| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. கஸ்ஸபகொ³த்தஸுத்தவண்ணனா
3. Kassapagottasuttavaṇṇanā
223. சே²தந்தி மிகா³னங் ஜீவிதங் சே²தங். தேனாஹ ‘‘மிக³லுத்³த³க’’ந்தி. ரோஹிதமிக³ந்தி லோஹிதவண்ணங் கு²த்³த³கமிக³ங், ‘‘மஹாரோஹிதமிக³’’ந்தி கேசி. ஸத்து² ஸந்திகே கம்மட்டா²னங் க³ஹெத்வா தஸ்ஸ ஜனபத³ஸ்ஸ ஸுலப⁴பி⁴க்க²தாய தத்த² க³ந்த்வா விஹரதீதி இமமத்த²ங் ஸந்தா⁴ய ‘‘பட²மஸுத்தே வுத்தனயேனேவா’’தி வுத்தங். அயங் பன தே²ரோ பஞ்சாபி⁴ஞ்ஞோ விபஸ்ஸனாகம்மிகோ. ட²த்வாதி பதா³னுப³ந்த⁴னவஸேன க³மனங் உபச்சி²ந்தி³த்வா தே²ரஸ்ஸ ஆஸன்னட்டா²னே ட²த்வா. தஸ்ஸ வசனங் ஸோதுங் ஆரத்³தோ⁴. அங்கு³ட்ட²கங் ஜாலாபேஸீதி அதி⁴ட்டா²னப³லேன த³ண்ட³தீ³பிகங் விய அத்தனோ அங்கு³ட்ட²கங் ஜாலாபேஸி. அக்கீ²ஹிபி பஸ்ஸதி அங்கு³ட்ட²கங் ஜாலமானங். கண்ணேஹிபி ஸுணாதி தேன வுச்சமானங் த⁴ம்மங் ஏகதே³ஸேன. சித்தங் பனஸ்ஸ தா⁴வதீதி ஸம்ப³ந்தோ⁴. ஏதஸ்ஸபீதி லுத்³த³கஸ்ஸபி.
223.Chetanti migānaṃ jīvitaṃ chetaṃ. Tenāha ‘‘migaluddaka’’nti. Rohitamiganti lohitavaṇṇaṃ khuddakamigaṃ, ‘‘mahārohitamiga’’nti keci. Satthu santike kammaṭṭhānaṃ gahetvā tassa janapadassa sulabhabhikkhatāya tattha gantvā viharatīti imamatthaṃ sandhāya ‘‘paṭhamasutte vuttanayenevā’’ti vuttaṃ. Ayaṃ pana thero pañcābhiñño vipassanākammiko. Ṭhatvāti padānubandhanavasena gamanaṃ upacchinditvā therassa āsannaṭṭhāne ṭhatvā. Tassa vacanaṃ sotuṃ āraddho. Aṅguṭṭhakaṃ jālāpesīti adhiṭṭhānabalena daṇḍadīpikaṃ viya attano aṅguṭṭhakaṃ jālāpesi. Akkhīhipi passati aṅguṭṭhakaṃ jālamānaṃ. Kaṇṇehipi suṇāti tena vuccamānaṃ dhammaṃ ekadesena. Cittaṃ panassa dhāvatīti sambandho. Etassapīti luddakassapi.
அப்பபஞ்ஞந்தி எத்த² அப்ப-ஸத்³தோ³ ‘‘அப்பஹரிதே’’திஆதீ³ஸு விய அபா⁴வத்தோ²தி ஆஹ ‘‘நிப்பஞ்ஞ’’ந்தி. காரணஜானநஸமத்தே²னாதி இமினா காரணேன ஸத்தானங் ஸுக²ங், இமினா து³க்க²ந்தி ஏவங் ஸமாசரமானேன காரணங் ஜானிதுங் ஸமத்தே²ன கம்மஸ்ஸகதஞாணஸம்பயுத்தசித்தேனாதி அத்தோ². ஸுணாதீதி கேவலங் ஸவனமத்தவஸேன ஸுணாதி, ந தத³த்த²வஸேன. தேனாஹ ‘‘அத்த²மஸ்ஸ ந ஜானாதீ’’தி. காரணரூபானீதி ஸபா⁴வகாரணானி. கிங் மே இமினாதி? ‘‘இத³ங் பபஞ்ச’’ந்தி பஹாய. வீரியங் பக்³க³ய்ஹாதி சதுப்³பி³த⁴ங் ஸம்மப்பதா⁴னங் வீரியங் பக்³க³ண்ஹித்வா.
Appapaññanti ettha appa-saddo ‘‘appaharite’’tiādīsu viya abhāvatthoti āha ‘‘nippañña’’nti. Kāraṇajānanasamatthenāti iminā kāraṇena sattānaṃ sukhaṃ, iminā dukkhanti evaṃ samācaramānena kāraṇaṃ jānituṃ samatthena kammassakatañāṇasampayuttacittenāti attho. Suṇātīti kevalaṃ savanamattavasena suṇāti, na tadatthavasena. Tenāha ‘‘atthamassa na jānātī’’ti. Kāraṇarūpānīti sabhāvakāraṇāni. Kiṃ me imināti? ‘‘Idaṃ papañca’’nti pahāya. Vīriyaṃ paggayhāti catubbidhaṃ sammappadhānaṃ vīriyaṃ paggaṇhitvā.
கஸ்ஸபகொ³த்தஸுத்தவண்ணனா நிட்டி²தா.
Kassapagottasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. கஸ்ஸபகொ³த்தஸுத்தங் • 3. Kassapagottasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. கஸ்ஸபகொ³த்தஸுத்தவண்ணனா • 3. Kassapagottasuttavaṇṇanā
