| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. கி²ப்பனிஸந்திஸுத்தங்
9. Khippanisantisuttaṃ
169. அத² கோ² ஆயஸ்மா ஆனந்தோ³ யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மதா ஸாரிபுத்தேன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் 1 வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஆனந்தோ³ ஆயஸ்மந்தங் ஸாரிபுத்தங் ஏதத³வோச –
169. Atha kho āyasmā ānando yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ 2 vītisāretvā ekamantaṃ nisīdi. Ekamantaṃ nisinno kho āyasmā ānando āyasmantaṃ sāriputtaṃ etadavoca –
‘‘கித்தாவதா நு கோ², ஆவுஸோ ஸாரிபுத்த, பி⁴க்கு² கி²ப்பனிஸந்தி ச ஹோதி, குஸலேஸு த⁴ம்மேஸு ஸுக்³க³ஹிதக்³கா³ஹீ ச, ப³ஹுஞ்ச க³ண்ஹாதி, க³ஹிதஞ்சஸ்ஸ நப்பமுஸ்ஸதீ’’தி? ‘‘ஆயஸ்மா கோ² ஆனந்தோ³ ப³ஹுஸ்ஸுதோ. படிபா⁴து ஆயஸ்மந்தங்யேவ ஆனந்த³’’ந்தி. ‘‘தேனஹாவுஸோ ஸாரிபுத்த, ஸுணாஹி, ஸாது⁴கங் மனஸி கரோஹி; பா⁴ஸிஸ்ஸாமீ’’தி. ‘‘ஏவமாவுஸோ’’தி கோ² ஆயஸ்மா ஸாரிபுத்தோ ஆயஸ்மதோ ஆனந்த³ஸ்ஸ பச்சஸ்ஸோஸி. ஆயஸ்மா ஆனந்தோ³ ஏதத³வோச –
‘‘Kittāvatā nu kho, āvuso sāriputta, bhikkhu khippanisanti ca hoti, kusalesu dhammesu suggahitaggāhī ca, bahuñca gaṇhāti, gahitañcassa nappamussatī’’ti? ‘‘Āyasmā kho ānando bahussuto. Paṭibhātu āyasmantaṃyeva ānanda’’nti. ‘‘Tenahāvuso sāriputta, suṇāhi, sādhukaṃ manasi karohi; bhāsissāmī’’ti. ‘‘Evamāvuso’’ti kho āyasmā sāriputto āyasmato ānandassa paccassosi. Āyasmā ānando etadavoca –
‘‘இதா⁴வுஸோ ஸாரிபுத்த, பி⁴க்கு² அத்த²குஸலோ ச ஹோதி, த⁴ம்மகுஸலோ ச, ப்³யஞ்ஜனகுஸலோ ச , நிருத்திகுஸலோ ச, புப்³பா³பரகுஸலோ ச. எத்தாவதா கோ² , ஆவுஸோ ஸாரிபுத்த, பி⁴க்கு² கி²ப்பனிஸந்தி ச ஹோதி குஸலேஸு த⁴ம்மேஸு, ஸுக்³க³ஹிதக்³கா³ஹீ ச, ப³ஹுஞ்ச க³ண்ஹாதி, க³ஹிதஞ்சஸ்ஸ நப்பமுஸ்ஸதீ’’தி. ‘‘அச்ச²ரியங், ஆவுஸோ! அப்³பு⁴தங், ஆவுஸோ!! யாவ ஸுபா⁴ஸிதங் சித³ங் ஆயஸ்மதா ஆனந்தே³ன. இமேஹி ச மயங் பஞ்சஹி த⁴ம்மேஹி ஸமன்னாக³தங் ஆயஸ்மந்தங் ஆனந்த³ங் தா⁴ரேம – ‘ஆயஸ்மா ஆனந்தோ³ அத்த²குஸலோ த⁴ம்மகுஸலோ ப்³யஞ்ஜனகுஸலோ நிருத்திகுஸலோ புப்³பா³பரகுஸலோ’’’தி. நவமங்.
‘‘Idhāvuso sāriputta, bhikkhu atthakusalo ca hoti, dhammakusalo ca, byañjanakusalo ca , niruttikusalo ca, pubbāparakusalo ca. Ettāvatā kho , āvuso sāriputta, bhikkhu khippanisanti ca hoti kusalesu dhammesu, suggahitaggāhī ca, bahuñca gaṇhāti, gahitañcassa nappamussatī’’ti. ‘‘Acchariyaṃ, āvuso! Abbhutaṃ, āvuso!! Yāva subhāsitaṃ cidaṃ āyasmatā ānandena. Imehi ca mayaṃ pañcahi dhammehi samannāgataṃ āyasmantaṃ ānandaṃ dhārema – ‘āyasmā ānando atthakusalo dhammakusalo byañjanakusalo niruttikusalo pubbāparakusalo’’’ti. Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. கி²ப்பனிஸந்திஸுத்தவண்ணனா • 9. Khippanisantisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7-9. சோத³னாஸுத்தாதி³வண்ணனா • 7-9. Codanāsuttādivaṇṇanā
