| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૧૯. એકૂનવીસતિમવગ્ગો
19. Ekūnavīsatimavaggo
(૧૮૬) ૧. કિલેસજહનકથા
(186) 1. Kilesajahanakathā
૮૨૮. અતીતે કિલેસે જહતીતિ? આમન્તા. નિરુદ્ધં નિરોધેતિ, વિગતં વિગમેતિ, ખીણં ખેપેતિ, અત્થઙ્ગતં અત્થઙ્ગમેતિ, અબ્ભત્થઙ્ગતં અબ્ભત્થઙ્ગમેતીતિ? ન હેવં વત્તબ્બે…પે॰… અતીતે કિલેસે જહતીતિ? આમન્તા. નનુ અતીતં નિરુદ્ધન્તિ? આમન્તા. હઞ્ચિ અતીતં નિરુદ્ધં , નો ચ વત રે વત્તબ્બે – ‘‘અતીતે કિલેસે જહતી’’તિ. અતીતે કિલેસે જહતીતિ? આમન્તા. નનુ અતીતં નત્થીતિ? આમન્તા. હઞ્ચિ અતીતં નત્થિ, નો ચ વત રે વત્તબ્બે – ‘‘અતીતે કિલેસે જહતી’’તિ.
828. Atīte kilese jahatīti? Āmantā. Niruddhaṃ nirodheti, vigataṃ vigameti, khīṇaṃ khepeti, atthaṅgataṃ atthaṅgameti, abbhatthaṅgataṃ abbhatthaṅgametīti? Na hevaṃ vattabbe…pe… atīte kilese jahatīti? Āmantā. Nanu atītaṃ niruddhanti? Āmantā. Hañci atītaṃ niruddhaṃ , no ca vata re vattabbe – ‘‘atīte kilese jahatī’’ti. Atīte kilese jahatīti? Āmantā. Nanu atītaṃ natthīti? Āmantā. Hañci atītaṃ natthi, no ca vata re vattabbe – ‘‘atīte kilese jahatī’’ti.
૮૨૯. અનાગતે કિલેસે જહતીતિ? આમન્તા. અજાતં અજનેતિ, અસઞ્જાતં અસઞ્જનેતિ, અનિબ્બત્તં અનિબ્બત્તેતિ, અપાતુભૂતં અપાતુભાવેતીતિ? ન હેવં વત્તબ્બે…પે॰… અનાગતે કિલેસે જહતીતિ? આમન્તા. નનુ અનાગતં અજાતન્તિ? આમન્તા. હઞ્ચિ અનાગતં અજાતં, નો ચ વત રે વત્તબ્બે – ‘‘અનાગતે કિલેસે જહતી’’તિ . અનાગતે કિલેસે જહતીતિ? આમન્તા. નનુ અનાગતં નત્થીતિ? આમન્તા. હઞ્ચિ અનાગતં નત્થિ, નો ચ વત રે વત્તબ્બે – ‘‘અનાગતે કિલેસે જહતી’’તિ.
829. Anāgate kilese jahatīti? Āmantā. Ajātaṃ ajaneti, asañjātaṃ asañjaneti, anibbattaṃ anibbatteti, apātubhūtaṃ apātubhāvetīti? Na hevaṃ vattabbe…pe… anāgate kilese jahatīti? Āmantā. Nanu anāgataṃ ajātanti? Āmantā. Hañci anāgataṃ ajātaṃ, no ca vata re vattabbe – ‘‘anāgate kilese jahatī’’ti . Anāgate kilese jahatīti? Āmantā. Nanu anāgataṃ natthīti? Āmantā. Hañci anāgataṃ natthi, no ca vata re vattabbe – ‘‘anāgate kilese jahatī’’ti.
૮૩૦. પચ્ચુપ્પન્ને કિલેસે જહતીતિ? આમન્તા. રત્તો રાગં જહતિ, દુટ્ઠો દોસં જહતિ, મૂળ્હો મોહં જહતિ, કિલિટ્ઠો કિલેસે જહતીતિ? ન હેવં વત્તબ્બે…પે॰… રાગેન રાગં જહતિ, દોસેન દોસં જહતિ, મોહેન મોહં જહતિ, કિલેસેહિ કિલેસે જહતીતિ? ન હેવં વત્તબ્બે…પે॰….
830. Paccuppanne kilese jahatīti? Āmantā. Ratto rāgaṃ jahati, duṭṭho dosaṃ jahati, mūḷho mohaṃ jahati, kiliṭṭho kilese jahatīti? Na hevaṃ vattabbe…pe… rāgena rāgaṃ jahati, dosena dosaṃ jahati, mohena mohaṃ jahati, kilesehi kilese jahatīti? Na hevaṃ vattabbe…pe….
રાગો ચિત્તસમ્પયુત્તો, મગ્ગો ચિત્તસમ્પયુત્તોતિ? આમન્તા. દ્વિન્નં ચિત્તાનં સમોધાનં હોતીતિ? ન હેવં વત્તબ્બે…પે॰….
Rāgo cittasampayutto, maggo cittasampayuttoti? Āmantā. Dvinnaṃ cittānaṃ samodhānaṃ hotīti? Na hevaṃ vattabbe…pe….
રાગો અકુસલો, મગ્ગો કુસલોતિ? આમન્તા. કુસલાકુસલા સાવજ્જાનવજ્જા હીનપણીતા કણ્હસુક્કસપ્પટિભાગા ધમ્મા સમ્મુખીભાવં આગચ્છન્તીતિ? ન હેવં વત્તબ્બે…પે॰….
Rāgo akusalo, maggo kusaloti? Āmantā. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Na hevaṃ vattabbe…pe….
કુસલાકુસલા સાવજ્જાનવજ્જા હીનપણીતા કણ્હસુક્કસપ્પટિભાગા ધમ્મા સમ્મુખીભાવં આગચ્છન્તીતિ? આમન્તા. નનુ વુત્તં ભગવતા – ‘‘ચત્તારિમાનિ, ભિક્ખવે, સુવિદૂરવિદૂરાનિ! કતમાનિ ચત્તારિ? નભઞ્ચ, ભિક્ખવે, પથવી ચ – ઇદં પઠમં સુવિદૂરવિદૂરં…પે॰… તસ્મા સતં ધમ્મો અસબ્ભિ આરકા’’તિ. અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘કુસલાકુસલા…પે॰… સમ્મુખીભાવં આગચ્છન્તી’’તિ.
Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Āmantā. Nanu vuttaṃ bhagavatā – ‘‘cattārimāni, bhikkhave, suvidūravidūrāni! Katamāni cattāri? Nabhañca, bhikkhave, pathavī ca – idaṃ paṭhamaṃ suvidūravidūraṃ…pe… tasmā sataṃ dhammo asabbhi ārakā’’ti. Attheva suttantoti? Āmantā. Tena hi na vattabbaṃ – ‘‘kusalākusalā…pe… sammukhībhāvaṃ āgacchantī’’ti.
૮૩૧. ન વત્તબ્બં – ‘‘અતીતે કિલેસે જહતિ, અનાગતે કિલેસે જહતિ, પચ્ચુપ્પન્ને કિલેસે જહતી’’તિ? આમન્તા. નત્થિ કિલેસે જહતીતિ ? ન હેવં વત્તબ્બે…પે॰… તેન હિ અતીતે કિલેસે જહતિ, અનાગતે કિલેસે જહતિ, પચ્ચુપ્પન્ને કિલેસે જહતીતિ.
831. Na vattabbaṃ – ‘‘atīte kilese jahati, anāgate kilese jahati, paccuppanne kilese jahatī’’ti? Āmantā. Natthi kilese jahatīti ? Na hevaṃ vattabbe…pe… tena hi atīte kilese jahati, anāgate kilese jahati, paccuppanne kilese jahatīti.
કિલેસજહનકથા નિટ્ઠિતા.
Kilesajahanakathā niṭṭhitā.
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૧. કિલેસપજહનકથાવણ્ણના • 1. Kilesapajahanakathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-મૂલટીકા • Pañcapakaraṇa-mūlaṭīkā / ૧. કિલેસપજહનકથાવણ્ણના • 1. Kilesapajahanakathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-અનુટીકા • Pañcapakaraṇa-anuṭīkā / ૧. કિલેસપજહનકથાવણ્ણના • 1. Kilesapajahanakathāvaṇṇanā
