| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. காமத³ஸுத்தவண்ணனா
6. Kāmadasuttavaṇṇanā
87. புப்³ப³யோகா³வசரோதி புப்³பே³ யோகா³வசரோ புரிமத்தபா⁴வே பா⁴வனமனுயுத்தோ. அயங் கிர கஸ்ஸபஸ்ஸ ப⁴க³வதோ ஸாஸனே பப்³ப³ஜித்வாவ ப³ஹூனி வஸ்ஸஸஹஸ்ஸானி ஸமணத⁴ம்மங் அகாஸி, ந பன விஸேஸங் நிப்³ப³த்தேஸி. தமத்த²ங் காரணேன ஸத்³தி⁴ங் த³ஸ்ஸேதுங் ‘‘ப³ஹலகிலேஸதாயா’’திஆதி³ வுத்தங். ஏகந்தபரிஸுத்³த⁴ஸ்ஸாதி யதா² விஸேஸாவஹோ ஹோதி , ஏவங் ஏகந்தேன பரிஸுத்³த⁴ஸ்ஸ ஸப்³ப³ஸோ அனுபக்கிலிட்ட²ஸ்ஸ. ஸீலேன ஸமாஹிதாதி யதா² ஸீலங் உபரூபரி விஸேஸாவஹங் நிப்³பே³த⁴பா⁴கி³யஞ்ச ஹோதி, ஏவங் ஸம்மதே³வ ஆஹிதசித்தா ஸுட்டு² ஸம்பன்னசித்தா. ததா²பூ⁴தா தேன ஸமன்னாக³தா ஹொந்தீதி ஆஹ ‘‘ஸமுபேதா’’தி. பதிட்டி²தஸபா⁴வாதி ஸெக்க²த்தா ஏவ யதா²தி⁴க³தத⁴ம்மேன நிச்சலபா⁴வேன அதி⁴ட்டி²தஸபா⁴வா. மயா துட்டி²யா க³ஹிதாய தே³வபுத்தோ ‘‘து³ல்லபா⁴ துட்டீ²’’தி வக்க²தீதி ப⁴க³வா ‘‘துட்டி² ஹோதி ஸுகா²வஹா’’தி அவோசாதி ஆஹ ‘‘உபரி பஞ்ஹஸமுட்டா²பனத்த²’’ந்தி. பப்³ப³ஜிதோ ருக்க²மூலிகோ அப்³போ⁴காஸிகோ வா அனகா³ரியுபேதோ நாம ஹோதி, ஸேனாஸனே பன வஸந்தோ கத²ந்தி ஆஹ ‘‘ஸத்தபூ⁴மிகே’’திஆதி³. சதுபச்சயஸந்தோஸோதி பா⁴வனாபி⁴யோக³ஸித்³தோ⁴ சதூஸு பச்சயேஸு ஸந்தோஸோ. தேன சித்தவூபஸமேன துட்டி² லத்³தா⁴தி த³ஸ்ஸேதி. சித்தவூபஸமபா⁴வனாயாதி சித்தகிலேஸானங் வூபஸமகரபா⁴வனாய, மனச்ச²ட்டா²னங் இந்த்³ரியானங் நிப்³பி³ஸேவனபா⁴வகரணேன ஸவிஸேஸங் சித்தஸ்ஸ வூபஸமகரபா⁴வனாய ரதோ மனோதி யோஜனா.
87.Pubbayogāvacaroti pubbe yogāvacaro purimattabhāve bhāvanamanuyutto. Ayaṃ kira kassapassa bhagavato sāsane pabbajitvāva bahūni vassasahassāni samaṇadhammaṃ akāsi, na pana visesaṃ nibbattesi. Tamatthaṃ kāraṇena saddhiṃ dassetuṃ ‘‘bahalakilesatāyā’’tiādi vuttaṃ. Ekantaparisuddhassāti yathā visesāvaho hoti , evaṃ ekantena parisuddhassa sabbaso anupakkiliṭṭhassa. Sīlena samāhitāti yathā sīlaṃ uparūpari visesāvahaṃ nibbedhabhāgiyañca hoti, evaṃ sammadeva āhitacittā suṭṭhu sampannacittā. Tathābhūtā tena samannāgatā hontīti āha ‘‘samupetā’’ti. Patiṭṭhitasabhāvāti sekkhattā eva yathādhigatadhammena niccalabhāvena adhiṭṭhitasabhāvā. Mayā tuṭṭhiyā gahitāya devaputto ‘‘dullabhā tuṭṭhī’’ti vakkhatīti bhagavā ‘‘tuṭṭhi hoti sukhāvahā’’ti avocāti āha ‘‘upari pañhasamuṭṭhāpanattha’’nti. Pabbajito rukkhamūliko abbhokāsiko vā anagāriyupeto nāma hoti, senāsane pana vasanto kathanti āha ‘‘sattabhūmike’’tiādi. Catupaccayasantosoti bhāvanābhiyogasiddho catūsu paccayesu santoso. Tena cittavūpasamena tuṭṭhi laddhāti dasseti. Cittavūpasamabhāvanāyāti cittakilesānaṃ vūpasamakarabhāvanāya, manacchaṭṭhānaṃ indriyānaṃ nibbisevanabhāvakaraṇena savisesaṃ cittassa vūpasamakarabhāvanāya rato manoti yojanā.
எத்த² ச இந்த்³ரியூபஸமேன சித்தஸமாதா⁴னங் பரிபுண்ணங் ஹோதி இந்த்³ரியபா⁴வனாய சித்தஸமாதா⁴னஸ்ஸ அகாரகானங் தூ³ரீகரணதோ. அதி⁴சித்தஸமாதா⁴னேன சதுபச்சயஸந்தோஸோ ஸவிஸேஸங் பரிஸுத்³தோ⁴ பரிபுண்ணோ ச ஹோதி பச்சயானங் அலாப⁴லாபே⁴ஸு பரிச்சாக³ஸபா⁴வதோ. வுத்தனயேன பன ஸந்துட்ட²ஸ்ஸ யதா²ஸமாதி³ன்னங் ஸீலங் விஸுஜ்ஜ²தி பாரிபூரிஞ்ச உபக³ச்ச²தி, ததா²பூ⁴தோ சதுஸச்சகம்மட்டா²னே யுத்தோ மக்³க³படிபாடியா ஸப்³ப³ஸோ கிலேஸே ஸமுச்சி²ந்த³ந்தோ நிப்³பா³னதி³ட்டோ² ஹோதீதி இமமத்த²ங் த³ஸ்ஸேதி ‘‘யே ரத்திந்தி³வ’’ந்திஆதி³னா. கிங் ந க³ச்சி²ஸ்ஸந்தி? க³மிஸ்ஸந்தேவாதி அரியமக்³க³பா⁴வனங் பஹாய ஸம்மாபடிபத்தியா து³க்கரபா⁴வங் ஸந்தா⁴ய ஸாஸங்கங் வத³தி. தேனாஹ ‘‘அயங் பன து³க்³க³மோ ப⁴க³வா விஸமோ மக்³கோ³’’தி.
Ettha ca indriyūpasamena cittasamādhānaṃ paripuṇṇaṃ hoti indriyabhāvanāya cittasamādhānassa akārakānaṃ dūrīkaraṇato. Adhicittasamādhānena catupaccayasantoso savisesaṃ parisuddho paripuṇṇo ca hoti paccayānaṃ alābhalābhesu pariccāgasabhāvato. Vuttanayena pana santuṭṭhassa yathāsamādinnaṃ sīlaṃ visujjhati pāripūriñca upagacchati, tathābhūto catusaccakammaṭṭhāne yutto maggapaṭipāṭiyā sabbaso kilese samucchindanto nibbānadiṭṭho hotīti imamatthaṃ dasseti ‘‘ye rattindiva’’ntiādinā. Kiṃ na gacchissanti? Gamissantevāti ariyamaggabhāvanaṃ pahāya sammāpaṭipattiyā dukkarabhāvaṃ sandhāya sāsaṅkaṃ vadati. Tenāha ‘‘ayaṃ pana duggamo bhagavā visamo maggo’’ti.
தத்த² கேசி ‘‘அயங் பனாதி தே³வபுத்தோ. ஸோ ஹி ப⁴க³வதோ ‘அரியா க³ச்ச²ந்தீ’தி வசனங் ஸுத்வா ‘து³க்³க³மோ ப⁴க³வா’திஆதி³மாஹா’’தி வத³ந்தி, தங் ந யுஜ்ஜதி. யஸ்மா ‘‘ஸச்சமேத’’ந்தி ஏவமாதி³பி தஸ்ஸேவ வேவசனங் கத்வா த³ஸ்ஸிதங், தஸ்மா ‘‘யேன மக்³கே³ன அரியா க³ச்ச²ந்தீ’’தி தும்ஹேஹி வுத்தங், அயங் பன ‘‘து³க்³க³மோ ப⁴க³வா விஸமோ மக்³கோ³’’தி ஆஹ தே³வபுத்தோ. அரியமக்³கோ³ காமங் கதா³சி அதிது³க்கா² படிபதா³திபி வுச்சதி, தஞ்ச கோ² புப்³ப³பா⁴க³படிபதா³வஸேன, அயங் பன அதீவ ஸுக³மோ ஸப்³ப³கிலேஸது³க்³க³விவஜ்ஜனதோ காயது³ச்சரிதாதி³விஸமஸ்ஸ ராகா³தி³விஸமஸ்ஸ ச தூ³ரீகரணதோ ந விஸமோ. தேனாஹ ‘‘புப்³ப³பா⁴க³படிபதா³யா’’திஆதி³. அஸ்ஸாதி அரியமக்³க³ஸ்ஸ. அரியமக்³க³ஸ்ஸ ஹி அதி⁴ஸீலஸிக்கா²தீ³னங் பரிபு³ந்தி⁴தப்³ப³பா⁴கே³ன ப³ஹூ பரிஸ்ஸயா ஹொந்தீதி. ஏவங் வுத்தோதி ‘‘து³க்³க³மோ விஸமோ’’தி ச ஏவங் வுத்தோ.
Tattha keci ‘‘ayaṃ panāti devaputto. So hi bhagavato ‘ariyā gacchantī’ti vacanaṃ sutvā ‘duggamo bhagavā’tiādimāhā’’ti vadanti, taṃ na yujjati. Yasmā ‘‘saccameta’’nti evamādipi tasseva vevacanaṃ katvā dassitaṃ, tasmā ‘‘yena maggena ariyā gacchantī’’ti tumhehi vuttaṃ, ayaṃ pana ‘‘duggamo bhagavā visamo maggo’’ti āha devaputto. Ariyamaggo kāmaṃ kadāci atidukkhā paṭipadātipi vuccati, tañca kho pubbabhāgapaṭipadāvasena, ayaṃ pana atīva sugamo sabbakilesaduggavivajjanato kāyaduccaritādivisamassa rāgādivisamassa ca dūrīkaraṇato na visamo. Tenāha ‘‘pubbabhāgapaṭipadāyā’’tiādi. Assāti ariyamaggassa. Ariyamaggassa hi adhisīlasikkhādīnaṃ paribundhitabbabhāgena bahū parissayā hontīti. Evaṃ vuttoti ‘‘duggamo visamo’’ti ca evaṃ vutto.
அவங்ஸிராதி அனுட்ட²ஹனேன அதோ⁴பூ⁴தஉத்தமங்கா³. குஸலங்கே³ஸு ஹி ஸம்மாதி³ட்டி² உத்தமங்கா³ ஸப்³ப³ஸெட்ட²த்தா , தஞ்ச அனரியா பதந்தி ந உட்ட²ஹந்தி மிச்சா²படிபஜ்ஜனதோ. தேனாஹ ‘‘ஞாணஸிரேனா’’திஆதி³. அனரியமக்³கே³தி மிச்சா²மக்³கே³. தேனாஹ ‘‘விஸமே மக்³கே³’’தி. தங் மக்³க³னதோ அனரியா அரியானங் மக்³க³தோ அபாபுணனேன பரிச்சத்தா ஹுத்வா அபாயே ஸகலவட்டது³க்கே² ச பதந்தி. ஸ்வேவாதி ஸ்வாயங் அனரியேஹி கதா³சிபி க³ந்துங் அஸக்குணெய்யோ மக்³கோ³ அரியானங் விஸுத்³த⁴ஸத்தானங் ஸப்³ப³ஸோ ஸமதி⁴க³மேன ஸமோ ஹோதி. காயவிஸமாதீ³ஹி ஸமன்னாக³தத்தா விஸமே ஸத்தகாயே தேஸங் ஸப்³ப³ஸோவ பஹானேன ஸப்³ப³த்த² ஸமாயேவ.
Avaṃsirāti anuṭṭhahanena adhobhūtauttamaṅgā. Kusalaṅgesu hi sammādiṭṭhi uttamaṅgā sabbaseṭṭhattā , tañca anariyā patanti na uṭṭhahanti micchāpaṭipajjanato. Tenāha ‘‘ñāṇasirenā’’tiādi. Anariyamaggeti micchāmagge. Tenāha ‘‘visame magge’’ti. Taṃ magganato anariyā ariyānaṃ maggato apāpuṇanena pariccattā hutvā apāye sakalavaṭṭadukkhe ca patanti. Svevāti svāyaṃ anariyehi kadācipi gantuṃ asakkuṇeyyo maggo ariyānaṃ visuddhasattānaṃ sabbaso samadhigamena samo hoti. Kāyavisamādīhi samannāgatattā visame sattakāye tesaṃ sabbasova pahānena sabbattha samāyeva.
காமத³ஸுத்தவண்ணனா நிட்டி²தா.
Kāmadasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. காமத³ஸுத்தங் • 6. Kāmadasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. காமத³ஸுத்தவண்ணனா • 6. Kāmadasuttavaṇṇanā
