| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. கரஜகாயஸுத்தங்
9. Karajakāyasuttaṃ
219. ‘‘நாஹங், பி⁴க்க²வே, ஸஞ்சேதனிகானங் கம்மானங் கதானங் உபசிதானங் அப்படிஸங்வேதி³த்வா ப்³யந்தீபா⁴வங் வதா³மி, தஞ்ச கோ² தி³ட்டே²வ த⁴ம்மே உபபஜ்ஜே வா அபரே வா பரியாயே. ந த்வேவாஹங், பி⁴க்க²வே, ஸஞ்சேதனிகானங் கம்மானங் கதானங் உபசிதானங் அப்படிஸங்வேதி³த்வா து³க்க²ஸ்ஸந்தகிரியங் வதா³மி.
219. ‘‘Nāhaṃ, bhikkhave, sañcetanikānaṃ kammānaṃ katānaṃ upacitānaṃ appaṭisaṃveditvā byantībhāvaṃ vadāmi, tañca kho diṭṭheva dhamme upapajje vā apare vā pariyāye. Na tvevāhaṃ, bhikkhave, sañcetanikānaṃ kammānaṃ katānaṃ upacitānaṃ appaṭisaṃveditvā dukkhassantakiriyaṃ vadāmi.
‘‘ஸ கோ² ஸோ, பி⁴க்க²வே, அரியஸாவகோ ஏவங் விக³தாபி⁴ஜ்ஜோ² விக³தப்³யாபாதோ³ அஸம்மூள்ஹோ ஸம்பஜானோ படிஸ்ஸதோ மெத்தாஸஹக³தேன சேதஸா ஏகங் தி³ஸங் ப²ரித்வா விஹரதி ததா² து³தியங் ததா² ததியங் ததா² சதுத்த²ங் 1. இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங் மெத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி.
‘‘Sa kho so, bhikkhave, ariyasāvako evaṃ vigatābhijjho vigatabyāpādo asammūḷho sampajāno paṭissato mettāsahagatena cetasā ekaṃ disaṃ pharitvā viharati tathā dutiyaṃ tathā tatiyaṃ tathā catutthaṃ 2. Iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjena pharitvā viharati.
‘‘ஸோ ஏவங் பஜானாதி – ‘புப்³பே³ கோ² மே இத³ங் சித்தங் பரித்தங் அஹோஸி அபா⁴விதங், ஏதரஹி பன மே இத³ங் சித்தங் அப்பமாணங் ஸுபா⁴விதங். யங் கோ² பன கிஞ்சி பமாணகதங் கம்மங், ந தங் தத்ராவஸிஸ்ஸதி ந தங் தத்ராவதிட்ட²தீ’தி .
‘‘So evaṃ pajānāti – ‘pubbe kho me idaṃ cittaṃ parittaṃ ahosi abhāvitaṃ, etarahi pana me idaṃ cittaṃ appamāṇaṃ subhāvitaṃ. Yaṃ kho pana kiñci pamāṇakataṃ kammaṃ, na taṃ tatrāvasissati na taṃ tatrāvatiṭṭhatī’ti .
‘‘அகரொந்தங் கோ² பன பாபகம்மங் அபி நு கோ² து³க்க²ங் பு²ஸெய்யா’’தி? ‘‘நோ ஹேதங், ப⁴ந்தே. அகரொந்தஞ்ஹி, ப⁴ந்தே, பாபகம்மங் குதோ து³க்க²ங் பு²ஸிஸ்ஸதீ’’தி!
‘‘Akarontaṃ kho pana pāpakammaṃ api nu kho dukkhaṃ phuseyyā’’ti? ‘‘No hetaṃ, bhante. Akarontañhi, bhante, pāpakammaṃ kuto dukkhaṃ phusissatī’’ti!
‘‘பா⁴வேதப்³பா³ கோ² பனாயங், பி⁴க்க²வே, மெத்தாசேதோவிமுத்தி இத்தி²யா வா புரிஸேன வா. இத்தி²யா வா, பி⁴க்க²வே, புரிஸஸ்ஸ வா நாயங் காயோ ஆதா³ய க³மனீயோ. சித்தந்தரோ அயங், பி⁴க்க²வே , மச்சோ. ஸோ ஏவங் பஜானாதி – ‘யங் கோ² மே இத³ங் கிஞ்சி புப்³பே³ இமினா கரஜகாயேன பாபகம்மங் கதங், ஸப்³ப³ங் தங் இத⁴ வேத³னீயங்; ந தங் அனுக³ங் ப⁴விஸ்ஸதீ’தி. ஏவங் பா⁴விதா கோ², பி⁴க்க²வே, மெத்தா சேதோவிமுத்தி அனாகா³மிதாய ஸங்வத்ததி, இத⁴ பஞ்ஞஸ்ஸ பி⁴க்கு²னோ உத்தரி 7 விமுத்திங் அப்படிவிஜ்ஜ²தோ.
‘‘Bhāvetabbā kho panāyaṃ, bhikkhave, mettācetovimutti itthiyā vā purisena vā. Itthiyā vā, bhikkhave, purisassa vā nāyaṃ kāyo ādāya gamanīyo. Cittantaro ayaṃ, bhikkhave , macco. So evaṃ pajānāti – ‘yaṃ kho me idaṃ kiñci pubbe iminā karajakāyena pāpakammaṃ kataṃ, sabbaṃ taṃ idha vedanīyaṃ; na taṃ anugaṃ bhavissatī’ti. Evaṃ bhāvitā kho, bhikkhave, mettā cetovimutti anāgāmitāya saṃvattati, idha paññassa bhikkhuno uttari 8 vimuttiṃ appaṭivijjhato.
‘‘கருணாஸஹக³தேன சேதஸா… முதி³தாஸஹக³தேன சேதஸா… உபெக்கா²ஸஹக³தேன சேதஸா ஏகங் தி³ஸங் ப²ரித்வா விஹரதி ததா² து³தியங் ததா² ததியங் ததா² சதுத்த²ங். இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங் உபெக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி.
‘‘Karuṇāsahagatena cetasā… muditāsahagatena cetasā… upekkhāsahagatena cetasā ekaṃ disaṃ pharitvā viharati tathā dutiyaṃ tathā tatiyaṃ tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyāpajjena pharitvā viharati.
‘‘ஸோ ஏவங் பஜானாதி – ‘புப்³பே³ கோ² மே இத³ங் சித்தங் பரித்தங் அஹோஸி அபா⁴விதங், ஏதரஹி பன மே இத³ங் சித்தங் அப்பமாணங் ஸுபா⁴விதங். யங் கோ² பன கிஞ்சி பமாணகதங் கம்மங் , ந தங் தத்ராவஸிஸ்ஸதி ந தங் தத்ராவதிட்ட²தீ’தி.
‘‘So evaṃ pajānāti – ‘pubbe kho me idaṃ cittaṃ parittaṃ ahosi abhāvitaṃ, etarahi pana me idaṃ cittaṃ appamāṇaṃ subhāvitaṃ. Yaṃ kho pana kiñci pamāṇakataṃ kammaṃ , na taṃ tatrāvasissati na taṃ tatrāvatiṭṭhatī’ti.
‘‘தங் கிங் மஞ்ஞத², பி⁴க்க²வே, த³ஹரதக்³கே³ சே ஸோ அயங் குமாரோ உபெக்க²ங் சேதோவிமுத்திங் பா⁴வெய்ய, அபி நு கோ² பாபகம்மங் கரெய்யா’’தி? ‘‘நோ ஹேதங், ப⁴ந்தே’’.
‘‘Taṃ kiṃ maññatha, bhikkhave, daharatagge ce so ayaṃ kumāro upekkhaṃ cetovimuttiṃ bhāveyya, api nu kho pāpakammaṃ kareyyā’’ti? ‘‘No hetaṃ, bhante’’.
‘‘அகரொந்தங் கோ² பன பாபகம்மங் அபி நு கோ² து³க்க²ங் பு²ஸெய்யா’’தி? ‘‘நோ ஹேதங், ப⁴ந்தே. அகரொந்தஞ்ஹி, ப⁴ந்தே, பாபகம்மங் குதோ து³க்க²ங் பு²ஸிஸ்ஸதீ’’தி!
‘‘Akarontaṃ kho pana pāpakammaṃ api nu kho dukkhaṃ phuseyyā’’ti? ‘‘No hetaṃ, bhante. Akarontañhi, bhante, pāpakammaṃ kuto dukkhaṃ phusissatī’’ti!
‘‘பா⁴வேதப்³பா³ கோ² பனாயங், பி⁴க்க²வே, உபெக்கா² சேதோவிமுத்தி இத்தி²யா வா புரிஸேன வா. இத்தி²யா வா, பி⁴க்க²வே, புரிஸஸ்ஸ வா நாயங் காயோ ஆதா³ய க³மனீயோ. சித்தந்தரோ அயங், பி⁴க்க²வே, மச்சோ. ஸோ ஏவங் பஜானாதி – ‘யங் கோ² மே இத³ங் கிஞ்சி புப்³பே³ இமினா கரஜகாயேன பாபகம்மங் கதங், ஸப்³ப³ங் தங் இத⁴ வேத³னீயங்; ந தங் அனுக³ங் ப⁴விஸ்ஸதீ’தி. ஏவங் பா⁴விதா கோ², பி⁴க்க²வே, உபெக்கா² சேதோவிமுத்தி அனாகா³மிதாய ஸங்வத்ததி, இத⁴ பஞ்ஞஸ்ஸ பி⁴க்கு²னோ உத்தரி விமுத்திங் அப்படிவிஜ்ஜ²தோ’’தி. நவமங்.
‘‘Bhāvetabbā kho panāyaṃ, bhikkhave, upekkhā cetovimutti itthiyā vā purisena vā. Itthiyā vā, bhikkhave, purisassa vā nāyaṃ kāyo ādāya gamanīyo. Cittantaro ayaṃ, bhikkhave, macco. So evaṃ pajānāti – ‘yaṃ kho me idaṃ kiñci pubbe iminā karajakāyena pāpakammaṃ kataṃ, sabbaṃ taṃ idha vedanīyaṃ; na taṃ anugaṃ bhavissatī’ti. Evaṃ bhāvitā kho, bhikkhave, upekkhā cetovimutti anāgāmitāya saṃvattati, idha paññassa bhikkhuno uttari vimuttiṃ appaṭivijjhato’’ti. Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. கரஜகாயஸுத்தவண்ணனா • 9. Karajakāyasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-536. பட²மனிரயஸக்³க³ஸுத்தாதி³வண்ணனா • 1-536. Paṭhamanirayasaggasuttādivaṇṇanā
