| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
6. காமூபபத்திஸுத்தவண்ணனா
6. Kāmūpapattisuttavaṇṇanā
95. ச²ட்டே² காமூபபத்தியோதி காமபடிலாபா⁴ காமபடிஸேவனா வா. பச்சுபட்டி²தகாமாதி நிப³த்³த⁴காமா நிப³த்³தா⁴ரம்மணா யதா² தங் மனுஸ்ஸா. மனுஸ்ஸா ஹி நிப³த்³த⁴வத்து²ஸ்மிங் வஸங் வத்தெந்தி. யத்த² படிப³த்³த⁴சித்தா ஹொந்தி, ஸதம்பி ஸஹஸ்ஸம்பி த³த்வா தமேவ மாதுகா³மங் ஆனெத்வா நிப³த்³த⁴போ⁴க³ங் பு⁴ஞ்ஜந்தி. ஏகச்சே ச தே³வா. சாதுமஹாராஜிகதோ பட்டா²ய ஹி சதுதே³வலோகவாஸினோ நிப³த்³த⁴வத்து²ஸ்மிங்யேவ வஸங் வத்தெந்தி. பஞ்சஸிக²வத்து² செத்த² நித³ஸ்ஸனங். ததா² ஏகச்சே ஆபாயிகே நேரயிகே ட²பெத்வா ஸேஸஅபாயஸத்தாபி நிப³த்³த⁴வத்து²ஸ்மிங்யேவ வஸங் வத்தெந்தி. மச்சா² ஹி அத்தனோ மச்சி²யா, கச்ச²போ கச்ச²பியாதி ஏவங் ஸப்³பே³பி திரச்சா²னா பேதா வினிபாதிகா ச. தஸ்மா நேரயிகே ட²பெத்வா ஸேஸஅபாயஸத்தே உபாதா³ய யாவ துஸிதகாயா இமே ஸத்தா பச்சுபட்டி²தகாமா நாம, நிம்மானரதினோதி ஸயங் நிம்மிதே நிம்மானே ரதி ஏதேஸந்தி நிம்மானரதினோ. தே ஹி நீலபீதாதி³வஸேன யாதி³ஸங் யாதி³ஸங் ரூபங் இச்ச²ந்தி, தாதி³ஸங் தாதி³ஸங் நிம்மினித்வா ரமந்தி ஆயஸ்மதோ அனுருத்³த⁴ஸ்ஸ புரதோ மனாபகாயிகா தே³வதா விய. பரனிம்மிதவஸவத்தினோதி பரேஹி நிம்மிதே காமே வஸங் வத்தெந்தீதி பரனிம்மிதவஸவத்தினோ. தேஸஞ்ஹி மனங் ஞத்வா பரே யதா²ருசிதங் காமபோ⁴க³ங் நிம்மினந்தி, தே தத்த² வஸங் வத்தெந்தி. கத²ங் தே பரஸ்ஸ மனங் ஜானந்தீதி? பகதிஸேவனாவஸேன. யதா² ஹி குஸலோ ஸூதோ³ ரஞ்ஞோ பு⁴ஞ்ஜந்தஸ்ஸ யங் யங் ருச்சதி, தங் தங் ஜானாதி, ஏவங் பகதியா அபி⁴ருசிதாரம்மணங் ஞத்வா தாதி³ஸேயேவ நிம்மினந்தி, தே தத்த² வஸங் வத்தெந்தி, மேது²னஸேவனாதி³வஸேன காமே பரிபு⁴ஞ்ஜந்தி. கேசி பன ‘‘ஹஸிதமத்தேன ஓலோகிதமத்தேன ஆலிங்கி³தமத்தேன ஹத்த²க்³க³ஹணமத்தேன ச தேஸங் காமகிச்சங் இஜ்ஜ²தீ’’தி வத³ந்தி, தங் அட்ட²கதா²யங் ‘‘ஏதங் பன நத்தீ²’’தி படிக்கி²த்தங். ந ஹி காயேன அபு²ஸந்தஸ்ஸ பொ²ட்ட²ப்³ப³ங் காமகிச்சங் ஸாதே⁴தி. ச²ன்னம்பி காமாவசரதே³வானங் காமா பாகதிகா ஏவ. வுத்தஞ்ஹேதங் –
95. Chaṭṭhe kāmūpapattiyoti kāmapaṭilābhā kāmapaṭisevanā vā. Paccupaṭṭhitakāmāti nibaddhakāmā nibaddhārammaṇā yathā taṃ manussā. Manussā hi nibaddhavatthusmiṃ vasaṃ vattenti. Yattha paṭibaddhacittā honti, satampi sahassampi datvā tameva mātugāmaṃ ānetvā nibaddhabhogaṃ bhuñjanti. Ekacce ca devā. Cātumahārājikato paṭṭhāya hi catudevalokavāsino nibaddhavatthusmiṃyeva vasaṃ vattenti. Pañcasikhavatthu cettha nidassanaṃ. Tathā ekacce āpāyike nerayike ṭhapetvā sesaapāyasattāpi nibaddhavatthusmiṃyeva vasaṃ vattenti. Macchā hi attano macchiyā, kacchapo kacchapiyāti evaṃ sabbepi tiracchānā petā vinipātikā ca. Tasmā nerayike ṭhapetvā sesaapāyasatte upādāya yāva tusitakāyā ime sattā paccupaṭṭhitakāmā nāma, nimmānaratinoti sayaṃ nimmite nimmāne rati etesanti nimmānaratino. Te hi nīlapītādivasena yādisaṃ yādisaṃ rūpaṃ icchanti, tādisaṃ tādisaṃ nimminitvā ramanti āyasmato anuruddhassa purato manāpakāyikā devatā viya. Paranimmitavasavattinoti parehi nimmite kāme vasaṃ vattentīti paranimmitavasavattino. Tesañhi manaṃ ñatvā pare yathārucitaṃ kāmabhogaṃ nimminanti, te tattha vasaṃ vattenti. Kathaṃ te parassa manaṃ jānantīti? Pakatisevanāvasena. Yathā hi kusalo sūdo rañño bhuñjantassa yaṃ yaṃ ruccati, taṃ taṃ jānāti, evaṃ pakatiyā abhirucitārammaṇaṃ ñatvā tādiseyeva nimminanti, te tattha vasaṃ vattenti, methunasevanādivasena kāme paribhuñjanti. Keci pana ‘‘hasitamattena olokitamattena āliṅgitamattena hatthaggahaṇamattena ca tesaṃ kāmakiccaṃ ijjhatī’’ti vadanti, taṃ aṭṭhakathāyaṃ ‘‘etaṃ pana natthī’’ti paṭikkhittaṃ. Na hi kāyena aphusantassa phoṭṭhabbaṃ kāmakiccaṃ sādheti. Channampi kāmāvacaradevānaṃ kāmā pākatikā eva. Vuttañhetaṃ –
‘‘ச² ஏதே காமாவசரா, ஸப்³ப³காமஸமித்³தி⁴னோ;
‘‘Cha ete kāmāvacarā, sabbakāmasamiddhino;
ஸப்³பே³ஸங் ஏகஸங்கா²தங், ஆயு ப⁴வதி கித்தக’’ந்தி. (விப⁴॰ 1023);
Sabbesaṃ ekasaṅkhātaṃ, āyu bhavati kittaka’’nti. (vibha. 1023);
கா³தா²ஸு யே சஞ்ஞேதி யே யதா²வுத்ததே³வேஹி அஞ்ஞே ச காமபோ⁴கி³னோ மனுஸ்ஸா சேவ ஏகச்சே அபாயூபகா³ ச ஸப்³பே³ தே. இத்த²பா⁴வஞ்ஞதா²பா⁴வந்தி இமங் யதா²படிலத்³த⁴த்தபா⁴வஞ்சேவ, உபபத்திப⁴வந்தரஸங்கா²தங் இதோ அஞ்ஞதா²பா⁴வஞ்சாதி த்³விப்பபே⁴த³ங் ஸங்ஸாரங் நாதிவத்தரே ந அதிக்கமந்தி. ஸப்³பே³ பரிச்சஜே காமேதி தி³ப்³பா³தி³பே⁴தே³ ஸப்³பே³பி காமே வத்து²காமே ச கிலேஸகாமே ச பரிச்சஜெய்ய. கிலேஸகாமே அனாகா³மிமக்³கே³ன பஜஹந்தோயேவ ஹி வத்து²காமே பரிச்சஜதி நாம. பியரூபஸாதக³தி⁴தந்தி பியரூபேஸு ரூபாதீ³ஸு ஸுக²வேத³னஸ்ஸாதே³ன க³தி⁴தங் கி³த்³த⁴ங். செ²த்வா ஸோதங் து³ரச்சயந்தி அஞ்ஞேஹி து³ரச்சயங் து³ரதிக்கமங் தண்ஹாஸோதங் அரஹத்தமக்³கே³ன ஸமுச்சி²ந்தி³த்வா. ஸேஸங் ஹெட்டா² வுத்தனயமேவாதி.
Gāthāsu ye caññeti ye yathāvuttadevehi aññe ca kāmabhogino manussā ceva ekacce apāyūpagā ca sabbe te. Itthabhāvaññathābhāvanti imaṃ yathāpaṭiladdhattabhāvañceva, upapattibhavantarasaṅkhātaṃ ito aññathābhāvañcāti dvippabhedaṃ saṃsāraṃ nātivattare na atikkamanti. Sabbe pariccaje kāmeti dibbādibhede sabbepi kāme vatthukāme ca kilesakāme ca pariccajeyya. Kilesakāme anāgāmimaggena pajahantoyeva hi vatthukāme pariccajati nāma. Piyarūpasātagadhitanti piyarūpesu rūpādīsu sukhavedanassādena gadhitaṃ giddhaṃ. Chetvā sotaṃ duraccayanti aññehi duraccayaṃ duratikkamaṃ taṇhāsotaṃ arahattamaggena samucchinditvā. Sesaṃ heṭṭhā vuttanayamevāti.
ச²ட்ட²ஸுத்தவண்ணனா நிட்டி²தா.
Chaṭṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 6. காமூபபத்திஸுத்தங் • 6. Kāmūpapattisuttaṃ
