| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
9. காயக³தாஸதிஸுத்தவண்ணனா
9. Kāyagatāsatisuttavaṇṇanā
153-4. ஏவங் மே ஸுதந்தி காயக³தாஸதிஸுத்தங். தத்த² கே³ஹஸிதாதி பஞ்சகாமகு³ணனிஸ்ஸிதா. ஸரஸங்கப்பாதி தா⁴வனஸங்கப்பா. ஸரந்தீதி ஹி ஸரா, தா⁴வந்தீதி அத்தோ². அஜ்ஜ²த்தமேவாதி கோ³சரஜ்ஜ²த்தஸ்மிங்யேவ. காயக³தாஸதிந்தி காயபரிக்³கா³ஹிகம்பி காயாரம்மணம்பி ஸதிங். காயபரிக்³கா³ஹிகந்தி வுத்தே ஸமதோ² கதி²தோ ஹோதி, காயாரம்மணந்தி வுத்தே விபஸ்ஸனா. உப⁴யேன ஸமத²விபஸ்ஸனா கதி²தா ஹொந்தி.
153-4.Evaṃme sutanti kāyagatāsatisuttaṃ. Tattha gehasitāti pañcakāmaguṇanissitā. Sarasaṅkappāti dhāvanasaṅkappā. Sarantīti hi sarā, dhāvantīti attho. Ajjhattamevāti gocarajjhattasmiṃyeva. Kāyagatāsatinti kāyapariggāhikampi kāyārammaṇampi satiṃ. Kāyapariggāhikanti vutte samatho kathito hoti, kāyārammaṇanti vutte vipassanā. Ubhayena samathavipassanā kathitā honti.
புன சபரங்…பே॰… ஏவம்பி, பி⁴க்க²வே, பி⁴க்கு² காயக³தாஸதிங் பா⁴வேதீதி ஸதிபட்டா²னே சுத்³த³ஸவிதே⁴ன காயானுபஸ்ஸனா கதி²தா.
Puna caparaṃ…pe… evampi, bhikkhave, bhikkhu kāyagatāsatiṃ bhāvetīti satipaṭṭhāne cuddasavidhena kāyānupassanā kathitā.
156. அந்தோக³தா⁴வாஸ்ஸாதி தஸ்ஸ பி⁴க்கு²னோ பா⁴வனாய அப்³ப⁴ந்தரக³தாவ ஹொந்தி. விஜ்ஜாபா⁴கி³யாதி எத்த² ஸம்பயோக³வஸேன விஜ்ஜங் ப⁴ஜந்தீதி விஜ்ஜாபா⁴கி³யா. விஜ்ஜாபா⁴கே³ விஜ்ஜாகொட்டா²ஸே வத்தந்தீதிபி விஜ்ஜாபா⁴கி³யா. தத்த² விபஸ்ஸனாஞாணங், மனோமயித்³தி⁴, ச² அபி⁴ஞ்ஞாதி அட்ட² விஜ்ஜா. புரிமேன அத்தே²ன தாஹி ஸம்பயுத்தத⁴ம்மாபி விஜ்ஜாபா⁴கி³யா. பச்சி²மேன அத்தே²ன தாஸு யா காசி ஏகா விஜ்ஜா விஜ்ஜா, ஸேஸா விஜ்ஜாபா⁴கி³யாதி ஏவங் விஜ்ஜாபி விஜ்ஜாய ஸம்பயுத்தா த⁴ம்மாபி விஜ்ஜாபா⁴கி³யாதேவ வேதி³தப்³பா³. சேதஸா பு²டோதி எத்த² து³வித⁴ங் ப²ரணங் ஆபோப²ரணஞ்ச, தி³ப்³ப³சக்கு²ப²ரணஞ்ச, தத்த² ஆபோகஸிணங் ஸமாபஜ்ஜித்வா ஆபேன ப²ரணங் ஆபோப²ரணங் நாம. ஏவங் பு²டேபி மஹாஸமுத்³தே³ ஸப்³பா³ ஸமுத்³த³ங்க³மா குன்னதி³யோ அந்தோக³தா⁴வ ஹொந்தி, ஆலோகங் பன வட்³டெ⁴த்வா தி³ப்³ப³சக்கு²னா ஸகலஸமுத்³த³ஸ்ஸ த³ஸ்ஸனங் தி³ப்³ப³சக்கு²ப²ரணங் நாம. ஏவங் ப²ரணேபி மஹாஸமுத்³தே³ ஸப்³பா³ ஸமுத்³த³ங்க³மா குன்னதி³யோ அந்தோக³தா⁴வ ஹொந்தி.
156.Antogadhāvāssāti tassa bhikkhuno bhāvanāya abbhantaragatāva honti. Vijjābhāgiyāti ettha sampayogavasena vijjaṃ bhajantīti vijjābhāgiyā. Vijjābhāge vijjākoṭṭhāse vattantītipi vijjābhāgiyā. Tattha vipassanāñāṇaṃ, manomayiddhi, cha abhiññāti aṭṭha vijjā. Purimena atthena tāhi sampayuttadhammāpi vijjābhāgiyā. Pacchimena atthena tāsu yā kāci ekā vijjā vijjā, sesā vijjābhāgiyāti evaṃ vijjāpi vijjāya sampayuttā dhammāpi vijjābhāgiyāteva veditabbā. Cetasā phuṭoti ettha duvidhaṃ pharaṇaṃ āpopharaṇañca, dibbacakkhupharaṇañca, tattha āpokasiṇaṃ samāpajjitvā āpena pharaṇaṃ āpopharaṇaṃ nāma. Evaṃ phuṭepi mahāsamudde sabbā samuddaṅgamā kunnadiyo antogadhāva honti, ālokaṃ pana vaḍḍhetvā dibbacakkhunā sakalasamuddassa dassanaṃ dibbacakkhupharaṇaṃ nāma. Evaṃ pharaṇepi mahāsamudde sabbā samuddaṅgamā kunnadiyo antogadhāva honti.
ஓதாரந்தி விவரங் சி²த்³த³ங். ஆரம்மணந்தி கிலேஸுப்பத்திபச்சயங். லபே⁴த² ஓதாரந்தி லபெ⁴ய்ய பவேஸனங், வினிவிஜ்ஜி²த்வா யாவ பரியோஸானா க³ச்செ²ய்யாதி அத்தோ². நிக்கே²பனந்தி நிக்கி²பனட்டா²னங்.
Otāranti vivaraṃ chiddaṃ. Ārammaṇanti kilesuppattipaccayaṃ. Labhetha otāranti labheyya pavesanaṃ, vinivijjhitvā yāva pariyosānā gaccheyyāti attho. Nikkhepananti nikkhipanaṭṭhānaṃ.
157. ஏவங் அபா⁴விதகாயக³தாஸதிங் புக்³க³லங் அல்லமத்திகபுஞ்ஜாதீ³ஹி உபமெத்வா இதா³னி பா⁴விதகாயக³தாஸதிங் ஸாரப²லகாதீ³ஹி உபமேதுங் ஸெய்யதா²பீதிஆதி³மாஹ. தத்த² அக்³க³ளப²லகந்தி கவாடங்.
157. Evaṃ abhāvitakāyagatāsatiṃ puggalaṃ allamattikapuñjādīhi upametvā idāni bhāvitakāyagatāsatiṃ sāraphalakādīhi upametuṃ seyyathāpītiādimāha. Tattha aggaḷaphalakanti kavāṭaṃ.
158. காகபெய்யோதி முக²வட்டியங் நிஸீதி³த்வா காகேன கீ³வங் அனாமெத்வாவ பாதப்³போ³. அபி⁴ஞ்ஞாஸச்சி²கரணீயஸ்ஸாதி அபி⁴ஞ்ஞாய ஸச்சி²காதப்³ப³ஸ்ஸ. ஸக்கி²ப⁴ப்³ப³தங் பாபுணாதீதி பச்சக்க²பா⁴வங் பாபுணாதி. ஸதி ஸதி ஆயதனேதி ஸதிஸதி காரணே. கிங் பனெத்த² காரணந்தி? அபி⁴ஞ்ஞாவ காரணங். ஆளிப³ந்தா⁴தி மரியாத³ப³த்³தா⁴.
158.Kākapeyyoti mukhavaṭṭiyaṃ nisīditvā kākena gīvaṃ anāmetvāva pātabbo. Abhiññāsacchikaraṇīyassāti abhiññāya sacchikātabbassa. Sakkhibhabbataṃpāpuṇātīti paccakkhabhāvaṃ pāpuṇāti. Sati sati āyataneti satisati kāraṇe. Kiṃ panettha kāraṇanti? Abhiññāva kāraṇaṃ. Āḷibandhāti mariyādabaddhā.
யானீகதாயாதி யுத்தயானங் விய கதாய. வத்து²கதாயாதி பதிட்டா²கதாய. அனுட்டி²தாயாதி அனுப்பவத்திதாய. பரிசிதாயாதி பரிசயகதாய. ஸுஸமாரத்³தா⁴யாதி ஸுட்டு² ஸமாரத்³தா⁴ய ஸுஸம்பக்³க³ஹிதாய. ஸேஸங் ஸப்³ப³த்த² உத்தானமேவாதி.
Yānīkatāyāti yuttayānaṃ viya katāya. Vatthukatāyāti patiṭṭhākatāya. Anuṭṭhitāyāti anuppavattitāya. Paricitāyāti paricayakatāya. Susamāraddhāyāti suṭṭhu samāraddhāya susampaggahitāya. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
காயக³தாஸதிஸுத்தவண்ணனா நிட்டி²தா.
Kāyagatāsatisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. காயக³தாஸதிஸுத்தங் • 9. Kāyagatāsatisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 9. காயக³தாஸதிஸுத்தவண்ணனா • 9. Kāyagatāsatisuttavaṇṇanā
