| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૩. કાળિગોધાપુત્તભદ્દિયત્થેરઅપદાનવણ્ણના
3. Kāḷigodhāputtabhaddiyattheraapadānavaṇṇanā
પદુમુત્તરસમ્બુદ્ધન્તિઆદિકં આયસ્મતો ભદ્દિયસ્સ કાળિગોધાપુત્તત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે વિભવસમ્પન્ને એકસ્મિં કુલે નિબ્બત્તો વુદ્ધિપ્પત્તો પુત્તદારેહિ વડ્ઢિતો નગરવાસિનો પુઞ્ઞાનિ કરોન્તે દિસ્વા સયમ્પિ પુઞ્ઞાનિ કાતુકામો બુદ્ધપ્પમુખં ભિક્ખુસઙ્ઘં નિમન્તેત્વા થૂલપટલિકાદિઅનેકાનિ મહારહાનિ સયનાનિ પઞ્ઞાપેત્વા તત્થ નિસિન્ને ભગવતિ સસઙ્ઘે પણીતેનાહારેન ભોજેત્વા મહાદાનં અદાસિ. સો એવં યાવતાયુકં પુઞ્ઞાનિ કત્વા દેવમનુસ્સેસુ ઉભયસમ્પત્તિયો અનુભવિત્વા અપરભાગે ઇમસ્મિં બુદ્ધુપ્પાદે કાળિગોધાય નામ દેવિયા પુત્તો હુત્વા નિબ્બત્તિ. સો વિઞ્ઞુતં પત્તો આરોહપરિણાહહત્થપાદરૂપસમ્પત્તિયા ભદ્દત્તા ચ કાળિગોધાય દેવિયા પુત્તત્તા ચ ભદ્દિયો કાળિગોધાપુત્તોતિ પાકટો. સત્થરિ પસીદિત્વા માતાપિતરો આરાધેત્વા પબ્બજિત્વા નચિરસ્સેવ અરહા અહોસિ.
Padumuttarasambuddhantiādikaṃ āyasmato bhaddiyassa kāḷigodhāputtattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle vibhavasampanne ekasmiṃ kule nibbatto vuddhippatto puttadārehi vaḍḍhito nagaravāsino puññāni karonte disvā sayampi puññāni kātukāmo buddhappamukhaṃ bhikkhusaṅghaṃ nimantetvā thūlapaṭalikādianekāni mahārahāni sayanāni paññāpetvā tattha nisinne bhagavati sasaṅghe paṇītenāhārena bhojetvā mahādānaṃ adāsi. So evaṃ yāvatāyukaṃ puññāni katvā devamanussesu ubhayasampattiyo anubhavitvā aparabhāge imasmiṃ buddhuppāde kāḷigodhāya nāma deviyā putto hutvā nibbatti. So viññutaṃ patto ārohapariṇāhahatthapādarūpasampattiyā bhaddattā ca kāḷigodhāya deviyā puttattā ca bhaddiyo kāḷigodhāputtoti pākaṭo. Satthari pasīditvā mātāpitaro ārādhetvā pabbajitvā nacirasseva arahā ahosi.
૫૪. સો અરહા હુત્વા અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પદુમુત્તરસમ્બુદ્ધન્તિઆદિમાહ. તં હેટ્ઠા વુત્તત્થમેવ. મેત્તચિત્તન્તિ મિજ્જતિ સિનેહતિ નન્દતિ સબ્બસત્તેતિ મેત્તા, મેત્તાય સહગતં ચિત્તં મેત્તચિત્તં, તં યસ્સ ભગવતો અત્થીતિ મેત્તચિત્તો, તં મેત્તચિત્તં. મહામુનિન્તિ સકલભિક્ખૂનં મહન્તત્તા મહામુનિ, તં પદુમુત્તરં સમ્બુદ્ધન્તિ સમ્બન્ધો. જનતા સબ્બાતિ સબ્બો જનકાયો, સબ્બનગરવાસિનોતિ અત્થો. સબ્બલોકગ્ગનાયકન્તિ સકલલોકસ્સ અગ્ગં સેટ્ઠં નિબ્બાનસ્સ નયનતો પાપનતો નાયકં પદુમુત્તરસમ્બુદ્ધં જનતા ઉપેતિ સમીપં ગચ્છતીતિ સમ્બન્ધો.
54. So arahā hutvā attano pubbakammaṃ saritvā somanassajāto pubbacaritāpadānaṃ pakāsento padumuttarasambuddhantiādimāha. Taṃ heṭṭhā vuttatthameva. Mettacittanti mijjati sinehati nandati sabbasatteti mettā, mettāya sahagataṃ cittaṃ mettacittaṃ, taṃ yassa bhagavato atthīti mettacitto, taṃ mettacittaṃ. Mahāmuninti sakalabhikkhūnaṃ mahantattā mahāmuni, taṃ padumuttaraṃ sambuddhanti sambandho. Janatā sabbāti sabbo janakāyo, sabbanagaravāsinoti attho. Sabbalokagganāyakanti sakalalokassa aggaṃ seṭṭhaṃ nibbānassa nayanato pāpanato nāyakaṃ padumuttarasambuddhaṃ janatā upeti samīpaṃ gacchatīti sambandho.
૫૫. સત્તુકઞ્ચ બદ્ધકઞ્ચાતિ બદ્ધસત્તુઅબદ્ધસત્તુસઙ્ખાતં આમિસં. અથ વા ભત્તપૂપખજ્જભોજ્જયાગુઆદયો યાવકાલિકત્તા આમિસં પાનભોજનઞ્ચ ગહેત્વા પુઞ્ઞક્ખેત્તે અનુત્તરે સત્થુનો દદન્તીતિ સમ્બન્ધો.
55.Sattukañca baddhakañcāti baddhasattuabaddhasattusaṅkhātaṃ āmisaṃ. Atha vā bhattapūpakhajjabhojjayāguādayo yāvakālikattā āmisaṃ pānabhojanañca gahetvā puññakkhette anuttare satthuno dadantīti sambandho.
૫૮. આસનં બુદ્ધયુત્તકન્તિ બુદ્ધયોગ્ગં બુદ્ધારહં બુદ્ધાનુચ્છવિકં સત્તરતનમયં આસનન્તિ અત્થો. સેસં નયાનુયોગેન સુવિઞ્ઞેય્યમેવાતિ.
58.Āsanaṃ buddhayuttakanti buddhayoggaṃ buddhārahaṃ buddhānucchavikaṃ sattaratanamayaṃ āsananti attho. Sesaṃ nayānuyogena suviññeyyamevāti.
કાળિગોધાપુત્તભદ્દિયત્થેરઅપદાનવણ્ણના સમત્તા.
Kāḷigodhāputtabhaddiyattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૩. કાળિગોધાપુત્તભદ્દિયત્થેરઅપદાનં • 3. Kāḷigodhāputtabhaddiyattheraapadānaṃ
