| Library / Tipiṭaka / તિપિટક • Tipiṭaka / વિમતિવિનોદની-ટીકા • Vimativinodanī-ṭīkā |
અન્તરપેય્યાલં
Antarapeyyālaṃ
કતિપુચ્છાવારવણ્ણના
Katipucchāvāravaṇṇanā
૨૭૧. કતિ આપત્તિયોતિ પારાજિકાદીસુ પઞ્ચસુ આપત્તીસુ મેથુનાદિન્નાદાનાદિઅન્તોગધભેદં અપેક્ખિત્વા જાતિવસેન એકત્તં આરોપેત્વા પુચ્છા કતા. કતિ આપત્તિક્ખન્ધાતિ અન્તોગધભેદં અપેક્ખિત્વા પચ્ચેકં રાસટ્ઠેનાતિ એત્તકમેવેત્થ ભેદો. વિનીતાનિયેવ વિનીતવત્થૂનીતિ આપત્તિતો વિરમણાનિ એવ અવિપ્પટિસારપામોજ્જાદિધમ્માનં કારણત્તા વત્થૂનીતિ વિનીતવત્થૂનિ, તાનિ એત્થ અત્થતો વિરતિઆદિઅનવજ્જધમ્મા એવ. વેરં મણતીતિ વેરહેતુત્તા ‘‘વેર’’ન્તિ લદ્ધનામં રાગાદિઅકુસલપક્ખં વિનાસેતિ.
271.Katiāpattiyoti pārājikādīsu pañcasu āpattīsu methunādinnādānādiantogadhabhedaṃ apekkhitvā jātivasena ekattaṃ āropetvā pucchā katā. Kati āpattikkhandhāti antogadhabhedaṃ apekkhitvā paccekaṃ rāsaṭṭhenāti ettakamevettha bhedo. Vinītāniyevavinītavatthūnīti āpattito viramaṇāni eva avippaṭisārapāmojjādidhammānaṃ kāraṇattā vatthūnīti vinītavatthūni, tāni ettha atthato viratiādianavajjadhammā eva. Veraṃ maṇatīti verahetuttā ‘‘vera’’nti laddhanāmaṃ rāgādiakusalapakkhaṃ vināseti.
ધમ્મસ્સવનગ્ગં ભિન્દિત્વા ગચ્છતીતિ બહૂસુ એકતો નિસીદિત્વા ધમ્મં સુણન્તેસુ તં ધમ્મસ્સવનસમાગમં કોપેત્વા ઉટ્ઠાય ગચ્છતિ. અનાદરોવાતિ તુસ્સિતબ્બટ્ઠાને તુટ્ઠિં, સંવિજિતબ્બટ્ઠાને સંવેગઞ્ચ અપવેદેન્તો એવ. કાયપાગબ્ભિયન્તિ ઉન્નતિવસેન પવત્તનકાયાનાચારં.
Dhammassavanaggaṃ bhinditvā gacchatīti bahūsu ekato nisīditvā dhammaṃ suṇantesu taṃ dhammassavanasamāgamaṃ kopetvā uṭṭhāya gacchati. Anādarovāti tussitabbaṭṭhāne tuṭṭhiṃ, saṃvijitabbaṭṭhāne saṃvegañca apavedento eva. Kāyapāgabbhiyanti unnativasena pavattanakāyānācāraṃ.
૨૭૪. મેત્તાય સમ્ભૂતં મેત્તં, કાયકમ્મં. ઉભયેહિપીતિ નવકેહિ, થેરેહિ ચ. પિયં કરોતીતિ તં પુગ્ગલં પેમટ્ઠાનં કરોતિ, કેસન્તિ આહ ‘‘સબ્રહ્મચારીન’’ન્તિ.
274. Mettāya sambhūtaṃ mettaṃ, kāyakammaṃ. Ubhayehipīti navakehi, therehi ca. Piyaṃ karotīti taṃ puggalaṃ pemaṭṭhānaṃ karoti, kesanti āha ‘‘sabrahmacārīna’’nti.
પુગ્ગલં પટિવિભજિત્વા ભુઞ્જતીતિ પકતેન સમ્બન્ધો. તમેવ પુગ્ગલપટિવિભાગં દસ્સેતું ‘‘અસુકસ્સા’’તિઆદિ વુત્તં.
Puggalaṃ paṭivibhajitvā bhuñjatīti pakatena sambandho. Tameva puggalapaṭivibhāgaṃ dassetuṃ ‘‘asukassā’’tiādi vuttaṃ.
ભુજિસ્સભાવકરણતોતિ તણ્હાદાસબ્યતો મોચેત્વા સમથવિપસ્સનાસુ સેરિવિહારિતાકરણતોતિ અત્થો. નિય્યાતીતિ પવત્તતિ. સમ્માદુક્ખક્ખયાય સંવત્તતીતિ અત્થો.
Bhujissabhāvakaraṇatoti taṇhādāsabyato mocetvā samathavipassanāsu serivihāritākaraṇatoti attho. Niyyātīti pavattati. Sammādukkhakkhayāya saṃvattatīti attho.
કતિપુચ્છાવારવણ્ણના નિટ્ઠિતા.
Katipucchāvāravaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / પરિવારપાળિ • Parivārapāḷi / કતિપુચ્છાવારો • Katipucchāvāro
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / પરિવાર-અટ્ઠકથા • Parivāra-aṭṭhakathā / કતિપુચ્છાવારવણ્ણના • Katipucchāvāravaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / કતિપુચ્છાવારવણ્ણના • Katipucchāvāravaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / કતિપુચ્છાવારવણ્ણના • Katipucchāvāravaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / અન્તરપેય્યાલ કતિપુચ્છાવારવણ્ણના • Antarapeyyāla katipucchāvāravaṇṇanā
