| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. கண்டகஸுத்தங்
2. Kaṇṭakasuttaṃ
72. ஏகங் ஸமயங் ப⁴க³வா வேஸாலியங் விஹரதி மஹாவனே கூடாகா³ரஸாலாயங் ஸம்ப³ஹுலேஹி அபி⁴ஞ்ஞாதேஹி அபி⁴ஞ்ஞாதேஹி தே²ரேஹி ஸாவகேஹி ஸத்³தி⁴ங் – ஆயஸ்மதா ச சாலேன 1, ஆயஸ்மதா ச உபசாலேன 2, ஆயஸ்மதா ச குக்குடேன 3, ஆயஸ்மதா ச களிம்பே⁴ன 4, ஆயஸ்மதா ச நிகடேன 5, ஆயஸ்மதா ச கடிஸ்ஸஹேன; அஞ்ஞேஹி ச அபி⁴ஞ்ஞாதேஹி அபி⁴ஞ்ஞாதேஹி தே²ரேஹி ஸாவகேஹி ஸத்³தி⁴ங்.
72. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ sambahulehi abhiññātehi abhiññātehi therehi sāvakehi saddhiṃ – āyasmatā ca cālena 6, āyasmatā ca upacālena 7, āyasmatā ca kukkuṭena 8, āyasmatā ca kaḷimbhena 9, āyasmatā ca nikaṭena 10, āyasmatā ca kaṭissahena; aññehi ca abhiññātehi abhiññātehi therehi sāvakehi saddhiṃ.
தேன கோ² பன ஸமயேன ஸம்ப³ஹுலா அபி⁴ஞ்ஞாதா அபி⁴ஞ்ஞாதா லிச்ச²வீ ப⁴த்³ரேஹி ப⁴த்³ரேஹி யானேஹி பரபுராய 11 உச்சாஸத்³தா³ மஹாஸத்³தா³ மஹாவனங் அஜ்ஜோ²கா³ஹந்தி ப⁴க³வந்தங் த³ஸ்ஸனாய. அத² கோ² தேஸங் ஆயஸ்மந்தானங் ஏதத³ஹோஸி – ‘‘இமே கோ² ஸம்ப³ஹுலா அபி⁴ஞ்ஞாதா அபி⁴ஞ்ஞாதா லிச்ச²வீ ப⁴த்³ரேஹி ப⁴த்³ரேஹி யானேஹி பரபுராய உச்சாஸத்³தா³ மஹாஸத்³தா³ மஹாவனங் அஜ்ஜோ²கா³ஹந்தி ப⁴க³வந்தங் த³ஸ்ஸனாய. ‘ஸத்³த³கண்டகா கோ² பன ஜா²னா’ வுத்தா ப⁴க³வதா. யங்னூன மயங் யேன கோ³ஸிங்க³ஸாலவனதா³யோ தேனுபஸங்கமெய்யாம . தத்த² மயங் அப்பஸத்³தா³ அப்பாகிண்ணா பா²ஸுங் 12 விஹரெய்யாமா’’தி. அத² கோ² தே ஆயஸ்மந்தோ யேன கோ³ஸிங்க³ஸாலவனதா³யோ தேனுபஸங்கமிங்ஸு; தத்த² தே ஆயஸ்மந்தோ அப்பஸத்³தா³ அப்பாகிண்ணா பா²ஸுங் விஹரந்தி.
Tena kho pana samayena sambahulā abhiññātā abhiññātā licchavī bhadrehi bhadrehi yānehi parapurāya 13 uccāsaddā mahāsaddā mahāvanaṃ ajjhogāhanti bhagavantaṃ dassanāya. Atha kho tesaṃ āyasmantānaṃ etadahosi – ‘‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṃ ajjhogāhanti bhagavantaṃ dassanāya. ‘Saddakaṇṭakā kho pana jhānā’ vuttā bhagavatā. Yaṃnūna mayaṃ yena gosiṅgasālavanadāyo tenupasaṅkameyyāma . Tattha mayaṃ appasaddā appākiṇṇā phāsuṃ 14 vihareyyāmā’’ti. Atha kho te āyasmanto yena gosiṅgasālavanadāyo tenupasaṅkamiṃsu; tattha te āyasmanto appasaddā appākiṇṇā phāsuṃ viharanti.
அத² கோ² ப⁴க³வா பி⁴க்கூ² ஆமந்தேஸி – ‘‘கஹங் நு கோ², பி⁴க்க²வே, சாலோ, கஹங் உபசாலோ, கஹங் குக்குடோ, கஹங் களிம்போ⁴, கஹங் நிகடோ, கஹங் கடிஸ்ஸஹோ; கஹங் நு கோ² தே, பி⁴க்க²வே, தே²ரா ஸாவகா க³தா’’தி?
Atha kho bhagavā bhikkhū āmantesi – ‘‘kahaṃ nu kho, bhikkhave, cālo, kahaṃ upacālo, kahaṃ kukkuṭo, kahaṃ kaḷimbho, kahaṃ nikaṭo, kahaṃ kaṭissaho; kahaṃ nu kho te, bhikkhave, therā sāvakā gatā’’ti?
‘‘இத⁴, ப⁴ந்தே, தேஸங் ஆயஸ்மந்தானங் ஏதத³ஹோஸி – ‘இமே கோ² ஸம்ப³ஹுலா அபி⁴ஞ்ஞாதா அபி⁴ஞ்ஞாதா லிச்ச²வீ ப⁴த்³ரேஹி ப⁴த்³ரேஹி யானேஹி பரபுராய உச்சாஸத்³தா³ மஹாஸத்³தா³ மஹாவனங் அஜ்ஜோ²கா³ஹந்தி ப⁴க³வந்தங் த³ஸ்ஸனாய ‘ஸத்³த³கண்டகா கோ² பன ஜா²னாவுத்தா ப⁴க³வதா யங்னூன மயங் யேன கோ³ஸிங்க³ஸாலவனதா³யோ தேனுபஸங்கமெய்யாம தத்த² மயங் அப்பஸத்³தா³ அப்பாகிண்ணா பா²ஸுங் விஹரெய்யாமா’தி. அத² கோ² தே, ப⁴ந்தே, ஆயஸ்மந்தோ யேன கோ³ஸிங்க³ஸாலவனதா³யோ தேனுபஸங்கமிங்ஸு. தத்த² தே ஆயஸ்மந்தோ அப்பஸத்³தா³ அப்பாகிண்ணா பா²ஸுங் விஹரந்தீ’’தி .
‘‘Idha, bhante, tesaṃ āyasmantānaṃ etadahosi – ‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṃ ajjhogāhanti bhagavantaṃ dassanāya ‘saddakaṇṭakā kho pana jhānāvuttā bhagavatā yaṃnūna mayaṃ yena gosiṅgasālavanadāyo tenupasaṅkameyyāma tattha mayaṃ appasaddā appākiṇṇā phāsuṃ vihareyyāmā’ti. Atha kho te, bhante, āyasmanto yena gosiṅgasālavanadāyo tenupasaṅkamiṃsu. Tattha te āyasmanto appasaddā appākiṇṇā phāsuṃ viharantī’’ti .
‘‘ஸாது⁴ ஸாது⁴, பி⁴க்க²வே, யதா² தே மஹாஸாவகா ஸம்மா ப்³யாகரமானா ப்³யாகரெய்யுங், ‘ஸத்³த³கண்டகா ஹி, பி⁴க்க²வே, ஜா²னா’ வுத்தா மயா.
‘‘Sādhu sādhu, bhikkhave, yathā te mahāsāvakā sammā byākaramānā byākareyyuṃ, ‘saddakaṇṭakā hi, bhikkhave, jhānā’ vuttā mayā.
‘‘த³ஸயிமே, பி⁴க்க²வே, கண்டகா. கதமே த³ஸ? பவிவேகாராமஸ்ஸ ஸங்க³ணிகாராமதா கண்டகோ, அஸுப⁴னிமித்தானுயோக³ங் அனுயுத்தஸ்ஸ ஸுப⁴னிமித்தானுயோகோ³ கண்டகோ, இந்த்³ரியேஸு கு³த்தத்³வாரஸ்ஸ விஸூகத³ஸ்ஸனங் கண்டகோ, ப்³ரஹ்மசரியஸ்ஸ மாதுகா³மூபசாரோ 15 கண்டகோ, 16 பட²மஸ்ஸ ஜா²னஸ்ஸ ஸத்³தோ³ கண்டகோ, து³தியஸ்ஸ ஜா²னஸ்ஸ விதக்கவிசாரா கண்டகா, ததியஸ்ஸ ஜா²னஸ்ஸ பீதி கண்டகோ, சதுத்த²ஸ்ஸ ஜா²னஸ்ஸ அஸ்ஸாஸபஸ்ஸாஸோ கண்டகோ, ஸஞ்ஞாவேத³யிதனிரோத⁴ஸமாபத்தியா ஸஞ்ஞா ச வேத³னா ச கண்டகோ ராகோ³ கண்டகோ தோ³ஸோ கண்டகோ மோஹோ கண்டகோ.
‘‘Dasayime, bhikkhave, kaṇṭakā. Katame dasa? Pavivekārāmassa saṅgaṇikārāmatā kaṇṭako, asubhanimittānuyogaṃ anuyuttassa subhanimittānuyogo kaṇṭako, indriyesu guttadvārassa visūkadassanaṃ kaṇṭako, brahmacariyassa mātugāmūpacāro 17 kaṇṭako, 18 paṭhamassa jhānassa saddo kaṇṭako, dutiyassa jhānassa vitakkavicārā kaṇṭakā, tatiyassa jhānassa pīti kaṇṭako, catutthassa jhānassa assāsapassāso kaṇṭako, saññāvedayitanirodhasamāpattiyā saññā ca vedanā ca kaṇṭako rāgo kaṇṭako doso kaṇṭako moho kaṇṭako.
‘‘அகண்டகா , பி⁴க்க²வே, விஹரத². நிக்கண்டகா, பி⁴க்க²வே, விஹரத². அகண்டகனிக்கண்டகா, பி⁴க்க²வே, விஹரத². அகண்டகா, பி⁴க்க²வே, அரஹந்தோ; நிக்கண்டகா, பி⁴க்க²வே, அரஹந்தோ; அகண்டகனிக்கண்டகா, பி⁴க்க²வே, அரஹந்தோ’’தி. து³தியங்.
‘‘Akaṇṭakā , bhikkhave, viharatha. Nikkaṇṭakā, bhikkhave, viharatha. Akaṇṭakanikkaṇṭakā, bhikkhave, viharatha. Akaṇṭakā, bhikkhave, arahanto; nikkaṇṭakā, bhikkhave, arahanto; akaṇṭakanikkaṇṭakā, bhikkhave, arahanto’’ti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. கண்டகஸுத்தவண்ணனா • 2. Kaṇṭakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-4. ஆகங்க²ஸுத்தாதி³வண்ணனா • 1-4. Ākaṅkhasuttādivaṇṇanā
