| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. களாரஸுத்தவண்ணனா
2. Kaḷārasuttavaṇṇanā
32. தஸ்ஸ தே²ரஸ்ஸ நாமங் ஜாதிஸமுதா³க³தங். நிவத்தோதி புப்³பே³ வட்டஸோதஸ்ஸ படிஸோதங் க³ந்துங் ஆரத்³தோ⁴, தங் அவிஸஹந்தோ அனுஸோதமேவ க³ச்ச²ந்தோ, ததோ நிவத்தோ பரிக்லேஸவித⁴மே அஸங்ஸட்டோ² வியுத்தோ ஹோதி. எத்த² சேதனாதி வா அஸ்ஸாஸோ. ஹீனாயாவத்தனங் நாம காமேஸு ஸாபெக்க²தாய, தத்த² ச நிரபெக்க²தா ததியமக்³கா³தி⁴க³மேனாதி த³ஸ்ஸெந்தோ ‘‘தயோ மக்³கே³’’திஆதி³மாஹ. ஸாவகபாரமீஞாணங் தே²ரஸ்ஸ அரஹத்தாதி⁴க³மேன நிப்ப²ன்னங், தஸ்மா தஸ்ஸ தங் உபரிமகோடியா அஸ்ஸாஸோ வுத்தோ. உக்³கா⁴டிதாதி விவடா, வூபஸமிதாதி அத்தோ². தத்தா²தி அரஹத்தப்பத்தியங். விசிகிச்சா²பா⁴வந்தி நிப்³பே³மதிகதங்.
32.Tassa therassa nāmaṃ jātisamudāgataṃ. Nivattoti pubbe vaṭṭasotassa paṭisotaṃ gantuṃ āraddho, taṃ avisahanto anusotameva gacchanto, tato nivatto pariklesavidhame asaṃsaṭṭho viyutto hoti. Ettha cetanāti vā assāso. Hīnāyāvattanaṃ nāma kāmesu sāpekkhatāya, tattha ca nirapekkhatā tatiyamaggādhigamenāti dassento ‘‘tayo magge’’tiādimāha. Sāvakapāramīñāṇaṃ therassa arahattādhigamena nipphannaṃ, tasmā tassa taṃ uparimakoṭiyā assāso vutto. Ugghāṭitāti vivaṭā, vūpasamitāti attho. Tatthāti arahattappattiyaṃ. Vicikicchābhāvanti nibbematikataṃ.
ந ஏவங் ப்³யாகதாதி ‘‘கீ²ணா ஜாதீ’’திஆதி³கா ஏவங் உத்தானகங் ந ப்³யாகதா, பரியாயேன பன ப்³யாகதா. கேனசீதி கேனசிபி காரணேன. ஏவங் உத்தானகங் ப்³யாகரிஸ்ஸதி.
Naevaṃ byākatāti ‘‘khīṇā jātī’’tiādikā evaṃ uttānakaṃ na byākatā, pariyāyena pana byākatā. Kenacīti kenacipi kāraṇena. Evaṃ uttānakaṃ byākarissati.
தஸ்ஸ பச்சயஸ்ஸ க²யாதி தஸ்ஸ கம்மப⁴வஸங்கா²தஸ்ஸ பச்சயஸ்ஸ அவிஜ்ஜாய ஸஹகாரிதாயங் ஸங்க³ஹிதஸ்ஸ க²யா அனுப்பாதா³ நிரோதா⁴. கீ²ணஸ்மிந்தி கீ²ணே. அனுப்பாத³னிரோதே⁴ன நிருத்³தே⁴ ஜாதியா யதா²வுத்தே பச்சயே. ஜாதிஸங்கா²தங் ப²லங் கீ²ணங் அனுப்பத்தித⁴ம்மதங் ஆபாதி³தந்தி. விதி³தங் ஞாதங். ஆஜானாதி சதுஸச்சங் ஹெட்டி²மமக்³கே³ஹி ஞாதங் அனதிக்கமித்வாவ படிவிஜ்ஜ²தீதி அஞ்ஞா அக்³க³மக்³கோ³. தது³பசாரேன அக்³க³ப²லங் இத⁴ ‘‘அஞ்ஞா’’ நாம. பச்சயோதி ப⁴வூபபத்தியா பச்சயோ படிச்சஸமுப்பாதோ³.
Tassa paccayassa khayāti tassa kammabhavasaṅkhātassa paccayassa avijjāya sahakāritāyaṃ saṅgahitassa khayā anuppādā nirodhā. Khīṇasminti khīṇe. Anuppādanirodhena niruddhe jātiyā yathāvutte paccaye. Jātisaṅkhātaṃ phalaṃ khīṇaṃ anuppattidhammataṃ āpāditanti. Viditaṃ ñātaṃ. Ājānāti catusaccaṃ heṭṭhimamaggehi ñātaṃ anatikkamitvāva paṭivijjhatīti aññā aggamaggo. Tadupacārena aggaphalaṃ idha ‘‘aññā’’ nāma. Paccayoti bhavūpapattiyā paccayo paṭiccasamuppādo.
மேதி மயா. அஞ்ஞாஸி ஆகாரக்³க³ஹணேன சித்தாசாரங் ஜானாதி. தேனாதி ப⁴க³வதா. ப்³யாகரணங் அனுமோதி³தங் பஞ்ஹப்³யாகரணஸ்ஸ விஸயகதபா⁴வதோ.
Meti mayā. Aññāsi ākāraggahaṇena cittācāraṃ jānāti. Tenāti bhagavatā. Byākaraṇaṃ anumoditaṃ pañhabyākaraṇassa visayakatabhāvato.
அயமஸ்ஸ விஸயோதி அயங் வேத³னா அஸ்ஸ ஸாரிபுத்தத்தே²ரஸ்ஸ ஸவிஸயோ தத்த² விஸயபா⁴வேன பவத்தத்தா. கிஞ்சாபீதி கிஞ்சாபி ஸுகா² வேத³னா டி²திஸுகா² து³க்கா² வேத³னா விபரிணாமஸுகா², அது³க்க²மஸுகா² வேத³னா ஞாணஸுகா². விபரிணாமகோடியாதி அனிச்சபா⁴வேன ஸப்³பா³வ வேத³னா து³க்கா² நாம . ஸுக²படிக்கே²பதோபி ஹி ஸுக²பீதியா ப²ரணதாய ஸுகா²தி திக்க²மத்தேன விபரிணாமது³க்கா²தி விபரிணாமதோ அபா⁴வாதி⁴க³மேன ஸுக²னிரோத⁴க்க²ணமத்தேன. ததா² ஹி வுத்தங் பபஞ்சஸூத³னியங் ‘‘ஸுகா²ய வேத³னாய அத்தி²பா⁴வோ ஸுக²’’ந்தி. ஸுக²காமோ து³க்க²ங் திதிக்க²தி. அபரிஞ்ஞாதவத்து²கானஞ்ஹி ஸுக²வேத³னுபரமோ து³க்க²தோ உபட்டா²தி, தஸ்மாயமத்தோ² வியோகே³ன தீ³பேதப்³போ³. ‘‘து³க்கா² விபரிணாமஸுகா²’’தி எத்தா²பி ஏஸேவ நயோ. ததா²சாஹ பபஞ்சஸூத³னியங் ‘‘து³க்கா²ய வேத³னாய நத்தி²பா⁴வோ ஸுக²’’ந்தி. து³க்க²வேத³னுபரமோ ஹி வுத்தானங் ஸுக²தோ உபட்டா²தி ஏவாதி வத³ந்தி. தஸ்ஸ யோக³ஸ்ஸ வூபஸமேன ‘‘அஹோ ஸுக²ங் ஜாத’’ந்தி மஜ்ஜ²த்தவேத³னாய ஜானநபா⁴வோ யாதா²வதோ அவபு³ஜ்ஜ²னங் ஸுக²ங். அது³க்க²மஸுகா²பி வேத³னா விஜானந்தஸ்ஸ ஸுக²ங் ஹோதி தஸ்ஸ ஸுகு²மதாய விஞ்ஞெய்யபா⁴வதோ. யதா² ரூபாரூபத⁴ம்மானங் ஸலக்க²ணதோ ஸாமஞ்ஞலக்க²ணதோ ச ஸம்மதே³வ அவபோ³தோ⁴ பரமங் ஸுக²ங். தேனாஹ –
Ayamassa visayoti ayaṃ vedanā assa sāriputtattherassa savisayo tattha visayabhāvena pavattattā. Kiñcāpīti kiñcāpi sukhā vedanā ṭhitisukhā dukkhā vedanā vipariṇāmasukhā, adukkhamasukhā vedanā ñāṇasukhā. Vipariṇāmakoṭiyāti aniccabhāvena sabbāva vedanā dukkhā nāma. Sukhapaṭikkhepatopi hi sukhapītiyā pharaṇatāya sukhāti tikkhamattena vipariṇāmadukkhāti vipariṇāmato abhāvādhigamena sukhanirodhakkhaṇamattena. Tathā hi vuttaṃ papañcasūdaniyaṃ ‘‘sukhāya vedanāya atthibhāvo sukha’’nti. Sukhakāmo dukkhaṃ titikkhati. Apariññātavatthukānañhi sukhavedanuparamo dukkhato upaṭṭhāti, tasmāyamattho viyogena dīpetabbo. ‘‘Dukkhā vipariṇāmasukhā’’ti etthāpi eseva nayo. Tathācāha papañcasūdaniyaṃ ‘‘dukkhāya vedanāya natthibhāvo sukha’’nti. Dukkhavedanuparamo hi vuttānaṃ sukhato upaṭṭhāti evāti vadanti. Tassa yogassa vūpasamena ‘‘aho sukhaṃ jāta’’nti majjhattavedanāya jānanabhāvo yāthāvato avabujjhanaṃ sukhaṃ. Adukkhamasukhāpi vedanā vijānantassa sukhaṃ hoti tassa sukhumatāya viññeyyabhāvato. Yathā rūpārūpadhammānaṃ salakkhaṇato sāmaññalakkhaṇato ca sammadeva avabodho paramaṃ sukhaṃ. Tenāha –
‘‘யதோ யதோ ஸம்மஸதி, க²ந்தா⁴னங் உத³யப்³ப³யங்;
‘‘Yato yato sammasati, khandhānaṃ udayabbayaṃ;
லப⁴தீ பீதிபாமோஜ்ஜங், அமதங் தங் விஜானத’’ந்தி. (த⁴॰ ப॰ 374);
Labhatī pītipāmojjaṃ, amataṃ taṃ vijānata’’nti. (dha. pa. 374);
அஞ்ஞாணது³க்கா²தி அஜானநபா⁴வோ அது³க்க²மஸுகா²வேத³னாய து³க்க²ங். ஸம்மா விபா⁴க³ஜானநஸபா⁴வோ ஞாணஸ்ஸ ஸம்ப⁴வோ. ஞாணஸம்பயுத்தா ஹி ஞாணூபனிஸ்ஸயா அது³க்க²மஸுகா² வேத³னா பஸத்தா²காரா, யதோ ஸா இட்டா² சேவ இட்ட²ப²லா சாதி. அஜானநபா⁴வோதி எத்த² வுத்தவிபரியாயேன அத்தோ² வேதி³தப்³போ³. ‘‘து³க்க²ந்தி விதி³தோ’’தி பாளி, அட்ட²கதா²யங் பன விதி³தந்தி பது³த்³தா⁴ரோ கதோ, தங் அத்த²த³ஸ்ஸனமத்தந்தி த³ட்ட²ப்³ப³ங்.
Aññāṇadukkhāti ajānanabhāvo adukkhamasukhāvedanāya dukkhaṃ. Sammā vibhāgajānanasabhāvo ñāṇassa sambhavo. Ñāṇasampayuttā hi ñāṇūpanissayā adukkhamasukhā vedanā pasatthākārā, yato sā iṭṭhā ceva iṭṭhaphalā cāti. Ajānanabhāvoti ettha vuttavipariyāyena attho veditabbo. ‘‘Dukkhanti vidito’’ti pāḷi, aṭṭhakathāyaṃ pana viditanti paduddhāro kato, taṃ atthadassanamattanti daṭṭhabbaṃ.
வேத³னாபரிச்சே²த³ஜானநேதி ‘‘திஸ்ஸோ இமா வேத³னா’’தி ஏவங் பரிச்சே²த³தோ ஜானநே. அஞ்ஞாஸீதி கதா³ அஞ்ஞாஸி? இமஸ்மிங் தே³ஸனாகாலேதி வத³ந்தி, படிவேத⁴காலேதி பன யுத்தங். யதா²படிவித்³தா⁴ ஹி வேத³னா இத⁴ தே²ரேன தே³ஸிதாதி. இமினா காரணேனாதி ‘‘யத³னிச்சங் தங் து³க்க²’’ந்தி வேத³னானங் அனிச்சதாய து³க்க²பா⁴வஜானநஸங்கா²தேன காரணேன. தங்னிமித்தங் ஹிஸ்ஸ வேத³னாஸு தண்ஹா ந உப்பஜ்ஜதி. அதிப்பபஞ்சோதி அதிவித்தா²ரோ. து³க்க²ஸ்மிங் அந்தோக³த⁴ங் து³க்க²பரியாபன்னத்தா. து³க்க²ந்தி ஸப்³ப³ங் வேத³யிதங் து³க்க²ங் ஸங்கா²ரது³க்க²பா⁴வதோ. ஞாதமத்தேதி யாதா²வதோ அவபு³ஜ்ஜ²னமத்தே. தண்ஹா ந திட்ட²தீதி ந ஸந்திட்ட²தி நப்பவத்ததி.
Vedanāparicchedajānaneti ‘‘tisso imā vedanā’’ti evaṃ paricchedato jānane. Aññāsīti kadā aññāsi? Imasmiṃ desanākāleti vadanti, paṭivedhakāleti pana yuttaṃ. Yathāpaṭividdhā hi vedanā idha therena desitāti. Iminā kāraṇenāti ‘‘yadaniccaṃ taṃ dukkha’’nti vedanānaṃ aniccatāya dukkhabhāvajānanasaṅkhātena kāraṇena. Taṃnimittaṃ hissa vedanāsu taṇhā na uppajjati. Atippapañcoti ativitthāro. Dukkhasmiṃ antogadhaṃ dukkhapariyāpannattā. Dukkhanti sabbaṃ vedayitaṃ dukkhaṃ saṅkhāradukkhabhāvato. Ñātamatteti yāthāvato avabujjhanamatte. Taṇhā na tiṭṭhatīti na santiṭṭhati nappavattati.
கத²ங் விமொக்கா²தி அஜ்ஜ²த்தப³ஹித்³தா⁴பே⁴தே³ஸு விமுத்தா. ஹேதும்ஹி சேதங் நிஸ்ஸக்கவசனந்தி ஹேதுஅத்தே²ன கரணவசனேன அத்த²மாஹ ‘‘கதரேன விமொக்கே²னா’’தி. கரணத்தே²பி வா ஏதங் நிஸ்ஸக்கவசனந்தி ததா² வுத்தங். அபி⁴னிவேஸோதி விபஸ்ஸனாரம்போ⁴. ப³ஹித்³தா⁴த⁴ம்மாபி த³ட்ட²ப்³பா³யேவ ஸப்³ப³ஸ்ஸபி பரிஞ்ஞெய்யஸ்ஸ பரிஜானிதப்³ப³தோ. ஞாணங் பவத்தெத்வா. தேதி அஜ்ஜ²த்தஸங்கா²ரே. வவத்த²பெத்வாதி ஸலக்க²ணதோ பரிச்சி²ந்தி³த்வா. ப³ஹித்³தா⁴ ஓதாரேதீதி ப³ஹித்³தா⁴ஸங்கா²ரேஸு ஞாணங் ஓதாரேதி. அஜ்ஜ²த்தங் ஓதாரேதீதி அஜ்ஜ²த்தஸங்கா²ரே ஸம்மஸதி. தத்ர தஸ்மிங் சதுக்கே. தேஸங் வவத்தா²னகாலேதி தேஸங் அஜ்ஜ²த்தஸங்கா²ரானங் விபஸ்ஸனாகாலே.
Kathaṃ vimokkhāti ajjhattabahiddhābhedesu vimuttā. Hetumhi cetaṃ nissakkavacananti hetuatthena karaṇavacanena atthamāha ‘‘katarena vimokkhenā’’ti. Karaṇatthepi vā etaṃ nissakkavacananti tathā vuttaṃ. Abhinivesoti vipassanārambho. Bahiddhādhammāpi daṭṭhabbāyeva sabbassapi pariññeyyassa parijānitabbato. Ñāṇaṃ pavattetvā. Teti ajjhattasaṅkhāre. Vavatthapetvāti salakkhaṇato paricchinditvā. Bahiddhā otāretīti bahiddhāsaṅkhāresu ñāṇaṃ otāreti. Ajjhattaṃ otāretīti ajjhattasaṅkhāre sammasati. Tatra tasmiṃ catukke. Tesaṃ vavatthānakāleti tesaṃ ajjhattasaṅkhārānaṃ vipassanākāle.
ஸப்³பு³பாதா³னக்க²யாதி ஸப்³ப³ஸோ உபாதா³னானங் க²யா. காமங் தி³ட்டி²ஸீலப்³ப³தஅத்தவாது³பாதா³னானி பட²மமக்³கே³னேவ கீ²யந்தி, காமுபாதா³னங் பன அக்³க³மக்³கே³னாதி தஸ்ஸ வஸேன ‘‘ஸப்³பு³பாதா³னக்க²யா’’தி வத³ந்தோ தே²ரோ அத்தனோ அரஹத்தபத்திங் ப்³யாகரோதி. தேனாஹ ‘‘ஆஸவா நானுஸ்ஸவந்தீ’’தி. ஸதோதி இமினா ஸதிவேபுல்லப்பத்திங் த³ஸ்ஸேதி. சக்கு²தோ ரூபே ஸவந்தீதி சக்கு²விஞ்ஞாணவீதி²யங் தத³னுக³தமனோவிஞ்ஞாணவீதி²யஞ்ச ரூபாரம்மணா ஆஸவா பவத்தந்தீதி. கிஞ்சாபி தத்த² குஸலாதீ³னம்பி பவத்தி அத்தி², காமாஸவாத³யோ ஏவ வணதோ யூஸங் விய பக்³க⁴ரணகஅஸுசிபா⁴வேன ஸந்த³ந்தி, ததா² ஸேஸவாரேஸு. தேனாஹ ‘‘ஏவ’’ந்திஆதி³, தஸ்மா தே ஏவ ‘‘ஆஸவா’’தி வுச்சந்தி. தத்த² ஹி பக்³க⁴ரணகஅஸுசிம்ஹி நிருள்ஹோ ஆஸவஸத்³தோ³. ‘‘அத்தானங் நாவஜானாமீ’’தி வுத்தத்தா ‘‘ஓமானபஹானங் கதி²த’’ந்தி ஆஹ. தேன ஆஸவேஸு ஸமுதா³யுபலக்க²ணங் கதி²தந்தி த³ட்ட²ப்³ப³ங். ந ஹி ஸெய்யமானாதி³ப்பஹானேன வினா ஹீனமானங்யேவ பஜஹதி. பஜானநாதி ‘‘நாபரங் இத்த²த்தாயா’’தி வுத்தபஜானநஸம்பன்னோ ஹோதீதி.
Sabbupādānakkhayāti sabbaso upādānānaṃ khayā. Kāmaṃ diṭṭhisīlabbataattavādupādānāni paṭhamamaggeneva khīyanti, kāmupādānaṃ pana aggamaggenāti tassa vasena ‘‘sabbupādānakkhayā’’ti vadanto thero attano arahattapattiṃ byākaroti. Tenāha ‘‘āsavā nānussavantī’’ti. Satoti iminā sativepullappattiṃ dasseti. Cakkhuto rūpe savantīti cakkhuviññāṇavīthiyaṃ tadanugatamanoviññāṇavīthiyañca rūpārammaṇā āsavā pavattantīti. Kiñcāpi tattha kusalādīnampi pavatti atthi, kāmāsavādayo eva vaṇato yūsaṃ viya paggharaṇakaasucibhāvena sandanti, tathā sesavāresu. Tenāha ‘‘eva’’ntiādi, tasmā te eva ‘‘āsavā’’ti vuccanti. Tattha hi paggharaṇakaasucimhi niruḷho āsavasaddo. ‘‘Attānaṃ nāvajānāmī’’ti vuttattā ‘‘omānapahānaṃ kathita’’nti āha. Tena āsavesu samudāyupalakkhaṇaṃ kathitanti daṭṭhabbaṃ. Na hi seyyamānādippahānena vinā hīnamānaṃyeva pajahati. Pajānanāti ‘‘nāparaṃ itthattāyā’’ti vuttapajānanasampanno hotīti.
ஸரூபபே⁴த³தோபீதி ‘‘சத்தாரோ’’தி ஏவங் பரிமாணபரிச்சே²த³தோபி. இத³ங் ப⁴க³வா த³ஸ்ஸெந்தோ ஆஹாதி ஸம்ப³ந்தோ⁴. இத³ந்தி ச ‘‘அயம்பி கோ²’’திஆதி³வசனங் ஸந்தா⁴யாஹ.
Sarūpabhedatopīti ‘‘cattāro’’ti evaṃ parimāṇaparicchedatopi. Idaṃ bhagavā dassento āhāti sambandho. Idanti ca ‘‘ayampi kho’’tiādivacanaṃ sandhāyāha.
அஸம்பி⁴ன்னாய ஏவாதி யதா²னிஸின்னாய ஏவ, அவுட்டி²தாய ஏவாதி அத்தோ². புக்³க³லதோ²மனத்த²ந்தி தே³ஸனாகுஸலானங் ஆனந்த³த்தே²ராதீ³னங் புக்³க³லானங் பஸங்ஸனத்த²ங் உக்கங்ஸனத்த²ங். த⁴ம்மதோ²மனத்த²ந்தி படிபத்தித⁴ம்மஸ்ஸ பஸங்ஸனத்த²ங். தேபீதி ஆனந்த³த்தே²ராத³யோ பி⁴க்கூ²பி. த⁴ம்மபடிக்³கா³ஹகா பி⁴க்கூ². அத்தே²தி ஸீலாதி³அத்தே². த⁴ம்மேதி பாளித⁴ம்மே.
Asambhinnāya evāti yathānisinnāya eva, avuṭṭhitāya evāti attho. Puggalathomanatthanti desanākusalānaṃ ānandattherādīnaṃ puggalānaṃ pasaṃsanatthaṃ ukkaṃsanatthaṃ. Dhammathomanatthanti paṭipattidhammassa pasaṃsanatthaṃ. Tepīti ānandattherādayo bhikkhūpi. Dhammapaṭiggāhakā bhikkhū. Attheti sīlādiatthe. Dhammeti pāḷidhamme.
அஸ்ஸாதி ப⁴க³வதோ. ஆனுபா⁴வங் கரிஸ்ஸதி ‘‘தி³வஸஞ்சேபி ப⁴க³வா’’திஆதி³னா. நந்தி ஸாரிபுத்தத்தே²ரங். அஹம்பி ததே²வ தோ²மெஸ்ஸாமி ‘‘ஸா ஹி பி⁴க்கூ²’’திஆதி³னா. ஏவங் சிந்தேஸீதி ஏவங் வக்க²மானேன த⁴ம்மதா³யாத³தே³ஸனாய சிந்திதாகாரேன சிந்தேஸி. தேனாஹ ‘‘யதா²’’திஆதி³. ஏகஜ்ஜா²ஸயாயாதி ஸமானாதி⁴ப்பாயாய. மதியாதி பஞ்ஞாய. அயங் தே³ஸனா அக்³கா³தி ப⁴க³வா த⁴ம்மஸேனாபதிங் கு³ணதோ ஏவங் பக்³க³ண்ஹாதீதி கத்வா வுத்தங்.
Assāti bhagavato. Ānubhāvaṃ karissati ‘‘divasañcepi bhagavā’’tiādinā. Nanti sāriputtattheraṃ. Ahampi tatheva thomessāmi ‘‘sā hi bhikkhū’’tiādinā. Evaṃ cintesīti evaṃ vakkhamānena dhammadāyādadesanāya cintitākārena cintesi. Tenāha ‘‘yathā’’tiādi. Ekajjhāsayāyāti samānādhippāyāya. Matiyāti paññāya. Ayaṃ desanā aggāti bhagavā dhammasenāpatiṃ guṇato evaṃ paggaṇhātīti katvā vuttaṃ.
பகாஸெத்வாதி கு³ணதோ பாகடங் பஞ்ஞாதங் கத்வா ஸப்³ப³ஸாவகேஹி ஸெட்ட²பா⁴வே ட²பேதுகாமோ. சித்தக³தியா சித்தவஸேன காயஸ்ஸ பரிணாமனேன ‘‘அயங் காயோ இத³ங் சித்தங் விய ஹோதூ’’தி காயஸமானக³திகத்தாதி⁴ட்டா²னேன. கத²ங் பன காயோ த³ந்த⁴ப்பவத்திகோ லஹுபரிவத்தேன சித்தேன ஸமானக³திகோ ஹோதீதி? ந ஸப்³ப³தா² ஸமானக³திகோ. யதே²வ ஹி காயவஸேன சித்தவிபரிணாமனே சித்தங் ஸப்³ப³தா² காயேன ஸமானக³திகங் ஹோதி. ந ஹி ததா³ சித்தங் ஸபா⁴வஸித்³தே⁴ன அத்தனோ க²ணேன அவத்தித்வா த³ந்த⁴வுத்திகஸ்ஸ ரூபத⁴ம்மஸ்ஸ க²ணேன வத்திதுங் ஸக்கோதி, ‘‘இத³ங் சித்தங் அயங் காயோ விய ஹோதூ’’தி பனாதி⁴ட்டா²னேன த³ந்த⁴க³திகஸ்ஸ காயஸ்ஸ அனுவத்தனதோ யாவ இச்சி²தட்டா²னப்பத்தி ஹோதி, தாவ காயக³திஅனுலோமேனேவ ஹுத்வா ஸந்தானவஸேன பவத்தமானங் சித்தங் காயக³தியா பரிணாமிதங் நாம ஹோதி, ஏவங் ‘‘அயங் காயோ இத³ங் சித்தங் விய ஹோதூ’’தி அதி⁴ட்டா²னேன பகே³வ ஸுக²லஹுஸஞ்ஞாய ஸம்பாதி³தத்தா அபா⁴விதித்³தி⁴பாதா³னங் விய த³ந்த⁴ங் அவத்தித்வா யதா² லஹுகதிபயசித்தவாரேஹேவ இச்சி²தட்டா²னப்பதி ஹோதி, ஏவங் பவத்தரூபதா விஞ்ஞாயதீதி.
Pakāsetvāti guṇato pākaṭaṃ paññātaṃ katvā sabbasāvakehi seṭṭhabhāve ṭhapetukāmo. Cittagatiyā cittavasena kāyassa pariṇāmanena ‘‘ayaṃ kāyo idaṃ cittaṃ viya hotū’’ti kāyasamānagatikattādhiṭṭhānena. Kathaṃ pana kāyo dandhappavattiko lahuparivattena cittena samānagatiko hotīti? Na sabbathā samānagatiko. Yatheva hi kāyavasena cittavipariṇāmane cittaṃ sabbathā kāyena samānagatikaṃ hoti. Na hi tadā cittaṃ sabhāvasiddhena attano khaṇena avattitvā dandhavuttikassa rūpadhammassa khaṇena vattituṃ sakkoti, ‘‘idaṃ cittaṃ ayaṃ kāyo viya hotū’’ti panādhiṭṭhānena dandhagatikassa kāyassa anuvattanato yāva icchitaṭṭhānappatti hoti, tāva kāyagatianulomeneva hutvā santānavasena pavattamānaṃ cittaṃ kāyagatiyā pariṇāmitaṃ nāma hoti, evaṃ ‘‘ayaṃ kāyo idaṃ cittaṃ viya hotū’’ti adhiṭṭhānena pageva sukhalahusaññāya sampāditattā abhāvitiddhipādānaṃ viya dandhaṃ avattitvā yathā lahukatipayacittavāreheva icchitaṭṭhānappati hoti, evaṃ pavattarūpatā viññāyatīti.
அதி⁴ப்பாயானுரூபமேவ தஸ்ஸ ப⁴க³வதோ தோ²மனாய கதத்தா. இத³ங் நாம அத்த²ஜாதங் ப⁴க³வா புச்சி²ஸ்ஸதீதி புப்³பே³ மயா அவிதி³தங் அபஸ்ஸங். ஆஸயஜானநத்த²ந்தி ‘‘ஏவங் ப்³யாகரொந்தேன ஸத்து² அஜ்ஜா²ஸயோ க³ஹிதோ ஹோதீ’’தி ஏவங் ஸத்து² அஜ்ஜா²ஸயஜானநத்த²ங். து³தியங் பஞ்ஹங் புச்ச²ந்தோ ப⁴க³வா பட²மங் பஞ்ஹங் அனுமோதி³ து³தியங் பஞ்ஹங் புச்ச²ந்தேனேவ பட²மபஞ்ஹவிஸ்ஸஜ்ஜனஸ்ஸ ஸம்படிச்சி²தபா⁴வதோ.
Adhippāyānurūpameva tassa bhagavato thomanāya katattā. Idaṃ nāma atthajātaṃ bhagavā pucchissatīti pubbe mayā aviditaṃ apassaṃ. Āsayajānanatthanti ‘‘evaṃ byākarontena satthu ajjhāsayo gahito hotī’’ti evaṃ satthu ajjhāsayajānanatthaṃ. Dutiyaṃ pañhaṃ pucchanto bhagavā paṭhamaṃ pañhaṃ anumodi dutiyaṃ pañhaṃ pucchanteneva paṭhamapañhavissajjanassa sampaṭicchitabhāvato.
ஏதங் அஹோஸீதி ஏதங் பரிவிதக்கனங் அஹோஸி. அஸ்ஸாதி களாரக²த்தியஸ்ஸ பி⁴க்கு²னோ. த⁴ம்மே த³ஹதீதி த⁴ம்மதா⁴து, ஸாவகபாரமீஞாணங், ஸாவகவிஸயே த⁴ம்மே த³ஹதி யாதா²வதோ அஜிதே கத்வா ட²பேதீதி அத்தோ². தேனாஹ ‘‘த⁴ம்மதா⁴தூ’’திஆதி³. ஸப்³ப³ஞ்ஞுதஞ்ஞாணக³திகமேவ விஸயே. கோ³சரத⁴ம்மேதி கோ³சரபூ⁴தே ஞெய்யத⁴ம்மே.
Etaṃ ahosīti etaṃ parivitakkanaṃ ahosi. Assāti kaḷārakhattiyassa bhikkhuno. Dhamme dahatīti dhammadhātu, sāvakapāramīñāṇaṃ, sāvakavisaye dhamme dahati yāthāvato ajite katvā ṭhapetīti attho. Tenāha ‘‘dhammadhātū’’tiādi. Sabbaññutaññāṇagatikameva visaye. Gocaradhammeti gocarabhūte ñeyyadhamme.
களாரஸுத்தவண்ணனா நிட்டி²தா.
Kaḷārasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. களாரஸுத்தங் • 2. Kaḷārasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. களாரஸுத்தவண்ணனா • 2. Kaḷārasuttavaṇṇanā
