| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
19. காயக³தாஸதிவக்³கோ³
19. Kāyagatāsativaggo
563. ‘‘யஸ்ஸ கஸ்ஸசி, பி⁴க்க²வே, மஹாஸமுத்³தோ³ சேதஸா பு²டோ அந்தோக³தா⁴ தஸ்ஸ குன்னதி³யோ யா காசி ஸமுத்³த³ங்க³மா; ஏவமேவங், பி⁴க்க²வே, யஸ்ஸ கஸ்ஸசி காயக³தா ஸதி பா⁴விதா ப³ஹுலீகதா அந்தோக³தா⁴ தஸ்ஸ குஸலா த⁴ம்மா யே கேசி விஜ்ஜாபா⁴கி³யா’’தி.
563. ‘‘Yassa kassaci, bhikkhave, mahāsamuddo cetasā phuṭo antogadhā tassa kunnadiyo yā kāci samuddaṅgamā; evamevaṃ, bhikkhave, yassa kassaci kāyagatā sati bhāvitā bahulīkatā antogadhā tassa kusalā dhammā ye keci vijjābhāgiyā’’ti.
564-570. ‘‘ஏகத⁴ம்மோ, பி⁴க்க²வே, பா⁴விதோ ப³ஹுலீகதோ மஹதோ ஸங்வேகா³ய ஸங்வத்ததி… மஹதோ அத்தா²ய ஸங்வத்ததி… மஹதோ யோக³க்கே²மாய ஸங்வத்ததி… ஸதிஸம்பஜஞ்ஞாய ஸங்வத்ததி… ஞாணத³ஸ்ஸனப்படிலாபா⁴ய ஸங்வத்ததி… தி³ட்ட²த⁴ம்மஸுக²விஹாராய ஸங்வத்ததி… விஜ்ஜாவிமுத்திப²லஸச்சி²கிரியாய ஸங்வத்ததி. கதமோ ஏகத⁴ம்மோ? காயக³தா ஸதி. அயங் கோ², பி⁴க்க²வே, ஏகத⁴ம்மோ பா⁴விதோ ப³ஹுலீகதோ மஹதோ ஸங்வேகா³ய ஸங்வத்ததி… மஹதோ அத்தா²ய ஸங்வத்ததி… மஹதோ யோக³க்கே²மாய ஸங்வத்ததி… ஸதிஸம்பஜஞ்ஞாய ஸங்வத்ததி… ஞாணத³ஸ்ஸனப்படிலாபா⁴ய ஸங்வத்ததி… தி³ட்ட²த⁴ம்மஸுக²விஹாராய ஸங்வத்ததி… விஜ்ஜாவிமுத்திப²லஸச்சி²கிரியாய ஸங்வத்ததீ’’தி.
564-570. ‘‘Ekadhammo, bhikkhave, bhāvito bahulīkato mahato saṃvegāya saṃvattati… mahato atthāya saṃvattati… mahato yogakkhemāya saṃvattati… satisampajaññāya saṃvattati… ñāṇadassanappaṭilābhāya saṃvattati… diṭṭhadhammasukhavihārāya saṃvattati… vijjāvimuttiphalasacchikiriyāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato mahato saṃvegāya saṃvattati… mahato atthāya saṃvattati… mahato yogakkhemāya saṃvattati… satisampajaññāya saṃvattati… ñāṇadassanappaṭilābhāya saṃvattati… diṭṭhadhammasukhavihārāya saṃvattati… vijjāvimuttiphalasacchikiriyāya saṃvattatī’’ti.
571. ‘‘ஏகத⁴ம்மே , பி⁴க்க²வே, பா⁴விதே ப³ஹுலீகதே காயோபி பஸ்ஸம்ப⁴தி, சித்தம்பி பஸ்ஸம்ப⁴தி, விதக்கவிசாராபி வூபஸம்மந்தி, கேவலாபி விஜ்ஜாபா⁴கி³யா த⁴ம்மா பா⁴வனாபாரிபூரிங் க³ச்ச²ந்தி. கதமஸ்மிங் ஏகத⁴ம்மே? காயக³தாய ஸதியா. இமஸ்மிங் கோ², பி⁴க்க²வே, ஏகத⁴ம்மே பா⁴விதே ப³ஹுலீகதே காயோபி பஸ்ஸம்ப⁴தி, சித்தம்பி பஸ்ஸம்ப⁴தி, விதக்கவிசாராபி வூபஸம்மந்தி, கேவலாபி விஜ்ஜாபா⁴கி³யா த⁴ம்மா பா⁴வனாபாரிபூரிங் க³ச்ச²ந்தீ’’தி.
571. ‘‘Ekadhamme , bhikkhave, bhāvite bahulīkate kāyopi passambhati, cittampi passambhati, vitakkavicārāpi vūpasammanti, kevalāpi vijjābhāgiyā dhammā bhāvanāpāripūriṃ gacchanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate kāyopi passambhati, cittampi passambhati, vitakkavicārāpi vūpasammanti, kevalāpi vijjābhāgiyā dhammā bhāvanāpāripūriṃ gacchantī’’ti.
572. ‘‘ஏகத⁴ம்மே, பி⁴க்க²வே, பா⁴விதே ப³ஹுலீகதே அனுப்பன்னா சேவ அகுஸலா த⁴ம்மா நுப்பஜ்ஜந்தி, உப்பன்னா ச அகுஸலா த⁴ம்மா பஹீயந்தி. கதமஸ்மிங் ஏகத⁴ம்மே? காயக³தாய ஸதியா. இமஸ்மிங் கோ², பி⁴க்க²வே, ஏகத⁴ம்மே பா⁴விதே ப³ஹுலீகதே அனுப்பன்னா சேவ அகுஸலா த⁴ம்மா நுப்பஜ்ஜந்தி, உப்பன்னா ச அகுஸலா த⁴ம்மா பஹீயந்தீ’’தி.
572. ‘‘Ekadhamme, bhikkhave, bhāvite bahulīkate anuppannā ceva akusalā dhammā nuppajjanti, uppannā ca akusalā dhammā pahīyanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anuppannā ceva akusalā dhammā nuppajjanti, uppannā ca akusalā dhammā pahīyantī’’ti.
573. ‘‘ஏகத⁴ம்மே , பி⁴க்க²வே, பா⁴விதே ப³ஹுலீகதே அனுப்பன்னா சேவ குஸலா த⁴ம்மா உப்பஜ்ஜந்தி, உப்பன்னா ச குஸலா த⁴ம்மா பி⁴ய்யோபா⁴வாய வேபுல்லாய ஸங்வத்தந்தி. கதமஸ்மிங் ஏகத⁴ம்மே? காயக³தாய ஸதியா. இமஸ்மிங் கோ², பி⁴க்க²வே, ஏகத⁴ம்மே பா⁴விதே ப³ஹுலீகதே அனுப்பன்னா சேவ குஸலா த⁴ம்மா உப்பஜ்ஜந்தி, உப்பன்னா ச குஸலா த⁴ம்மா பி⁴ய்யோபா⁴வாய வேபுல்லாய ஸங்வத்தந்தீ’’தி.
573. ‘‘Ekadhamme , bhikkhave, bhāvite bahulīkate anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya saṃvattanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya saṃvattantī’’ti.
574. ‘‘ஏகத⁴ம்மே, பி⁴க்க²வே, பா⁴விதே ப³ஹுலீகதே அவிஜ்ஜா பஹீயதி, விஜ்ஜா உப்பஜ்ஜதி, அஸ்மிமானோ பஹீயதி, அனுஸயா ஸமுக்³கா⁴தங் க³ச்ச²ந்தி, ஸங்யோஜனா பஹீயந்தி. கதமஸ்மிங் ஏகத⁴ம்மே? காயக³தாய ஸதியா. இமஸ்மிங் கோ², பி⁴க்க²வே, ஏகத⁴ம்மே பா⁴விதே ப³ஹுலீகதே அவிஜ்ஜா பஹீயதி, விஜ்ஜா உப்பஜ்ஜதி, அஸ்மிமானோ பஹீயதி, அனுஸயா ஸமுக்³கா⁴தங் க³ச்ச²ந்தி, ஸங்யோஜனா பஹீயந்தீ’’தி.
574. ‘‘Ekadhamme, bhikkhave, bhāvite bahulīkate avijjā pahīyati, vijjā uppajjati, asmimāno pahīyati, anusayā samugghātaṃ gacchanti, saṃyojanā pahīyanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate avijjā pahīyati, vijjā uppajjati, asmimāno pahīyati, anusayā samugghātaṃ gacchanti, saṃyojanā pahīyantī’’ti.
575-576. ‘‘ஏகத⁴ம்மோ, பி⁴க்க²வே, பா⁴விதோ ப³ஹுலீகதோ பஞ்ஞாபபே⁴தா³ய ஸங்வத்ததி… அனுபாதா³பரினிப்³பா³னாய ஸங்வத்ததி. கதமோ ஏகத⁴ம்மோ? காயக³தா ஸதி. அயங் கோ², பி⁴க்க²வே, ஏகத⁴ம்மோ பா⁴விதோ ப³ஹுலீகதோ பஞ்ஞாபபே⁴தா³ய ஸங்வத்ததி… அனுபாதா³பரினிப்³பா³னாய ஸங்வத்ததீ’’தி.
575-576. ‘‘Ekadhammo, bhikkhave, bhāvito bahulīkato paññāpabhedāya saṃvattati… anupādāparinibbānāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato paññāpabhedāya saṃvattati… anupādāparinibbānāya saṃvattatī’’ti.
577-579. ‘‘ஏகத⁴ம்மே , பி⁴க்க²வே, பா⁴விதே ப³ஹுலீகதே அனேகதா⁴துபடிவேதோ⁴ ஹோதி… நானாதா⁴துபடிவேதோ⁴ ஹோதி… அனேகதா⁴துபடிஸம்பி⁴தா³ ஹோதி. கதமஸ்மிங் ஏகத⁴ம்மே? காயக³தாய ஸதியா. இமஸ்மிங் கோ², பி⁴க்க²வே, ஏகத⁴ம்மே பா⁴விதே ப³ஹுலீகதே அனேகதா⁴துபடிவேதோ⁴ ஹோதி… நானாதா⁴துபடிவேதோ⁴ ஹோதி… அனேகதா⁴துபடிஸம்பி⁴தா³ ஹோதீ’’தி.
577-579. ‘‘Ekadhamme , bhikkhave, bhāvite bahulīkate anekadhātupaṭivedho hoti… nānādhātupaṭivedho hoti… anekadhātupaṭisambhidā hoti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anekadhātupaṭivedho hoti… nānādhātupaṭivedho hoti… anekadhātupaṭisambhidā hotī’’ti.
580-583. ‘‘ஏகத⁴ம்மோ, பி⁴க்க²வே, பா⁴விதோ ப³ஹுலீகதோ ஸோதாபத்திப²லஸச்சி²கிரியாய ஸங்வத்ததி… ஸகதா³கா³மிப²லஸச்சி²கிரியாய ஸங்வத்ததி… அனாகா³மிப²லஸச்சி²கிரியாய ஸங்வத்ததி… அரஹத்தப²லஸச்சி²கிரியாய ஸங்வத்ததி. கதமோ ஏகத⁴ம்மோ? காயக³தா ஸதி. அயங் கோ², பி⁴க்க²வே, ஏகத⁴ம்மோ பா⁴விதோ ப³ஹுலீகதோ ஸோதாபத்திப²லஸச்சி²கிரியாய ஸங்வத்ததி… ஸகதா³கா³மிப²லஸச்சி²கிரியாய ஸங்வத்ததி… அனாகா³மிப²லஸச்சி²கிரியாய ஸங்வத்ததி… அரஹத்தப²லஸச்சி²கிரியாய ஸங்வத்ததீ’’தி.
580-583. ‘‘Ekadhammo, bhikkhave, bhāvito bahulīkato sotāpattiphalasacchikiriyāya saṃvattati… sakadāgāmiphalasacchikiriyāya saṃvattati… anāgāmiphalasacchikiriyāya saṃvattati… arahattaphalasacchikiriyāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato sotāpattiphalasacchikiriyāya saṃvattati… sakadāgāmiphalasacchikiriyāya saṃvattati… anāgāmiphalasacchikiriyāya saṃvattati… arahattaphalasacchikiriyāya saṃvattatī’’ti.
584-599. ‘‘ஏகத⁴ம்மோ , பி⁴க்க²வே, பா⁴விதோ ப³ஹுலீகதோ பஞ்ஞாபடிலாபா⁴ய ஸங்வத்ததி… பஞ்ஞாவுத்³தி⁴யா ஸங்வத்ததி… பஞ்ஞாவேபுல்லாய ஸங்வத்ததி… மஹாபஞ்ஞதாய ஸங்வத்ததி… புது²பஞ்ஞதாய ஸங்வத்ததி… விபுலபஞ்ஞதாய ஸங்வத்ததி… க³ம்பீ⁴ரபஞ்ஞதாய ஸங்வத்ததி… அஸாமந்தபஞ்ஞதாய 1 ஸங்வத்ததி… பூ⁴ரிபஞ்ஞதாய ஸங்வத்ததி… பஞ்ஞாபா³ஹுல்லாய ஸங்வத்ததி… ஸீக⁴பஞ்ஞதாய ஸங்வத்ததி… லஹுபஞ்ஞதாய ஸங்வத்ததி… ஹாஸபஞ்ஞதாய 2 ஸங்வத்ததி… ஜவனபஞ்ஞதாய ஸங்வத்ததி… திக்க²பஞ்ஞதாய ஸங்வத்ததி… நிப்³பே³தி⁴கபஞ்ஞதாய ஸங்வத்ததி. கதமோ ஏகத⁴ம்மோ? காயக³தா ஸதி. அயங் கோ², பி⁴க்க²வே, ஏகத⁴ம்மோ பா⁴விதோ ப³ஹுலீகதோ பஞ்ஞாபடிலாபா⁴ய ஸங்வத்ததி… பஞ்ஞாவுத்³தி⁴யா ஸங்வத்ததி… பஞ்ஞாவேபுல்லாய ஸங்வத்ததி… மஹாபஞ்ஞதாய ஸங்வத்ததி… புது²பஞ்ஞதாய ஸங்வத்ததி… விபுலபஞ்ஞதாய ஸங்வத்ததி… க³ம்பீ⁴ரபஞ்ஞதாய ஸங்வத்ததி… அஸாமந்தபஞ்ஞதாய ஸங்வத்ததி… பூ⁴ரிபஞ்ஞதாய ஸங்வத்ததி… பஞ்ஞாபா³ஹுல்லாய ஸங்வத்ததி… ஸீக⁴பஞ்ஞதாய ஸங்வத்ததி… லஹுபஞ்ஞதாய ஸங்வத்ததி… ஹாஸபஞ்ஞதாய ஸங்வத்ததி… ஜவனபஞ்ஞதாய ஸங்வத்ததி… திக்க²பஞ்ஞதாய ஸங்வத்ததி… நிப்³பே³தி⁴கபஞ்ஞதாய ஸங்வத்ததீ’’தி.
584-599. ‘‘Ekadhammo , bhikkhave, bhāvito bahulīkato paññāpaṭilābhāya saṃvattati… paññāvuddhiyā saṃvattati… paññāvepullāya saṃvattati… mahāpaññatāya saṃvattati… puthupaññatāya saṃvattati… vipulapaññatāya saṃvattati… gambhīrapaññatāya saṃvattati… asāmantapaññatāya 3 saṃvattati… bhūripaññatāya saṃvattati… paññābāhullāya saṃvattati… sīghapaññatāya saṃvattati… lahupaññatāya saṃvattati… hāsapaññatāya 4 saṃvattati… javanapaññatāya saṃvattati… tikkhapaññatāya saṃvattati… nibbedhikapaññatāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato paññāpaṭilābhāya saṃvattati… paññāvuddhiyā saṃvattati… paññāvepullāya saṃvattati… mahāpaññatāya saṃvattati… puthupaññatāya saṃvattati… vipulapaññatāya saṃvattati… gambhīrapaññatāya saṃvattati… asāmantapaññatāya saṃvattati… bhūripaññatāya saṃvattati… paññābāhullāya saṃvattati… sīghapaññatāya saṃvattati… lahupaññatāya saṃvattati… hāsapaññatāya saṃvattati… javanapaññatāya saṃvattati… tikkhapaññatāya saṃvattati… nibbedhikapaññatāya saṃvattatī’’ti.
காயக³தாஸதிவக்³கோ³ ஏகூனவீஸதிமோ.
Kāyagatāsativaggo ekūnavīsatimo.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 19. காயக³தாஸதிவக்³க³வண்ணனா • 19. Kāyagatāsativaggavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 19. காயக³தாஸதிவக்³க³வண்ணனா • 19. Kāyagatāsativaggavaṇṇanā
