| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૧૦. અબ્યાકતસંયુત્તં
10. Abyākatasaṃyuttaṃ
૧. ખેમાસુત્તવણ્ણના
1. Khemāsuttavaṇṇanā
૪૧૦. બિમ્બિસારસ્સ ઉપાસિકાતિ બિમ્બિસારસ્સ ઓરોધભૂતા ઉપાસિકા. પણ્ડિચ્ચં સિક્ખિતભાવેન. વેય્યત્તિયં વિસારદભાવેન. વિસારદા નામ તિહેતુકપટિસન્ધિસિદ્ધસાભાવિકપઞ્ઞા, તાય સમન્નાગતા.
410.Bimbisārassaupāsikāti bimbisārassa orodhabhūtā upāsikā. Paṇḍiccaṃ sikkhitabhāvena. Veyyattiyaṃ visāradabhāvena. Visāradā nāma tihetukapaṭisandhisiddhasābhāvikapaññā, tāya samannāgatā.
અચ્છિદ્દકગણનાય કુસલોતિ નવન્તગણનાય કુસલો. અઙ્ગુલિમુદ્દાય ગણનાય કુસલોતિ અઙ્ગુલિકાય એવ ગણનાય કુસલો સેય્યથાપિ પાદસિકા. પિણ્ડગણનાયાતિ સઙ્કલનપટુપ્પન્નકારિનો પિણ્ડવસેન ગણના. તથાગતોતિ ખીણાસવો, તથાગતં સન્ધાય પુચ્છતીતિ ખીણાસવોતિ ચસ્સ અરહત્તફલવસિભાવિતખન્ધે ઉપાદાય અયં પઞ્ઞત્તિ હોતિ. તેસુ ખન્ધેસુ સતિ ખીણાસવા સત્તસઙ્ખાતા હોન્તીતિ વોહારેન પઞ્ઞપેતું સક્કા ભવેય્ય, અસન્તેસુ ન સક્કા, તસ્મા પરં મરણાતિ વુત્તત્તા તેસં અભાવા ‘‘અબ્યાકતમેત’’ન્તિ વુત્તં. યદિ એવં તેસં અભાવતો ‘‘ન હોતિ તથાગતો પરં મરણા’’તિ પુટ્ઠાય ‘‘આમા’’તિ પટિજાનિતબ્બા સિયા, તં પન સત્તસઙ્ખાતસ્સ પુચ્છિતત્તા ન પટિઞ્ઞાતન્તિ દટ્ઠબ્બં. યેન રૂપેનાતિ સત્તતથાગતે વુત્તરૂપં સબ્બઞ્ઞુતથાગતે પટિક્ખિપિતું ‘‘તં રૂપ’’ન્તિઆદિ વુત્તં. યં ઉપાદાયાતિ યં ખન્ધપઞ્ચકં ઉપાદાય. તદભાવેનાતિ તસ્સ ખન્ધપઞ્ચકસ્સ અભાવેન. તસ્સા પઞ્ઞત્તિયાતિ સત્તપઞ્ઞત્તિયા અભાવં. નિરુદ્ધં ન નિદસ્સેતિ.
Acchiddakagaṇanāya kusaloti navantagaṇanāya kusalo. Aṅgulimuddāya gaṇanāya kusaloti aṅgulikāya eva gaṇanāya kusalo seyyathāpi pādasikā. Piṇḍagaṇanāyāti saṅkalanapaṭuppannakārino piṇḍavasena gaṇanā. Tathāgatoti khīṇāsavo, tathāgataṃ sandhāya pucchatīti khīṇāsavoti cassa arahattaphalavasibhāvitakhandhe upādāya ayaṃ paññatti hoti. Tesu khandhesu sati khīṇāsavā sattasaṅkhātā hontīti vohārena paññapetuṃ sakkā bhaveyya, asantesu na sakkā, tasmā paraṃ maraṇāti vuttattā tesaṃ abhāvā ‘‘abyākatameta’’nti vuttaṃ. Yadi evaṃ tesaṃ abhāvato ‘‘na hoti tathāgato paraṃ maraṇā’’ti puṭṭhāya ‘‘āmā’’ti paṭijānitabbā siyā, taṃ pana sattasaṅkhātassa pucchitattā na paṭiññātanti daṭṭhabbaṃ. Yena rūpenāti sattatathāgate vuttarūpaṃ sabbaññutathāgate paṭikkhipituṃ ‘‘taṃ rūpa’’ntiādi vuttaṃ. Yaṃ upādāyāti yaṃ khandhapañcakaṃ upādāya. Tadabhāvenāti tassa khandhapañcakassa abhāvena. Tassā paññattiyāti sattapaññattiyā abhāvaṃ. Niruddhaṃ na nidasseti.
ખેમાય થેરિયા વુત્તં પઠમં સુત્તં ભગવતો સેટ્ઠત્થદીપનતો અગ્ગપદાવચરંવ હોતીતિ વુત્તં ‘‘અગ્ગપદસ્મિ’’ન્તિ.
Khemāya theriyā vuttaṃ paṭhamaṃ suttaṃ bhagavato seṭṭhatthadīpanato aggapadāvacaraṃva hotīti vuttaṃ ‘‘aggapadasmi’’nti.
ખેમાસુત્તવણ્ણના નિટ્ઠિતા.
Khemāsuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૧. ખેમાસુત્તં • 1. Khemāsuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧. ખેમાસુત્તવણ્ણના • 1. Khemāsuttavaṇṇanā
