| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. கேஸகம்ப³லஸுத்தங்
5. Kesakambalasuttaṃ
138. ‘‘ஸெய்யதா²பி, பி⁴க்க²வே, யானி கானிசி தந்தாவுதானங் வத்தா²னங், கேஸகம்ப³லோ தேஸங் படிகிட்டோ² அக்கா²யதி. கேஸகம்ப³லோ, பி⁴க்க²வே, ஸீதே ஸீதோ, உண்ஹே உண்ஹோ, து³ப்³ப³ண்ணோ, து³க்³க³ந்தோ⁴, து³க்க²ஸம்ப²ஸ்ஸோ. ஏவமேவங் கோ², பி⁴க்க²வே, யானி கானிசி புது²ஸமணப்³ராஹ்மணவாதா³னங் 1 மக்க²லிவாதோ³ தேஸங் படிகிட்டோ² அக்கா²யதி.
138. ‘‘Seyyathāpi, bhikkhave, yāni kānici tantāvutānaṃ vatthānaṃ, kesakambalo tesaṃ paṭikiṭṭho akkhāyati. Kesakambalo, bhikkhave, sīte sīto, uṇhe uṇho, dubbaṇṇo, duggandho, dukkhasamphasso. Evamevaṃ kho, bhikkhave, yāni kānici puthusamaṇabrāhmaṇavādānaṃ 2 makkhalivādo tesaṃ paṭikiṭṭho akkhāyati.
‘‘மக்க²லி, பி⁴க்க²வே, மோக⁴புரிஸோ ஏவங்வாதீ³ ஏவங்தி³ட்டி² – ‘நத்தி² கம்மங், நத்தி² கிரியங், நத்தி² வீரிய’ந்தி. யேபி தே, பி⁴க்க²வே, அஹேஸுங் அதீதமத்³தா⁴னங் அரஹந்தோ ஸம்மாஸம்பு³த்³தா⁴, தேபி ப⁴க³வந்தோ கம்மவாதா³ சேவ அஹேஸுங் கிரியவாதா³ ச வீரியவாதா³ ச. தேபி, பி⁴க்க²வே, மக்க²லி மோக⁴புரிஸோ படிபா³ஹதி – ‘நத்தி² கம்மங், நத்தி² கிரியங், நத்தி² வீரிய’ந்தி. யேபி தே, பி⁴க்க²வே, ப⁴விஸ்ஸந்தி அனாக³தமத்³தா⁴னங் அரஹந்தோ ஸம்மாஸம்பு³த்³தா⁴, தேபி ப⁴க³வந்தோ கம்மவாதா³ சேவ ப⁴விஸ்ஸந்தி கிரியவாதா³ ச வீரியவாதா³ ச. தேபி, பி⁴க்க²வே, மக்க²லி மோக⁴புரிஸோ படிபா³ஹதி – ‘நத்தி² கம்மங், நத்தி² கிரியங், நத்தி² வீரிய’ந்தி. அஹம்பி, பி⁴க்க²வே, ஏதரஹி அரஹங் ஸம்மாஸம்பு³த்³தோ⁴ கம்மவாதோ³ சேவ கிரியவாதோ³ ச வீரியவாதோ³ ச. மம்பி, பி⁴க்க²வே, மக்க²லி மோக⁴புரிஸோ படிபா³ஹதி – ‘நத்தி² கம்மங், நத்தி² கிரியங், நத்தி² வீரிய’’’ந்தி.
‘‘Makkhali, bhikkhave, moghapuriso evaṃvādī evaṃdiṭṭhi – ‘natthi kammaṃ, natthi kiriyaṃ, natthi vīriya’nti. Yepi te, bhikkhave, ahesuṃ atītamaddhānaṃ arahanto sammāsambuddhā, tepi bhagavanto kammavādā ceva ahesuṃ kiriyavādā ca vīriyavādā ca. Tepi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’nti. Yepi te, bhikkhave, bhavissanti anāgatamaddhānaṃ arahanto sammāsambuddhā, tepi bhagavanto kammavādā ceva bhavissanti kiriyavādā ca vīriyavādā ca. Tepi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’nti. Ahampi, bhikkhave, etarahi arahaṃ sammāsambuddho kammavādo ceva kiriyavādo ca vīriyavādo ca. Mampi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’’’nti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. கேஸகம்ப³லஸுத்தவண்ணனா • 5. Kesakambalasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5-10. கேஸகம்ப³லஸுத்தாதி³வண்ணனா • 5-10. Kesakambalasuttādivaṇṇanā
