| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
10. கண்ணகத்த²லஸுத்தவண்ணனா
10. Kaṇṇakatthalasuttavaṇṇanā
375. ஏவங் மே ஸுதந்தி கண்ணகத்த²லஸுத்தங். தத்த² உருஞ்ஞாயந்தி உருஞ்ஞாதி தஸ்ஸ ரட்ட²ஸ்ஸபி நக³ரஸ்ஸபி ஏததே³வ நாமங், ப⁴க³வா உருஞ்ஞானக³ரங் உபனிஸ்ஸாய விஹரதி. கண்ணகத்த²லே மிக³தா³யேதி தஸ்ஸ நக³ரஸ்ஸ அவிதூ³ரே கண்ணகத்த²லங் நாம ஏகோ ரமணீயோ பூ⁴மிபா⁴கோ³ அத்தி², ஸோ மிகா³னங் அப⁴யத்தா²ய தி³ன்னத்தா மிக³தா³யோதி வுச்சதி, தஸ்மிங் கண்ணகத்த²லே மிக³தா³யே. கேனசிதே³வ கரணீயேனாதி ந அஞ்ஞேன, அனந்தரஸுத்தே வுத்தகரணீயேனேவ. ஸோமா ச ப⁴கி³னீ ஸகுலா ச ப⁴கி³னீதி இமா த்³வே ப⁴கி³னியோ ரஞ்ஞோ பஜாபதியோ. ப⁴த்தாபி⁴ஹாரேதி ப⁴த்தங் அபி⁴ஹரணட்டா²னே. ரஞ்ஞோ பு⁴ஞ்ஜனட்டா²னஞ்ஹி ஸப்³பா³பி ஓரோதா⁴ கடச்சு²ஆதீ³னி க³ஹெத்வா ராஜானங் உபட்டா²துங் க³ச்ச²ந்தி, தாபி ததே²வ அக³மங்ஸு.
375.Evaṃme sutanti kaṇṇakatthalasuttaṃ. Tattha uruññāyanti uruññāti tassa raṭṭhassapi nagarassapi etadeva nāmaṃ, bhagavā uruññānagaraṃ upanissāya viharati. Kaṇṇakatthale migadāyeti tassa nagarassa avidūre kaṇṇakatthalaṃ nāma eko ramaṇīyo bhūmibhāgo atthi, so migānaṃ abhayatthāya dinnattā migadāyoti vuccati, tasmiṃ kaṇṇakatthale migadāye. Kenacideva karaṇīyenāti na aññena, anantarasutte vuttakaraṇīyeneva. Somā ca bhaginī sakulā ca bhaginīti imā dve bhaginiyo rañño pajāpatiyo. Bhattābhihāreti bhattaṃ abhiharaṇaṭṭhāne. Rañño bhuñjanaṭṭhānañhi sabbāpi orodhā kaṭacchuādīni gahetvā rājānaṃ upaṭṭhātuṃ gacchanti, tāpi tatheva agamaṃsu.
376. கிங் பன, மஹாராஜாதி கஸ்மா ஏவமாஹ? ரஞ்ஞோ க³ரஹபரிமோசனத்த²ங். ஏவஞ்ஹி பரிஸா சிந்தெய்ய – ‘‘அயங் ராஜா ஆக³ச்ச²மானோவ மாதுகா³மானங் ஸாஸனங் ஆரோசேதி, மயங் அத்தனோ த⁴ம்மதாய ப⁴க³வந்தங் த³ட்டு²ங் ஆக³தோதி மஞ்ஞாம, அயங் பன மாதுகா³மானங் ஸாஸனங் க³ஹெத்வா ஆக³தோ, மாதுகா³மதா³ஸோ மஞ்ஞே, ஏஸ புப்³பே³பி இமினாவ காரணேன ஆக³ச்ச²தீ’’தி. புச்சி²தோ பன ஸோ அத்தனோ ஆக³மனகாரணங் கதெ²ஸ்ஸதி, ஏவமஸ்ஸ அயங் க³ரஹா ந உப்பஜ்ஜிஸ்ஸதீதி க³ரஹமோசனத்த²ங் ஏவமாஹ.
376.Kiṃ pana, mahārājāti kasmā evamāha? Rañño garahaparimocanatthaṃ. Evañhi parisā cinteyya – ‘‘ayaṃ rājā āgacchamānova mātugāmānaṃ sāsanaṃ āroceti, mayaṃ attano dhammatāya bhagavantaṃ daṭṭhuṃ āgatoti maññāma, ayaṃ pana mātugāmānaṃ sāsanaṃ gahetvā āgato, mātugāmadāso maññe, esa pubbepi imināva kāraṇena āgacchatī’’ti. Pucchito pana so attano āgamanakāraṇaṃ kathessati, evamassa ayaṃ garahā na uppajjissatīti garahamocanatthaṃ evamāha.
378. அப்³பு⁴தா³ஹாஸீதி கதே²ஸி. ஸகிதே³வ ஸப்³ப³ங் உஸ்ஸதி ஸப்³ப³ங் த³க்கி²தீதி யோ ஏகாவஜ்ஜனேன ஏகசித்தேன அதீதானாக³தபச்சுப்பன்னங் ஸப்³ப³ங் உஸ்ஸதி வா த³க்கி²தி வா, ஸோ நத்தீ²தி அத்தோ². ஏகேன ஹி சித்தேன அதீதங் ஸப்³ப³ங் ஜானிஸ்ஸாமீதி ஆவஜ்ஜித்வாபி அதீதங் ஸப்³ப³ங் ஜானிதுங் ந ஸக்கா, ஏகதே³ஸமேவ ஜானாதி. அனாக³தபச்சுப்பன்னங் பன தேன சித்தேன ஸப்³பே³னேவ ஸப்³ப³ங் ந ஜானாதீதி. ஏஸ நயோ இதரேஸு. ஏவங் ஏகசித்தவஸேனாயங் பஞ்ஹோ கதி²தோ. ஹேதுரூபந்தி ஹேதுஸபா⁴வங் காரணஜாதிகங். ஸஹேதுரூபந்தி ஸகாரணஜாதிகங். ஸம்பராயிகாஹங், ப⁴ந்தேதி ஸம்பராயகு³ணங் அஹங், ப⁴ந்தே, புச்சா²மி.
378.Abbhudāhāsīti kathesi. Sakidevasabbaṃ ussati sabbaṃ dakkhitīti yo ekāvajjanena ekacittena atītānāgatapaccuppannaṃ sabbaṃ ussati vā dakkhiti vā, so natthīti attho. Ekena hi cittena atītaṃ sabbaṃ jānissāmīti āvajjitvāpi atītaṃ sabbaṃ jānituṃ na sakkā, ekadesameva jānāti. Anāgatapaccuppannaṃ pana tena cittena sabbeneva sabbaṃ na jānātīti. Esa nayo itaresu. Evaṃ ekacittavasenāyaṃ pañho kathito. Heturūpanti hetusabhāvaṃ kāraṇajātikaṃ. Saheturūpanti sakāraṇajātikaṃ. Samparāyikāhaṃ, bhanteti samparāyaguṇaṃ ahaṃ, bhante, pucchāmi.
379. பஞ்சிமானீதி இமஸ்மிங் ஸுத்தே பஞ்ச பதா⁴னியங்கா³னி லோகுத்தரமிஸ்ஸகானி கதி²தானி. கதி²னங்க³ணவாஸீசூளஸமுத்³த³த்தே²ரோ பன ‘‘தும்ஹாகங், ப⁴ந்தே, கிங் ருச்சதீ’’தி வுத்தே ‘‘மய்ஹங் லோகுத்தரானேவாதி ருச்சதீ’’தி ஆஹ. பதா⁴னவேமத்ததந்தி பதா⁴னநானத்தங். அஞ்ஞாதி³ஸமேவ ஹி புது²ஜ்ஜனஸ்ஸ பதா⁴னங், அஞ்ஞாதி³ஸங் ஸோதாபன்னஸ்ஸ, அஞ்ஞாதி³ஸங் ஸகதா³கா³மினோ, அஞ்ஞாதி³ஸங் அனாகா³மினோ, அஞ்ஞாதி³ஸங் அரஹதோ, அஞ்ஞாதி³ஸங் அஸீதிமஹாஸாவகானங், அஞ்ஞாதி³ஸங் த்³வின்னங் அக்³க³ஸாவகானங், அஞ்ஞாதி³ஸங் பச்சேகபு³த்³தா⁴னங், அஞ்ஞாதி³ஸங் ஸப்³ப³ஞ்ஞுபு³த்³தா⁴னங். புது²ஜ்ஜனஸ்ஸ பதா⁴னங் ஸோதாபன்னஸ்ஸ பதா⁴னங் ந பாபுணாதி…பே॰… பச்சேகபு³த்³த⁴ஸ்ஸ பதா⁴னங் ஸப்³ப³ஞ்ஞுபு³த்³த⁴ஸ்ஸ பதா⁴னங் ந பாபுணாதி. இமமத்த²ங் ஸந்தா⁴ய ‘‘பதா⁴னவேமத்ததங் வதா³மீ’’தி ஆஹ. த³ந்தகாரணங் க³ச்செ²ய்யுந்தி யங் அகூடகரணங், அனவச்சி²ந்த³னங் , து⁴ரஸ்ஸ அச்சி²ந்த³னந்தி த³ந்தேஸு காரணங் தி³ஸ்ஸதி, தங் காரணங் உபக³ச்செ²ய்யுந்தி அத்தோ². த³ந்தபூ⁴மிந்தி த³ந்தேஹி க³ந்தப்³ப³பூ⁴மிங். அஸ்ஸத்³தோ⁴திஆதீ³ஸு புது²ஜ்ஜனஸோதாபன்னஸகதா³கா³மிஅனாகா³மினோ சத்தாரோபி அஸ்ஸத்³தா⁴ நாம. புது²ஜ்ஜனோ ஹி ஸோதாபன்னஸ்ஸ ஸத்³த⁴ங் அப்பத்தோதி அஸ்ஸத்³தோ⁴, ஸோதாபன்னோ ஸகதா³கா³மிஸ்ஸ, ஸகதா³கா³மீ அனாகா³மிஸ்ஸ, அனாகா³மீ அரஹதோ ஸத்³த⁴ங் அப்பத்தோதி அஸ்ஸத்³தோ⁴, ஆபா³தோ⁴ அரஹதோபி உப்பஜ்ஜதீதி பஞ்சபி ப³ஹ்வாபா³தா⁴ நாம ஹொந்தி. அரியஸாவகஸ்ஸ பன ஸடோ² மாயாவீதி நாமங் நத்தி². தேனேவ தே²ரோ – ‘‘பஞ்ச பதா⁴னியங்கா³னி லோகுத்தரானி கதி²தானீதி மய்ஹங் ருச்சதீ’’தி ஆஹ. அஸ்ஸக²ளுங்கஸுத்தந்தே பன – ‘‘தயோ ச, பி⁴க்க²வே, அஸ்ஸக²ளுங்கே தயோ ச புரிஸக²ளுங்கே தே³ஸெஸ்ஸாமீ’’தி (அ॰ நி॰ 3.141) எத்த² அரியஸாவகஸ்ஸாபி ஸம்போ³தி⁴னாமங் ஆக³தங் , தஸ்ஸ வஸேன லோகுத்தரமிஸ்ஸகா கதி²தாதி வுத்தங். புது²ஜ்ஜனோ பன ஸோதாபத்திமக்³க³வீரியங் அஸம்பத்தோ…பே॰… அனாகா³மீ அரஹத்தமக்³க³வீரியங் அஸம்பத்தோதி குஸீதோபி அஸ்ஸத்³தோ⁴ விய சத்தாரோவ ஹொந்தி, ததா² து³ப்பஞ்ஞோ.
379.Pañcimānīti imasmiṃ sutte pañca padhāniyaṅgāni lokuttaramissakāni kathitāni. Kathinaṅgaṇavāsīcūḷasamuddatthero pana ‘‘tumhākaṃ, bhante, kiṃ ruccatī’’ti vutte ‘‘mayhaṃ lokuttarānevāti ruccatī’’ti āha. Padhānavemattatanti padhānanānattaṃ. Aññādisameva hi puthujjanassa padhānaṃ, aññādisaṃ sotāpannassa, aññādisaṃ sakadāgāmino, aññādisaṃ anāgāmino, aññādisaṃ arahato, aññādisaṃ asītimahāsāvakānaṃ, aññādisaṃ dvinnaṃ aggasāvakānaṃ, aññādisaṃ paccekabuddhānaṃ, aññādisaṃ sabbaññubuddhānaṃ. Puthujjanassa padhānaṃ sotāpannassa padhānaṃ na pāpuṇāti…pe… paccekabuddhassa padhānaṃ sabbaññubuddhassa padhānaṃ na pāpuṇāti. Imamatthaṃ sandhāya ‘‘padhānavemattataṃ vadāmī’’ti āha. Dantakāraṇaṃ gaccheyyunti yaṃ akūṭakaraṇaṃ, anavacchindanaṃ , dhurassa acchindananti dantesu kāraṇaṃ dissati, taṃ kāraṇaṃ upagaccheyyunti attho. Dantabhūminti dantehi gantabbabhūmiṃ. Assaddhotiādīsu puthujjanasotāpannasakadāgāmianāgāmino cattāropi assaddhā nāma. Puthujjano hi sotāpannassa saddhaṃ appattoti assaddho, sotāpanno sakadāgāmissa, sakadāgāmī anāgāmissa, anāgāmī arahato saddhaṃ appattoti assaddho, ābādho arahatopi uppajjatīti pañcapi bahvābādhā nāma honti. Ariyasāvakassa pana saṭho māyāvīti nāmaṃ natthi. Teneva thero – ‘‘pañca padhāniyaṅgāni lokuttarāni kathitānīti mayhaṃ ruccatī’’ti āha. Assakhaḷuṅkasuttante pana – ‘‘tayo ca, bhikkhave, assakhaḷuṅke tayo ca purisakhaḷuṅke desessāmī’’ti (a. ni. 3.141) ettha ariyasāvakassāpi sambodhināmaṃ āgataṃ , tassa vasena lokuttaramissakā kathitāti vuttaṃ. Puthujjano pana sotāpattimaggavīriyaṃ asampatto…pe… anāgāmī arahattamaggavīriyaṃ asampattoti kusītopi assaddho viya cattārova honti, tathā duppañño.
ஏவங் பனெத்த² ஓபம்மஸங்ஸந்த³னங் வேதி³தப்³ப³ங் – அத³ந்தஹத்தி²ஆத³யோ விய ஹி மக்³க³பதா⁴னரஹிதோ புக்³க³லோ. த³ந்தஹத்தி²ஆத³யோ விய மக்³க³பதா⁴னவா. யதா² அத³ந்தா ஹத்தி²ஆத³யோ கூடாகாரங் அகத்வா அவிச்சி²ந்தி³த்வா து⁴ரங் அபாதெத்வா த³ந்தக³மனங் வா க³ந்துங் த³ந்தபூ⁴மிங் வா பத்துங் ந ஸக்கொந்தி, ஏவமேவங் மக்³க³பதா⁴னரஹிதோ மக்³க³பதா⁴னவதா பத்தப்³ப³ங் பாபுணிதுங் நிப்³ப³த்தேதப்³ப³ங் கு³ணங் நிப்³ப³த்தேதுங் ந ஸக்கோதி. யதா² பன த³ந்தஹத்தி²ஆத³யோ கூடாகாரங் அகத்வா அவிச்சி²ந்தி³த்வா து⁴ரங் அபாதெத்வா த³ந்தக³மனங் வா க³ந்துங் த³ந்தபூ⁴மிங் வா பத்துங் ஸக்கொந்தி , ஏவமேவங் மக்³க³பதா⁴னவா மக்³க³பதா⁴னவதா பத்தப்³ப³ங் பாபுணிதுங் நிப்³ப³த்தேதப்³ப³ங் கு³ணங் நிப்³ப³த்தேதுங் ஸக்கோதி. இத³ங் வுத்தங் ஹோதி – ‘‘ஸோதாபத்திமக்³க³பதா⁴னவா ஸோதாபத்திமக்³க³பதா⁴னவதா பத்தோகாஸங் பாபுணிதுங் நிப்³ப³த்தேதப்³ப³ங் கு³ணங் நிப்³ப³த்தேதுங் ஸக்கோதி…பே॰… அரஹத்தமக்³க³பதா⁴னவா அரஹத்தமக்³க³பதா⁴னவதா பத்தோகாஸங் பாபுணிதுங் நிப்³ப³த்தேதப்³ப³ங் கு³ணங் நிப்³ப³த்தேதுங் ஸக்கோதீ’’தி.
Evaṃ panettha opammasaṃsandanaṃ veditabbaṃ – adantahatthiādayo viya hi maggapadhānarahito puggalo. Dantahatthiādayo viya maggapadhānavā. Yathā adantā hatthiādayo kūṭākāraṃ akatvā avicchinditvā dhuraṃ apātetvā dantagamanaṃ vā gantuṃ dantabhūmiṃ vā pattuṃ na sakkonti, evamevaṃ maggapadhānarahito maggapadhānavatā pattabbaṃ pāpuṇituṃ nibbattetabbaṃ guṇaṃ nibbattetuṃ na sakkoti. Yathā pana dantahatthiādayo kūṭākāraṃ akatvā avicchinditvā dhuraṃ apātetvā dantagamanaṃ vā gantuṃ dantabhūmiṃ vā pattuṃ sakkonti , evamevaṃ maggapadhānavā maggapadhānavatā pattabbaṃ pāpuṇituṃ nibbattetabbaṃ guṇaṃ nibbattetuṃ sakkoti. Idaṃ vuttaṃ hoti – ‘‘sotāpattimaggapadhānavā sotāpattimaggapadhānavatā pattokāsaṃ pāpuṇituṃ nibbattetabbaṃ guṇaṃ nibbattetuṃ sakkoti…pe… arahattamaggapadhānavā arahattamaggapadhānavatā pattokāsaṃ pāpuṇituṃ nibbattetabbaṃ guṇaṃ nibbattetuṃ sakkotī’’ti.
380. ஸம்மப்பதா⁴னாதி மக்³க³பதா⁴னேன ஸம்மப்பதா⁴னா. ந கிஞ்சி நானாகரணங் வதா³மி யதி³த³ங் விமுத்தியா விமுத்திந்தி யங் ஏகஸ்ஸ ப²லவிமுத்தியா இதரஸ்ஸ ப²லவிமுத்திங் ஆரப்³ப⁴ நானாகரணங் வத்தப்³ப³ங் ஸியா, தங் ந கிஞ்சி வதா³மீதி அத்தோ². அச்சியா வா அச்சிந்தி அச்சியா வா அச்சிம்ஹி. ஸேஸபத³த்³வயேபி ஏஸேவ நயோ, பு⁴ம்மத்தே² ஹி ஏதங் உபயோக³வசனங். கிங் பன த்வங், மஹாராஜாதி, மஹாராஜ, கிங் த்வங்? ‘‘ஸந்தி தே³வா சாதுமஹாராஜிகா, ஸந்தி தே³வா தாவதிங்ஸா…பே॰… ஸந்தி தே³வா பரனிம்மிதவஸவத்தினோ, ஸந்தி தே³வா ததுத்தரி’’ந்தி ஏவங் தே³வானங் அத்தி²பா⁴வங் ந ஜானாஸி, யேன ஏவங் வதே³ஸீதி. ததோ அத்தி²பா⁴வங் ஜானாமி, மனுஸ்ஸலோகங் பன ஆக³ச்ச²ந்தி நாக³ச்ச²ந்தீதி இத³ங் புச்ச²ந்தோ யதி³ வா தே, ப⁴ந்தேதிஆதி³மாஹ. ஸப்³யாப³ஜ்ஜா²தி ஸது³க்கா², ஸமுச்சே²த³ப்பஹானேன அப்பஹீனசேதஸிகது³க்கா². ஆக³ந்தாரோதி உபபத்திவஸேன ஆக³ந்தாரோ. அப்³யாப³ஜ்ஜா²தி ஸமுச்சி²ன்னது³க்கா². அனாக³ந்தாரோதி உபபத்திவஸேன அனாக³ந்தாரோ.
380.Sammappadhānāti maggapadhānena sammappadhānā. Na kiñci nānākaraṇaṃ vadāmi yadidaṃ vimuttiyā vimuttinti yaṃ ekassa phalavimuttiyā itarassa phalavimuttiṃ ārabbha nānākaraṇaṃ vattabbaṃ siyā, taṃ na kiñci vadāmīti attho. Acciyā vā accinti acciyā vā accimhi. Sesapadadvayepi eseva nayo, bhummatthe hi etaṃ upayogavacanaṃ. Kiṃ pana tvaṃ, mahārājāti, mahārāja, kiṃ tvaṃ? ‘‘Santi devā cātumahārājikā, santi devā tāvatiṃsā…pe… santi devā paranimmitavasavattino, santi devā tatuttari’’nti evaṃ devānaṃ atthibhāvaṃ na jānāsi, yena evaṃ vadesīti. Tato atthibhāvaṃ jānāmi, manussalokaṃ pana āgacchanti nāgacchantīti idaṃ pucchanto yadi vā te, bhantetiādimāha. Sabyābajjhāti sadukkhā, samucchedappahānena appahīnacetasikadukkhā. Āgantāroti upapattivasena āgantāro. Abyābajjhāti samucchinnadukkhā. Anāgantāroti upapattivasena anāgantāro.
381. பஹோதீதி ஸக்கோதி. ராஜா ஹி புஞ்ஞவந்தம்பி லாப⁴ஸக்காரஸம்பன்னங் யதா² ந கோசி உபஸங்கமதி, ஏவங் கரொந்தோ தம்ஹா டா²னா சாவேதுங் ஸக்கோதி. தங் அபுஞ்ஞவந்தம்பி ஸகலகா³மங் பிண்டா³ய சரித்வா யாபனமத்தங் அலப⁴ந்தங் யதா² லாப⁴ஸக்காரஸம்பன்னோ ஹோதி, ஏவங் கரொந்தோ தம்ஹா டா²னா சாவேதுங் ஸக்கோதி. ப்³ரஹ்மசரியவந்தம்பி இத்தீ²ஹி ஸத்³தி⁴ங் ஸம்பயோஜெத்வா ஸீலவினாஸங் பாபெந்தோ ப³லக்காரேன வா உப்பப்³பா³ஜெந்தோ தம்ஹா டா²னா சாவேதுங் ஸக்கோதி. அப்³ரஹ்மசரியவந்தம்பி ஸம்பன்னகாமகு³ணங் அமச்சங் ப³ந்த⁴னாகா³ரங் பவேஸெத்வா இத்தீ²னங் முக²ம்பி பஸ்ஸிதுங் அதெ³ந்தோ தம்ஹா டா²னா சாவேதி நாம. ரட்ட²தோ பன யங் இச்ச²தி, தங் பப்³பா³ஜேதி நாம.
381.Pahotīti sakkoti. Rājā hi puññavantampi lābhasakkārasampannaṃ yathā na koci upasaṅkamati, evaṃ karonto tamhā ṭhānā cāvetuṃ sakkoti. Taṃ apuññavantampi sakalagāmaṃ piṇḍāya caritvā yāpanamattaṃ alabhantaṃ yathā lābhasakkārasampanno hoti, evaṃ karonto tamhā ṭhānā cāvetuṃ sakkoti. Brahmacariyavantampi itthīhi saddhiṃ sampayojetvā sīlavināsaṃ pāpento balakkārena vā uppabbājento tamhā ṭhānā cāvetuṃ sakkoti. Abrahmacariyavantampi sampannakāmaguṇaṃ amaccaṃ bandhanāgāraṃ pavesetvā itthīnaṃ mukhampi passituṃ adento tamhā ṭhānā cāveti nāma. Raṭṭhato pana yaṃ icchati, taṃ pabbājeti nāma.
த³ஸ்ஸனாயபி நப்பஹொந்தீதி காமாவசரே தாவ அப்³யாப³ஜ்ஜே² தே³வே ஸப்³யாப³ஜ்ஜா² தே³வா சக்கு²விஞ்ஞாணத³ஸ்ஸனாயபி நப்பஹொந்தி. கஸ்மா? அரஹதோ தத்த² டா²னாபா⁴வதோ. ரூபாவசரே பன ஏகவிமானஸ்மிங்யேவ திட்ட²ந்தி ச நிஸீத³ந்தி சாதி சக்கு²விஞ்ஞாணத³ஸ்ஸனாய பஹொந்தி, ஏதேஹி தி³ட்ட²ங் பன ஸல்லக்கி²தங் படிவித்³த⁴ங் லக்க²ணங் த³ட்டு²ங் ஸல்லக்கி²துங் படிவிஜ்ஜி²துங் ந ஸக்கொந்தீதி ஞாணசக்கு²னா த³ஸ்ஸனாய நப்பஹொந்தி, உபரிதே³வே ச சக்கு²விஞ்ஞாணத³ஸ்ஸனேனாபீதி.
Dassanāyapi nappahontīti kāmāvacare tāva abyābajjhe deve sabyābajjhā devā cakkhuviññāṇadassanāyapi nappahonti. Kasmā? Arahato tattha ṭhānābhāvato. Rūpāvacare pana ekavimānasmiṃyeva tiṭṭhanti ca nisīdanti cāti cakkhuviññāṇadassanāya pahonti, etehi diṭṭhaṃ pana sallakkhitaṃ paṭividdhaṃ lakkhaṇaṃ daṭṭhuṃ sallakkhituṃ paṭivijjhituṃ na sakkontīti ñāṇacakkhunā dassanāya nappahonti, uparideve ca cakkhuviññāṇadassanenāpīti.
382. கோ நாமோ அயங், ப⁴ந்தேதி ராஜா தே²ரங் ஜானந்தோபி அஜானந்தோ விய புச்ச²தி. கஸ்மா? பஸங்ஸிதுகாமதாய. ஆனந்த³ரூபோதி ஆனந்த³ஸபா⁴வோ. ப்³ரஹ்மபுச்சா²பி வுத்தனயேனேவ வேதி³தப்³பா³. அத² கோ² அஞ்ஞதரோ புரிஸோதி ஸா கிர கதா² விடடூபே⁴னேவ கதி²தா, தே ‘‘தயா கதி²தா, தயா கதி²தா’’தி குபிதா அஞ்ஞமஞ்ஞங் இமஸ்மிங்யேவ டா²னே அத்தனோ அத்தனோ ப³லகாயங் உட்டா²பெத்வா கலஹம்பி கரெய்யுந்தி நிவாரணத்த²ங் ஸோ ராஜபுரிஸோ ஏதத³வோச. ஸேஸங் ஸப்³ப³த்த² உத்தானமேவ. அயங் பன தே³ஸனா நெய்யபுக்³க³லஸ்ஸ வஸேன நிட்டி²தாதி.
382.Ko nāmo ayaṃ, bhanteti rājā theraṃ jānantopi ajānanto viya pucchati. Kasmā? Pasaṃsitukāmatāya. Ānandarūpoti ānandasabhāvo. Brahmapucchāpi vuttanayeneva veditabbā. Atha kho aññataro purisoti sā kira kathā viṭaṭūbheneva kathitā, te ‘‘tayā kathitā, tayā kathitā’’ti kupitā aññamaññaṃ imasmiṃyeva ṭhāne attano attano balakāyaṃ uṭṭhāpetvā kalahampi kareyyunti nivāraṇatthaṃ so rājapuriso etadavoca. Sesaṃ sabbattha uttānameva. Ayaṃ pana desanā neyyapuggalassa vasena niṭṭhitāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
கண்ணகத்த²லஸுத்தவண்ணனா நிட்டி²தா.
Kaṇṇakatthalasuttavaṇṇanā niṭṭhitā.
சதுத்த²வக்³க³வண்ணனா நிட்டி²தா.
Catutthavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. கண்ணகத்த²லஸுத்தங் • 10. Kaṇṇakatthalasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 10. கண்ணகத்த²லஸுத்தவண்ணனா • 10. Kaṇṇakatthalasuttavaṇṇanā
