1. கந்த³ரகஸுத்தவண்ணனா

1. Kandarakasuttavaṇṇanā

1. ஏவங் மே ஸுதந்தி கந்த³ரகஸுத்தங். தத்த² சம்பாயந்தி ஏவங்னாமகே நக³ரே. தஸ்ஸ ஹி நக³ரஸ்ஸ ஆராமபொக்க²ரணீஆதீ³ஸு தேஸு தேஸு டா²னேஸு சம்பகருக்கா²வ உஸ்ஸன்னா அஹேஸுங், தஸ்மா சம்பாதி ஸங்க²மக³மாஸி. க³க்³க³ராய பொக்க²ரணியா தீரேதி தஸ்ஸ சம்பானக³ரஸ்ஸ அவிதூ³ரே க³க்³க³ராய நாம ராஜமஹேஸியா க²ணிதத்தா க³க்³க³ராதி லத்³த⁴வோஹாரா பொக்க²ரணீ அத்தி². தஸ்ஸா தீரே ஸமந்ததோ நீலாதி³பஞ்சவண்ணகுஸுமபடிமண்டி³தங் மஹந்தங் சம்பகவனங். தஸ்மிங் ப⁴க³வா குஸுமக³ந்த⁴ஸுக³ந்தே⁴ சம்பகவனே விஹரதி. தங் ஸந்தா⁴ய ‘‘க³க்³க³ராய பொக்க²ரணியா தீரே’’தி வுத்தங். மஹதா பி⁴க்கு²ஸங்கே⁴ன ஸத்³தி⁴ந்தி அத³ஸ்ஸிதபரிச்சே²தே³ன மஹந்தேன பி⁴க்கு²ஸங்கே⁴ன ஸத்³தி⁴ங். பெஸ்ஸோதி தஸ்ஸ நாமங். ஹத்தா²ரோஹபுத்தோதி ஹத்தா²சரியஸ்ஸ புத்தோ. கந்த³ரகோ ச பரிப்³பா³ஜகோதி கந்த³ரகோதி ஏவங்னாமோ ச²ன்னபரிப்³பா³ஜகோ. அபி⁴வாதெ³த்வாதி ச²ப்³ப³ண்ணானங் க⁴னபு³த்³த⁴ரஸ்மீனங் அந்தரங் பவிஸித்வா பஸன்னலாகா²ரஸே நிமுஜ்ஜமானோ விய, ஸிங்கீ³ஸுவண்ணவண்ணங் து³ஸ்ஸவரங் பஸாரெத்வா ஸஸீஸங் பாருபமானோ விய, வண்ணக³ந்த⁴ஸம்பன்னசம்பகபுப்பா²னி ஸிரஸா ஸம்படிச்ச²ந்தோ விய, ஸினேருபாத³ங் உபக³ச்ச²ந்தோ புண்ணசந்தோ³ விய ப⁴க³வதோ சக்கலக்க²ணபடிமண்டி³தே அலத்தகவண்ணபு²ல்லபது³மஸஸ்ஸிரிகே பாதே³ வந்தி³த்வாதி அத்தோ². ஏகமந்தங் நிஸீதீ³தி ச²னிஸஜ்ஜதோ³ஸவிரஹிதே ஏகஸ்மிங் ஓகாஸே நிஸீதி³.

1.Evaṃme sutanti kandarakasuttaṃ. Tattha campāyanti evaṃnāmake nagare. Tassa hi nagarassa ārāmapokkharaṇīādīsu tesu tesu ṭhānesu campakarukkhāva ussannā ahesuṃ, tasmā campāti saṅkhamagamāsi. Gaggarāya pokkharaṇiyā tīreti tassa campānagarassa avidūre gaggarāya nāma rājamahesiyā khaṇitattā gaggarāti laddhavohārā pokkharaṇī atthi. Tassā tīre samantato nīlādipañcavaṇṇakusumapaṭimaṇḍitaṃ mahantaṃ campakavanaṃ. Tasmiṃ bhagavā kusumagandhasugandhe campakavane viharati. Taṃ sandhāya ‘‘gaggarāya pokkharaṇiyā tīre’’ti vuttaṃ. Mahatā bhikkhusaṅghena saddhinti adassitaparicchedena mahantena bhikkhusaṅghena saddhiṃ. Pessoti tassa nāmaṃ. Hatthārohaputtoti hatthācariyassa putto. Kandarakoca paribbājakoti kandarakoti evaṃnāmo channaparibbājako. Abhivādetvāti chabbaṇṇānaṃ ghanabuddharasmīnaṃ antaraṃ pavisitvā pasannalākhārase nimujjamāno viya, siṅgīsuvaṇṇavaṇṇaṃ dussavaraṃ pasāretvā sasīsaṃ pārupamāno viya, vaṇṇagandhasampannacampakapupphāni sirasā sampaṭicchanto viya, sinerupādaṃ upagacchanto puṇṇacando viya bhagavato cakkalakkhaṇapaṭimaṇḍite alattakavaṇṇaphullapadumasassirike pāde vanditvāti attho. Ekamantaṃ nisīdīti chanisajjadosavirahite ekasmiṃ okāse nisīdi.

துண்ஹீபூ⁴ தங் துண்ஹீபூ⁴தந்தி யதோ யதோ அனுவிலோகேதி, ததோ ததோ துண்ஹீபூ⁴தமேவாதி அத்தோ². தத்த² ஹி ஏகபி⁴க்கு²ஸ்ஸாபி ஹத்த²குக்குச்சங் வா பாத³குக்குச்சங் வா நத்தி², ஸப்³பே³ ப⁴க³வதோ சேவ கா³ரவேன அத்தனோ ச ஸிக்கி²தஸிக்க²தாய அஞ்ஞமஞ்ஞங் விக³தஸல்லாபா அந்தமஸோ உக்காஸிதஸத்³த³ம்பி அகரொந்தா ஸுனிகா²தஇந்த³கீ²லா விய நிவாதட்டா²னே ஸன்னிஸின்னங் மஹாஸமுத்³த³உத³கங் விய காயேனபி நிச்சலா மனஸாபி அவிக்கி²த்தா ரத்தவலாஹகா விய ஸினேருகூடங் ப⁴க³வந்தங் பரிவாரெத்வா நிஸீதி³ங்ஸு. பரிப்³பா³ஜகஸ்ஸ ஏவங் ஸன்னிஸின்னங் பரிஸங் தி³ஸ்வா மஹந்தங் பீதிஸோமனஸ்ஸங் உப்பஜ்ஜி. உப்பன்னங் பன அந்தோஹத³யஸ்மிங்யேவ ஸன்னித³ஹிதுங் அஸக்கொந்தோ பியஸமுதா³ஹாரங் ஸமுட்டா²பேஸி. தஸ்மா அச்ச²ரியங் போ⁴திஆதி³மாஹ.

Tuṇhībhūtaṃ tuṇhībhūtanti yato yato anuviloketi, tato tato tuṇhībhūtamevāti attho. Tattha hi ekabhikkhussāpi hatthakukkuccaṃ vā pādakukkuccaṃ vā natthi, sabbe bhagavato ceva gāravena attano ca sikkhitasikkhatāya aññamaññaṃ vigatasallāpā antamaso ukkāsitasaddampi akarontā sunikhātaindakhīlā viya nivātaṭṭhāne sannisinnaṃ mahāsamuddaudakaṃ viya kāyenapi niccalā manasāpi avikkhittā rattavalāhakā viya sinerukūṭaṃ bhagavantaṃ parivāretvā nisīdiṃsu. Paribbājakassa evaṃ sannisinnaṃ parisaṃ disvā mahantaṃ pītisomanassaṃ uppajji. Uppannaṃ pana antohadayasmiṃyeva sannidahituṃ asakkonto piyasamudāhāraṃ samuṭṭhāpesi. Tasmā acchariyaṃ bhotiādimāha.

தத்த² அந்த⁴ஸ்ஸ பப்³ப³தாரோஹனங் விய நிச்சங் ந ஹோதீதி அச்ச²ரியங். அயங் தாவ ஸத்³த³னயோ. அயங் பன அட்ட²கதா²னயோ , அச்ச²ராயொக்³க³ந்தி அச்ச²ரியங். அச்ச²ரங் பஹரிதுங் யுத்தந்தி அத்தோ². அபூ⁴தபுப்³ப³ங் பூ⁴தந்தி அப்³பு⁴தங். உப⁴யம்பேதங் விம்ஹயஸ்ஸேவாதி⁴வசனங். தங் பனேதங் க³ரஹஅச்ச²ரியங், பஸங்ஸாஅச்ச²ரியந்தி து³வித⁴ங் ஹோதி. தத்த² அச்ச²ரியங் மொக்³க³ல்லான அப்³பு⁴தங் மொக்³க³ல்லான, யாவ பா³ஹாக³ஹணாபி நாம ஸோ மோக⁴புரிஸோ ஆக³மெஸ்ஸதீதி (சூளவ॰ 383; அ॰ நி॰ 8.20), இத³ங் க³ரஹஅச்ச²ரியங் நாம. ‘‘அச்ச²ரியங் நந்த³மாதே அப்³பு⁴தங் நந்த³மாதே, யத்ர ஹி நாம சித்துப்பாத³ம்பி பரிஸோதெ⁴ஸ்ஸஸீதி (அ॰ நி॰ 7.53) இத³ங் பஸங்ஸாஅச்ச²ரியங் நாம. இதா⁴பி இத³மேவ அதி⁴ப்பேதங்’’ அயஞ்ஹி தங் பஸங்ஸந்தோ ஏவமாஹ.

Tattha andhassa pabbatārohanaṃ viya niccaṃ na hotīti acchariyaṃ. Ayaṃ tāva saddanayo. Ayaṃ pana aṭṭhakathānayo , accharāyogganti acchariyaṃ. Accharaṃ paharituṃ yuttanti attho. Abhūtapubbaṃ bhūtanti abbhutaṃ. Ubhayampetaṃ vimhayassevādhivacanaṃ. Taṃ panetaṃ garahaacchariyaṃ, pasaṃsāacchariyanti duvidhaṃ hoti. Tattha acchariyaṃ moggallāna abbhutaṃ moggallāna, yāva bāhāgahaṇāpi nāma so moghapuriso āgamessatīti (cūḷava. 383; a. ni. 8.20), idaṃ garahaacchariyaṃ nāma. ‘‘Acchariyaṃ nandamāte abbhutaṃ nandamāte, yatra hi nāma cittuppādampi parisodhessasīti (a. ni. 7.53) idaṃ pasaṃsāacchariyaṃ nāma. Idhāpi idameva adhippetaṃ’’ ayañhi taṃ pasaṃsanto evamāha.

யாவஞ்சித³ந்தி எத்த² இத³ந்தி நிபாதமத்தங். யாவாதி பமாணபரிச்சே²தோ³, யாவ ஸம்மா படிபாதி³தோ, யத்தகேன பமாணேன ஸம்மா படிபாதி³தோ, ந ஸக்கா தஸ்ஸ வண்ணே வத்துங், அத² கோ² அச்ச²ரியமேவேதங் அப்³பு⁴தமேவேதந்தி வுத்தங் ஹோதி. ஏதபரமங்யேவாதி ஏவங் ஸம்மா படிபாதி³தோ ஏஸோ பி⁴க்கு²ஸங்கோ⁴ தஸ்ஸாபி பி⁴க்கு²ஸங்க⁴ஸ்ஸ பரமோதி ஏதபரமோ, தங் ஏதபரமங் யதா² அயங் படிபாதி³தோ, ஏவங் படிபாதி³தங் கத்வா படிபாதே³ஸுங், ந இதோ பி⁴ய்யோதி அத்தோ². து³தியனயே ஏவங் படிபாதெ³ஸ்ஸந்தி, ந இதோ பி⁴ய்யோதி யோஜேதப்³ப³ங். தத்த² படிபாதி³தோதி ஆபி⁴ஸமாசாரிகவத்தங் ஆதி³ங் கத்வா ஸம்மா அபச்சனீகபடிபத்தியங் யோஜிதோ. அத² கஸ்மா அயங் பரிப்³பா³ஜகோ அதீதானாக³தே பு³த்³தே⁴ த³ஸ்ஸேதி, கிமஸ்ஸ தியத்³த⁴ஜானநஞாணங் அத்தீ²தி. நத்தி², நயக்³கா³ஹே பன ட²த்வா ‘‘யேனாகாரேன அயங் பி⁴க்கு²ஸங்கோ⁴ ஸன்னிஸின்னோ த³ந்தோ வினீதோ உபஸந்தோ, அதீதபு³த்³தா⁴பி ஏதபரமங்யேவ கத்வா படிபஜ்ஜாபேஸுங், அனாக³தபு³த்³தா⁴பி படிபஜ்ஜாபெஸ்ஸந்தி, நத்தி² இதோ உத்தரி படிபாத³னா’’தி மஞ்ஞமானோ அனுபு³த்³தி⁴யா ஏவமாஹ.

Yāvañcidanti ettha idanti nipātamattaṃ. Yāvāti pamāṇaparicchedo, yāva sammā paṭipādito, yattakena pamāṇena sammā paṭipādito, na sakkā tassa vaṇṇe vattuṃ, atha kho acchariyamevetaṃ abbhutamevetanti vuttaṃ hoti. Etaparamaṃyevāti evaṃ sammā paṭipādito eso bhikkhusaṅgho tassāpi bhikkhusaṅghassa paramoti etaparamo, taṃ etaparamaṃ yathā ayaṃ paṭipādito, evaṃ paṭipāditaṃ katvā paṭipādesuṃ, na ito bhiyyoti attho. Dutiyanaye evaṃ paṭipādessanti, na ito bhiyyoti yojetabbaṃ. Tattha paṭipāditoti ābhisamācārikavattaṃ ādiṃ katvā sammā apaccanīkapaṭipattiyaṃ yojito. Atha kasmā ayaṃ paribbājako atītānāgate buddhe dasseti, kimassa tiyaddhajānanañāṇaṃ atthīti. Natthi, nayaggāhe pana ṭhatvā ‘‘yenākārena ayaṃ bhikkhusaṅgho sannisinno danto vinīto upasanto, atītabuddhāpi etaparamaṃyeva katvā paṭipajjāpesuṃ, anāgatabuddhāpi paṭipajjāpessanti, natthi ito uttari paṭipādanā’’ti maññamāno anubuddhiyā evamāha.

2. ஏவமேதங் கந்த³ரகாதி பாடிஏக்கோ அனுஸந்தி⁴. ப⁴க³வா கிர தங் ஸுத்வா ‘‘கந்த³ரக த்வங் பி⁴க்கு²ஸங்க⁴ங் உபஸந்தோதி வத³ஸி, இமஸ்ஸ பன பி⁴க்கு²ஸங்க⁴ஸ்ஸ உபஸந்தகாரணங் துய்ஹங் அபாகடங், ந ஹி த்வங் ஸமதிங்ஸ பாரமியா பூரெத்வா குஸலமூலங் பரிபாசெத்வா போ³தி⁴பல்லங்கே ஸப்³ப³ஞ்ஞுதஞ்ஞாணங் படிவிஜ்ஜி², மயா பன பாரமியோ பூரெத்வா ஞாதத்த²சரியங் லோகத்த²சரியங் பு³த்³த⁴த்த²சரியஞ்ச கோடிங் பாபெத்வா போ³தி⁴பல்லங்கே ஸப்³ப³ஞ்ஞுதஞ்ஞாணங் படிவித்³த⁴ங், மய்ஹங் ஏதேஸங் உபஸந்தகாரணங் பாகட’’ந்தி த³ஸ்ஸேதுங் இமங் தே³ஸனங் ஆரபி⁴.

2.Evametaṃ kandarakāti pāṭiekko anusandhi. Bhagavā kira taṃ sutvā ‘‘kandaraka tvaṃ bhikkhusaṅghaṃ upasantoti vadasi, imassa pana bhikkhusaṅghassa upasantakāraṇaṃ tuyhaṃ apākaṭaṃ, na hi tvaṃ samatiṃsa pāramiyā pūretvā kusalamūlaṃ paripācetvā bodhipallaṅke sabbaññutaññāṇaṃ paṭivijjhi, mayā pana pāramiyo pūretvā ñātatthacariyaṃ lokatthacariyaṃ buddhatthacariyañca koṭiṃ pāpetvā bodhipallaṅke sabbaññutaññāṇaṃ paṭividdhaṃ, mayhaṃ etesaṃ upasantakāraṇaṃ pākaṭa’’nti dassetuṃ imaṃ desanaṃ ārabhi.

ஸந்தி ஹி கந்த³ரகாதி அயம்பி பாடிஏக்கோ அனுஸந்தி⁴. ப⁴க³வதோ கிர ஏதத³ஹோஸி – ‘‘அயங் பரிப்³பா³ஜகோ இமங் பி⁴க்கு²ஸங்க⁴ங் உபஸந்தோதி வத³தி, அயஞ்ச பி⁴க்கு²ஸங்கோ⁴ கப்பெத்வா பகப்பெத்வா குஹகபா⁴வேன இரியாபத²ங் ஸண்ட²பெந்தோ சித்தேன அனுபஸந்தோ ந உபஸந்தாகாரங் த³ஸ்ஸேதி. எத்த² பன பி⁴க்கு²ஸங்கே⁴ படிபத³ங் பூரயமானாபி படிபத³ங் பூரெத்வா மத்த²கங் பத்வா டி²தபி⁴க்கூ²பி அத்தி², தத்த² படிபத³ங் பூரெத்வா மத்த²கங் பத்தா அத்தனா படிவித்³த⁴கு³ணேஹேவ உபஸந்தா, படிபத³ங் பூரயமானா உபரிமக்³க³ஸ்ஸ விபஸ்ஸனாய உபஸந்தா, இதோ முத்தா பன அவஸேஸா சதூஹி ஸதிபட்டா²னேஹி உபஸந்தா. தங் நேஸங் உபஸந்தகாரணங் த³ஸ்ஸெஸ்ஸாமீ’’தி ‘‘இமினா ச இமினா ச காரணேன அயங் பி⁴க்கு²ஸங்கோ⁴ உபஸந்தோ’’தி த³ஸ்ஸேதுங் ‘‘ஸந்தி ஹி கந்த³ரகா’’திஆதி³மாஹ.

Santi hi kandarakāti ayampi pāṭiekko anusandhi. Bhagavato kira etadahosi – ‘‘ayaṃ paribbājako imaṃ bhikkhusaṅghaṃ upasantoti vadati, ayañca bhikkhusaṅgho kappetvā pakappetvā kuhakabhāvena iriyāpathaṃ saṇṭhapento cittena anupasanto na upasantākāraṃ dasseti. Ettha pana bhikkhusaṅghe paṭipadaṃ pūrayamānāpi paṭipadaṃ pūretvā matthakaṃ patvā ṭhitabhikkhūpi atthi, tattha paṭipadaṃ pūretvā matthakaṃ pattā attanā paṭividdhaguṇeheva upasantā, paṭipadaṃ pūrayamānā uparimaggassa vipassanāya upasantā, ito muttā pana avasesā catūhi satipaṭṭhānehi upasantā. Taṃ nesaṃ upasantakāraṇaṃ dassessāmī’’ti ‘‘iminā ca iminā ca kāraṇena ayaṃ bhikkhusaṅgho upasanto’’ti dassetuṃ ‘‘santi hi kandarakā’’tiādimāha.

தத்த² அரஹந்தோ கீ²ணாஸவாதிஆதீ³ஸு யங் வத்தப்³ப³ங், தங் மூலபரியாயஸுத்தவண்ணனாயமேவ வுத்தங். ஸேக²படிபத³ம்பி தத்தே²வ வித்தா²ரிதங். ஸந்ததஸீலாதி ஸததஸீலா நிரந்தரஸீலா. ஸந்ததவுத்தினோதி தஸ்ஸேவ வேவசனங், ஸந்ததஜீவிகா வாதிபி அத்தோ². தஸ்மிங் ஸந்ததஸீலே ட²த்வாவ ஜீவிகங் கப்பெந்தி, ந து³ஸ்ஸீல்யங் மரணங் பாபுணந்தீதி அத்தோ².

Tattha arahanto khīṇāsavātiādīsu yaṃ vattabbaṃ, taṃ mūlapariyāyasuttavaṇṇanāyameva vuttaṃ. Sekhapaṭipadampi tattheva vitthāritaṃ. Santatasīlāti satatasīlā nirantarasīlā. Santatavuttinoti tasseva vevacanaṃ, santatajīvikā vātipi attho. Tasmiṃ santatasīle ṭhatvāva jīvikaṃ kappenti, na dussīlyaṃ maraṇaṃ pāpuṇantīti attho.

நிபகாதி நேபக்கேன ஸமன்னாக³தா பஞ்ஞவந்தோ. நிபகவுத்தினோதி பஞ்ஞாய வுத்தினோ, பஞ்ஞாய ட²த்வா ஜீவிகங் கப்பெந்தி. யதா² ஏகச்சோ ஸாஸனே பப்³ப³ஜித்வாபி ஜீவிதகாரணா ச²ஸு அகோ³சரேஸு சரதி, வேஸியாகோ³சரோ ஹோதி, வித⁴வது²ல்லகுமாரிகபண்ட³கபானாகா³ரபி⁴க்கு²னிகோ³சரோ ஹோதி. ஸங்ஸட்டோ² விஹரதி ராஜூஹி ராஜமஹாமத்தேஹி தித்தி²யேஹி தித்தி²யஸாவகேஹி அனநுலோமிகேன கி³ஹிஸங்ஸக்³கே³ன (விப⁴॰ 514), வேஜ்ஜகம்மங் கரோதி, தூ³தகம்மங் கரோதி, பஹிணகம்மங் கரோதி, க³ண்ட³ங் பா²லேதி, அருமக்க²னங் தே³தி, உத்³த⁴ங்விரேசனங் தே³தி, அதோ⁴விரேசனங் தே³தி, நத்து²தேலங் பசதி, பிவனதேலங் பசதி, வேளுதா³னங், பத்ததா³னங், புப்ப²தா³னங், ப²லதா³னங், ஸினானதா³னங், த³ந்தகட்ட²தா³னங், முகோ²த³கதா³னங், சுண்ணமத்திகதா³னங் தே³தி, சாடுகம்யங் கரோதி, முக்³க³ஸூபியங், பாரிப⁴டுங், ஜங்க⁴பேஸனியங் கரோதீதி ஏகவீஸதிவிதா⁴ய அனேஸனாய ஜீவிகங் கப்பெந்தோ அனிபகவுத்தி நாம ஹோதி, ந பஞ்ஞாய ட²த்வா ஜீவிகங் கப்பேதி, ததோ காலகிரியங் கத்வா ஸமணயக்கோ² நாம ஹுத்வா ‘‘தஸ்ஸ ஸங்கா⁴டிபி ஆதி³த்தா ஹோதி ஸம்பஜ்ஜலிதா’’தி வுத்தனயேன மஹாது³க்க²ங் அனுபோ⁴தி. ஏவங்விதா⁴ அஹுத்வா ஜீவிதஹேதுபி ஸிக்கா²பத³ங் அனதிக்கமந்தோ சதுபாரிஸுத்³தி⁴ஸீலே பதிட்டா²ய யதா²ப³லங் பு³த்³த⁴வசனங் உக்³க³ண்ஹித்வா ரத²வினீதபடிபத³ங், மஹாகோ³ஸிங்க³படிபத³ங், மஹாஸுஞ்ஞதபடிபத³ங், அனங்க³ணபடிபத³ங், த⁴ம்மதா³யாத³படிபத³ங், நாலகபடிபத³ங், துவட்டகபடிபத³ங், சந்தோ³பமபடிபத³ந்தி இமானி அரியபடிபதா³னி பூரெந்தோ சதுபச்சய-ஸந்தோஸ-பா⁴வனாராம-அரியவங்ஸபடிபத்தியங் காயஸக்கி²னோ ஹுத்வா அனீகா நிக்க²ந்தஹத்தீ² விய யூதா² விஸ்ஸட்ட²ஸீஹோ விய நிபச்சா²ப³ந்த⁴மஹானாவா விய ச க³மனாதீ³ஸு ஏகவிஹாரினோ விபஸ்ஸனங் பட்ட²பெத்வா அஜ்ஜஅஜ்ஜேவ அரஹத்தந்தி பவத்தஉஸ்ஸாஹா விஹரந்தீதி அத்தோ².

Nipakāti nepakkena samannāgatā paññavanto. Nipakavuttinoti paññāya vuttino, paññāya ṭhatvā jīvikaṃ kappenti. Yathā ekacco sāsane pabbajitvāpi jīvitakāraṇā chasu agocaresu carati, vesiyāgocaro hoti, vidhavathullakumārikapaṇḍakapānāgārabhikkhunigocaro hoti. Saṃsaṭṭho viharati rājūhi rājamahāmattehi titthiyehi titthiyasāvakehi ananulomikena gihisaṃsaggena (vibha. 514), vejjakammaṃ karoti, dūtakammaṃ karoti, pahiṇakammaṃ karoti, gaṇḍaṃ phāleti, arumakkhanaṃ deti, uddhaṃvirecanaṃ deti, adhovirecanaṃ deti, natthutelaṃ pacati, pivanatelaṃ pacati, veḷudānaṃ, pattadānaṃ, pupphadānaṃ, phaladānaṃ, sinānadānaṃ, dantakaṭṭhadānaṃ, mukhodakadānaṃ, cuṇṇamattikadānaṃ deti, cāṭukamyaṃ karoti, muggasūpiyaṃ, pāribhaṭuṃ, jaṅghapesaniyaṃ karotīti ekavīsatividhāya anesanāya jīvikaṃ kappento anipakavutti nāma hoti, na paññāya ṭhatvā jīvikaṃ kappeti, tato kālakiriyaṃ katvā samaṇayakkho nāma hutvā ‘‘tassa saṅghāṭipi ādittā hoti sampajjalitā’’ti vuttanayena mahādukkhaṃ anubhoti. Evaṃvidhā ahutvā jīvitahetupi sikkhāpadaṃ anatikkamanto catupārisuddhisīle patiṭṭhāya yathābalaṃ buddhavacanaṃ uggaṇhitvā rathavinītapaṭipadaṃ, mahāgosiṅgapaṭipadaṃ, mahāsuññatapaṭipadaṃ, anaṅgaṇapaṭipadaṃ, dhammadāyādapaṭipadaṃ, nālakapaṭipadaṃ, tuvaṭṭakapaṭipadaṃ, candopamapaṭipadanti imāni ariyapaṭipadāni pūrento catupaccaya-santosa-bhāvanārāma-ariyavaṃsapaṭipattiyaṃ kāyasakkhino hutvā anīkā nikkhantahatthī viya yūthā vissaṭṭhasīho viya nipacchābandhamahānāvā viya ca gamanādīsu ekavihārino vipassanaṃ paṭṭhapetvā ajjaajjeva arahattanti pavattaussāhā viharantīti attho.

ஸுப்பதிட்டி²தசித்தாதி சதூஸு ஸதிபட்டா²னேஸு ஸுட்ட²பிதசித்தா ஹுத்வா. ஸேஸா ஸதிபட்டா²னகதா² ஹெட்டா² வித்தா²ரிதாவ. இத⁴ பன லோகியலோகுத்தரமிஸ்ஸகா ஸதிபட்டா²னா கதி²தா, எத்தகேன பி⁴க்கு²ஸங்க⁴ஸ்ஸ உபஸந்தகாரணங் கதி²தங் ஹோதி.

Suppatiṭṭhitacittāti catūsu satipaṭṭhānesu suṭṭhapitacittā hutvā. Sesā satipaṭṭhānakathā heṭṭhā vitthāritāva. Idha pana lokiyalokuttaramissakā satipaṭṭhānā kathitā, ettakena bhikkhusaṅghassa upasantakāraṇaṃ kathitaṃ hoti.

3. யாவ ஸுபஞ்ஞத்தாதி யாவ ஸுட்ட²பிதா ஸுதே³ஸிதா. மயம்பி ஹி, ப⁴ந்தேதி இமினா ஏஸ அத்தனோ காரகபா⁴வங் த³ஸ்ஸேதி, பி⁴க்கு²ஸங்க⁴ஞ்ச உக்கி²பதி. அயஞ்ஹெத்த² அதி⁴ப்பாயோ, மயம்பி ஹி, ப⁴ந்தே, கி³ஹி…பே॰… ஸுப்பதிட்டி²தசித்தா விஹராம, பி⁴க்கு²ஸங்க⁴ஸ்ஸ பன அயமேவ கஸி ச பீ³ஜஞ்ச யுக³னங்க³லஞ்ச பா²லபாசனஞ்ச, தஸ்மா பி⁴க்கு²ஸங்கோ⁴ ஸப்³ப³காலங் ஸதிபட்டா²னபராயணோ, மயங் பன காலேன காலங் ஓகாஸங் லபி⁴த்வா ஏதங் மனஸிகாரங் கரோம, மயம்பி காரகா, ந ஸப்³ப³ஸோ விஸ்ஸட்ட²கம்மட்டா²னாயேவாதி. மனுஸ்ஸக³ஹனேதி மனுஸ்ஸானங் அஜ்ஜா²ஸயக³ஹனேன க³ஹனதா, அஜ்ஜா²ஸயஸ்ஸாபி நேஸங் கிலேஸக³ஹனேன க³ஹனதா வேதி³தப்³பா³. கஸடஸாடெ²ய்யேஸுபி ஏஸேவ நயோ. தத்த² அபரிஸுத்³த⁴ட்டே²ன கஸடதா, கேராடியட்டே²ன ஸாடெ²ய்யதா வேதி³தப்³பா³. ஸத்தானங் ஹிதாஹிதங் ஜானாதீதி ஏவங் க³ஹனகஸடகேராடியானங் மனுஸ்ஸானங் ஹிதாஹிதபடிபத³ங் யாவ ஸுட்டு² ப⁴க³வா ஜானாதி. யதி³த³ங் பஸவோதி எத்த² ஸப்³பா³பி சதுப்பத³ஜாதி பஸவோதி அதி⁴ப்பேதா. பஹோமீதி ஸக்கோமி. யாவதகேன அந்தரேனாதி யத்தகேன க²ணேன. சம்பங் க³தாக³தங் கரிஸ்ஸதீதி அஸ்ஸமண்ட³லதோ யாவ சம்பானக³ரத்³வாரா க³மனஞ்ச ஆக³மனஞ்ச கரிஸ்ஸதி. ஸாடெ²ய்யானீதி ஸட²த்தானி. கூடெய்யானீதி கூடத்தானி. வங்கெய்யானீதி வங்கத்தானி. ஜிம்ஹெய்யானீதி ஜிம்ஹத்தானி. பாதுகரிஸ்ஸதீதி பகாஸெஸ்ஸதி த³ஸ்ஸெஸ்ஸதி. ந ஹி ஸக்கா தேன தானி எத்தகேன அந்தரேன த³ஸ்ஸேதுங்.

3.Yāva supaññattāti yāva suṭṭhapitā sudesitā. Mayampi hi, bhanteti iminā esa attano kārakabhāvaṃ dasseti, bhikkhusaṅghañca ukkhipati. Ayañhettha adhippāyo, mayampi hi, bhante, gihi…pe… suppatiṭṭhitacittā viharāma, bhikkhusaṅghassa pana ayameva kasi ca bījañca yuganaṅgalañca phālapācanañca, tasmā bhikkhusaṅgho sabbakālaṃ satipaṭṭhānaparāyaṇo, mayaṃ pana kālena kālaṃ okāsaṃ labhitvā etaṃ manasikāraṃ karoma, mayampi kārakā, na sabbaso vissaṭṭhakammaṭṭhānāyevāti. Manussagahaneti manussānaṃ ajjhāsayagahanena gahanatā, ajjhāsayassāpi nesaṃ kilesagahanena gahanatā veditabbā. Kasaṭasāṭheyyesupi eseva nayo. Tattha aparisuddhaṭṭhena kasaṭatā, kerāṭiyaṭṭhena sāṭheyyatā veditabbā. Sattānaṃ hitāhitaṃ jānātīti evaṃ gahanakasaṭakerāṭiyānaṃ manussānaṃ hitāhitapaṭipadaṃ yāva suṭṭhu bhagavā jānāti. Yadidaṃ pasavoti ettha sabbāpi catuppadajāti pasavoti adhippetā. Pahomīti sakkomi. Yāvatakena antarenāti yattakena khaṇena. Campaṃ gatāgataṃ karissatīti assamaṇḍalato yāva campānagaradvārā gamanañca āgamanañca karissati. Sāṭheyyānīti saṭhattāni. Kūṭeyyānīti kūṭattāni. Vaṅkeyyānīti vaṅkattāni. Jimheyyānīti jimhattāni. Pātukarissatīti pakāsessati dassessati. Na hi sakkā tena tāni ettakena antarena dassetuṃ.

தத்த² யஸ்ஸ கிஸ்மிஞ்சிதே³வ டா²னே டா²துகாமஸ்ஸ ஸதோ யங் டா²னங் மனுஸ்ஸானங் ஸப்படிப⁴யங், புரதோ க³ந்த்வா வஞ்செத்வா ட²ஸ்ஸாமீதி ந ஹோதி, தஸ்மிங் டா²துகாமட்டா²னேயேவ நிகா²தத்த²ம்போ⁴ விய சத்தாரோ பாதே³ நிச்சலே கத்வா திட்ட²தி, அயங் ஸடோ² நாம. யஸ்ஸ பன கிஸ்மிஞ்சிதே³வ டா²னே அவச்சி²ந்தி³த்வா க²ந்த⁴க³தங் பாதேதுகாமஸ்ஸ ஸதோ யங் டா²னங் மனுஸ்ஸானங் ஸப்படிப⁴யங், புரதோ க³ந்த்வா வஞ்செத்வா பாதெஸ்ஸாமீதி ந ஹோதி, தத்தே²வ அவச்சி²ந்தி³த்வா பாதேதி, அயங் கூடோ நாம. யஸ்ஸ கிஸ்மிஞ்சிதே³வ டா²னே மக்³கா³ உக்கம்ம நிவத்தித்வா படிமக்³க³ங் ஆரோஹிதுகாமஸ்ஸ ஸதோ யங் டா²னங் மனுஸ்ஸானங் ஸப்படிப⁴யங், புரதோ க³ந்த்வா வஞ்செத்வா ஏவங் கரிஸ்ஸாமீதி ந ஹோதி, தத்தே²வ மக்³கா³ உக்கம்ம நிவத்தித்வா படிமக்³க³ங் ஆரோஹதி, அயங் வங்கோ நாம. யஸ்ஸ பன காலேன வாமதோ காலேன த³க்கி²ணதோ காலேன உஜுமக்³கே³னேவ க³ந்துகாமஸ்ஸ ஸதோ யங் டா²னங் மனுஸ்ஸானங் ஸப்படிப⁴யங், புரதோ க³ந்த்வா வஞ்செத்வா ஏவங் கரிஸ்ஸாமீதி ந ஹோதி, தத்தே²வ காலேன வாமதோ காலேன த³க்கி²ணதோ காலேன உஜுமக்³க³ங் க³ச்ச²தி, ததா² லண்ட³ங் வா பஸ்ஸாவங் வா விஸ்ஸஜ்ஜேதுகாமஸ்ஸ ஸதோ இத³ங் டா²னங் ஸுஸம்மட்ட²ங் ஆகிண்ணமனுஸ்ஸங் ரமணீயங், இமஸ்மிங் டா²னே ஏவரூபங் காதுங் ந யுத்தங், புரதோ க³ந்த்வா படிச்ச²ன்னடா²னே கரிஸ்ஸாமீதி ந ஹோதி, தத்தே²வ கரோதி, அயங் ஜிம்ஹோ நாம. இதி இமங் சதுப்³பி³த⁴ம்பி கிரியங் ஸந்தா⁴யேதங் வுத்தங். ஸப்³பா³னி தானி ஸாடெ²ய்யானி கூடெய்யானி வங்கெய்யானி ஜிம்ஹெய்யானி பாதுகரிஸ்ஸதீதி ஏவங் கரொந்தாபி தே ஸடா²த³யோ தானி ஸாடெ²ய்யாதீ³னி பாதுகரொந்தி நாம.

Tattha yassa kismiñcideva ṭhāne ṭhātukāmassa sato yaṃ ṭhānaṃ manussānaṃ sappaṭibhayaṃ, purato gantvā vañcetvā ṭhassāmīti na hoti, tasmiṃ ṭhātukāmaṭṭhāneyeva nikhātatthambho viya cattāro pāde niccale katvā tiṭṭhati, ayaṃ saṭho nāma. Yassa pana kismiñcideva ṭhāne avacchinditvā khandhagataṃ pātetukāmassa sato yaṃ ṭhānaṃ manussānaṃ sappaṭibhayaṃ, purato gantvā vañcetvā pātessāmīti na hoti, tattheva avacchinditvā pāteti, ayaṃ kūṭo nāma. Yassa kismiñcideva ṭhāne maggā ukkamma nivattitvā paṭimaggaṃ ārohitukāmassa sato yaṃ ṭhānaṃ manussānaṃ sappaṭibhayaṃ, purato gantvā vañcetvā evaṃ karissāmīti na hoti, tattheva maggā ukkamma nivattitvā paṭimaggaṃ ārohati, ayaṃ vaṅko nāma. Yassa pana kālena vāmato kālena dakkhiṇato kālena ujumaggeneva gantukāmassa sato yaṃ ṭhānaṃ manussānaṃ sappaṭibhayaṃ, purato gantvā vañcetvā evaṃ karissāmīti na hoti, tattheva kālena vāmato kālena dakkhiṇato kālena ujumaggaṃ gacchati, tathā laṇḍaṃ vā passāvaṃ vā vissajjetukāmassa sato idaṃ ṭhānaṃ susammaṭṭhaṃ ākiṇṇamanussaṃ ramaṇīyaṃ, imasmiṃ ṭhāne evarūpaṃ kātuṃ na yuttaṃ, purato gantvā paṭicchannaṭhāne karissāmīti na hoti, tattheva karoti, ayaṃ jimho nāma. Iti imaṃ catubbidhampi kiriyaṃ sandhāyetaṃ vuttaṃ. Sabbāni tāni sāṭheyyāni kūṭeyyāni vaṅkeyyāni jimheyyāni pātukarissatīti evaṃ karontāpi te saṭhādayo tāni sāṭheyyādīni pātukaronti nāma.

ஏவங் பஸூனங் உத்தானபா⁴வங் த³ஸ்ஸெத்வா இதா³னி மனுஸ்ஸானங் க³ஹனபா⁴வங் த³ஸ்ஸெந்தோ அம்ஹாகங் பன, ப⁴ந்தேதிஆதி³மாஹ. தத்த² தா³ஸாதி அந்தோஜாதகா வா த⁴னக்கீதா வா கரமரானீதா வா ஸயங் வா தா³ஸப்³யங் உபக³தா. பெஸ்ஸாதி பேஸனகாரகா. கம்மகராதி ப⁴த்தவேதனப⁴தா. அஞ்ஞதா²வ காயேனாதி அஞ்ஞேனேவாகாரேன காயேன ஸமுதா³சரந்தி, அஞ்ஞேனேவாகாரேன வாசாய, அஞ்ஞேன ச நேஸங் ஆகாரேன சித்தங் டி²தங் ஹோதீதி த³ஸ்ஸேதி. தத்த² யே ஸம்முகா² ஸாமிகே தி³ஸ்வா பச்சுக்³க³மனங் கரொந்தி, ஹத்த²தோ ப⁴ண்ட³கங் க³ண்ஹந்தி, இமங் விஸ்ஸஜ்ஜெத்வா இமங் க³ண்ஹந்தா ஸேஸானிபி ஆஸன-பஞ்ஞாபன-தாலவண்டபீ³ஜன-பாத³தோ⁴வனாதீ³னி ஸப்³பா³னி கிச்சானி கரொந்தி, பரம்முக²காலே பன தேலம்பி உத்தரந்தங் ந ஓலோகெந்தி, ஸதக்³க⁴னகேபி ஸஹஸ்ஸக்³க⁴னகேபி கம்மே பரிஹாயந்தே நிவத்தித்வா ஓலோகேதும்பி ந இச்ச²ந்தி, இமே அஞ்ஞதா² காயேன ஸமுதா³சரந்தி நாம. யே பன ஸம்முகா² ‘‘அம்ஹாகங் ஸாமி அம்ஹாகங் அய்யோ’’திஆதீ³னி வத்வா பஸங்ஸந்தி, பரம்முகா² அவத்தப்³ப³ங் நாம நத்தி², யங் இச்ச²ந்தி, தங் வத³ந்தி, இமே அஞ்ஞதா² வாசாய ஸமுதா³சரந்தி நாம.

Evaṃ pasūnaṃ uttānabhāvaṃ dassetvā idāni manussānaṃ gahanabhāvaṃ dassento amhākaṃ pana, bhantetiādimāha. Tattha dāsāti antojātakā vā dhanakkītā vā karamarānītā vā sayaṃ vā dāsabyaṃ upagatā. Pessāti pesanakārakā. Kammakarāti bhattavetanabhatā. Aññathāva kāyenāti aññenevākārena kāyena samudācaranti, aññenevākārena vācāya, aññena ca nesaṃ ākārena cittaṃ ṭhitaṃ hotīti dasseti. Tattha ye sammukhā sāmike disvā paccuggamanaṃ karonti, hatthato bhaṇḍakaṃ gaṇhanti, imaṃ vissajjetvā imaṃ gaṇhantā sesānipi āsana-paññāpana-tālavaṇṭabījana-pādadhovanādīni sabbāni kiccāni karonti, parammukhakāle pana telampi uttarantaṃ na olokenti, satagghanakepi sahassagghanakepi kamme parihāyante nivattitvā oloketumpi na icchanti, ime aññathā kāyena samudācaranti nāma. Ye pana sammukhā ‘‘amhākaṃ sāmi amhākaṃ ayyo’’tiādīni vatvā pasaṃsanti, parammukhā avattabbaṃ nāma natthi, yaṃ icchanti, taṃ vadanti, ime aññathā vācāya samudācaranti nāma.

4. சத்தாரோமே பெஸ்ஸபுக்³க³லாதி அயம்பி பாடிஏக்கோ அனுஸந்தி⁴. அயஞ்ஹி பெஸ்ஸோ ‘‘யாவஞ்சித³ங், ப⁴ந்தே, ப⁴க³வா ஏவங் மனுஸ்ஸக³ஹணே ஏவங் மனுஸ்ஸகஸடே ஏவங் மனுஸ்ஸஸாடெ²ய்யே வத்தமானே ஸத்தானங் ஹிதாஹிதங் ஜானாதீ’’தி ஆஹ. புரிமே ச தயோ புக்³க³லா அஹிதபடிபத³ங் படிபன்னா, உபரி சதுத்தோ² ஹிதபடிபத³ங், ஏவமஹங் ஸத்தானங் ஹிதாஹிதங் ஜானாமீதி த³ஸ்ஸேதுங் இமங் தே³ஸனங் ஆரபி⁴. ஹெட்டா² கந்த³ரகஸ்ஸ கதா²ய ஸத்³தி⁴ங் யோஜேதும்பி வட்டதி. தேன வுத்தங் ‘‘யாவஞ்சித³ங் போ⁴தா கோ³தமேன ஸம்மா பி⁴க்கு²ஸங்கோ⁴ படிபாதி³தோ’’தி. அத²ஸ்ஸ ப⁴க³வா ‘‘புரிமே தயோ புக்³க³லே பஹாய உபரி சதுத்த²புக்³க³லஸ்ஸ ஹிதபடிபத்தியங்யேவ படிபாதே³மீ’’தி த³ஸ்ஸெந்தோபி இமங் தே³ஸனங் ஆரபி⁴. ஸந்தோதி இத³ங் ஸங்விஜ்ஜமானாதி பத³ஸ்ஸேவ வேவசனங். ‘‘ஸந்தா ஹொந்தி ஸமிதா வூபஸந்தா’’தி (விப⁴॰ 542) எத்த² ஹி நிருத்³தா⁴ ஸந்தாதி வுத்தா. ‘‘ஸந்தா ஏதே விஹாரா அரியஸ்ஸ வினயே வுச்சந்தீ’’தி எத்த² (ம॰ நி॰ 1.82) நிப்³பு³தா. ‘‘ஸந்தோ ஹவே ஸப்³பி⁴ பவேத³யந்தீ’’தி எத்த² (ஜா॰ 2.21.413) பண்டி³தா. இத⁴ பன விஜ்ஜமானா உபலப்³ப⁴மானாதி அத்தோ².

4.Cattārome pessapuggalāti ayampi pāṭiekko anusandhi. Ayañhi pesso ‘‘yāvañcidaṃ, bhante, bhagavā evaṃ manussagahaṇe evaṃ manussakasaṭe evaṃ manussasāṭheyye vattamāne sattānaṃ hitāhitaṃ jānātī’’ti āha. Purime ca tayo puggalā ahitapaṭipadaṃ paṭipannā, upari catuttho hitapaṭipadaṃ, evamahaṃ sattānaṃ hitāhitaṃ jānāmīti dassetuṃ imaṃ desanaṃ ārabhi. Heṭṭhā kandarakassa kathāya saddhiṃ yojetumpi vaṭṭati. Tena vuttaṃ ‘‘yāvañcidaṃ bhotā gotamena sammā bhikkhusaṅgho paṭipādito’’ti. Athassa bhagavā ‘‘purime tayo puggale pahāya upari catutthapuggalassa hitapaṭipattiyaṃyeva paṭipādemī’’ti dassentopi imaṃ desanaṃ ārabhi. Santoti idaṃ saṃvijjamānāti padasseva vevacanaṃ. ‘‘Santā honti samitā vūpasantā’’ti (vibha. 542) ettha hi niruddhā santāti vuttā. ‘‘Santā ete vihārā ariyassa vinaye vuccantī’’ti ettha (ma. ni. 1.82) nibbutā. ‘‘Santo have sabbhi pavedayantī’’ti ettha (jā. 2.21.413) paṇḍitā. Idha pana vijjamānā upalabbhamānāti attho.

அத்தந்தபாதீ³ஸு அத்தானங் தபதி து³க்கா²பேதீதி அத்தந்தபோ. அத்தனோ பரிதாபனானுயோக³ங் அத்தபரிதாபனானுயோக³ங். பரங் தபதி து³க்கா²பேதீதி பரந்தபோ. பரேஸங் பரிதாபனானுயோக³ங் பரபரிதாபனானுயோக³ங். தி³ட்டே²வ த⁴ம்மேதி இமஸ்மிங்யேவ அத்தபா⁴வே. நிச்சா²தோதி சா²தங் வுச்சதி தண்ஹா, ஸா அஸ்ஸ நத்தீ²தி நிச்சா²தோ. ஸப்³ப³கிலேஸானங் நிப்³பு³தத்தா நிப்³பு³தோ. அந்தோ தாபனகிலேஸானங் அபா⁴வா ஸீதலோ ஜாதோதி ஸீதிபூ⁴தோ. ஜா²னமக்³க³ப²லனிப்³பா³னஸுகா²னி படிஸங்வேதே³தீதி ஸுக²படிஸங்வேதீ³. ப்³ரஹ்மபூ⁴தேன அத்தனாதி ஸெட்ட²பூ⁴தேன அத்தனா. சித்தங் ஆராதே⁴தீதி சித்தங் ஸம்பாதே³தி, பரிபூரேதி க³ண்ஹாதி பஸாதே³தீதி அத்தோ².

Attantapādīsu attānaṃ tapati dukkhāpetīti attantapo. Attano paritāpanānuyogaṃ attaparitāpanānuyogaṃ. Paraṃ tapati dukkhāpetīti parantapo. Paresaṃ paritāpanānuyogaṃ paraparitāpanānuyogaṃ. Diṭṭheva dhammeti imasmiṃyeva attabhāve. Nicchātoti chātaṃ vuccati taṇhā, sā assa natthīti nicchāto. Sabbakilesānaṃ nibbutattā nibbuto. Anto tāpanakilesānaṃ abhāvā sītalo jātoti sītibhūto. Jhānamaggaphalanibbānasukhāni paṭisaṃvedetīti sukhapaṭisaṃvedī. Brahmabhūtena attanāti seṭṭhabhūtena attanā. Cittaṃ ārādhetīti cittaṃ sampādeti, paripūreti gaṇhāti pasādetīti attho.

5. து³க்க²படிக்கூலந்தி து³க்க²ஸ்ஸ படிகூலங், பச்சனீகஸண்டி²தங் து³க்க²ங் அபத்த²யமானந்தி அத்தோ².

5.Dukkhapaṭikkūlanti dukkhassa paṭikūlaṃ, paccanīkasaṇṭhitaṃ dukkhaṃ apatthayamānanti attho.

6. பண்டி³தோதி இத⁴ சதூஹி காரணேஹி பண்டி³தோதி ந வத்தப்³போ³, ஸதிபட்டா²னேஸு பன கம்மங் கரோதீதி பண்டி³தோதி வத்துங் வட்டதி. மஹாபஞ்ஞோதி இத³ம்பி மஹந்தே அத்தே² பரிக்³க³ண்ஹாதீதிஆதி³னா மஹாபஞ்ஞலக்க²ணேன ந வத்தப்³ப³ங், ஸதிபட்டா²னபரிக்³கா³ஹிகாய பன பஞ்ஞாய ஸமன்னாக³தத்தா மஹாபஞ்ஞோதி வத்துங் வட்டதி. மஹதா அத்தே²ன ஸங்யுத்தோ அக³மிஸ்ஸாதி மஹதா அத்தே²ன ஸங்யுத்தோ ஹுத்வா க³தோ ப⁴வெய்ய, ஸோதாபத்திப²லங் பாபுணெய்யாதி அத்தோ². கிங் பன யேஸங் மக்³க³ப²லானங் உபனிஸ்ஸயோ அத்தி², பு³த்³தா⁴னங் ஸம்முகீ²பா⁴வே டி²தேபி தேஸங் அந்தராயோ ஹோதீதி. ஆம ஹோதி, ந பன பு³த்³தே⁴ படிச்ச, அத² கோ² கிரியபரிஹானியா வா பாபமித்ததாய வா ஹோதி. தத்த² கிரியபரிஹானியா ஹோதி நாம – ஸசே ஹி த⁴ம்மஸேனாபதி த⁴னஞ்ஜானிஸ்ஸ ப்³ராஹ்மணஸ்ஸ ஆஸயங் ஞத்வா த⁴ம்மங் அதே³ஸயிஸ்ஸா, ஸோ ப்³ராஹ்மணோ ஸோதாபன்னோ அப⁴விஸ்ஸா, ஏவங் தாவ கிரியபரிஹானியா ஹோதி. பாபமித்ததாய ஹோதி நாம – ஸசே ஹி அஜாதஸத்து தே³வத³த்தஸ்ஸ வசனங் க³ஹெத்வா பிதுகா⁴தகம்மங் நாகரிஸ்ஸா, ஸாமஞ்ஞப²லஸுத்தகதி²ததி³வஸேவ ஸோதாபன்னோ அப⁴விஸ்ஸா, தஸ்ஸ வசனங் க³ஹெத்வா பிதுகா⁴தகம்மஸ்ஸ கதத்தா பன ந ஹோதி, ஏவங் பாபமித்ததாய ஹோதி. இமஸ்ஸாபி உபாஸகஸ்ஸ கிரியபரிஹானி ஜாதா, அபரினிட்டி²தாய தே³ஸனாய உட்ட²ஹித்வா பக்கந்தோ. அபிச, பி⁴க்க²வே, எத்தாவதாபி பெஸ்ஸோ ஹத்தா²ரோஹபுத்தோ மஹதா அத்தே²ன ஸங்யுத்தோதி கதரேன மஹந்தேன அத்தே²ன? த்³வீஹி ஆனிஸங்ஸேஹி. ஸோ கிர உபாஸகோ ஸங்கே⁴ ச பஸாத³ங் படிலபி⁴, ஸதிபட்டா²னபரிக்³க³ஹணத்தா²ய சஸ்ஸ அபி⁴னவோ நயோ உத³பாதி³. தேன வுத்தங் ‘‘மஹதா அத்தே²ன ஸங்யுத்தோ’’தி. கந்த³ரகோ பன ஸங்கே⁴ பஸாத³மேவ படிலபி⁴. ஏதஸ்ஸ ப⁴க³வா காலோதி ஏதஸ்ஸ த⁴ம்மக்கா²னஸ்ஸ, சதுன்னங் வா புக்³க³லானங் விப⁴ஜனஸ்ஸ காலோ.

6.Paṇḍitoti idha catūhi kāraṇehi paṇḍitoti na vattabbo, satipaṭṭhānesu pana kammaṃ karotīti paṇḍitoti vattuṃ vaṭṭati. Mahāpaññoti idampi mahante atthe pariggaṇhātītiādinā mahāpaññalakkhaṇena na vattabbaṃ, satipaṭṭhānapariggāhikāya pana paññāya samannāgatattā mahāpaññoti vattuṃ vaṭṭati. Mahatā atthena saṃyutto agamissāti mahatā atthena saṃyutto hutvā gato bhaveyya, sotāpattiphalaṃ pāpuṇeyyāti attho. Kiṃ pana yesaṃ maggaphalānaṃ upanissayo atthi, buddhānaṃ sammukhībhāve ṭhitepi tesaṃ antarāyo hotīti. Āma hoti, na pana buddhe paṭicca, atha kho kiriyaparihāniyā vā pāpamittatāya vā hoti. Tattha kiriyaparihāniyā hoti nāma – sace hi dhammasenāpati dhanañjānissa brāhmaṇassa āsayaṃ ñatvā dhammaṃ adesayissā, so brāhmaṇo sotāpanno abhavissā, evaṃ tāva kiriyaparihāniyā hoti. Pāpamittatāya hoti nāma – sace hi ajātasattu devadattassa vacanaṃ gahetvā pitughātakammaṃ nākarissā, sāmaññaphalasuttakathitadivaseva sotāpanno abhavissā, tassa vacanaṃ gahetvā pitughātakammassa katattā pana na hoti, evaṃ pāpamittatāya hoti. Imassāpi upāsakassa kiriyaparihāni jātā, apariniṭṭhitāya desanāya uṭṭhahitvā pakkanto. Apica, bhikkhave, ettāvatāpi pessohatthārohaputto mahatā atthena saṃyuttoti katarena mahantena atthena? Dvīhi ānisaṃsehi. So kira upāsako saṅghe ca pasādaṃ paṭilabhi, satipaṭṭhānapariggahaṇatthāya cassa abhinavo nayo udapādi. Tena vuttaṃ ‘‘mahatā atthena saṃyutto’’ti. Kandarako pana saṅghe pasādameva paṭilabhi. Etassa bhagavā kāloti etassa dhammakkhānassa, catunnaṃ vā puggalānaṃ vibhajanassa kālo.

8. ஓரப்³பி⁴காதீ³ஸு உரப்³பா⁴ வுச்சந்தி ஏளகா, உரப்³பே⁴ ஹனதீதி ஓரப்³பி⁴கோ. ஸூகரிகாதீ³ஸுபி ஏஸேவ நயோ. லுத்³தோ³தி தா³ருணோ கக்க²ளோ. மச்ச²கா⁴தகோதி மச்ச²ப³ந்த⁴கேவட்டோ. ப³ந்த⁴னாகா³ரிகோதி ப³ந்த⁴னாகா³ரகோ³பகோ. குருரகம்மந்தாதி தா³ருணகம்மந்தா.

8.Orabbhikādīsu urabbhā vuccanti eḷakā, urabbhe hanatīti orabbhiko. Sūkarikādīsupi eseva nayo. Luddoti dāruṇo kakkhaḷo. Macchaghātakoti macchabandhakevaṭṭo. Bandhanāgārikoti bandhanāgāragopako. Kururakammantāti dāruṇakammantā.

9. முத்³தா⁴வஸித்தோதி க²த்தியாபி⁴ஸேகேன முத்³த⁴னி அபி⁴ஸித்தோ. புரத்தி²மேன நக³ரஸ்ஸாதி நக³ரதோ புரத்தி²மதி³ஸாய. ஸந்தா²கா³ரந்தி யஞ்ஞஸாலங். க²ராஜினங் நிவாஸெத்வாதி ஸகு²ரங் அஜினசம்மங் நிவாஸெத்வா. ஸப்பிதேலேனாதி ஸப்பினா ச தேலேன ச. ட²பெத்வா ஹி ஸப்பிங் அவஸேஸோ யோ கோசி ஸ்னேஹோ தேலந்தி வுச்சதி. கண்டூ³வமானோதி நகா²னங் சி²ன்னத்தா கண்டூ³விதப்³ப³காலே தேன கண்டூ³வமானோ. அனந்தரஹிதாயாதி அஸந்த²தாய. ஸரூபவச்சா²யாதி ஸதி³ஸவச்சா²ய. ஸசே கா³வீ ஸேதா ஹோதி, வச்சோ²பி ஸேதகோவ. ஸசே கா³வீ கப³ரா வா ரத்தா வா, வச்சோ²பி தாதி³ஸோ வாதி ஏவங் ஸரூபவச்சா²ய. ஸோ ஏவமாஹாதி ஸோ ராஜா ஏவங் வதே³தி. வச்ச²தராதி தருணவச்ச²கபா⁴வங் அதிக்கந்தா ப³லவவச்சா². வச்ச²தரீஸுபி ஏஸேவ நயோ. ப³ரிஹிஸத்தா²யாதி பரிக்கே²பகரணத்தா²ய சேவ யஞ்ஞபூ⁴மியங் அத்த²ரணத்தா²ய ச. ஸேஸங் ஹெட்டா² தத்த² தத்த² வித்தா²ரிதத்தா உத்தானமேவாதி.

9.Muddhāvasittoti khattiyābhisekena muddhani abhisitto. Puratthimena nagarassāti nagarato puratthimadisāya. Santhāgāranti yaññasālaṃ. Kharājinaṃ nivāsetvāti sakhuraṃ ajinacammaṃ nivāsetvā. Sappitelenāti sappinā ca telena ca. Ṭhapetvā hi sappiṃ avaseso yo koci sneho telanti vuccati. Kaṇḍūvamānoti nakhānaṃ chinnattā kaṇḍūvitabbakāle tena kaṇḍūvamāno. Anantarahitāyāti asanthatāya. Sarūpavacchāyāti sadisavacchāya. Sace gāvī setā hoti, vacchopi setakova. Sace gāvī kabarā vā rattā vā, vacchopi tādiso vāti evaṃ sarūpavacchāya. So evamāhāti so rājā evaṃ vadeti. Vacchatarāti taruṇavacchakabhāvaṃ atikkantā balavavacchā. Vacchatarīsupi eseva nayo. Barihisatthāyāti parikkhepakaraṇatthāya ceva yaññabhūmiyaṃ attharaṇatthāya ca. Sesaṃ heṭṭhā tattha tattha vitthāritattā uttānamevāti.

பபஞ்சஸூத³னியா மஜ்ஜி²மனிகாயட்ட²கதா²ய

Papañcasūdaniyā majjhimanikāyaṭṭhakathāya

கந்த³ரகஸுத்தவண்ணனா நிட்டி²தா.

Kandarakasuttavaṇṇanā niṭṭhitā.

Next: 2. அட்ட²கனாக³ரஸுத்தவண்ணனா • 2. Aṭṭhakanāgarasuttavaṇṇanā

Related texts:

திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 1. கந்த³ரகஸுத்தங் • 1. Kandarakasuttaṃ

டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 1. கந்த³ரகஸுத்தவண்ணனா • 1. Kandarakasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact