| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. ககுத⁴ஸுத்தவண்ணனா
8. Kakudhasuttavaṇṇanā
99. ‘‘நந்தா³மீ’’தி வுத்தே நந்தீ³ நாம பப்³ப³ஜிதஸ்ஸ மலந்தி சோதே³துகாமோ தே³வபுத்தோ ‘‘நந்த³ஸீ’’தி புச்சி². அத²ஸ்ஸ ப⁴க³வா தங் படிக்கி²பந்தோ ‘‘கிங் லத்³தா⁴’’தி? ஆஹ. தேன ‘‘தயா மம அதி⁴ப்பேதனந்தி³யா இத⁴ பச்சயோ ஏவ நத்தி², குதோ ஸா நந்தீ³’’தி த³ஸ்ஸேதி. தேனாஹ ‘‘துட்டி² நாமா’’திஆதி³. அத² தே³வபுத்தோ நந்தி³யா அஸதி ஸோகேன ப⁴விதப்³ப³ங், ஸோகோ ச பப்³ப³ஜிதஸ்ஸ மலந்தி சோதெ³ந்தோ ஆஹ ‘‘தேன ஹி, ஸமண, ஸோசஸீ’’தி. ப⁴க³வா தம்பி படிக்கி²பந்தோ ‘‘கிங் ஜீயித்தா²’’திஆதி³மாஹ. கிங் மங் ஜினாதீதி அத்தோ²?
99. ‘‘Nandāmī’’ti vutte nandī nāma pabbajitassa malanti codetukāmo devaputto ‘‘nandasī’’ti pucchi. Athassa bhagavā taṃ paṭikkhipanto ‘‘kiṃ laddhā’’ti? Āha. Tena ‘‘tayā mama adhippetanandiyā idha paccayo eva natthi, kuto sā nandī’’ti dasseti. Tenāha ‘‘tuṭṭhi nāmā’’tiādi. Atha devaputto nandiyā asati sokena bhavitabbaṃ, soko ca pabbajitassa malanti codento āha ‘‘tena hi, samaṇa, socasī’’ti. Bhagavā tampi paṭikkhipanto ‘‘kiṃ jīyitthā’’tiādimāha. Kiṃ maṃ jinātīti attho?
யதி³ தே நந்தி³ஸோகா ந ஸந்தி ஹாஸவத்து²னோ லாப⁴ஸ்ஸ ஜானியா ச அபா⁴வதோ, ஏகவிஹாரினோ பன அரதியா ப⁴விதப்³ப³ந்தி ஆஹ – ‘‘கச்சி தங் ஏகமாஸீனங், அரதீ நாபி⁴கீரதீ’’தி. தஸ்மிம்பி ப⁴க³வதா படிக்கி²த்தே அத² நேஸம்பி நந்தி³ஸோகாரதீனங் அபா⁴வே காரணங் புச்ச²ந்தோ ‘‘கத²ங் த்வ’’ந்தி கா³த²மாஹ? அத²ஸ்ஸ ப⁴க³வா தங் காரணங் பவேதெ³ந்தோ ‘‘அக⁴ஜாதஸ்ஸா’’தி கா³த²மாஹ. தத்த² அக⁴ஜாதஸ்ஸாதி அகே⁴ ஜாதஸ்ஸ. தேனாஹ ‘‘வட்டது³க்கே² டி²தஸ்ஸா’’தி. ஜாததண்ஹஸ்ஸ அப்பஹீனதண்ஹஸ்ஸ வட்டது³க்க²ங் ஆக³தமேவ காரணஸ்ஸ அப்பஹீனத்தா. தஸ்ஸேவ ஹி காரணஸ்ஸ அப்பஹீனதங் த³ஸ்ஸெந்தோ ‘‘து³க்கீ² ஸுக²ங் பத்த²யதீதி ஹி வுத்த’’ந்தி ஆஹ. து³க்க²ப்பவத்தியா ஸாபி தண்ஹாப்பவத்தி தேன த³ஸ்ஸிதா. இதீதிஆதி³னா வுத்தமேவத்த²ங் நிக³மனவஸேன த³ஸ்ஸேதி.
Yadi te nandisokā na santi hāsavatthuno lābhassa jāniyā ca abhāvato, ekavihārino pana aratiyā bhavitabbanti āha – ‘‘kacci taṃ ekamāsīnaṃ, aratī nābhikīratī’’ti. Tasmimpi bhagavatā paṭikkhitte atha nesampi nandisokāratīnaṃ abhāve kāraṇaṃ pucchanto ‘‘kathaṃ tva’’nti gāthamāha? Athassa bhagavā taṃ kāraṇaṃ pavedento ‘‘aghajātassā’’ti gāthamāha. Tattha aghajātassāti aghe jātassa. Tenāha ‘‘vaṭṭadukkhe ṭhitassā’’ti. Jātataṇhassa appahīnataṇhassa vaṭṭadukkhaṃ āgatameva kāraṇassa appahīnattā. Tasseva hi kāraṇassa appahīnataṃ dassento ‘‘dukkhī sukhaṃ patthayatīti hi vutta’’nti āha. Dukkhappavattiyā sāpi taṇhāppavatti tena dassitā. Itītiādinā vuttamevatthaṃ nigamanavasena dasseti.
ககுத⁴ஸுத்தவண்ணனா நிட்டி²தா.
Kakudhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. ககுத⁴ஸுத்தங் • 8. Kakudhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8-10. ககுத⁴ஸுத்தாதி³வண்ணனா • 8-10. Kakudhasuttādivaṇṇanā
