| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
7. காமயோக³ஸுத்தவண்ணனா
7. Kāmayogasuttavaṇṇanā
96. ஸத்தமே காமயோக³யுத்தோதி பஞ்சகாமகு³ணிகோ ராகோ³ காமயோகோ³, தேன யுத்தோ காமயோக³யுத்தோ, அஸமுச்சி²ன்னகாமராக³ஸ்ஸேதங் அதி⁴வசனங். ரூபாரூபப⁴வேஸு ச²ந்த³ராகோ³ ப⁴வயோகோ³, ததா² ஜா²னநிகந்தி ஸஸ்ஸததி³ட்டி²ஸஹக³தோ ச ராகோ³, தேன யுத்தோ ப⁴வயோக³யுத்தோ, அப்பஹீனப⁴வராகோ³தி அத்தோ². ஆகா³மீதி ப்³ரஹ்மலோகே டி²தோபி படிஸந்தி⁴க்³க³ஹணவஸேன இமங் மனுஸ்ஸலோகங் ஆக³மனஸீலோ. தேனேவாஹ ‘‘ஆக³ந்தா இத்த²த்த’’ந்தி. மனுஸ்ஸத்தபா⁴வஸங்கா²தங் இத்த²பா⁴வங் ஆக³மனத⁴ம்மோ , மனுஸ்ஸேஸு உபபஜ்ஜனஸீலோதி அத்தோ². காமஞ்செத்த² காமயோகோ³ இத்த²த்தங் ஆக³மனஸ்ஸ காரணங். யோ பன காமயோக³யுத்தோ, ஸோ ஏகந்தேன ப⁴வயோக³யுத்தோபி ஹோதீதி த³ஸ்ஸனத்த²ங் ‘‘காமயோக³யுத்தோ, பி⁴க்க²வே, ப⁴வயோக³யுத்தோ’’தி உப⁴யம்பி ஏகஜ்ஜ²ங் கத்வா வுத்தங்.
96. Sattame kāmayogayuttoti pañcakāmaguṇiko rāgo kāmayogo, tena yutto kāmayogayutto, asamucchinnakāmarāgassetaṃ adhivacanaṃ. Rūpārūpabhavesu chandarāgo bhavayogo, tathā jhānanikanti sassatadiṭṭhisahagato ca rāgo, tena yutto bhavayogayutto, appahīnabhavarāgoti attho. Āgāmīti brahmaloke ṭhitopi paṭisandhiggahaṇavasena imaṃ manussalokaṃ āgamanasīlo. Tenevāha ‘‘āgantā itthatta’’nti. Manussattabhāvasaṅkhātaṃ itthabhāvaṃ āgamanadhammo , manussesu upapajjanasīloti attho. Kāmañcettha kāmayogo itthattaṃ āgamanassa kāraṇaṃ. Yo pana kāmayogayutto, so ekantena bhavayogayuttopi hotīti dassanatthaṃ ‘‘kāmayogayutto, bhikkhave, bhavayogayutto’’ti ubhayampi ekajjhaṃ katvā vuttaṃ.
காமயோக³விஸங்யுத்தோதி எத்த² அஸுப⁴ஜ்ஜா²னம்பி காமயோக³விஸங்யோகோ³, தங் பாத³கங் கத்வா அதி⁴க³தோ அனாகா³மிமக்³கோ³ ஏகந்தேனேவ காமயோக³விஸங்யோகோ³ நாம, தஸ்மா ததியமக்³க³ப²லே டி²தோ அரியபுக்³க³லோ ‘‘காமயோக³விஸங்யுத்தோ’’தி வுத்தோ. யஸ்மா பன ரூபாரூபப⁴வேஸு ச²ந்த³ராகோ³ அனாகா³மிமக்³கே³ன ந பஹீயதி, தஸ்மா ஸோ அப்பஹீனப⁴வயோக³த்தா ‘‘ப⁴வயோக³யுத்தோ’’தி வுத்தோ. அனாகா³மீதி காமலோகங் படிஸந்தி⁴க்³க³ஹணவஸேன அனாக³மனதோ அனாகா³மீ. காமயோக³விஸங்யோக³வஸேனேவ ஹி ஸத்³தி⁴ங் அனவஸேஸஓரம்பா⁴கி³யஸங்யோஜனஸமுக்³கா⁴தேன அஜ்ஜ²த்தஸங்யோஜனாபா⁴வஸித்³தி⁴தோ இத்த²த்தங் அனாக³ந்த்வா ஹோதி, தத்த² பரினிப்³பா³யீ அனாவத்தித⁴ம்மோ. யஸ்ஸ பன அனவஸேஸங் ப⁴வயோகோ³ பஹீனோ, தஸ்ஸ அவிஜ்ஜாயோகா³தி³அவஸிட்ட²கிலேஸாபி ததே³கட்ட²பா⁴வதோ பஹீனா ஏவ ஹொந்தீதி , ஸோ பரிக்கீ²ணப⁴வஸங்யோஜனோ ‘‘அரஹங் கீ²ணாஸவோ’’தி வுச்சதி. தேன வுத்தங் ‘‘காமயோக³விஸங்யுத்தோ, பி⁴க்க²வே, ப⁴வயோக³விஸங்யுத்தோ அரஹங் ஹோதி கீ²ணாஸவோ’’தி. எத்த² ச காமயோக³விஸங்யோகோ³ அனாகா³மீ சதுத்த²ஜ்ஜா²னஸ்ஸ ஸுக²து³க்க²ஸோமனஸ்ஸதோ³மனஸ்ஸப்பஹானங் விய, ததியமக்³க³ஸ்ஸ தி³ட்டி²விசிகிச்சா²ஸீலப்³ப³தபராமாஸஸங்யோஜனபரிக்க²யோ விய ச சதுத்த²மக்³க³ஸ்ஸ வண்ணப⁴ணனத்த²ங் வுத்தோதி த³ட்ட²ப்³ப³ங். பட²மபதே³ன ஸோதாபன்னஸகதா³கா³மீஹி ஸத்³தி⁴ங் ஸப்³போ³ புது²ஜ்ஜனோ க³ஹிதோ, து³தியபதே³ன பன ஸப்³போ³ அனாகா³மீ, ததியபதே³ன அரஹாதி அரஹத்தனிகூடேன தே³ஸனங் நிட்டா²பேஸி.
Kāmayogavisaṃyuttoti ettha asubhajjhānampi kāmayogavisaṃyogo, taṃ pādakaṃ katvā adhigato anāgāmimaggo ekanteneva kāmayogavisaṃyogo nāma, tasmā tatiyamaggaphale ṭhito ariyapuggalo ‘‘kāmayogavisaṃyutto’’ti vutto. Yasmā pana rūpārūpabhavesu chandarāgo anāgāmimaggena na pahīyati, tasmā so appahīnabhavayogattā ‘‘bhavayogayutto’’ti vutto. Anāgāmīti kāmalokaṃ paṭisandhiggahaṇavasena anāgamanato anāgāmī. Kāmayogavisaṃyogavaseneva hi saddhiṃ anavasesaorambhāgiyasaṃyojanasamugghātena ajjhattasaṃyojanābhāvasiddhito itthattaṃ anāgantvā hoti, tattha parinibbāyī anāvattidhammo. Yassa pana anavasesaṃ bhavayogo pahīno, tassa avijjāyogādiavasiṭṭhakilesāpi tadekaṭṭhabhāvato pahīnā eva hontīti , so parikkhīṇabhavasaṃyojano ‘‘arahaṃ khīṇāsavo’’ti vuccati. Tena vuttaṃ ‘‘kāmayogavisaṃyutto, bhikkhave, bhavayogavisaṃyutto arahaṃ hoti khīṇāsavo’’ti. Ettha ca kāmayogavisaṃyogo anāgāmī catutthajjhānassa sukhadukkhasomanassadomanassappahānaṃ viya, tatiyamaggassa diṭṭhivicikicchāsīlabbataparāmāsasaṃyojanaparikkhayo viya ca catutthamaggassa vaṇṇabhaṇanatthaṃ vuttoti daṭṭhabbaṃ. Paṭhamapadena sotāpannasakadāgāmīhi saddhiṃ sabbo puthujjano gahito, dutiyapadena pana sabbo anāgāmī, tatiyapadena arahāti arahattanikūṭena desanaṃ niṭṭhāpesi.
கா³தா²ஸு உப⁴யந்தி உப⁴யேன, காமயோகே³ன, ப⁴வயோகே³ன ச ஸங்யுத்தாதி அத்தோ². ஸத்தா க³ச்ச²ந்தி ஸங்ஸாரந்தி புது²ஜ்ஜனா ஸோதாபன்னா ஸகதா³கா³மினோதி இமே திவிதா⁴ ஸத்தா காமயோக³ப⁴வயோகா³னங் அப்பஹீனத்தா க³ச்ச²ந்தி ஸங்ஸாரந்தி. ததோ ஏவ ஜாதிமரணகா³மினோ ஹொந்தி. எத்த² ஏகபீ³ஜீ, கோலங்கோலோ, ஸத்தக்க²த்துபரமோதி தீஸு ஸோதாபன்னேஸு ஸப்³ப³முது³ ஸத்தக்க²த்துபரமோ, ஸோ அட்ட²மங் ப⁴வங் ந நிப்³ப³த்தேதி, அத்தனோ பரிச்சி²ன்னஜாதிவஸேன பன ஸங்ஸரதி, ததா² இதரேபி. ஸகதா³கா³மீஸுபி யோ இத⁴ ஸகதா³கா³மிமக்³க³ங் பத்வா தே³வலோகே உப்பஜ்ஜித்வா புன இத⁴ நிப்³ப³த்ததி, ஸோ அத்தனோ பரிச்சி²ன்னஜாதிவஸேனேவ ஸங்ஸரதி. யே பன ஸகதா³கா³மினோ வோமிஸ்ஸகனயேன வினா தத்த² தத்த² தே³வேஸுயேவ மனுஸ்ஸேஸுயேவ வா நிப்³ப³த்தந்தி, தே உபரிமக்³கா³தி⁴க³மாய யாவ இந்த்³ரியபரிபாகா புனப்புனங் உப்பஜ்ஜனதோ ஸங்ஸரந்தியேவ. புது²ஜ்ஜனே பன வத்தப்³ப³மேவ நத்தி² ஸப்³ப³ப⁴வஸங்யோஜனானங் அபரிக்கீ²ணத்தா. தேன வுத்தங் –
Gāthāsu ubhayanti ubhayena, kāmayogena, bhavayogena ca saṃyuttāti attho. Sattā gacchanti saṃsāranti puthujjanā sotāpannā sakadāgāminoti ime tividhā sattā kāmayogabhavayogānaṃ appahīnattā gacchanti saṃsāranti. Tato eva jātimaraṇagāmino honti. Ettha ekabījī, kolaṃkolo, sattakkhattuparamoti tīsu sotāpannesu sabbamudu sattakkhattuparamo, so aṭṭhamaṃ bhavaṃ na nibbatteti, attano paricchinnajātivasena pana saṃsarati, tathā itarepi. Sakadāgāmīsupi yo idha sakadāgāmimaggaṃ patvā devaloke uppajjitvā puna idha nibbattati, so attano paricchinnajātivaseneva saṃsarati. Ye pana sakadāgāmino vomissakanayena vinā tattha tattha devesuyeva manussesuyeva vā nibbattanti, te uparimaggādhigamāya yāva indriyaparipākā punappunaṃ uppajjanato saṃsarantiyeva. Puthujjane pana vattabbameva natthi sabbabhavasaṃyojanānaṃ aparikkhīṇattā. Tena vuttaṃ –
‘‘காமயோகே³ன ஸங்யுத்தா, ப⁴வயோகே³ன சூப⁴யங்;
‘‘Kāmayogena saṃyuttā, bhavayogena cūbhayaṃ;
ஸத்தா க³ச்ச²ந்தி ஸங்ஸாரங், ஜாதிமரணகா³மினோ’’தி.
Sattā gacchanti saṃsāraṃ, jātimaraṇagāmino’’ti.
காமே பஹந்த்வானாதி காமராக³ஸங்கா²தே கிலேஸகாமே அனாகா³மிமக்³கே³ன பஜஹித்வா. சி²ன்னஸங்ஸயாதி ஸமுச்சி²ன்னகங்கா², தஞ்ச கோ² ஸோதாபத்திமக்³கே³னேவ. வண்ணப⁴ணனத்த²ங் பன சதுத்த²மக்³க³ஸ்ஸ ஏவங் வுத்தங். அரஹந்தோ ஹி இத⁴ ‘‘சி²ன்னஸங்ஸயா’’தி அதி⁴ப்பேதா. தேனேவாஹ ‘‘கீ²ணமானபுனப்³ப⁴வா’’தி. ஸப்³ப³ஸோ கீ²ணோ நவவிதோ⁴பி மானோ ஆயதிங் புனப்³ப⁴வோ ச ஏதேஸந்தி கீ²ணமானபுனப்³ப⁴வா. மானக்³க³ஹணேன செத்த² ததே³கட்ட²தாய லக்க²ணவஸேன வா ஸப்³போ³ சதுத்த²மக்³க³வஜ்ஜோ² கிலேஸோ க³ஹிதோதி. கீ²ணமானதாய ச ஸஉபாதி³ஸேஸா நிப்³பா³னதா⁴து வுத்தா ஹோதி, கீ²ணபுனப்³ப⁴வதாய அனுபாதி³ஸேஸா. ஸேஸங் ஸுவிஞ்ஞெய்யமேவ.
Kāme pahantvānāti kāmarāgasaṅkhāte kilesakāme anāgāmimaggena pajahitvā. Chinnasaṃsayāti samucchinnakaṅkhā, tañca kho sotāpattimaggeneva. Vaṇṇabhaṇanatthaṃ pana catutthamaggassa evaṃ vuttaṃ. Arahanto hi idha ‘‘chinnasaṃsayā’’ti adhippetā. Tenevāha ‘‘khīṇamānapunabbhavā’’ti. Sabbaso khīṇo navavidhopi māno āyatiṃ punabbhavo ca etesanti khīṇamānapunabbhavā. Mānaggahaṇena cettha tadekaṭṭhatāya lakkhaṇavasena vā sabbo catutthamaggavajjho kileso gahitoti. Khīṇamānatāya ca saupādisesā nibbānadhātu vuttā hoti, khīṇapunabbhavatāya anupādisesā. Sesaṃ suviññeyyameva.
ஸத்தமஸுத்தவண்ணனா நிட்டி²தா.
Sattamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 7. காமயோக³ஸுத்தங் • 7. Kāmayogasuttaṃ
