| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
7. கங்கா²ரேவதஸுத்தவண்ணனா
7. Kaṅkhārevatasuttavaṇṇanā
47. ஸத்தமே கங்கா²ரேவதோதி தஸ்ஸ தே²ரஸ்ஸ நாமங். ஸோ ஹி ஸாஸனே பப்³ப³ஜித்வா லத்³தூ⁴பஸம்பதோ³ ஸீலவா கல்யாணத⁴ம்மோ விஹரதி, ‘‘அகப்பியா முக்³கா³, ந கப்பந்தி முக்³கா³ பரிபு⁴ஞ்ஜிதுங், அகப்பியோ கு³ளோ’’தி (மஹாவ॰ 272) ச ஆதி³னா வினயகுக்குச்சஸங்கா²தகங்கா²ப³ஹுலோ பன ஹோதி. தேன கங்கா²ரேவதோதி பஞ்ஞாயித்த². ஸோ அபரபா⁴கே³ ஸத்து² ஸந்திகே கம்மட்டா²னங் க³ஹெத்வா க⁴டெந்தோ வாயமந்தோ ச²ளபி⁴ஞ்ஞா ஸச்சி²கத்வா ஜா²னஸுகே²ன ப²லஸுகே²ன வீதினாமேதி, யேபு⁴ய்யேன பன அத்தனா அதி⁴க³தங் அரியமக்³க³ங் க³ருங் கத்வா பச்சவெக்க²தி. தேன வுத்தங் – ‘‘அத்தனோ கங்கா²விதரணவிஸுத்³தி⁴ங் பச்சவெக்க²மானோ’’தி. மக்³க³பஞ்ஞா ஹி ‘‘அஹோஸிங் நு கோ² அஹங் அதீதமத்³தா⁴ன’’ந்திஆதி³னயபவத்தாய (ம॰ நி॰ 1.18; ஸங்॰ நி॰ 2.20) ஸோளஸவத்து²காய, ‘‘பு³த்³தே⁴ கங்க²தி…பே॰… படிச்சஸமுப்பன்னேஸு த⁴ம்மேஸு கங்க²தீ’’தி (த⁴॰ ஸ॰ 1008) ஏவங் வுத்தாய அட்ட²வத்து²காய, பகே³வ இதராஸந்தி அனவஸேஸதோ ஸப்³ப³கங்கா²னங் விதரணதோ ஸமதிக்கமனதோ, அஞ்ஞேஹி ச அத்தனா பஹாதப்³ப³கிலேஸேஹி அச்சந்தவிஸுஜ்ஜ²னதோ ‘‘கங்கா²விதரணவிஸுத்³தீ⁴’’தி இதா⁴தி⁴ப்பேதா. தஞ்ஹி அயமாயஸ்மா தீ³க⁴ரத்தங் கங்கா²பகதத்தா ‘‘இமங் மக்³க³த⁴ம்மங் அதி⁴க³ம்ம இமா மே கங்கா² அனவஸேஸா பஹீனா’’தி க³ருங் கத்வா பச்சவெக்க²மானோ நிஸீதி³, ந ஸப்பச்சயனாமரூபத³ஸ்ஸனங் அனிச்சந்திகத்தா தஸ்ஸ கங்கா²விதரணஸ்ஸ.
47. Sattame kaṅkhārevatoti tassa therassa nāmaṃ. So hi sāsane pabbajitvā laddhūpasampado sīlavā kalyāṇadhammo viharati, ‘‘akappiyā muggā, na kappanti muggā paribhuñjituṃ, akappiyo guḷo’’ti (mahāva. 272) ca ādinā vinayakukkuccasaṅkhātakaṅkhābahulo pana hoti. Tena kaṅkhārevatoti paññāyittha. So aparabhāge satthu santike kammaṭṭhānaṃ gahetvā ghaṭento vāyamanto chaḷabhiññā sacchikatvā jhānasukhena phalasukhena vītināmeti, yebhuyyena pana attanā adhigataṃ ariyamaggaṃ garuṃ katvā paccavekkhati. Tena vuttaṃ – ‘‘attano kaṅkhāvitaraṇavisuddhiṃ paccavekkhamāno’’ti. Maggapaññā hi ‘‘ahosiṃ nu kho ahaṃ atītamaddhāna’’ntiādinayapavattāya (ma. ni. 1.18; saṃ. ni. 2.20) soḷasavatthukāya, ‘‘buddhe kaṅkhati…pe… paṭiccasamuppannesu dhammesu kaṅkhatī’’ti (dha. sa. 1008) evaṃ vuttāya aṭṭhavatthukāya, pageva itarāsanti anavasesato sabbakaṅkhānaṃ vitaraṇato samatikkamanato, aññehi ca attanā pahātabbakilesehi accantavisujjhanato ‘‘kaṅkhāvitaraṇavisuddhī’’ti idhādhippetā. Tañhi ayamāyasmā dīgharattaṃ kaṅkhāpakatattā ‘‘imaṃ maggadhammaṃ adhigamma imā me kaṅkhā anavasesā pahīnā’’ti garuṃ katvā paccavekkhamāno nisīdi, na sappaccayanāmarūpadassanaṃ aniccantikattā tassa kaṅkhāvitaraṇassa.
ஏதமத்த²ங் விதி³த்வாதி ஏதங் அரியமக்³க³ஸ்ஸ அனவஸேஸகங்கா²விதரணஸங்கா²தங் அத்த²ங் விதி³த்வா தத³த்த²தீ³பகங் இமங் உதா³னங் உதா³னேஸி.
Etamatthaṃ viditvāti etaṃ ariyamaggassa anavasesakaṅkhāvitaraṇasaṅkhātaṃ atthaṃ viditvā tadatthadīpakaṃ imaṃ udānaṃ udānesi.
தத்த² யா காசி கங்கா² இத⁴ வா ஹுரங் வாதி இத⁴ இமஸ்மிங் பச்சுப்பன்னே அத்தபா⁴வே ‘‘அஹங் நு கொ²ஸ்மி நோ நு கொ²ஸ்மீ’’திஆதி³னா ஹுரங் வா, அதீதானாக³தேஸு அத்தபா⁴வேஸு ‘‘அஹோஸிங் நு கோ² அஹங் அதீதமத்³தா⁴ன’’ந்திஆதி³னா உப்பஜ்ஜனகா கங்கா². ஸகவேதி³யா வா பரவேதி³யா வாதி தா ஏவங் வுத்தனயேனேவ ஸகஅத்தபா⁴வே ஆரம்மணவஸேன படிலபி⁴தப்³பா³ய பவத்தியா ஸகவேதி³யா வா பரஸ்ஸ அத்தபா⁴வே படிலபி⁴தப்³பா³ய ‘‘பு³த்³தோ⁴ நு கோ², நோ நு கோ²’’திஆதி³னா வா பரஸ்மிங் பதா⁴னே உத்தமே படிலபி⁴தப்³பா³ய பவத்தியா பரவேதி³யா வா யா காசி கங்கா² விசிகிச்சா². யே ஜா²யினோ தா பஜஹந்தி ஸப்³பா³, ஆதாபினோ ப்³ரஹ்மசரியங் சரந்தாதி யே ஆரம்மணூபனிஜ்ஜா²னேன லக்க²ணூபனிஜ்ஜா²னேன ஜா²யினோ விபஸ்ஸனங் உஸ்ஸுக்காபெத்வா சதுப்³பி³த⁴ஸம்மப்பதா⁴னபாரிபூரியா ஆதாபினோ மக்³க³ப்³ரஹ்மசரியங் சரந்தா அதி⁴க³ச்ச²ந்தா ஸத்³தா⁴னுஸாரீஆதி³ப்பபே⁴தா³ பட²மமக்³க³ட்டா² புக்³க³லா, தா ஸப்³பா³ கங்கா² பஜஹந்தி ஸமுச்சி²ந்த³ந்தி மக்³க³க்க²ணே. ததோ பரங் பன தா பஹீனா நாம ஹொந்தி, தஸ்மா இதோ அஞ்ஞங் தாஸங் அச்சந்தப்பஹானங் நாம நத்தீ²தி அதி⁴ப்பாயோ.
Tattha yā kāci kaṅkhā idha vā huraṃ vāti idha imasmiṃ paccuppanne attabhāve ‘‘ahaṃ nu khosmi no nu khosmī’’tiādinā huraṃ vā, atītānāgatesu attabhāvesu ‘‘ahosiṃ nu kho ahaṃ atītamaddhāna’’ntiādinā uppajjanakā kaṅkhā. Sakavediyā vā paravediyā vāti tā evaṃ vuttanayeneva sakaattabhāve ārammaṇavasena paṭilabhitabbāya pavattiyā sakavediyā vā parassa attabhāve paṭilabhitabbāya ‘‘buddho nu kho, no nu kho’’tiādinā vā parasmiṃ padhāne uttame paṭilabhitabbāya pavattiyā paravediyā vā yā kāci kaṅkhā vicikicchā. Ye jhāyino tā pajahanti sabbā, ātāpino brahmacariyaṃ carantāti ye ārammaṇūpanijjhānena lakkhaṇūpanijjhānena jhāyino vipassanaṃ ussukkāpetvā catubbidhasammappadhānapāripūriyā ātāpino maggabrahmacariyaṃ carantā adhigacchantā saddhānusārīādippabhedā paṭhamamaggaṭṭhā puggalā, tā sabbā kaṅkhā pajahanti samucchindanti maggakkhaṇe. Tato paraṃ pana tā pahīnā nāma honti, tasmā ito aññaṃ tāsaṃ accantappahānaṃ nāma natthīti adhippāyo.
இதி ப⁴க³வா ஜா²னமுகே²ன ஆயஸ்மதோ கங்கா²ரேவதஸ்ஸ ஜா²னஸீஸேன அரியமக்³கா³தி⁴க³மங் தோ²மெந்தோ தோ²மனாவஸேன உதா³னங் உதா³னேஸி. தேனேவ ச நங் ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் ஜா²யீனங் யதி³த³ங் கங்கா²ரேவதோ’’தி (அ॰ நி॰ 1.204) ஜா²யீபா⁴வேன ஏதத³க்³கே³ ட²பேஸீதி.
Iti bhagavā jhānamukhena āyasmato kaṅkhārevatassa jhānasīsena ariyamaggādhigamaṃ thomento thomanāvasena udānaṃ udānesi. Teneva ca naṃ ‘‘etadaggaṃ, bhikkhave, mama sāvakānaṃ bhikkhūnaṃ jhāyīnaṃ yadidaṃ kaṅkhārevato’’ti (a. ni. 1.204) jhāyībhāvena etadagge ṭhapesīti.
ஸத்தமஸுத்தவண்ணனா நிட்டி²தா.
Sattamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 7. கங்கா²ரேவதஸுத்தங் • 7. Kaṅkhārevatasuttaṃ
