| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
15. நவபுராணவக்³கோ³
15. Navapurāṇavaggo
1. கம்மனிரோத⁴ஸுத்தவண்ணனா
1. Kammanirodhasuttavaṇṇanā
146. ஸம்பதி விஜ்ஜமானஸ்ஸ சக்கு²ஸ்ஸ தங்னிப்³ப³த்தஸ்ஸ கம்மஸ்ஸ ச அதி⁴ப்பேதத்தா ‘‘ந சக்கு² புராணங், கம்மமேவ புராண’’ந்தி வத்வா யதா² தஸ்ஸ சக்கு²ஸ்ஸ புராணபரியாயோ வுத்தோ, தங் த³ஸ்ஸெந்தோ ஆஹ – ‘‘கம்மதோ பனா’’திஆதி³. பச்சயனாமேனாதி புரிமஜாதிஸங்ஸித்³த⁴த்தா ‘‘புராண’’ந்தி வத்தப்³ப³ஸ்ஸ பச்சயபூ⁴தஸ்ஸ கம்மஸ்ஸ நாமேன. ஏவங் வுத்தந்தி ‘‘புராணகம்ம’’ந்தி ஏவங் வுத்தங். பச்சயேஹி அபி⁴ஸமாக³ந்த்வா கதந்தி தண்ஹாவிஜ்ஜாதி³பச்சயேஹி அபி⁴முக²பா⁴வேன ஸமாக³ந்த்வா ஸமேச்ச நிப்³ப³த்திதங். சேதனாயாதி கம்மசேதனாய. பகப்பிதந்தி அபி⁴ஸமீஹிதங். வேத³னாயாதி அத்தானங் நிஸ்ஸாய ஆரம்மணங் கத்வா பவத்தாய வேத³னாய. வத்தூ²தி நிப்³ப³த்திகாரணங் பவத்தட்டா²னந்தி விபஸ்ஸனாபஞ்ஞாய பஸ்ஸிதப்³ப³ங். கம்மஸ்ஸ நிரோதே⁴னாதி கிலேஸானங் அனுப்பாத³னிரோத⁴ஸித்³தே⁴ன கம்மஸ்ஸ நிரோதே⁴ன. விமுத்திங் பு²ஸதீதி அரஹத்தப²லவிமுத்திங் பாபுணாதி. ஆரம்மணபூ⁴தோ நிரோதோ⁴ நிப்³பா³னங் ‘‘கம்மனிரோதோ⁴’’தி வுச்சதி, ‘‘கம்மங் நிருஜ்ஜ²தி எத்தா²’’தி கத்வா. ‘‘ஜா²யத², பி⁴க்க²வே, மா பமாத³த்தா²’’தி வுத்தத்தா ‘‘புப்³ப³பா⁴க³விபஸ்ஸனா கதி²தா’’தி வுத்தங்.
146. Sampati vijjamānassa cakkhussa taṃnibbattassa kammassa ca adhippetattā ‘‘na cakkhu purāṇaṃ, kammameva purāṇa’’nti vatvā yathā tassa cakkhussa purāṇapariyāyo vutto, taṃ dassento āha – ‘‘kammato panā’’tiādi. Paccayanāmenāti purimajātisaṃsiddhattā ‘‘purāṇa’’nti vattabbassa paccayabhūtassa kammassa nāmena. Evaṃ vuttanti ‘‘purāṇakamma’’nti evaṃ vuttaṃ. Paccayehi abhisamāgantvā katanti taṇhāvijjādipaccayehi abhimukhabhāvena samāgantvā samecca nibbattitaṃ. Cetanāyāti kammacetanāya. Pakappitanti abhisamīhitaṃ. Vedanāyāti attānaṃ nissāya ārammaṇaṃ katvā pavattāya vedanāya. Vatthūti nibbattikāraṇaṃ pavattaṭṭhānanti vipassanāpaññāya passitabbaṃ. Kammassa nirodhenāti kilesānaṃ anuppādanirodhasiddhena kammassa nirodhena. Vimuttiṃ phusatīti arahattaphalavimuttiṃ pāpuṇāti. Ārammaṇabhūto nirodho nibbānaṃ ‘‘kammanirodho’’ti vuccati, ‘‘kammaṃ nirujjhati etthā’’ti katvā. ‘‘Jhāyatha, bhikkhave, mā pamādatthā’’ti vuttattā ‘‘pubbabhāgavipassanā kathitā’’ti vuttaṃ.
கம்மனிரோத⁴ஸுத்தவண்ணனா நிட்டி²தா.
Kammanirodhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. கம்மனிரோத⁴ஸுத்தங் • 1. Kammanirodhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. கம்மனிரோத⁴ஸுத்தவண்ணனா • 1. Kammanirodhasuttavaṇṇanā
