| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. கரோதோஸுத்தவண்ணனா
6. Karotosuttavaṇṇanā
211. ஸஹத்தா² கரொந்தஸ்ஸாதி ஸஹத்தே²ன கரொந்தஸ்ஸ. நிஸ்ஸக்³கி³யதா²வராத³யோபி இத⁴ ஸஹத்த²கரணேனேவ ஸங்க³ஹிதா. ஹத்தா²தீ³னீதி ஹத்த²பாத³கண்ணனாஸாதீ³னி. பசனங் த³ஹனங் விபா³த⁴னந்தி ஆஹ ‘‘த³ண்டே³ன பீளெந்தஸ்ஸா’’தி. பபஞ்சஸூத³னியங் ‘‘தஜ்ஜெந்தஸ்ஸ சா’’தி அத்தோ² வுத்தோ, இத⁴ பன ஸுமங்க³லவிலாஸினியங் விய தஜ்ஜனங் பரிபா⁴ஸனங் த³ண்டே³னேவ ஸங்க³ஹெத்வா ‘‘த³ண்டே³ன பீளெந்தஸ்ஸ’’இச்சேவ வுத்தங். ஸோகங் ஸயங் கரொந்தஸ்ஸாதி பரஸ்ஸ ஸோககாரணங் ஸயங் கரொந்தஸ்ஸ, ஸோகங் வா உப்பாதெ³ந்தஸ்ஸ. பரேஹி அத்தனோ வசனகரேஹி. ஸயம்பி ப²ந்த³தோதி பரஸ்ஸ விபா³த⁴னப்பயோகே³ன ஸயம்பி ப²ந்த³தோ. அதிபாதயதோதி பத³ங் ஸுத்³த⁴கத்துஅத்தே² ஹேதுகத்துஅத்தே² ச வத்ததீதி ஆஹ – ‘‘ஹனந்தஸ்ஸபி ஹனாபெந்தஸ்ஸபீ’’தி. காரணவஸேனாதி காராபனவஸேன.
211.Sahatthā karontassāti sahatthena karontassa. Nissaggiyathāvarādayopi idha sahatthakaraṇeneva saṅgahitā. Hatthādīnīti hatthapādakaṇṇanāsādīni. Pacanaṃ dahanaṃ vibādhananti āha ‘‘daṇḍena pīḷentassā’’ti. Papañcasūdaniyaṃ ‘‘tajjentassa cā’’ti attho vutto, idha pana sumaṅgalavilāsiniyaṃ viya tajjanaṃ paribhāsanaṃ daṇḍeneva saṅgahetvā ‘‘daṇḍena pīḷentassa’’icceva vuttaṃ. Sokaṃ sayaṃ karontassāti parassa sokakāraṇaṃ sayaṃ karontassa, sokaṃ vā uppādentassa. Parehi attano vacanakarehi. Sayampi phandatoti parassa vibādhanappayogena sayampi phandato. Atipātayatoti padaṃ suddhakattuatthe hetukattuatthe ca vattatīti āha – ‘‘hanantassapi hanāpentassapī’’ti. Kāraṇavasenāti kārāpanavasena.
க⁴ரஸ்ஸ பி⁴த்தி அந்தோ ச ப³ஹி ச ஸந்தி⁴தா ஹுத்வா டி²தாவ க⁴ரஸந்தி⁴. கிஞ்சிபி அஸேஸெத்வா நிரவஸேஸோ லோபோ நில்லோபோ. ஏகாகா³ரே நியுத்தோ விலோபோ ஏகாகா³ரிகோ. பரிதோ ஸப்³ப³ஸோ பந்தே² ஹனநங் பரிபந்தோ². பாபங் ந கரீயதி புப்³பே³ அஸதோ உப்பாதே³துங் அஸக்குணெய்யத்தா, தஸ்மா நத்தி² பாபங். யதி³ ஏவங் கத²ங் ஸத்தா பாபே பவத்தந்தீதி ஆஹ ‘‘ஸத்தா பன கரோமாதி ஏவங்ஸஞ்ஞினோ ஹொந்தீ’’தி ஏவங் கிரஸ்ஸ ஹோதி இமேஸஞ்ஹி ஸத்தானங் ஹிங்ஸாதி³கிரியா ந அத்தானங் பு²ஸதி தஸ்ஸ நிச்சதாய நிப்³பி³காரத்தா, ஸரீரங் பன அசேதனங் கட்ட²கலிங்க³ரூபமங், தஸ்மிங் விகோபிதேபி ந கிஞ்சி பாபந்தி. கு²ரனேமினாதி நிஸிதகு²ரமயனேமினா, கு²ரஸதி³ஸனேமினாதி அத்தோ².
Gharassa bhitti anto ca bahi ca sandhitā hutvā ṭhitāva gharasandhi. Kiñcipi asesetvā niravaseso lopo nillopo. Ekāgāre niyutto vilopo ekāgāriko. Parito sabbaso panthe hananaṃ paripantho. Pāpaṃ na karīyati pubbe asato uppādetuṃ asakkuṇeyyattā, tasmā natthi pāpaṃ. Yadi evaṃ kathaṃ sattā pāpe pavattantīti āha ‘‘sattā pana karomāti evaṃsaññino hontī’’ti evaṃ kirassa hoti imesañhi sattānaṃ hiṃsādikiriyā na attānaṃ phusati tassa niccatāya nibbikārattā, sarīraṃ pana acetanaṃ kaṭṭhakaliṅgarūpamaṃ, tasmiṃ vikopitepi na kiñci pāpanti. Khuranemināti nisitakhuramayaneminā, khurasadisanemināti attho.
க³ங்கா³ய த³க்கி²ணா தி³ஸா அப்பதிரூபதே³ஸோ, உத்தரதி³ஸா பதிரூபதே³ஸோதி அதி⁴ப்பாயேன ‘‘த³க்கி²ணஞ்சேபீ’’திஆதி³ வுத்தந்தி ஆஹ ‘‘த³க்கி²ணதீரே மனுஸ்ஸா கக்க²ளா’’திஆதி³. மஹாயாக³ந்தி மஹாவிஜிதயஞ்ஞஸதி³ஸங் மஹாயாக³ங். உபோஸத²கம்மேனாதி உபோஸத²கம்மேன ச. ச-ஸத்³தோ³ ஹெத்த² லுத்தனித்³தி³ட்டோ². த³மஸத்³தோ³ ஹி இந்த்³ரியஸங்வரஸ்ஸ உபோஸத²ஸீலஸ்ஸ ச வாசகோ இதா⁴தி⁴ப்பேதோ. கேசி பன ‘‘உபோஸத²கம்மேனா’’தி இத³ங் இந்த்³ரியத³மனஸ்ஸ விஸேஸனங், தஸ்மா ‘‘உபோஸத²கம்மபூ⁴தேன இந்த்³ரியத³மேனா’’தி அத்த²ங் வத³ந்தி. ஸீலஸங்யமேனாதி ஸீலஸங்வரேன. ஸச்சவசனேனாதி ஸச்சவாசாய. தஸ்ஸா விஸுங் வசனங் லோகே க³ருதரபுஞ்ஞஸம்மதபா⁴வதோ. யதா² ஹி பாபத⁴ம்மேஸு முஸாவாதோ³ க³ரு, ஏவங் புஞ்ஞத⁴ம்மேஸு ஸச்சவாசா. தேனாஹ ப⁴க³வா – ‘‘ஏகங் த⁴ம்மங் அதீதஸ்ஸா’’திஆதி³ (இதிவு॰ 25). பவத்தீதி யோ கரோதீதி வுச்சதி, தஸ்ஸ ஸந்தானே ப²லஸ்ஸ நிப்³ப³த்தியா பச்சயபா⁴வேன பவத்தி. ஸப்³ப³தா²தி ‘‘கரோதோ’’திஆதி³னா வுத்தேன ஸப்³ப³ப்பகாரேன கிரியமேவ படிக்கி²பந்தி.
Gaṅgāya dakkhiṇā disā appatirūpadeso, uttaradisā patirūpadesoti adhippāyena ‘‘dakkhiṇañcepī’’tiādi vuttanti āha ‘‘dakkhiṇatīre manussā kakkhaḷā’’tiādi. Mahāyāganti mahāvijitayaññasadisaṃ mahāyāgaṃ. Uposathakammenāti uposathakammena ca. Ca-saddo hettha luttaniddiṭṭho. Damasaddo hi indriyasaṃvarassa uposathasīlassa ca vācako idhādhippeto. Keci pana ‘‘uposathakammenā’’ti idaṃ indriyadamanassa visesanaṃ, tasmā ‘‘uposathakammabhūtena indriyadamenā’’ti atthaṃ vadanti. Sīlasaṃyamenāti sīlasaṃvarena. Saccavacanenāti saccavācāya. Tassā visuṃ vacanaṃ loke garutarapuññasammatabhāvato. Yathā hi pāpadhammesu musāvādo garu, evaṃ puññadhammesu saccavācā. Tenāha bhagavā – ‘‘ekaṃ dhammaṃ atītassā’’tiādi (itivu. 25). Pavattīti yo karotīti vuccati, tassa santāne phalassa nibbattiyā paccayabhāvena pavatti. Sabbathāti ‘‘karoto’’tiādinā vuttena sabbappakārena kiriyameva paṭikkhipanti.
கரோதோஸுத்தவண்ணனா நிட்டி²தா.
Karotosuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. கரோதோஸுத்தங் • 6. Karotosuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. கரோதோஸுத்தவண்ணனா • 6. Karotosuttavaṇṇanā
