| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૯. અસઙ્ખતસંયુત્તં
9. Asaṅkhatasaṃyuttaṃ
૧. પઠમવગ્ગો
1. Paṭhamavaggo
૧. કાયગતાસતિસુત્તં
1. Kāyagatāsatisuttaṃ
૩૬૬. સાવત્થિનિદાનં . ‘‘અસઙ્ખતઞ્ચ વો, ભિક્ખવે, દેસેસ્સામિ અસઙ્ખતગામિઞ્ચ મગ્ગં. તં સુણાથ. કતમઞ્ચ, ભિક્ખવે, અસઙ્ખતં? યો, ભિક્ખવે, રાગક્ખયો દોસક્ખયો મોહક્ખયો – ઇદં વુચ્ચતિ, ભિક્ખવે, અસઙ્ખતં. કતમો ચ, ભિક્ખવે, અસઙ્ખતગામિમગ્ગો? કાયગતાસતિ. અયં વુચ્ચતિ, ભિક્ખવે, અસઙ્ખતગામિમગ્ગો’’.
366. Sāvatthinidānaṃ . ‘‘Asaṅkhatañca vo, bhikkhave, desessāmi asaṅkhatagāmiñca maggaṃ. Taṃ suṇātha. Katamañca, bhikkhave, asaṅkhataṃ? Yo, bhikkhave, rāgakkhayo dosakkhayo mohakkhayo – idaṃ vuccati, bhikkhave, asaṅkhataṃ. Katamo ca, bhikkhave, asaṅkhatagāmimaggo? Kāyagatāsati. Ayaṃ vuccati, bhikkhave, asaṅkhatagāmimaggo’’.
‘‘ઇતિ ખો, ભિક્ખવે, દેસિતં વો મયા અસઙ્ખતં, દેસિતો અસઙ્ખતગામિમગ્ગો. યં, ભિક્ખવે, સત્થારા કરણીયં સાવકાનં હિતેસિના અનુકમ્પકેન અનુકમ્પં ઉપાદાય, કતં વો તં મયા. એતાનિ, ભિક્ખવે, રુક્ખમૂલાનિ, એતાનિ સુઞ્ઞાગારાનિ. ઝાયથ 1, ભિક્ખવે, મા પમાદત્થ; મા પચ્છા વિપ્પટિસારિનો અહુવત્થ. અયં વો અમ્હાકં અનુસાસની’’તિ. પઠમં.
‘‘Iti kho, bhikkhave, desitaṃ vo mayā asaṅkhataṃ, desito asaṅkhatagāmimaggo. Yaṃ, bhikkhave, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. Etāni, bhikkhave, rukkhamūlāni, etāni suññāgārāni. Jhāyatha 2, bhikkhave, mā pamādattha; mā pacchā vippaṭisārino ahuvattha. Ayaṃ vo amhākaṃ anusāsanī’’ti. Paṭhamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧-૧૧. કાયગતાસતિસુત્તાદિવણ્ણના • 1-11. Kāyagatāsatisuttādivaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૧-૧૧. કાયગતાસતિસુત્તાદિવણ્ણના • 1-11. Kāyagatāsatisuttādivaṇṇanā
