| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
7. காமஸுத்தங்
7. Kāmasuttaṃ
7. ‘‘யேபு⁴ய்யேன, பி⁴க்க²வே, ஸத்தா காமேஸு லளிதா 1. அஸிதப்³யாப⁴ங்கி³ங் 2, பி⁴க்க²வே, குலபுத்தோ ஓஹாய அகா³ரஸ்மா அனகா³ரியங் பப்³ப³ஜிதோ ஹோதி, ‘ஸத்³தா⁴பப்³ப³ஜிதோ குலபுத்தோ’தி அலங் வசனாய. தங் கிஸ்ஸ ஹேது? லப்³பா⁴ 3, பி⁴க்க²வே, யொப்³ப³னேன காமா தே ச கோ² யாதி³ஸா வா தாதி³ஸா வா. யே ச, பி⁴க்க²வே, ஹீனா காமா யே ச மஜ்ஜி²மா காமா யே ச பணீதா காமா , ஸப்³பே³ காமா ‘காமா’த்வேவ ஸங்க²ங் க³ச்ச²ந்தி. ஸெய்யதா²பி , பி⁴க்க²வே, த³ஹரோ குமாரோ மந்தோ³ உத்தானஸெய்யகோ தா⁴தியா பமாத³மன்வாய கட்ட²ங் வா கட²லங் 4 வா முகே² ஆஹரெய்ய. தமேனங் தா⁴தி ஸீக⁴ங் ஸீக⁴ங் 5 மனஸி கரெய்ய; ஸீக⁴ங் ஸீக⁴ங் மனஸி கரித்வா ஸீக⁴ங் ஸீக⁴ங் ஆஹரெய்ய. நோ சே ஸக்குணெய்ய ஸீக⁴ங் ஸீக⁴ங் ஆஹரிதுங், வாமேன ஹத்தே²ன ஸீஸங் பரிக்³க³ஹெத்வா த³க்கி²ணேன ஹத்தே²ன வங்கங்கு³லிங் கரித்வா ஸலோஹிதம்பி ஆஹரெய்ய. தங் கிஸ்ஸ ஹேது? ‘அத்தே²ஸா, பி⁴க்க²வே, குமாரஸ்ஸ விஹேஸா; நேஸா நத்தீ²’தி வதா³மி. கரணீயஞ்ச கோ² ஏதங் 6, பி⁴க்க²வே, தா⁴தியா அத்த²காமாய ஹிதேஸினியா அனுகம்பிகாய, அனுகம்பங் உபாதா³ய. யதோ ச கோ², பி⁴க்க²வே, ஸோ குமாரோ வுத்³தோ⁴ ஹோதி அலங்பஞ்ஞோ, அனபெக்கா² தா³னி 7, பி⁴க்க²வே, தா⁴தி தஸ்மிங் குமாரே ஹோதி – ‘அத்தகு³த்தோ தா³னி குமாரோ நாலங் பமாதா³யா’தி.
7. ‘‘Yebhuyyena, bhikkhave, sattā kāmesu laḷitā 8. Asitabyābhaṅgiṃ 9, bhikkhave, kulaputto ohāya agārasmā anagāriyaṃ pabbajito hoti, ‘saddhāpabbajito kulaputto’ti alaṃ vacanāya. Taṃ kissa hetu? Labbhā 10, bhikkhave, yobbanena kāmā te ca kho yādisā vā tādisā vā. Ye ca, bhikkhave, hīnā kāmā ye ca majjhimā kāmā ye ca paṇītā kāmā , sabbe kāmā ‘kāmā’tveva saṅkhaṃ gacchanti. Seyyathāpi , bhikkhave, daharo kumāro mando uttānaseyyako dhātiyā pamādamanvāya kaṭṭhaṃ vā kaṭhalaṃ 11 vā mukhe āhareyya. Tamenaṃ dhāti sīghaṃ sīghaṃ 12 manasi kareyya; sīghaṃ sīghaṃ manasi karitvā sīghaṃ sīghaṃ āhareyya. No ce sakkuṇeyya sīghaṃ sīghaṃ āharituṃ, vāmena hatthena sīsaṃ pariggahetvā dakkhiṇena hatthena vaṅkaṅguliṃ karitvā salohitampi āhareyya. Taṃ kissa hetu? ‘Atthesā, bhikkhave, kumārassa vihesā; nesā natthī’ti vadāmi. Karaṇīyañca kho etaṃ 13, bhikkhave, dhātiyā atthakāmāya hitesiniyā anukampikāya, anukampaṃ upādāya. Yato ca kho, bhikkhave, so kumāro vuddho hoti alaṃpañño, anapekkhā dāni 14, bhikkhave, dhāti tasmiṃ kumāre hoti – ‘attagutto dāni kumāro nālaṃ pamādāyā’ti.
‘‘ஏவமேவங் கோ², பி⁴க்க²வே, யாவகீவஞ்ச பி⁴க்கு²னோ ஸத்³தா⁴ய அகதங் ஹோதி குஸலேஸு த⁴ம்மேஸு, ஹிரியா அகதங் ஹோதி குஸலேஸு த⁴ம்மேஸு, ஒத்தப்பேன அகதங் ஹோதி குஸலேஸு த⁴ம்மேஸு, வீரியேன அகதங் ஹோதி குஸலேஸு த⁴ம்மேஸு, பஞ்ஞாய அகதங் ஹோதி குஸலேஸு த⁴ம்மேஸு, அனுரக்கி²தப்³போ³ தாவ மே ஸோ, பி⁴க்க²வே, பி⁴க்கு² ஹோதி. யதோ ச கோ², பி⁴க்க²வே, பி⁴க்கு²னோ ஸத்³தா⁴ய கதங் ஹோதி குஸலேஸு த⁴ம்மேஸு, ஹிரியா கதங் ஹோதி குஸலேஸு த⁴ம்மேஸு, ஒத்தப்பேன கதங் ஹோதி குஸலேஸு த⁴ம்மேஸு, வீரியேன கதங் ஹோதி குஸலேஸு த⁴ம்மேஸு, பஞ்ஞாய கதங் ஹோதி குஸலேஸு த⁴ம்மேஸு, அனபெக்கோ² தா³னாஹங், பி⁴க்க²வே 15, தஸ்மிங் பி⁴க்கு²ஸ்மிங் ஹோமி – ‘அத்தகு³த்தோ தா³னி பி⁴க்கு² நாலங் பமாதா³யா’’’தி. ஸத்தமங்.
‘‘Evamevaṃ kho, bhikkhave, yāvakīvañca bhikkhuno saddhāya akataṃ hoti kusalesu dhammesu, hiriyā akataṃ hoti kusalesu dhammesu, ottappena akataṃ hoti kusalesu dhammesu, vīriyena akataṃ hoti kusalesu dhammesu, paññāya akataṃ hoti kusalesu dhammesu, anurakkhitabbo tāva me so, bhikkhave, bhikkhu hoti. Yato ca kho, bhikkhave, bhikkhuno saddhāya kataṃ hoti kusalesu dhammesu, hiriyā kataṃ hoti kusalesu dhammesu, ottappena kataṃ hoti kusalesu dhammesu, vīriyena kataṃ hoti kusalesu dhammesu, paññāya kataṃ hoti kusalesu dhammesu, anapekkho dānāhaṃ, bhikkhave 16, tasmiṃ bhikkhusmiṃ homi – ‘attagutto dāni bhikkhu nālaṃ pamādāyā’’’ti. Sattamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. காமஸுத்தவண்ணனா • 7. Kāmasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. மஹாஸுபினஸுத்தவண்ணனா • 6. Mahāsupinasuttavaṇṇanā
