| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. கிங்த³த³ஸுத்தவண்ணனா
2. Kiṃdadasuttavaṇṇanā
42. த்³வே தீணி ப⁴த்தானி அபு⁴த்வாதி த்³வே தயோ வாரே ப⁴த்தானி அபு⁴ஞ்ஜித்வா. உட்டா²துங் ந ஸக்கோதீதி உட்டா²தும்பி ந ஸக்கோதீ, பகே³வ அஞ்ஞங் ஸரீரேன காதப்³ப³கிச்சங் து³ப்³ப³லபா⁴வதோ. து³ப்³ப³லோபி ஹுத்வாதி பு⁴ஞ்ஜனதோ புப்³பே³ து³ப்³ப³லோ ஹுத்வா ப³லஸம்பன்னோ ஹோதி. ஏவங் ப்³யதிரேகதோ அன்வயதோ ச ஆஹாரஸ்ஸ ஸரீரே ப³லவதங் ஆஹ. யஸ்மா அன்னதோ³ தா³யகோ படிக்³கா³ஹகஸ்ஸ ப³லதோ³ ஹோதி, தஸ்மா ஸோ ஆயதிங் அத்தனோ ஸரீரே ப³லதோ³ அவினாஸவஸேன ப³லஸ்ஸ ரக்க²கோ ச ஹோதி. தேனாஹ ப⁴க³வா – ‘‘ப³லங் கோ² பன த³த்வா ப³லஸ்ஸ பா⁴கீ³ ஹோதீ’’தி (அ॰ நி॰ 5.37) ஸேஸபதே³ஸுபி ஏஸேவ நயோ. ஸுரூபோபீதி அபி⁴ரூபோபி. விரூபோ ஹோதீதி பீ³ப⁴ச்ச²ரூபோ கோபீனஸ்ஸ அச்ச²ன்னத்தா. இத³ஞ்ச யானந்தி ஸாமஞ்ஞதோ வுத்தங். உபாஹனாதி ஸரூபதோ த³ஸ்ஸேதி. அது³க்க²ப்பத்தோ ஹுத்வா யாதி வத்ததி ஏதேனாதி யானந்தி ச²த்தாதீ³னம்பி யானபா⁴வோ வுத்தோ. தேனாஹ ‘‘யானதோ³ ஸுக²தோ³ ஹோதீ’’தி. சக்கு²தோ³ நாம ஹோதி சக்கு²னா காதப்³ப³கிச்சே ஸஹகாரீகாரணபா⁴வதோ தீ³பஸ்ஸ.
42.Dve tīṇi bhattāni abhutvāti dve tayo vāre bhattāni abhuñjitvā. Uṭṭhātuṃ na sakkotīti uṭṭhātumpi na sakkotī, pageva aññaṃ sarīrena kātabbakiccaṃ dubbalabhāvato. Dubbalopi hutvāti bhuñjanato pubbe dubbalo hutvā balasampanno hoti. Evaṃ byatirekato anvayato ca āhārassa sarīre balavataṃ āha. Yasmā annado dāyako paṭiggāhakassa balado hoti, tasmā so āyatiṃ attano sarīre balado avināsavasena balassa rakkhako ca hoti. Tenāha bhagavā – ‘‘balaṃ kho pana datvā balassa bhāgī hotī’’ti (a. ni. 5.37) sesapadesupi eseva nayo. Surūpopīti abhirūpopi. Virūpo hotīti bībhaccharūpo kopīnassa acchannattā. Idañca yānanti sāmaññato vuttaṃ. Upāhanāti sarūpato dasseti. Adukkhappatto hutvā yāti vattati etenāti yānanti chattādīnampi yānabhāvo vutto. Tenāha ‘‘yānado sukhado hotī’’ti. Cakkhudo nāma hoti cakkhunā kātabbakicce sahakārīkāraṇabhāvato dīpassa.
‘‘ஸப்³பே³ஸங்யேவ ப³லாதீ³னங் தா³யகோ ஹோதீ’’தி ஸங்கே²பதோ வுத்தங் அத்த²ங் வித்தா²ரதோ த³ஸ்ஸேதுங் ‘‘த்³வே தயோ கா³மே’’திஆதி³ வுத்தங். நிஸஜ்ஜாதி³வஸேன பதிஸ்ஸயிதப்³ப³தோ பதிஸ்ஸயோ, விஹாரோ. பக்கி²த்தங் விய ஹோதி பரிஸ்ஸமஸ்ஸ வினோதி³தத்தா. ப³ஹி விசரந்தஸ்ஸாதி பதிஸ்ஸயங் அலபி⁴த்வா ப³ஹி விவடங்க³ணே விசரந்தஸ்ஸ. ஜா²யதீதி ஜா²யந்தங் ஹோதி, கிலமதீதி அத்தோ². ஸீதுண்ஹாதி³விரோதி⁴பச்சயவஸேன ஸஸந்தானே விஸபா⁴க³ஸந்ததி, தப்³பி³பரியாயதோ ஸபா⁴க³ஸந்ததி வேதி³தப்³பா³. ஸுக²ங் நாம து³க்க²பச்சயபரிஹாரதோ ஸுக²பச்சயுப்பன்னதோ ச ஹோதி, தது³ப⁴யங் பதிஸ்ஸயவஸேன லப⁴தீதி த³ஸ்ஸெந்தோ ‘‘ப³ஹி விசரந்தஸ்ஸ பாதே³’’திஆதி³மாஹ. த⁴ம்மபீதிஸுக²ந்தி த⁴ம்மபச்சவெக்க²ணேன உப்பன்னபீதிஸுக²ங். உபஸமஸுக²ந்தி கிலேஸானங் வூபஸமேன பவத்தஸுக²ங். நிவாதங் பிஹிதவாதபானங் பதிஸ்ஸயங் பவிஸித்வா த்³வாரங் பிதா⁴ய டி²தஸ்ஸ அந்த⁴காரோ ஹோதீதி வுத்தங் ‘‘கூபே ஓதிண்ணோ விய ஹோதீ’’தி. தேனாஹ ‘‘மஞ்சபீடா²தீ³னி ந பஞ்ஞாயந்தீ’’தி. தயித³ங் ப³ஹிஸமாபன்னபரிஸ்ஸமதோ³ஸேன, ந ச பதிஸ்ஸயதோ³ஸேன. தேனாஹ ‘‘முஹுத்த’’ந்திஆதி³.
‘‘Sabbesaṃyeva balādīnaṃ dāyako hotī’’ti saṅkhepato vuttaṃ atthaṃ vitthārato dassetuṃ ‘‘dve tayo gāme’’tiādi vuttaṃ. Nisajjādivasena patissayitabbato patissayo, vihāro. Pakkhittaṃ viya hoti parissamassa vinoditattā. Bahi vicarantassāti patissayaṃ alabhitvā bahi vivaṭaṅgaṇe vicarantassa. Jhāyatīti jhāyantaṃ hoti, kilamatīti attho. Sītuṇhādivirodhipaccayavasena sasantāne visabhāgasantati, tabbipariyāyato sabhāgasantati veditabbā. Sukhaṃ nāma dukkhapaccayaparihārato sukhapaccayuppannato ca hoti, tadubhayaṃ patissayavasena labhatīti dassento ‘‘bahi vicarantassa pāde’’tiādimāha. Dhammapītisukhanti dhammapaccavekkhaṇena uppannapītisukhaṃ. Upasamasukhanti kilesānaṃ vūpasamena pavattasukhaṃ. Nivātaṃ pihitavātapānaṃ patissayaṃ pavisitvā dvāraṃ pidhāya ṭhitassa andhakāro hotīti vuttaṃ ‘‘kūpe otiṇṇo viya hotī’’ti. Tenāha ‘‘mañcapīṭhādīni na paññāyantī’’ti. Tayidaṃ bahisamāpannaparissamadosena, na ca patissayadosena. Tenāha ‘‘muhutta’’ntiādi.
ந மரதி ஏதேனாதி அமரணங், நிப்³பா³னாதி⁴க³மாத³யோ. தஸ்ஸ தா³னங் த⁴ம்மூபதே³ஸோ, தங் தே³தி. தேனாஹ ‘‘யோ த⁴ம்மங் அனுஸாஸதீ’’தி. தயித³ங் த⁴ம்மானுஸாஸனங் கத²ங் ஹோதீதி ஆஹ ‘‘அட்ட²கத²’’ந்திஆதி³. அட்ட²கத²ங் கதே²தீதி அவிவடபாட²ஸ்ஸ பாளியா அத்த²ஸங்வண்ணனங் கரோதீதி அத்தோ². அனதீ⁴தினோ பன பாளிங் வாசேதி. தத்த² தத்த² க³தட்டா²னே புச்சி²தபஞ்ஹங் விஸ்ஸஜ்ஜேதி, அயங் தாவ க³ந்த²து⁴ரோ, படிபத்திவாஸது⁴ரே பன கம்மட்டா²னங் ஆசிக்க²தி, உப⁴யேஸம்பி த⁴ம்மஸ்ஸவனங் கரோதி. ஸப்³ப³தா³னந்தி யதா²வுத்தஆமிஸதா³னங் அப⁴யதா³னங். த⁴ம்மதா³னந்தி த⁴ம்மதே³ஸனா. த⁴ம்மரதீதி ஸமத²விபஸ்ஸனாத⁴ம்மே அபி⁴ரதி. த⁴ம்மரஸோதி ஸத்³த⁴ம்மஸன்னிஸ்ஸயங் பீதிபாமோஜ்ஜங்.
Na marati etenāti amaraṇaṃ, nibbānādhigamādayo. Tassa dānaṃ dhammūpadeso, taṃ deti. Tenāha ‘‘yo dhammaṃ anusāsatī’’ti. Tayidaṃ dhammānusāsanaṃ kathaṃ hotīti āha ‘‘aṭṭhakatha’’ntiādi. Aṭṭhakathaṃ kathetīti avivaṭapāṭhassa pāḷiyā atthasaṃvaṇṇanaṃ karotīti attho. Anadhītino pana pāḷiṃ vāceti. Tattha tattha gataṭṭhāne pucchitapañhaṃ vissajjeti, ayaṃ tāva ganthadhuro, paṭipattivāsadhure pana kammaṭṭhānaṃ ācikkhati, ubhayesampi dhammassavanaṃ karoti. Sabbadānanti yathāvuttaāmisadānaṃ abhayadānaṃ. Dhammadānanti dhammadesanā. Dhammaratīti samathavipassanādhamme abhirati. Dhammarasoti saddhammasannissayaṃ pītipāmojjaṃ.
கிங்த³த³ஸுத்தவண்ணனா நிட்டி²தா.
Kiṃdadasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. கிங்த³த³ஸுத்தங் • 2. Kiṃdadasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. கிங்த³த³ஸுத்தவண்ணனா • 2. Kiṃdadasuttavaṇṇanā
