| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. காமகு³ணஸுத்தவண்ணனா
4. Kāmaguṇasuttavaṇṇanā
117. சேதஸோதி கரணே ஸாமிவசனங். சித்தேன ஸங்பு²ஸனங் நாம அனுப⁴வோதி ஆஹ ‘‘சித்தேன அனுபூ⁴தபுப்³பா³’’தி. உதுத்தயானுரூபதாவஸேன பாஸாத³த்தயங், தங் வஸேன திவித⁴னாடகபே⁴தோ³. மனோரம்மதாமத்தேன காமகு³ணங் கத்வா த³ஸ்ஸிதங், ந காமவஸேன. ந ஹி அபி⁴னிக்க²மனதோ உத்³த⁴ங் போ³தி⁴ஸத்தஸ்ஸ காமவிதக்கா பூ⁴தபுப்³பா³. தேனாஹ மாரோ பாபிமா –
117.Cetasoti karaṇe sāmivacanaṃ. Cittena saṃphusanaṃ nāma anubhavoti āha ‘‘cittena anubhūtapubbā’’ti. Ututtayānurūpatāvasena pāsādattayaṃ, taṃ vasena tividhanāṭakabhedo. Manorammatāmattena kāmaguṇaṃ katvā dassitaṃ, na kāmavasena. Na hi abhinikkhamanato uddhaṃ bodhisattassa kāmavitakkā bhūtapubbā. Tenāha māro pāpimā –
‘‘ஸத்த வஸ்ஸானி ப⁴க³வந்தங், அனுப³ந்தி⁴ங் பதா³பத³ங்;
‘‘Satta vassāni bhagavantaṃ, anubandhiṃ padāpadaṃ;
ஓதாரங் நாதி⁴க³ச்சி²ஸ்ஸங், ஸம்பு³த்³த⁴ஸ்ஸ ஸதீமதோ’’தி. (ஸு॰ நி॰ 448);
Otāraṃ nādhigacchissaṃ, sambuddhassa satīmato’’ti. (su. ni. 448);
மெத்தெய்யோ நாமாதிஆதி³ அனாக³தாரம்மணத³ஸ்ஸனமத்தங், ந போ³தி⁴ஸத்தஸ்ஸ ஏவங் உப்பஜ்ஜதீதி. அத்தா பியாயிதப்³ப³ரூபோ ஏதஸ்ஸாதி அத்தரூபோ, உத்தரபதே³ புரிமபத³லோபேனாதி ‘‘அத்தனோ ஹிதகாமஜாதிகேனா’’தி அத்தோ² வுத்தோ. அத்தரூபேனாதி வா பீதிஸோமனஸ்ஸேஹி க³ஹிதஸபா⁴வேன துட்ட²பஹட்டே²ன உத³க்³கு³த³க்³கே³ன. அப்பமாதோ³தி அப்பமஜ்ஜனங் குஸலத⁴ம்மேஸு அக²ண்ட³காரிதாதி ஆஹ ‘‘ஸாதச்சகிரியா’’தி. அவொஸ்ஸக்³கோ³தி சித்தஸ்ஸ காமகு³ணேஸு அவொஸ்ஸஜ்ஜனங் பக்க²ந்தி³துங் அப்பதா³னங். புரிமோ விகப்போ குஸலானங் த⁴ம்மானங் கரணவஸேன த³ஸ்ஸிதோ, பச்சி²மோ அகுஸலானங் அகரணவஸேன. த்³வே த⁴ம்மாதி அப்பமாதோ³ ஸதீதி த்³வே த⁴ம்மா. அப்பமாதோ³ ஸதி ச ததா² பவத்தா சத்தாரோ குஸலத⁴ம்மக்க²ந்தா⁴ வேதி³தப்³பா³. கத்தப்³பா³தி பவத்தேதப்³பா³.
Metteyyo nāmātiādi anāgatārammaṇadassanamattaṃ, na bodhisattassa evaṃ uppajjatīti. Attā piyāyitabbarūpo etassāti attarūpo, uttarapade purimapadalopenāti ‘‘attano hitakāmajātikenā’’ti attho vutto. Attarūpenāti vā pītisomanassehi gahitasabhāvena tuṭṭhapahaṭṭhena udaggudaggena. Appamādoti appamajjanaṃ kusaladhammesu akhaṇḍakāritāti āha ‘‘sātaccakiriyā’’ti. Avossaggoti cittassa kāmaguṇesu avossajjanaṃ pakkhandituṃ appadānaṃ. Purimo vikappo kusalānaṃ dhammānaṃ karaṇavasena dassito, pacchimo akusalānaṃ akaraṇavasena. Dve dhammāti appamādo satīti dve dhammā. Appamādo sati ca tathā pavattā cattāro kusaladhammakkhandhā veditabbā. Kattabbāti pavattetabbā.
தஸ்மிங் ஆயதனேதி தஸ்மிங் நிப்³பா³னஸஞ்ஞிதே காரணே படிவேதே⁴. தங் காரணந்தி ச²ன்னங் ஆயதனானங் காரணங். ஸளாயதனங் நிருஜ்ஜ²தி எத்தா²தி ஸளாயதனநிரோதோ⁴ வுச்சதி நிப்³பா³னங். தேனாஹ ‘‘நிப்³பா³னங். தங் ஸந்தா⁴யா’’திஆதி³. நிப்³பா³னஸ்மிந்தி நிப்³பா³னம்ஹி.
Tasmiṃ āyataneti tasmiṃ nibbānasaññite kāraṇe paṭivedhe. Taṃ kāraṇanti channaṃ āyatanānaṃ kāraṇaṃ. Saḷāyatanaṃ nirujjhati etthāti saḷāyatananirodho vuccati nibbānaṃ. Tenāha ‘‘nibbānaṃ. Taṃ sandhāyā’’tiādi. Nibbānasminti nibbānamhi.
காமகு³ணஸுத்தவண்ணனா நிட்டி²தா.
Kāmaguṇasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. காமகு³ணஸுத்தங் • 4. Kāmaguṇasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. காமகு³ணஸுத்தவண்ணனா • 4. Kāmaguṇasuttavaṇṇanā
