| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
9. கஸ்ஸகஸுத்தவண்ணனா
9. Kassakasuttavaṇṇanā
155. நிப்³பா³னங் அபதி³ஸித்வாதி நிப்³பா³னங் நிஸ்ஸாய நிப்³பா³னகு³ணே ஆரப்³பா⁴தி அத்தோ². ஹடஹடகேஸோதி இதோ சிதோ ச விகிண்ணத்தா ஆகுலாகுலகேஸோ. சக்கு²ஸம்ப²ஸ்ஸவிஞ்ஞாணாயதனந்தி எத்த² யதா² சக்கு²க்³க³ஹணேன ப²ஸ்ஸோ விஸேஸிதோ, தேன ஏவ விஞ்ஞாணாயதனங். ததா² ஸதி சக்கு²விஞ்ஞாணஸ்ஸ ச க³ஹணங் ஆபஜ்ஜெய்யாதி. நனு செத்த² சக்கு²க்³க³ஹணேன விஸேஸிதத்தா சக்கு²த்³வாரிகானங் ஸப்³பே³ஸங் விஞ்ஞாணானங் க³ஹணந்தி? ஸச்சமேதங், தஞ்ச கோ² பட²மேன சக்கு²க்³க³ஹணேனாதி நாயங் தோ³ஸோ. ப⁴வங்க³சித்தந்தி ஆவஜ்ஜனாய அனந்தரபச்சயபூ⁴தமேவ அதி⁴ப்பேதந்தி நியமெத்வா த³ஸ்ஸேதுங் ‘‘ஸாவஜ்ஜனக’’ந்தி வுத்தங், தஸ்மா ததா³ரம்மணம்பீதி ஜவனசித்தேன ஸஹ ததா³ரம்மணசித்தம்பி. ‘‘விஞ்ஞாணாயதன’’ந்தி ச வுத்தே நிம்மலமேவ.
155.Nibbānaṃ apadisitvāti nibbānaṃ nissāya nibbānaguṇe ārabbhāti attho. Haṭahaṭakesoti ito cito ca vikiṇṇattā ākulākulakeso. Cakkhusamphassaviññāṇāyatananti ettha yathā cakkhuggahaṇena phasso visesito, tena eva viññāṇāyatanaṃ. Tathā sati cakkhuviññāṇassa ca gahaṇaṃ āpajjeyyāti. Nanu cettha cakkhuggahaṇena visesitattā cakkhudvārikānaṃ sabbesaṃ viññāṇānaṃ gahaṇanti? Saccametaṃ, tañca kho paṭhamena cakkhuggahaṇenāti nāyaṃ doso. Bhavaṅgacittanti āvajjanāya anantarapaccayabhūtameva adhippetanti niyametvā dassetuṃ ‘‘sāvajjanaka’’nti vuttaṃ, tasmā tadārammaṇampīti javanacittena saha tadārammaṇacittampi. ‘‘Viññāṇāyatana’’nti ca vutte nimmalameva.
‘‘சக்கூ²’’தி அவிஸேஸதோ வுத்தத்தா பன மாரஸ்ஸ அயம்பி அத்தோ² ஆபன்னோதி த³ஸ்ஸேதுங் ‘‘யங் லோகே’’திஆதி³ வுத்தங். உபக்கவிபக்கந்தி சக்கு²பாகரோகே³ன உபரி ஹெட்டா² ச ஸப்³ப³ஸோ பக்கங் குதி²தங். ஏஸேவ நயோதி இமினா யங் லோகே குட்ட²கிலாஸக³ண்ட³கச்சு²ஆதீ³ஹி உபத்³து³தங் வணபீளகாதி³வஸேன பக்³க⁴ரந்தங் அஸுசிங் அந்தமஸோ பரமஜேகு³ச்ச²ரூபம்பி, ஸப்³ப³ங் தங் தவேவ ஹோதூதி ஏவமாதி³ங் அபதி³ஸதி.
‘‘Cakkhū’’ti avisesato vuttattā pana mārassa ayampi attho āpannoti dassetuṃ ‘‘yaṃ loke’’tiādi vuttaṃ. Upakkavipakkanti cakkhupākarogena upari heṭṭhā ca sabbaso pakkaṃ kuthitaṃ. Eseva nayoti iminā yaṃ loke kuṭṭhakilāsagaṇḍakacchuādīhi upaddutaṃ vaṇapīḷakādivasena paggharantaṃ asuciṃ antamaso paramajeguccharūpampi, sabbaṃ taṃ taveva hotūti evamādiṃ apadisati.
யங் ப⁴ண்ட³கந்தி ஹிரஞ்ஞஸுவண்ணாதி³கெ²த்தவத்தா²தி³உபகரணங் க³ஹட்டா², பப்³ப³ஜிதா ச யங் பத்தசீவராதி³ங் ‘‘மம இத³’’ந்தி அபி⁴னிவிஸந்தாவ வத³ந்தி, ஏதேஸு பரிக்³க³ஹத்தே²ஸு ச தேஸங் பரிக்³கா³ஹகபுக்³க³லேஸு ச தே சித்தங் யதி³ அத்தி², தானி ஆரப்³ப⁴ தவ சித்தங் யதி³ ப⁴வதி, ஏவங் த்வங் தத்த² ப³த்³தோ⁴ ஏவ ஹோஸீதி அத்தோ². தேனாஹ ‘‘ந மே ஸமண மொக்க²ஸீ’’தி.
Yaṃ bhaṇḍakanti hiraññasuvaṇṇādikhettavatthādiupakaraṇaṃ gahaṭṭhā, pabbajitā ca yaṃ pattacīvarādiṃ ‘‘mama ida’’nti abhinivisantāva vadanti, etesu pariggahatthesu ca tesaṃ pariggāhakapuggalesu ca te cittaṃ yadi atthi, tāni ārabbha tava cittaṃ yadi bhavati, evaṃ tvaṃ tattha baddho eva hosīti attho. Tenāha ‘‘na me samaṇa mokkhasī’’ti.
யங் ப⁴ண்ட³கங் வத³ந்தீதி யதா²வுத்தங் உபகரணங் லோகே ப³ஹுஜனா ‘‘மம இத³’’ந்தி வத³ந்தி. ந தங் மய்ஹந்தி தங் மய்ஹங் ந ஹோதி, ந தத்த² மம தண்ஹாவஸேன மமந்தி நத்தி². ந தே அஹந்தி யே புக்³க³லா எத்த² ப³த்³தா⁴, தேபி அஹங் ந ஹோமி, தத்த² மே தி³ட்டி²ப³த்³தோ⁴ நத்தி². ந மே மக்³க³ம்பி த³க்க²ஸீதி ஏவங் ஸப்³ப³ஸோ ப³த்³தா⁴பா⁴வேன முத்தஸ்ஸ மே க³தமக்³க³ம்பி மார த்வங் ந த³க்க²ஸி ந பஸ்ஸிஸ்ஸஸி, யே ப⁴வாத³யோ துய்ஹங் விஸயா, தேஸு ப⁴வயோனிக³திஆதீ³ஸு மய்ஹங் க³தமக்³க³ங் ந பஸ்ஸிஸ்ஸஸி ப⁴வனிஸ்ஸட்ட²த்தாதி.
Yaṃ bhaṇḍakaṃ vadantīti yathāvuttaṃ upakaraṇaṃ loke bahujanā ‘‘mama ida’’nti vadanti. Na taṃ mayhanti taṃ mayhaṃ na hoti, na tattha mama taṇhāvasena mamanti natthi. Na te ahanti ye puggalā ettha baddhā, tepi ahaṃ na homi, tattha me diṭṭhibaddho natthi. Na me maggampi dakkhasīti evaṃ sabbaso baddhābhāvena muttassa me gatamaggampi māra tvaṃ na dakkhasi na passissasi, ye bhavādayo tuyhaṃ visayā, tesu bhavayonigatiādīsu mayhaṃ gatamaggaṃ na passissasi bhavanissaṭṭhattāti.
கஸ்ஸகஸுத்தவண்ணனா நிட்டி²தா.
Kassakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. கஸ்ஸகஸுத்தங் • 9. Kassakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. கஸ்ஸகஸுத்தவண்ணனா • 9. Kassakasuttavaṇṇanā
