| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. கட்ட²ஹாரஸுத்தவண்ணனா
8. Kaṭṭhahārasuttavaṇṇanā
204. த⁴ம்மந்தேவாஸிகாதி கிஞ்சிபி த⁴னங் அத³த்வா கேவலங் அந்தேவாஸிகா. தேனாஹ ‘‘வெய்யாவச்சங் கத்வா ஸிப்புக்³க³ண்ஹனகா’’தி. க³ம்பீ⁴ரஸபா⁴வேதி ஸமந்ததோ தூ³ரதோ க³ஹனஸச்ச²ன்னவிபுலதரருக்க²க³ச்ச²லதாய ச, ததா³ ஹிமபிண்ட³ஸின்னபா⁴வேன மயூரயானேஹி பதிட்டா²துங் அஸக்குணெய்யதாய ச க³ம்பீ⁴ரபா⁴வே.
204.Dhammantevāsikāti kiñcipi dhanaṃ adatvā kevalaṃ antevāsikā. Tenāha ‘‘veyyāvaccaṃ katvā sippuggaṇhanakā’’ti. Gambhīrasabhāveti samantato dūrato gahanasacchannavipulatararukkhagacchalatāya ca, tadā himapiṇḍasinnabhāvena mayūrayānehi patiṭṭhātuṃ asakkuṇeyyatāya ca gambhīrabhāve.
ப³ஹுபே⁴ரவேதி ப³ஹுப⁴யானகே. அனிஞ்ஜமானேனாதி இத்த²ம்பூ⁴தத்தே² கரணவசனங். அதிஸுந்த³ரங் வதாதி ஏவங் ஸந்தே நாம அரஞ்ஞே ஏவங் நிச்சலகாயோ நிஸின்னோ ஜா²யந்தோ அதிவிய ஸுந்த³ரஞ்ச ஜா²னங் ஜா²யஸீதி வத³தி.
Bahubheraveti bahubhayānake. Aniñjamānenāti itthambhūtatthe karaṇavacanaṃ. Atisundaraṃ vatāti evaṃ sante nāma araññe evaṃ niccalakāyo nisinno jhāyanto ativiya sundarañca jhānaṃ jhāyasīti vadati.
அச்சே²ரரூபந்தி அச்ச²ரியபா⁴வங். ஸெட்ட²ப்பத்தியாதி ஸெட்ட²பா⁴வப்பத்தியா.
Accherarūpanti acchariyabhāvaṃ. Seṭṭhappattiyāti seṭṭhabhāvappattiyā.
‘‘லோகாதி⁴பதிஸஹப்³யதங் ஆகங்க²மானோ’’தி இமினா ப்³ராஹ்மணோ லோகாதி⁴பதிஸஹயோக³ங் புச்ச²தி, ‘‘கஸ்மா ப⁴வ’’ந்திஆதி³னா பன தத³ஞ்ஞவிஸேஸாகங்க²ங் புச்ச²தீதி ஆஹ ‘‘அபரேனபி ஆகாரேன புச்ச²தீ’’தி.
‘‘Lokādhipatisahabyataṃ ākaṅkhamāno’’ti iminā brāhmaṇo lokādhipatisahayogaṃ pucchati, ‘‘kasmā bhava’’ntiādinā pana tadaññavisesākaṅkhaṃ pucchatīti āha ‘‘aparenapi ākārena pucchatī’’ti.
கங்கா²தி தண்ஹா அபி⁴க்க²ணவஸேன பவத்தா. அனேகஸபா⁴வேஸூதி ரூபாதி³வஸேன அஜ்ஜ²த்திகாதி³வஸேன ஏவங் நானாஸபா⁴வேஸு ஆரம்மணேஸு. அஸ்ஸாத³ராகோ³ லோபோ⁴ அபி⁴ஜ்ஜா²தி நானப்பகாரா. ஸேஸகிலேஸா வா தி³ட்டி²மானதோ³ஸாத³யோ. நிச்சகாலங் அவஸ்ஸிதா ஸத்தானங் அவஸ்ஸயபா⁴வத்தா. பஜப்பாபனவஸேனாதி பகாரேஹி தண்ஹாயனவஸேன. நிரந்தாதி அந்தரஹிதா நிரவஸேஸா.
Kaṅkhāti taṇhā abhikkhaṇavasena pavattā. Anekasabhāvesūti rūpādivasena ajjhattikādivasena evaṃ nānāsabhāvesu ārammaṇesu. Assādarāgo lobho abhijjhāti nānappakārā. Sesakilesā vā diṭṭhimānadosādayo. Niccakālaṃ avassitā sattānaṃ avassayabhāvattā. Pajappāpanavasenāti pakārehi taṇhāyanavasena. Nirantāti antarahitā niravasesā.
அனுபக³மனோதி அனுபாதா³னோ. ஸப்³ப³ஞ்ஞுதஞ்ஞாணங் தீ³பேதி, தஸ்ஸ ஹி வஸேன ஏவ நானாஸபா⁴வேஸு ப⁴க³வா ஸமந்தசக்கு²னா பஸ்ஸதீதி ‘‘ஸப்³பே³…பே॰… த³ஸ்ஸனோ’’தி வுச்சதி. அரஹத்தங் ஸந்தா⁴யாஹ, தஞ்ஹி நிப்பரியாயதோ ‘‘அனுத்தர’’ந்தி வுச்சதி.
Anupagamanoti anupādāno. Sabbaññutaññāṇaṃ dīpeti, tassa hi vasena eva nānāsabhāvesu bhagavā samantacakkhunā passatīti ‘‘sabbe…pe… dassano’’ti vuccati. Arahattaṃ sandhāyāha, tañhi nippariyāyato ‘‘anuttara’’nti vuccati.
கட்ட²ஹாரஸுத்தவண்ணனா நிட்டி²தா.
Kaṭṭhahārasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. கட்ட²ஹாரஸுத்தங் • 8. Kaṭṭhahārasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. கட்ட²ஹாரஸுத்தவண்ணனா • 8. Kaṭṭhahārasuttavaṇṇanā
