| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૬. છટ્ઠવગ્ગો
6. Chaṭṭhavaggo
(૬૨) ૧૦. કાયકમ્મં સનિદસ્સનન્તિકથા
(62) 10. Kāyakammaṃ sanidassanantikathā
૪૬૯. કાયકમ્મં સનિદસ્સનન્તિ? આમન્તા. રૂપં રૂપાયતનં રૂપધાતુ નીલં પીતકં લોહિતકં ઓદાતં ચક્ખુવિઞ્ઞેય્યં ચક્ખુસ્મિં પટિહઞ્ઞતિ ચક્ખુસ્સ આપાથં આગચ્છતીતિ? ન હેવં વત્તબ્બે…પે॰….
469. Kāyakammaṃ sanidassananti? Āmantā. Rūpaṃ rūpāyatanaṃ rūpadhātu nīlaṃ pītakaṃ lohitakaṃ odātaṃ cakkhuviññeyyaṃ cakkhusmiṃ paṭihaññati cakkhussa āpāthaṃ āgacchatīti? Na hevaṃ vattabbe…pe….
કાયકમ્મં સનિદસ્સનન્તિ? આમન્તા. ચક્ખુઞ્ચ પટિચ્ચ કાયકમ્મઞ્ચ ઉપ્પજ્જતિ ચક્ખુવિઞ્ઞાણન્તિ? ન હેવં વત્તબ્બે…પે॰….
Kāyakammaṃ sanidassananti? Āmantā. Cakkhuñca paṭicca kāyakammañca uppajjati cakkhuviññāṇanti? Na hevaṃ vattabbe…pe….
ચક્ખુઞ્ચ પટિચ્ચ કાયકમ્મઞ્ચ ઉપ્પજ્જતિ ચક્ખુવિઞ્ઞાણન્તિ? આમન્તા. ‘‘ચક્ખુઞ્ચ પટિચ્ચ કાયકમ્મઞ્ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? નત્થિ. ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? આમન્તા. હઞ્ચિ ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તો, નો ચ વત રે વત્તબ્બે – ‘‘ચક્ખુઞ્ચ પટિચ્ચ કાયકમ્મઞ્ચ ઉપ્પજ્જતિ ચક્ખુવિઞ્ઞાણ’’ન્તિ.
Cakkhuñca paṭicca kāyakammañca uppajjati cakkhuviññāṇanti? Āmantā. ‘‘Cakkhuñca paṭicca kāyakammañca uppajjati cakkhuviññāṇa’’nti – attheva suttantoti? Natthi. ‘‘Cakkhuñca paṭicca rūpe ca uppajjati cakkhuviññāṇa’’nti – attheva suttantoti? Āmantā. Hañci ‘‘cakkhuñca paṭicca rūpe ca uppajjati cakkhuviññāṇa’’nti – attheva suttanto, no ca vata re vattabbe – ‘‘cakkhuñca paṭicca kāyakammañca uppajjati cakkhuviññāṇa’’nti.
૪૭૦. ન વત્તબ્બં – ‘‘કાયકમ્મં સનિદસ્સન’’ન્તિ? આમન્તા. નનુ પસ્સતિ અભિક્કમન્તં પટિક્કમન્તં આલોકેન્તં વિલોકેન્તં સમિઞ્જેન્તં પસારેન્તન્તિ? આમન્તા. હઞ્ચિ પસ્સતિ અભિક્કમન્તં પટિક્કમન્તં આલોકેન્તં વિલોકેન્તં સમિઞ્જેન્તં પસારેન્તં, તેન વત રે વત્તબ્બે – ‘‘કાયકમ્મં સનિદસ્સન’’ન્તિ.
470. Na vattabbaṃ – ‘‘kāyakammaṃ sanidassana’’nti? Āmantā. Nanu passati abhikkamantaṃ paṭikkamantaṃ ālokentaṃ vilokentaṃ samiñjentaṃ pasārentanti? Āmantā. Hañci passati abhikkamantaṃ paṭikkamantaṃ ālokentaṃ vilokentaṃ samiñjentaṃ pasārentaṃ, tena vata re vattabbe – ‘‘kāyakammaṃ sanidassana’’nti.
કાયકમ્મં સનિદસ્સનન્તિકથા નિટ્ઠિતા.
Kāyakammaṃ sanidassanantikathā niṭṭhitā.
છટ્ઠવગ્ગો.
Chaṭṭhavaggo.
તસ્સુદ્દાનં –
Tassuddānaṃ –
નિયમો અસઙ્ખતો, પટિચ્ચસમુપ્પાદો અસઙ્ખતો, ચત્તારિ સચ્ચાનિ અસઙ્ખતાનિ, ચત્તારો આરુપ્પા અસઙ્ખતા, નિરોધસમાપત્તિ અસઙ્ખતા, આકાસો અસઙ્ખતો, આકાસો સનિદસ્સનો, ચત્તારો મહાભૂતા, પઞ્ચિન્દ્રિયાનિ, તથેવ કાયકમ્મન્તિ.
Niyamo asaṅkhato, paṭiccasamuppādo asaṅkhato, cattāri saccāni asaṅkhatāni, cattāro āruppā asaṅkhatā, nirodhasamāpatti asaṅkhatā, ākāso asaṅkhato, ākāso sanidassano, cattāro mahābhūtā, pañcindriyāni, tatheva kāyakammanti.
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૧૦. પથવીધાતુસનિદસ્સનાતિઆદિકથાવણ્ણના • 10. Pathavīdhātusanidassanātiādikathāvaṇṇanā
