| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૧૦. અબ્યાકતસંયુત્તં
10. Abyākatasaṃyuttaṃ
૧. ખેમાસુત્તવણ્ણના
1. Khemāsuttavaṇṇanā
૪૧૦. અબ્યાકતસંયુત્તસ્સ પઠમે ખેમાતિ ગિહિકાલે બિમ્બિસારસ્સ ઉપાસિકા સદ્ધાપબ્બજિતા મહાથેરી ‘‘એતદગ્ગં, ભિક્ખવે, મમ સાવિકાનં ભિક્ખુનીનં મહાપઞ્ઞાનં યદિદં ખેમા’’તિ એવં ભગવતા મહાપઞ્ઞતાય એતદગ્ગે ઠપિતા. પણ્ડિતાતિ પણ્ડિચ્ચેન સમન્નાગતા. વિયત્તાતિ વેય્યત્તિયેન સમન્નાગતા. મેધાવિનીતિ મેધાય પઞ્ઞાય સમન્નાગતા. બહુસ્સુતાતિ પરિયત્તિબાહુસચ્ચેનપિ પટિવેધબાહુસચ્ચેનપિ સમન્નાગતા.
410. Abyākatasaṃyuttassa paṭhame khemāti gihikāle bimbisārassa upāsikā saddhāpabbajitā mahātherī ‘‘etadaggaṃ, bhikkhave, mama sāvikānaṃ bhikkhunīnaṃ mahāpaññānaṃ yadidaṃ khemā’’ti evaṃ bhagavatā mahāpaññatāya etadagge ṭhapitā. Paṇḍitāti paṇḍiccena samannāgatā. Viyattāti veyyattiyena samannāgatā. Medhāvinīti medhāya paññāya samannāgatā. Bahussutāti pariyattibāhusaccenapi paṭivedhabāhusaccenapi samannāgatā.
ગણકોતિ અચ્છિદ્દકગણનાય કુસલો. મુદ્દિકોતિ અઙ્ગુલિમુદ્દાય ગણનાય કુસલો. સઙ્ખાયકોતિ પિણ્ડગણનાય કુસલો. ગમ્ભીરોતિ ચતુરાસીતિયોજનસહસ્સગમ્ભીરો. અપ્પમેય્યોતિ આળ્હકગણનાય અપ્પમેય્યો. દુપ્પરિયોગાહોતિ આળ્હકગણનાય પમાણગહણત્થં દુરોગાહો. યેન રૂપેન તથાગતન્તિ યેન રૂપેન દીઘો રસ્સો સામો ઓદાતોતિ સત્તસઙ્ખાતં તથાગતં પઞ્ઞપેય્ય. તં રૂપં તથાગતસ્સ પહીનન્તિ તં વુત્તપ્પકારરૂપં સમુદયપ્પહાનેન સબ્બઞ્ઞુતથાગતસ્સ પહીનં. રૂપસઙ્ખાય વિમુત્તોતિ આયતિં રૂપસ્સ અનુપ્પત્તિયા રૂપારૂપકોટ્ઠાસેનપિ એવરૂપો નામ ભવિસ્સતીતિ વોહારસ્સપિ પટિપસ્સદ્ધત્તા રૂપપણ્ણત્તિયાપિ વિમુત્તો. ગમ્ભીરોતિ અજ્ઝાસય ગમ્ભીરતાય ચ ગુણગમ્ભીરતાય ચ ગમ્ભીરો. તસ્સ એવં ગુણગમ્ભીરસ્સ સતો સબ્બઞ્ઞુતથાગતસ્સ યં ઉપાદાય સત્તસઙ્ખાતો તથાગતોતિ પઞ્ઞત્તિ હોતિ, તદભાવેન તસ્સા પઞ્ઞત્તિયા અભાવં પસ્સન્તસ્સ અયં સત્તસઙ્ખાતો હોતિ તથાગતો પરં મરણાતિ ઇદં વચનં ન ઉપેતિ ન યુજ્જતિ, ન હોતિ તથાગતો પરં મરણાતિઆદિવચનમ્પિ ન ઉપેતિ ન યુજ્જતીતિ અત્થો.
Gaṇakoti acchiddakagaṇanāya kusalo. Muddikoti aṅgulimuddāya gaṇanāya kusalo. Saṅkhāyakoti piṇḍagaṇanāya kusalo. Gambhīroti caturāsītiyojanasahassagambhīro. Appameyyoti āḷhakagaṇanāya appameyyo. Duppariyogāhoti āḷhakagaṇanāya pamāṇagahaṇatthaṃ durogāho. Yena rūpena tathāgatanti yena rūpena dīgho rasso sāmo odātoti sattasaṅkhātaṃ tathāgataṃ paññapeyya. Taṃ rūpaṃ tathāgatassa pahīnanti taṃ vuttappakārarūpaṃ samudayappahānena sabbaññutathāgatassa pahīnaṃ. Rūpasaṅkhāya vimuttoti āyatiṃ rūpassa anuppattiyā rūpārūpakoṭṭhāsenapi evarūpo nāma bhavissatīti vohārassapi paṭipassaddhattā rūpapaṇṇattiyāpi vimutto. Gambhīroti ajjhāsaya gambhīratāya ca guṇagambhīratāya ca gambhīro. Tassa evaṃ guṇagambhīrassa sato sabbaññutathāgatassa yaṃ upādāya sattasaṅkhāto tathāgatoti paññatti hoti, tadabhāvena tassā paññattiyā abhāvaṃ passantassa ayaṃ sattasaṅkhāto hoti tathāgato paraṃ maraṇāti idaṃ vacanaṃ na upeti na yujjati, na hoti tathāgato paraṃ maraṇātiādivacanampi na upeti na yujjatīti attho.
સંસન્દિસ્સતીતિ એકં ભવિસ્સતિ. સમેસ્સતીતિ નિરન્તરં ભવિસ્સતિ. ન વિરોધયિસ્સતીતિ ન વિરુદ્ધં પદં ભવિસ્સતિ. અગ્ગપદસ્મિન્તિ દેસનાય. દેસના હિ ઇધ અગ્ગપદન્તિ અધિપ્પેતા.
Saṃsandissatīti ekaṃ bhavissati. Samessatīti nirantaraṃ bhavissati. Na virodhayissatīti na viruddhaṃ padaṃ bhavissati. Aggapadasminti desanāya. Desanā hi idha aggapadanti adhippetā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૧. ખેમાસુત્તં • 1. Khemāsuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૧. ખેમાસુત્તવણ્ણના • 1. Khemāsuttavaṇṇanā
