| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૨૨. બાવીસતિમવગ્ગો
22. Bāvīsatimavaggo
(૨૧૭) ૧૦. ખણિકકથા
(217) 10. Khaṇikakathā
૯૦૬. એકચિત્તક્ખણિકા સબ્બે ધમ્માતિ? આમન્તા. ચિત્તે મહાપથવી સણ્ઠાતિ, મહાસમુદ્દો સણ્ઠાતિ, સિનેરુપબ્બતરાજા સણ્ઠાતિ, આપો સણ્ઠાતિ, તેજો સણ્ઠાતિ, વાયો સણ્ઠાતિ, તિણકટ્ઠવનપ્પતયો સણ્ઠહન્તીતિ? ન હેવં વત્તબ્બે…પે॰….
906. Ekacittakkhaṇikā sabbe dhammāti? Āmantā. Citte mahāpathavī saṇṭhāti, mahāsamuddo saṇṭhāti, sinerupabbatarājā saṇṭhāti, āpo saṇṭhāti, tejo saṇṭhāti, vāyo saṇṭhāti, tiṇakaṭṭhavanappatayo saṇṭhahantīti? Na hevaṃ vattabbe…pe….
એકચિત્તક્ખણિકા સબ્બે ધમ્માતિ? આમન્તા. ચક્ખાયતનં ચક્ખુવિઞ્ઞાણેન સહજાતન્તિ? ન હેવં વત્તબ્બે…પે॰… ચક્ખાયતનં ચક્ખુવિઞ્ઞાણેન સહજાતન્તિ? આમન્તા. નનુ આયસ્મા સારિપુત્તો એતદવોચ – ‘‘અજ્ઝત્તિકઞ્ચેવ, આવુસો, ચક્ખું અપરિભિન્નં હોતિ, બાહિરા ચ રૂપા ન આપાથં આગચ્છન્તિ, નો ચ તજ્જો સમન્નાહારો હોતિ, નેવ તાવ તજ્જસ્સ વિઞ્ઞાણભાગસ્સ 1 પાતુભાવો હોતિ. અજ્ઝત્તિકઞ્ચેવ, આવુસો, ચક્ખું અપરિભિન્નં હોતિ, બાહિરા ચ રૂપા આપાથં આગચ્છન્તિ, નો ચ તજ્જો સમન્નાહારો હોતિ, નેવ તાવ તજ્જસ્સ વિઞ્ઞાણભાગસ્સ પાતુભાવો હોતિ. યતો ચ ખો, આવુસો, અજ્ઝત્તિકઞ્ચેવ ચક્ખું અપરિભિન્નં હોતિ , બાહિરા ચ રૂપા આપાથં આગચ્છન્તિ, તજ્જો ચ સમન્નાહારો હોતિ, એવં તજ્જસ્સ વિઞ્ઞાણભાગસ્સ પાતુભાવો હોતી’’તિ 2! અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘ચક્ખાયતનં ચક્ખુવિઞ્ઞાણેન સહજાત’’ન્તિ.
Ekacittakkhaṇikā sabbe dhammāti? Āmantā. Cakkhāyatanaṃ cakkhuviññāṇena sahajātanti? Na hevaṃ vattabbe…pe… cakkhāyatanaṃ cakkhuviññāṇena sahajātanti? Āmantā. Nanu āyasmā sāriputto etadavoca – ‘‘ajjhattikañceva, āvuso, cakkhuṃ aparibhinnaṃ hoti, bāhirā ca rūpā na āpāthaṃ āgacchanti, no ca tajjo samannāhāro hoti, neva tāva tajjassa viññāṇabhāgassa 3 pātubhāvo hoti. Ajjhattikañceva, āvuso, cakkhuṃ aparibhinnaṃ hoti, bāhirā ca rūpā āpāthaṃ āgacchanti, no ca tajjo samannāhāro hoti, neva tāva tajjassa viññāṇabhāgassa pātubhāvo hoti. Yato ca kho, āvuso, ajjhattikañceva cakkhuṃ aparibhinnaṃ hoti , bāhirā ca rūpā āpāthaṃ āgacchanti, tajjo ca samannāhāro hoti, evaṃ tajjassa viññāṇabhāgassa pātubhāvo hotī’’ti 4! Attheva suttantoti? Āmantā. Tena hi na vattabbaṃ – ‘‘cakkhāyatanaṃ cakkhuviññāṇena sahajāta’’nti.
સોતાયતનં…પે॰… ઘાનાયતનં…પે॰… જિવ્હાયતનં…પે॰… કાયાયતનં કાયવિઞ્ઞાણેન સહજાતન્તિ? ન હેવં વત્તબ્બે…પે॰… કાયાયતનં કાયવિઞ્ઞાણેન સહજાતન્તિ? આમન્તા. નનુ આયસ્મા સારિપુત્તો એતદવોચ – ‘‘અજ્ઝત્તિકો ચેવ, આવુસો, કાયો અપરિભિન્નો હોતિ, બાહિરા ચ ફોટ્ઠબ્બા ન આપાથં આગચ્છન્તિ, નો ચ…પે॰… અજ્ઝત્તિકો ચેવ, આવુસો, કાયો અપરિભિન્નો હોતિ, બાહિરા ચ ફોટ્ઠબ્બા આપાથં આગચ્છન્તિ, નો ચ…પે॰… યતો ચ ખો, આવુસો, અજ્ઝત્તિકો ચેવ કાયો અપરિભિન્નો હોતિ, બાહિરા ચ ફોટ્ઠબ્બા આપાથં આગચ્છન્તિ, તજ્જો ચ સમન્નાહારો હોતિ, એવં તજ્જસ્સ વિઞ્ઞાણભાગસ્સ પાતુભાવો હોતી’’તિ 5! અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘કાયાયતનં કાયવિઞ્ઞાણેન સહજાત’’ન્તિ.
Sotāyatanaṃ…pe… ghānāyatanaṃ…pe… jivhāyatanaṃ…pe… kāyāyatanaṃ kāyaviññāṇena sahajātanti? Na hevaṃ vattabbe…pe… kāyāyatanaṃ kāyaviññāṇena sahajātanti? Āmantā. Nanu āyasmā sāriputto etadavoca – ‘‘ajjhattiko ceva, āvuso, kāyo aparibhinno hoti, bāhirā ca phoṭṭhabbā na āpāthaṃ āgacchanti, no ca…pe… ajjhattiko ceva, āvuso, kāyo aparibhinno hoti, bāhirā ca phoṭṭhabbā āpāthaṃ āgacchanti, no ca…pe… yato ca kho, āvuso, ajjhattiko ceva kāyo aparibhinno hoti, bāhirā ca phoṭṭhabbā āpāthaṃ āgacchanti, tajjo ca samannāhāro hoti, evaṃ tajjassa viññāṇabhāgassa pātubhāvo hotī’’ti 6! Attheva suttantoti? Āmantā. Tena hi na vattabbaṃ – ‘‘kāyāyatanaṃ kāyaviññāṇena sahajāta’’nti.
૯૦૭. ન વત્તબ્બં – ‘‘એકચિત્તક્ખણિકા સબ્બે ધમ્મા’’તિ? આમન્તા. સબ્બે ધમ્મા નિચ્ચા ધુવા સસ્સતા અવિપરિણામધમ્માતિ? ન હેવં વત્તબ્બે. તેન હિ એકચિત્તક્ખણિકા સબ્બે ધમ્માતિ.
907. Na vattabbaṃ – ‘‘ekacittakkhaṇikā sabbe dhammā’’ti? Āmantā. Sabbe dhammā niccā dhuvā sassatā avipariṇāmadhammāti? Na hevaṃ vattabbe. Tena hi ekacittakkhaṇikā sabbe dhammāti.
ખણિકકથા નિટ્ઠિતા.
Khaṇikakathā niṭṭhitā.
બાવીસતિમવગ્ગો.
Bāvīsatimavaggo.
તસ્સુદ્દાનં –
Tassuddānaṃ –
અત્થિ કિઞ્ચિ સંયોજનં અપ્પહાય પરિનિબ્બાનં, અરહા કુસલચિત્તો પરિનિબ્બાયતિ, અરહા આનેઞ્જે ઠિતો પરિનિબ્બાયતિ, અત્થિ ગબ્ભસેય્યાય ધમ્માભિસમયો, અત્થિ ગબ્ભસેય્યાય અરહત્તપ્પત્તિ, અત્થિ સુપિનગતસ્સ ધમ્માભિસમયો, અત્થિ સુપિનગતસ્સ અરહત્તપ્પત્તિ, સબ્બં સુપિનગતસ્સ ચિત્તં અબ્યાકતં, નત્થિ કાચિ આસેવનપચ્ચયતા, એકચિત્તક્ખણિકા સબ્બે ધમ્માતિ.
Atthi kiñci saṃyojanaṃ appahāya parinibbānaṃ, arahā kusalacitto parinibbāyati, arahā āneñje ṭhito parinibbāyati, atthi gabbhaseyyāya dhammābhisamayo, atthi gabbhaseyyāya arahattappatti, atthi supinagatassa dhammābhisamayo, atthi supinagatassa arahattappatti, sabbaṃ supinagatassa cittaṃ abyākataṃ, natthi kāci āsevanapaccayatā, ekacittakkhaṇikā sabbe dhammāti.
Footnotes:
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૧૦. ખણિકકથાવણ્ણના • 10. Khaṇikakathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-મૂલટીકા • Pañcapakaraṇa-mūlaṭīkā / ૧૦. ખણિકકથાવણ્ણના • 10. Khaṇikakathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-અનુટીકા • Pañcapakaraṇa-anuṭīkā / ૧૦. ખણિકકથાવણ્ણના • 10. Khaṇikakathāvaṇṇanā
