanti niddukkhataṃ. Lahuṭṭhānanti sarīrassa sallahukaṃ uṭṭhānaṃ. Balanti kāyabalaṃ. Phāsuvihāranti kāyassa sukhavihāraṃ. Iminā kiṃ kathitaṃ? Divā vikālabhojanaṃ pajahāpitakālo kathito. Bhaddālisutte pana rattiṃ vikālabhojanaṃ pajahāpitakālo kathito. Imāni hi dve bhojanāni bhagavā na ekappahārena pajahāpesi. Kasmā? Imāneva hi dve bhojanāni vaṭṭe sattānaṃ āciṇṇāni. Santi kulaputtā sukhumālā, te ekato dvepi bhojanāni pajahantā kilamanti. Tasmā ekato apajahāpetvā ekasmiṃ kāle divā vikālabhojanaṃ, ekasmiṃ rattiṃ vikālabhojananti visuṃ pajahāpesi. Tesu idha divā vikālabhojanaṃ pajahāpitakālo kathito. Tattha yasmā buddhā na bhayaṃ dassetvā tajjetvā pajahāpenti, ānisaṃsaṃ pana dassetvā pajahāpenti, evañhi sattā sukhena pajahanti. Tasmā ānisaṃsaṃ dassento ime pañca guṇe dassesi. Anusāsanī karaṇīyāti punappunaṃ sāsane kattabbaṃ nāhosi. ‘‘Idaṃ karotha, idaṃ mā karothā’’ti satuppādakaraṇīyamattameva ahosi. Tāvattakeneva te kattabbaṃ akaṃsu, pahātabbaṃ pajahiṃsu, paṭhamabodhiyaṃ, bhikkhave, subbacā bhikkhū ahesuṃ assavā ovādapaṭikarāti.
இதா³னி நேஸங் ஸுப்³ப³சபா⁴வதீ³பிகங் உபமங் ஆஹரந்தோ ஸெய்யதா²பீதிஆதி³மாஹ. தத்த² ஸுபூ⁴மியந்தி ஸமபூ⁴மியங். ‘‘ஸுபூ⁴ம்யங் ஸுகெ²த்தே விஹதகா²ணுகே பீ³ஜானி பதிட்ட²பெய்யா’’தி (தீ³॰ நி॰ 2.438) எத்த² பன மண்ட³பூ⁴மி ஸுபூ⁴மீதி ஆக³தா. சதுமஹாபதே²தி த்³வின்னங் மஹாமக்³கா³னங் வினிவிஜ்ஜி²த்வா க³தட்டா²னே. ஆஜஞ்ஞரதோ²தி வினீதஅஸ்ஸரதோ². ஓத⁴ஸ்தபதோதோ³தி யதா² ரத²ங் அபி⁴ருஹித்வா டி²தேன ஸக்கா ஹோதி க³ண்ஹிதுங், ஏவங் ஆலம்ப³னங் நிஸ்ஸாய திரியதோ ட²பிதபதோதோ³. யொக்³கா³சரியோதி அஸ்ஸாசரியோ. ஸ்வேவ அஸ்ஸத³ம்மே ஸாரேதீதி அஸ்ஸத³ம்மஸாரதி². யேனிச்ச²கந்தி யேன யேன மக்³கே³ன இச்ச²தி. யதி³ச்ச²கந்தி யங் யங் க³திங் இச்ச²தி. ஸாரெய்யாதி உஜுகங் புரதோ பேஸெய்ய. பச்சாஸாரெய்யாதி படினிவத்தெய்ய.
Idāni nesaṃ subbacabhāvadīpikaṃ upamaṃ āharanto seyyathāpītiādimāha. Tattha subhūmiyanti samabhūmiyaṃ. ‘‘Subhūmyaṃ sukhette vihatakhāṇuke bījāni patiṭṭhapeyyā’’ti (dī. ni. 2.438) ettha pana maṇḍabhūmi subhūmīti āgatā. Catumahāpatheti dvinnaṃ mahāmaggānaṃ vinivijjhitvā gataṭṭhāne. Ājaññarathoti vinītaassaratho. Odhastapatodoti yathā rathaṃ abhiruhitvā ṭhitena sakkā hoti gaṇhituṃ, evaṃ ālambanaṃ nissāya tiriyato ṭhapitapatodo. Yoggācariyoti assācariyo. Sveva assadamme sāretīti assadammasārathi. Yenicchakanti yena yena maggena icchati. Yadicchakanti yaṃ yaṃ gatiṃ icchati. Sāreyyāti ujukaṃ purato peseyya. Paccāsāreyyāti paṭinivatteyya.
ஏவமேவ கோ²தி யதா² ஹி ஸோ யொக்³கா³சரியோ யேன யேன மக்³கே³ன க³மனங் இச்ச²தி, தங் தங் அஸ்ஸா ஆருள்ஹாவ ஹொந்தி. யாய யாய ச க³தியா இச்ச²தி, ஸா ஸா க³தி க³ஹிதாவ ஹோதி. ரத²ங் பேஸெத்வா அஸ்ஸா நேவ வாரேதப்³பா³ ந விஜ்ஜி²தப்³பா³ ஹொந்தி. கேவலங் தேஸங் ஸமே பூ⁴மிபா⁴கே³ கு²ரேஸு நிமித்தங் ட²பெத்வா க³மனமேவ பஸ்ஸிதப்³ப³ங் ஹோதி. ஏவங் மய்ஹம்பி தேஸு பி⁴க்கூ²ஸு புனப்புனங் வத்தப்³ப³ங் நாஹோஸி. இத³ங் கரோத² இத³ங் மா கரோதா²தி ஸதுப்பாத³னமத்தமேவ கத்தப்³ப³ங் ஹோதி. தேஹிபி தாவதே³வ கத்தப்³ப³ங் கதமேவ ஹோதி, அகத்தப்³ப³ங் ஜஹிதமேவ. தஸ்மாதி யஸ்மா ஸுப்³ப³சா யுத்தயானபடிபா⁴கா³ ஹுத்வா ஸதுப்பாத³னமத்தேனேவ பஜஹிங்ஸு, தஸ்மா தும்ஹேபி பஜஹதா²தி அத்தோ². ஏலண்டே³ஹீதி ஏலண்டா³ கிர ஸாலதூ³ஸனா ஹொந்தி, தஸ்மா ஏவமாஹ. விஸோதெ⁴ய்யாதி ஏலண்டே³ சேவ அஞ்ஞா ச வல்லியோ சி²ந்தி³த்வா ப³ஹி நீஹரணேன ஸோதெ⁴ய்ய. ஸுஜாதாதி ஸுஸண்டி²தா. ஸம்மா பரிஹரெய்யாதி மரியாத³ங் ப³ந்தி⁴த்வா உத³காஸிஞ்சனேனபி காலேனகாலங் மூலமூலே க²ணனேனபி வல்லிகு³ம்பா³தி³ச்சே²த³னேனபி கிபில்லபூடகஹரணேனபி மக்கடகஜாலஸுக்க²த³ண்ட³கஹரணேனபி ஸம்மா வட்³டெ⁴த்வா போஸெய்ய. வுத்³தி⁴ஆதீ³னி வுத்தத்தா²னேவ.
Evameva khoti yathā hi so yoggācariyo yena yena maggena gamanaṃ icchati, taṃ taṃ assā āruḷhāva honti. Yāya yāya ca gatiyā icchati, sā sā gati gahitāva hoti. Rathaṃ pesetvā assā neva vāretabbā na vijjhitabbā honti. Kevalaṃ tesaṃ same bhūmibhāge khuresu nimittaṃ ṭhapetvā gamanameva passitabbaṃ hoti. Evaṃ mayhampi tesu bhikkhūsu punappunaṃ vattabbaṃ nāhosi. Idaṃ karotha idaṃ mā karothāti satuppādanamattameva kattabbaṃ hoti. Tehipi tāvadeva kattabbaṃ katameva hoti, akattabbaṃ jahitameva. Tasmāti yasmā subbacā yuttayānapaṭibhāgā hutvā satuppādanamatteneva pajahiṃsu, tasmā tumhepi pajahathāti attho. Elaṇḍehīti elaṇḍā kira sāladūsanā honti, tasmā evamāha. Visodheyyāti elaṇḍe ceva aññā ca valliyo chinditvā bahi nīharaṇena sodheyya. Sujātāti susaṇṭhitā. Sammā parihareyyāti mariyādaṃ bandhitvā udakāsiñcanenapi kālenakālaṃ mūlamūle khaṇanenapi valligumbādicchedanenapi kipillapūṭakaharaṇenapi makkaṭakajālasukkhadaṇḍakaharaṇenapi sammā vaḍḍhetvā poseyya. Vuddhiādīni vuttatthāneva.
226. இதா³னி அக்க²ந்தியா தோ³ஸங் த³ஸ்ஸெந்தோ பூ⁴தபுப்³ப³ந்திஆதி³மாஹ. தத்த² வேதே³ஹிகாதி விதே³ஹரட்ட²வாஸிகஸ்ஸ தீ⁴தா. அத² வா வேதோ³தி பஞ்ஞா வுச்சதி, வேதே³ன ஈஹதி இரியதீதி வேதே³ஹிகா, பண்டி³தாதி அத்தோ². க³ஹபதானீதி க⁴ரஸாமினீ. கித்திஸத்³தோ³தி கித்திகோ⁴ஸோ. ஸோரதாதி ஸோரச்சேன ஸமன்னாக³தா. நிவாதாதி நிவாதவுத்தி. உபஸந்தாதி நிப்³பு³தா. த³க்கா²தி ப⁴த்தபசனஸயனத்த²ரணதீ³புஜ்ஜலனாதி³கம்மேஸு சே²கா. அனலஸாதி உட்டா²ஹிகா, ஸுஸங்விஹிதகம்மந்தாதி ஸுட்டு² ஸங்விஹிதகம்மந்தா. ஏகா அனலஸா ஹோதி, யங் யங் பன பா⁴ஜனங் க³ண்ஹாதி, தங் தங் பி⁴ந்த³தி வா சி²த்³த³ங் வா கரோதி, அயங் ந தாதி³ஸாதி த³ஸ்ஸேதி.
226. Idāni akkhantiyā dosaṃ dassento bhūtapubbantiādimāha. Tattha vedehikāti videharaṭṭhavāsikassa dhītā. Atha vā vedoti paññā vuccati, vedena īhati iriyatīti vedehikā, paṇḍitāti attho. Gahapatānīti gharasāminī. Kittisaddoti kittighoso. Soratāti soraccena samannāgatā. Nivātāti nivātavutti. Upasantāti nibbutā. Dakkhāti bhattapacanasayanattharaṇadīpujjalanādikammesu chekā. Analasāti uṭṭhāhikā, susaṃvihitakammantāti suṭṭhu saṃvihitakammantā. Ekā analasā hoti, yaṃ yaṃ pana bhājanaṃ gaṇhāti, taṃ taṃ bhindati vā chiddaṃ vā karoti, ayaṃ na tādisāti dasseti.
தி³வா உட்டா²ஸீதி பாதோவ கத்தப்³பா³னி தே⁴னுது³ஹனாதி³கம்மானி அகத்வா உஸ்ஸூரே உட்டி²தா. ஹே ஜே காளீதி அரே காளி. கிங் ஜே தி³வா உட்டா²ஸீதி கிங் தே கிஞ்சி அபா²ஸுகங் அத்தி², கிங் தி³வா உட்டா²ஸீதி? நோ வத ரே கிஞ்சீதி அரே யதி³ தே ந கிஞ்சி அபா²ஸுகங் அத்தி², நேவ ஸீஸங் ருஜ்ஜ²தி, ந பிட்டி², அத² கஸ்மா பாபி தா³ஸி தி³வா உட்டா²ஸீதி குபிதா அனத்தமனா பா⁴குடிமகாஸி. தி³வாதரங் உட்டா²ஸீதி புனதி³வஸே உஸ்ஸூரதரங் உட்டா²ஸி. அனத்தமனவாசந்தி அரே பாபி தா³ஸி அத்தனோ பமாணங் ந ஜானாஸி; கிங் அக்³கி³ங் ஸீதோதி மஞ்ஞஸி, இதா³னி தங் ஸிக்கா²பெஸ்ஸாமீதிஆதீ³னி வத³மானா குபிதவசனங் நிச்சா²ரேஸி.
Divā uṭṭhāsīti pātova kattabbāni dhenuduhanādikammāni akatvā ussūre uṭṭhitā. He je kāḷīti are kāḷi. Kiṃ je divā uṭṭhāsīti kiṃ te kiñci aphāsukaṃ atthi, kiṃ divā uṭṭhāsīti? No vata re kiñcīti are yadi te na kiñci aphāsukaṃ atthi, neva sīsaṃ rujjhati, na piṭṭhi, atha kasmā pāpi dāsi divā uṭṭhāsīti kupitā anattamanā bhākuṭimakāsi. Divātaraṃ uṭṭhāsīti punadivase ussūrataraṃ uṭṭhāsi. Anattamanavācanti are pāpi dāsi attano pamāṇaṃ na jānāsi; kiṃ aggiṃ sītoti maññasi, idāni taṃ sikkhāpessāmītiādīni vadamānā kupitavacanaṃ nicchāresi.
படிவிஸகானந்தி ஸாமந்தகே³ஹவாஸீனங். உஜ்ஜா²பேஸீதி அவஜானாபேஸி. சண்டீ³தி அஸோரதா கிப்³பி³ஸா. இதி யத்தகா கு³ணா, ததோ தி³கு³ணா தோ³ஸா உப்பஜ்ஜிங்ஸு. கு³ணா நாம ஸணிகங் ஸணிகங் ஆக³ச்ச²ந்தி; தோ³ஸா ஏகதி³வஸேனேவ பத்த²டா ஹொந்தி. ஸோரதஸோரதோதி அதிவிய ஸோரதோ, ஸோதாபன்னோ நு கோ², ஸகதா³கா³மீ அனாகா³மீ அரஹா நு கோ²தி வத்தப்³ப³தங் ஆபஜ்ஜதி. பு²ஸந்தீதி பு²ஸந்தா க⁴ட்டெந்தா ஆபாத²ங் ஆக³ச்ச²ந்தி.
Paṭivisakānanti sāmantagehavāsīnaṃ. Ujjhāpesīti avajānāpesi. Caṇḍīti asoratā kibbisā. Iti yattakā guṇā, tato diguṇā dosā uppajjiṃsu. Guṇā nāma saṇikaṃ saṇikaṃ āgacchanti; dosā ekadivaseneva patthaṭā honti. Soratasoratoti ativiya sorato, sotāpanno nu kho, sakadāgāmī anāgāmī arahā nu khoti vattabbataṃ āpajjati. Phusantīti phusantā ghaṭṭentā āpāthaṃ āgacchanti.
அத² பி⁴க்கு² ஸோரதோதி வேதி³தப்³போ³தி அத² அதி⁴வாஸனக்க²ந்தியங் டி²தோ பி⁴க்கு² ஸோரதோதி வேதி³தப்³போ³. யோ சீவர…பே॰… பரிக்கா²ரஹேதூதி யோ ஏதானி சீவராதீ³னி பணீதபணீதானி லப⁴ந்தோ பாத³பரிகம்மபிட்டி²பரிகம்மாதீ³னி ஏகவசனேனேவ கரோதி. அலப⁴மானோதி யதா² புப்³பே³ லப⁴தி, ஏவங் அலப⁴ந்தோ. த⁴ம்மஞ்ஞேவ ஸக்கரொந்தோதி த⁴ம்மங்யேவ ஸக்காரங் ஸுகதகாரங் கரொந்தோ. க³ருங் கரொந்தோதி க³ருபா⁴ரியங் கரொந்தோ. மானெந்தோதி மனேன பியங் கரொந்தோ. பூஜெந்தோதி பச்சயபூஜாய பூஜெந்தோ. அபசாயமானோதி த⁴ம்மங்யேவ அபசாயமானோ அபசிதிங் நீசவுத்திங் த³ஸ்ஸெந்தோ.
Athabhikkhu soratoti veditabboti atha adhivāsanakkhantiyaṃ ṭhito bhikkhu soratoti veditabbo. Yo cīvara…pe… parikkhārahetūti yo etāni cīvarādīni paṇītapaṇītāni labhanto pādaparikammapiṭṭhiparikammādīni ekavacaneneva karoti. Alabhamānoti yathā pubbe labhati, evaṃ alabhanto. Dhammaññeva sakkarontoti dhammaṃyeva sakkāraṃ sukatakāraṃ karonto. Garuṃ karontoti garubhāriyaṃ karonto. Mānentoti manena piyaṃ karonto. Pūjentoti paccayapūjāya pūjento. Apacāyamānoti dhammaṃyeva apacāyamāno apacitiṃ nīcavuttiṃ dassento.
227. ஏவங் அக்க²ந்தியா தோ³ஸங் த³ஸ்ஸெத்வா இதா³னி யே அதி⁴வாஸெந்தி, தே ஏவங் அதி⁴வாஸெந்தீதி பஞ்ச வசனபதே² த³ஸ்ஸெந்தோ பஞ்சிமே, பி⁴க்க²வேதிஆதி³மாஹ. தத்த² காலேனாதி யுத்தபத்தகாலேன. பூ⁴தேனாதி ஸதா விஜ்ஜமானேன. ஸண்ஹேனாதி ஸம்மட்டே²ன . அத்த²ஸஞ்ஹிதேனாதி அத்த²னிஸ்ஸிதேன காரணனிஸ்ஸிதேன. அகாலேனாதிஆதீ³னி தேஸங்யேவ படிபக்க²வஸேன வேதி³தப்³பா³னி. மெத்தசித்தாதி உப்பன்னமெத்தசித்தா ஹுத்வா. தோ³ஸந்தராதி து³ட்ட²சித்தா, அப்³ப⁴ந்தரே உப்பன்னதோ³ஸா ஹுத்வா. தத்ராதி தேஸு வசனபதே²ஸு. ப²ரித்வாதி அதி⁴முச்சித்வா. ததா³ரம்மணஞ்சாதி கத²ங் ததா³ரம்மணங் ஸப்³பா³வந்தங் லோகங் கரோதி? பஞ்ச வசனபதே² க³ஹெத்வா ஆக³தங் புக்³க³லங் மெத்தசித்தஸ்ஸ ஆரம்மணங் கத்வா புன தஸ்ஸேவ மெத்தசித்தஸ்ஸ அவஸேஸஸத்தே ஆரம்மணங் கரொந்தோ ஸப்³பா³வந்தங் லோகங் ததா³ரம்மணங் கரோதி நாம. தத்ராயங் வசனத்தோ². ததா³ரம்மணஞ்சாதி தஸ்ஸேவ மெத்தசித்தஸ்ஸ ஆரம்மணங் கத்வா. ஸப்³பா³வந்தந்தி ஸப்³ப³ஸத்தவந்தங். லோகந்தி ஸத்தலோகங். விபுலேனாதி அனேகஸத்தாரம்மணேன. மஹக்³க³தேனாதி மஹக்³க³தபூ⁴மிகேன. அப்பமாணேனாதி ஸுபா⁴விதேன. அவேரேனாதி நித்³தோ³ஸேன. அப்³யாப³ஜ்ஜே²னாதி நித்³து³க்கே²ன. ப²ரித்வா விஹரிஸ்ஸாமாதி ஏவரூபேன மெத்தாஸஹக³தேன சேதஸா தஞ்ச புக்³க³லங் ஸப்³ப³ஞ்ச லோகங் தஸ்ஸ சித்தஸ்ஸ ஆரம்மணங் கத்வா அதி⁴முச்சித்வா விஹரிஸ்ஸாம.
227. Evaṃ akkhantiyā dosaṃ dassetvā idāni ye adhivāsenti, te evaṃ adhivāsentīti pañca vacanapathe dassento pañcime, bhikkhavetiādimāha. Tattha kālenāti yuttapattakālena. Bhūtenāti satā vijjamānena. Saṇhenāti sammaṭṭhena . Atthasañhitenāti atthanissitena kāraṇanissitena. Akālenātiādīni tesaṃyeva paṭipakkhavasena veditabbāni. Mettacittāti uppannamettacittā hutvā. Dosantarāti duṭṭhacittā, abbhantare uppannadosā hutvā. Tatrāti tesu vacanapathesu. Pharitvāti adhimuccitvā. Tadārammaṇañcāti kathaṃ tadārammaṇaṃ sabbāvantaṃ lokaṃ karoti? Pañca vacanapathe gahetvā āgataṃ puggalaṃ mettacittassa ārammaṇaṃ katvā puna tasseva mettacittassa avasesasatte ārammaṇaṃ karonto sabbāvantaṃ lokaṃ tadārammaṇaṃ karoti nāma. Tatrāyaṃ vacanattho. Tadārammaṇañcāti tasseva mettacittassa ārammaṇaṃ katvā. Sabbāvantanti sabbasattavantaṃ. Lokanti sattalokaṃ. Vipulenāti anekasattārammaṇena. Mahaggatenāti mahaggatabhūmikena. Appamāṇenāti subhāvitena. Averenāti niddosena. Abyābajjhenāti niddukkhena. Pharitvā viharissāmāti evarūpena mettāsahagatena cetasā tañca puggalaṃ sabbañca lokaṃ tassa cittassa ārammaṇaṃ katvā adhimuccitvā viharissāma.
228. இதா³னி தத³த்த²தீ³பிகங் உபமங் ஆஹரந்தோ ஸெய்யதா²பீதிஆதி³மாஹ. தத்த² அபத²விந்தி நிப்பத²விங் கரிஸ்ஸாமீதி அத்தோ². தத்ர தத்ராதி தஸ்மிங் தஸ்மிங் டா²னே. விகிரெய்யாதி பச்சி²யா பங்ஸுங் உத்³த⁴ரித்வா பீ³ஜானி விய விகிரெய்ய. ஒட்டு²பெ⁴ய்யாதி கே²ளங் பாதெய்ய. அபத²விங் கரெய்யாதி ஏவங் காயேன ச வாசாய ச பயோக³ங் கத்வாபி ஸக்குணெய்ய அபத²விங் காதுந்தி? க³ம்பீ⁴ராதி ப³ஹலத்தேன த்³வியோஜனஸதஸஹஸ்ஸானி சத்தாரி ச நஹுதானி க³ம்பீ⁴ரா. அப்பமெய்யாதி திரியங் பன அபரிச்சி²ன்னா. ஏவமேவ கோ²தி எத்த² இத³ங் ஓபம்மஸங்ஸந்த³னங் – பத²வீ விய ஹி மெத்தசித்தங் த³ட்ட²ப்³ப³ங். குதா³லபிடகங் க³ஹெத்வா ஆக³தபுரிஸோ விய பஞ்ச வசனபதே² க³ஹெத்வா ஆக³தபுக்³க³லோ. யதா² ஸோ குதா³லபிடகேன மஹாபத²விங் அபத²விங் காதுங் ந ஸக்கோதி, ஏவங் வோ பஞ்ச வசனபதே² க³ஹெத்வா ஆக³தபுக்³க³லோ மெத்தசித்தஸ்ஸ அஞ்ஞத²த்தங் காதுங் ந ஸக்கி²ஸ்ஸதீதி.
228. Idāni tadatthadīpikaṃ upamaṃ āharanto seyyathāpītiādimāha. Tattha apathavinti nippathaviṃ karissāmīti attho. Tatra tatrāti tasmiṃ tasmiṃ ṭhāne. Vikireyyāti pacchiyā paṃsuṃ uddharitvā bījāni viya vikireyya. Oṭṭhubheyyāti kheḷaṃ pāteyya. Apathaviṃ kareyyāti evaṃ kāyena ca vācāya ca payogaṃ katvāpi sakkuṇeyya apathaviṃ kātunti? Gambhīrāti bahalattena dviyojanasatasahassāni cattāri ca nahutāni gambhīrā. Appameyyāti tiriyaṃ pana aparicchinnā. Evameva khoti ettha idaṃ opammasaṃsandanaṃ – pathavī viya hi mettacittaṃ daṭṭhabbaṃ. Kudālapiṭakaṃ gahetvā āgatapuriso viya pañca vacanapathe gahetvā āgatapuggalo. Yathā so kudālapiṭakena mahāpathaviṃ apathaviṃ kātuṃ na sakkoti, evaṃ vo pañca vacanapathe gahetvā āgatapuggalo mettacittassa aññathattaṃ kātuṃ na sakkhissatīti.
229. து³தியஉபமாயங் ஹலித்³தி³ந்தி யங்கிஞ்சி பீதகவண்ணங். நீலந்தி கங்ஸனீலங் வா பலாஸனீலங் வா. அரூபீதி அரூபோ . நனு ச, த்³வின்னங் கட்டா²னங் வா த்³வின்னங் ருக்கா²னங் வா த்³வின்னங் ஸெய்யானங் வா த்³வின்னங் ஸேலானங் வா அந்தரங் பரிச்சி²ன்னாகாஸரூபந்தி ஆக³தங், கஸ்மா இத⁴ அரூபீதி வுத்தோதி? ஸனித³ஸ்ஸனபா⁴வபடிக்கே²பதோ. தேனேவாஹ ‘‘அனித³ஸ்ஸனோ’’தி. தஸ்மிஞ்ஹி ரூபங் லிகி²துங், ரூபபாதுபா⁴வங் த³ஸ்ஸேதுங் ந ஸக்கா, தஸ்மா ‘‘அரூபீ’’தி வுத்தோ. அனித³ஸ்ஸனோதி த³ஸ்ஸனஸ்ஸ சக்கு²விஞ்ஞாணஸ்ஸ அனாபாதோ². உபமாஸங்ஸந்த³னே பனெத்த² ஆகாஸோ விய மெத்தசித்தங். துலிகபஞ்சமா சத்தாரோ ரங்க³ஜாதா விய பஞ்ச வசனபதா², துலிகபஞ்சமே ரங்கே³ க³ஹெத்வா ஆக³தபுரிஸோ விய பஞ்ச வசனபதே² க³ஹெத்வா ஆக³தபுக்³க³லோ. யதா² ஸோ துலிகபஞ்சமேஹி ரங்கே³ஹி ஆகாஸே ரூபபாதுபா⁴வங் காதுங் ந ஸக்கோதி, ஏவங் வோ பஞ்ச வசனபதே² க³ஹெத்வா ஆக³தபுக்³க³லோ மெத்தசித்தஸ்ஸ அஞ்ஞத²த்தங் கத்வா தோ³ஸுப்பத்திங் த³ஸ்ஸேதுங் ந ஸக்கி²ஸ்ஸதீதி.
229. Dutiyaupamāyaṃ haliddinti yaṃkiñci pītakavaṇṇaṃ. Nīlanti kaṃsanīlaṃ vā palāsanīlaṃ vā. Arūpīti arūpo . Nanu ca, dvinnaṃ kaṭṭhānaṃ vā dvinnaṃ rukkhānaṃ vā dvinnaṃ seyyānaṃ vā dvinnaṃ selānaṃ vā antaraṃ paricchinnākāsarūpanti āgataṃ, kasmā idha arūpīti vuttoti? Sanidassanabhāvapaṭikkhepato. Tenevāha ‘‘anidassano’’ti. Tasmiñhi rūpaṃ likhituṃ, rūpapātubhāvaṃ dassetuṃ na sakkā, tasmā ‘‘arūpī’’ti vutto. Anidassanoti dassanassa cakkhuviññāṇassa anāpātho. Upamāsaṃsandane panettha ākāso viya mettacittaṃ. Tulikapañcamā cattāro raṅgajātā viya pañca vacanapathā, tulikapañcame raṅge gahetvā āgatapuriso viya pañca vacanapathe gahetvā āgatapuggalo. Yathā so tulikapañcamehi raṅgehi ākāse rūpapātubhāvaṃ kātuṃ na sakkoti, evaṃ vo pañca vacanapathe gahetvā āgatapuggalo mettacittassa aññathattaṃ katvā dosuppattiṃ dassetuṃ na sakkhissatīti.
230. ததியஉபமாயங் ஆதி³த்தந்தி பஜ்ஜலிதங். க³ம்பீ⁴ரா அப்பமெய்யாதி இமிஸ்ஸா க³ங்கா³ய க³ம்பீ⁴ரட்டா²னங் கா³வுதம்பி அத்தி², அட்³ட⁴யோஜனம்பி, யோஜனம்பி. புது²லங் பனஸ்ஸா ஏவரூபங்யேவ, தீ³க⁴தோ பன பஞ்சயோஜனஸதானி. ஸா கத²ங் க³ம்பீ⁴ரா அப்பமெய்யாதி? ஏதேன பயோகே³ன பரிவத்தெத்வா உத்³த⁴னே உத³கங் விய தாபேதுங் அஸக்குணெய்யதோ. டி²தோத³கங் பன கேனசி உபாயேன அங்கு³லமத்தங் வா அட்³ட⁴ங்கு³லமத்தங் வா ஏவங் தாபேதுங் ஸக்கா ப⁴வெய்ய, அயங் பன ந ஸக்கா, தஸ்மா ஏவங் வுத்தங். உபமாஸங்ஸந்த³னே பனெத்த² க³ங்கா³ விய மெத்தசித்தங், திணுக்கங் ஆதா³ய ஆக³தபுரிஸோ விய பஞ்ச வசனபதே² க³ஹெத்வா ஆக³தபுக்³க³லோ. யதா² ஸோ ஆதி³த்தாய திணுக்காய க³ங்க³ங் தாபேதுங் ந ஸக்கோதி, ஏவங் வோ பஞ்ச வசனபதே² க³ஹெத்வா ஆக³தபுக்³க³லோ மெத்தசித்தஸ்ஸ அஞ்ஞத²த்தங் காதுங் ந ஸக்கி²ஸ்ஸதீதி.
230. Tatiyaupamāyaṃ ādittanti pajjalitaṃ. Gambhīrā appameyyāti imissā gaṅgāya gambhīraṭṭhānaṃ gāvutampi atthi, aḍḍhayojanampi, yojanampi. Puthulaṃ panassā evarūpaṃyeva, dīghato pana pañcayojanasatāni. Sā kathaṃ gambhīrā appameyyāti? Etena payogena parivattetvā uddhane udakaṃ viya tāpetuṃ asakkuṇeyyato. Ṭhitodakaṃ pana kenaci upāyena aṅgulamattaṃ vā aḍḍhaṅgulamattaṃ vā evaṃ tāpetuṃ sakkā bhaveyya, ayaṃ pana na sakkā, tasmā evaṃ vuttaṃ. Upamāsaṃsandane panettha gaṅgā viya mettacittaṃ, tiṇukkaṃ ādāya āgatapuriso viya pañca vacanapathe gahetvā āgatapuggalo. Yathā so ādittāya tiṇukkāya gaṅgaṃ tāpetuṃ na sakkoti, evaṃ vo pañca vacanapathe gahetvā āgatapuggalo mettacittassa aññathattaṃ kātuṃ na sakkhissatīti.
231. சதுத்த²உபமாயங் பி³ளாரப⁴ஸ்தாதி பி³ளாரசம்மபஸிப்³ப³கா. ஸுமத்³தி³தாதி ஸுட்டு² மத்³தி³தா. ஸுபரிமத்³தி³தாதி அந்தோ ச ப³ஹி ச ஸமந்ததோ ஸுபரிமத்³தி³தா. தூலினீதி ஸிம்ப³லிதூலலதாதூலஸமானா. சி²ன்னஸஸ்ஸராதி சி²ன்னஸஸ்ஸரஸத்³தா³. சி²ன்னப⁴ப்³ப⁴ராதி சி²ன்னப⁴ப்³ப⁴ரஸத்³தா³. உபமாஸங்ஸந்த³னே பனெத்த² பி³ளாரப⁴ஸ்தா விய மெத்தசித்தங், கட்ட²கட²லங் ஆதா³ய ஆக³தபுரிஸோ விய பஞ்ச வசனபதே² க³ஹெத்வா ஆக³தபுக்³க³லோ. யதா² ஸோ கட்டே²ன வா கட²லேன வா பி³ளாரப⁴ஸ்தங் ஸரஸரங் ப⁴ரப⁴ரங் ஸத்³த³ங் காதுங் ந ஸக்கோதி, ஏவங் வோ பஞ்ச வசனபதே² க³ஹெத்வா ஆக³தபுக்³க³லோ மெத்தசித்தஸ்ஸ அஞ்ஞத²த்தங் கத்வா தோ³ஸானுக³தபா⁴வங் காதுங் ந ஸக்கி²ஸ்ஸதீதி.
231. Catutthaupamāyaṃ biḷārabhastāti biḷāracammapasibbakā. Sumadditāti suṭṭhu madditā. Suparimadditāti anto ca bahi ca samantato suparimadditā. Tūlinīti simbalitūlalatātūlasamānā. Chinnasassarāti chinnasassarasaddā. Chinnabhabbharāti chinnabhabbharasaddā. Upamāsaṃsandane panettha biḷārabhastā viya mettacittaṃ, kaṭṭhakaṭhalaṃ ādāya āgatapuriso viya pañca vacanapathe gahetvā āgatapuggalo. Yathā so kaṭṭhena vā kaṭhalena vā biḷārabhastaṃ sarasaraṃ bharabharaṃ saddaṃ kātuṃ na sakkoti, evaṃ vo pañca vacanapathe gahetvā āgatapuggalo mettacittassa aññathattaṃ katvā dosānugatabhāvaṃ kātuṃ na sakkhissatīti.
232. ஓசரகாதி அவசரகா ஹெட்டா²சரகா, நீசகம்மகாரகாதி அத்தோ². யோ மனோ பதூ³ஸெய்யாதி யோ பி⁴க்கு² வா பி⁴க்கு²னீ வா மனோ பதூ³ஸெய்ய, தங் ககசேன ஓகந்தனங் நாதி⁴வாஸெய்ய. ந மே ஸோ தேன ஸாஸனகரோதி ஸோ தேன அனதி⁴வாஸனேன மய்ஹங் ஓவாத³கரோ ந ஹோதி. ஆபத்தி பனெத்த² நத்தி².
232.Ocarakāti avacarakā heṭṭhācarakā, nīcakammakārakāti attho. Yo mano padūseyyāti yo bhikkhu vā bhikkhunī vā mano padūseyya, taṃ kakacena okantanaṃ nādhivāseyya. Na me so tena sāsanakaroti so tena anadhivāsanena mayhaṃ ovādakaro na hoti. Āpatti panettha natthi.
233. அணுங் வா தூ²லங் வாதி அப்பஸாவஜ்ஜங் வா மஹாஸாவஜ்ஜங் வா. யங் தும்ஹே நாதி⁴வாஸெய்யாதா²தி யோ தும்ஹேஹி அதி⁴வாஸேதப்³போ³ ந ப⁴வெய்யாதி அத்தோ². நோ ஹேதங், ப⁴ந்தேதி, ப⁴ந்தே, அனதி⁴வாஸேதப்³ப³ங் நாம வசனபத²ங் ந பஸ்ஸாமாதி அதி⁴ப்பாயோ. தீ³க⁴ரத்தங் ஹிதாய ஸுகா²யாதி இதி ப⁴க³வா அரஹத்தேன கூடங் க³ண்ஹந்தோ யதா²னுஸந்தி⁴னா தே³ஸனங் நிட்ட²பேஸீதி.
233.Aṇuṃ vā thūlaṃ vāti appasāvajjaṃ vā mahāsāvajjaṃ vā. Yaṃ tumhe nādhivāseyyāthāti yo tumhehi adhivāsetabbo na bhaveyyāti attho. No hetaṃ, bhanteti, bhante, anadhivāsetabbaṃ nāma vacanapathaṃ na passāmāti adhippāyo. Dīgharattaṃ hitāya sukhāyāti iti bhagavā arahattena kūṭaṃ gaṇhanto yathānusandhinā desanaṃ niṭṭhapesīti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ககசூபமஸுத்தவண்ணனா நிட்டி²தா.
Kakacūpamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 1. ககசூபமஸுத்தங் • 1. Kakacūpamasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 1. ககசூபமஸுத்தவண்ணனா • 1. Kakacūpamasuttavaṇṇanā
