| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
3. கிங்தி³ட்டி²கஸுத்தங்
3. Kiṃdiṭṭhikasuttaṃ
93. ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² அனாத²பிண்டி³கோ க³ஹபதி தி³வா தி³வஸ்ஸ ஸாவத்தி²யா நிக்க²மி ப⁴க³வந்தங் த³ஸ்ஸனாய. அத² கோ² அனாத²பிண்டி³கஸ்ஸ க³ஹபதிஸ்ஸ ஏதத³ஹோஸி – ‘‘அகாலோ கோ² தாவ ப⁴க³வந்தங் த³ஸ்ஸனாய. படிஸல்லீனோ ப⁴க³வா. மனோபா⁴வனீயானம்பி பி⁴க்கூ²னங் அகாலோ த³ஸ்ஸனாய. படிஸல்லீனா மனோபா⁴வனீயா பி⁴க்கூ². யங்னூனாஹங் யேன அஞ்ஞதித்தி²யானங் பரிப்³பா³ஜகானங் ஆராமோ தேனுபஸங்கமெய்ய’’ந்தி.
93. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho anāthapiṇḍiko gahapati divā divassa sāvatthiyā nikkhami bhagavantaṃ dassanāya. Atha kho anāthapiṇḍikassa gahapatissa etadahosi – ‘‘akālo kho tāva bhagavantaṃ dassanāya. Paṭisallīno bhagavā. Manobhāvanīyānampi bhikkhūnaṃ akālo dassanāya. Paṭisallīnā manobhāvanīyā bhikkhū. Yaṃnūnāhaṃ yena aññatitthiyānaṃ paribbājakānaṃ ārāmo tenupasaṅkameyya’’nti.
அத² கோ² அனாத²பிண்டி³கோ க³ஹபதி யேன அஞ்ஞதித்தி²யானங் பரிப்³பா³ஜகானங் ஆராமோ தேனுபஸங்கமி. தேன கோ² பன ஸமயேன அஞ்ஞதித்தி²யா பரிப்³பா³ஜகா ஸங்க³ம்ம ஸமாக³ம்ம உன்னாதி³னோ உச்சாஸத்³த³மஹாஸத்³தா³ அனேகவிஹிதங் திரச்சா²னகத²ங் கதெ²ந்தா நிஸின்னா ஹொந்தி. அத்³த³ஸங்ஸு கோ² தே அஞ்ஞதித்தி²யா பரிப்³பா³ஜகா அனாத²பிண்டி³கங் க³ஹபதிங் தூ³ரதோவ ஆக³ச்ச²ந்தங். தி³ஸ்வான அஞ்ஞமஞ்ஞங் ஸண்டா²பேஸுங் – ‘‘அப்பஸத்³தா³ பொ⁴ந்தோ ஹொந்து, மா பொ⁴ந்தோ ஸத்³த³மகத்த². அயங் அனாத²பிண்டி³கோ க³ஹபதி ஆராமங் ஆக³ச்ச²தி ஸமணஸ்ஸ கோ³தமஸ்ஸ ஸாவகோ. யாவதா கோ² பன ஸமணஸ்ஸ கோ³தமஸ்ஸ ஸாவகா கி³ஹீ ஓதா³தவஸனா ஸாவத்தி²யங் படிவஸந்தி, அயங் தேஸங் அஞ்ஞதரோ அனாத²பிண்டி³கோ க³ஹபதி. அப்பஸத்³த³காமா கோ² பன தே ஆயஸ்மந்தோ அப்பஸத்³த³வினீதா அப்பஸத்³த³ஸ்ஸ வண்ணவாதி³னோ. அப்பேவ நாம அப்பஸத்³த³ங் பரிஸங் விதி³த்வா உபஸங்கமிதப்³ப³ங் மஞ்ஞெய்யா’’தி.
Atha kho anāthapiṇḍiko gahapati yena aññatitthiyānaṃ paribbājakānaṃ ārāmo tenupasaṅkami. Tena kho pana samayena aññatitthiyā paribbājakā saṅgamma samāgamma unnādino uccāsaddamahāsaddā anekavihitaṃ tiracchānakathaṃ kathentā nisinnā honti. Addasaṃsu kho te aññatitthiyā paribbājakā anāthapiṇḍikaṃ gahapatiṃ dūratova āgacchantaṃ. Disvāna aññamaññaṃ saṇṭhāpesuṃ – ‘‘appasaddā bhonto hontu, mā bhonto saddamakattha. Ayaṃ anāthapiṇḍiko gahapati ārāmaṃ āgacchati samaṇassa gotamassa sāvako. Yāvatā kho pana samaṇassa gotamassa sāvakā gihī odātavasanā sāvatthiyaṃ paṭivasanti, ayaṃ tesaṃ aññataro anāthapiṇḍiko gahapati. Appasaddakāmā kho pana te āyasmanto appasaddavinītā appasaddassa vaṇṇavādino. Appeva nāma appasaddaṃ parisaṃ viditvā upasaṅkamitabbaṃ maññeyyā’’ti.
அத² கோ² தே அஞ்ஞதித்தி²யா பரிப்³பா³ஜகா துண்ஹீ அஹேஸுங். அத² கோ² அனாத²பிண்டி³கோ க³ஹபதி யேன தே அஞ்ஞதித்தி²யா பரிப்³பா³ஜகா தேனுபஸங்கமி; உபஸங்கமித்வா தேஹி அஞ்ஞதித்தி²யேஹி பரிப்³பா³ஜகேஹி ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னங் கோ² அனாத²பிண்டி³கங் க³ஹபதிங் தே அஞ்ஞதித்தி²யா பரிப்³பா³ஜகா ஏதத³வோசுங் – ‘‘வதே³ஹி, க³ஹபதி, கிங்தி³ட்டி²கோ ஸமணோ கோ³தமோ’’தி? ‘‘ந கோ² அஹங், ப⁴ந்தே, ப⁴க³வதோ ஸப்³ப³ங் தி³ட்டி²ங் ஜானாமீ’’தி.
Atha kho te aññatitthiyā paribbājakā tuṇhī ahesuṃ. Atha kho anāthapiṇḍiko gahapati yena te aññatitthiyā paribbājakā tenupasaṅkami; upasaṅkamitvā tehi aññatitthiyehi paribbājakehi saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinnaṃ kho anāthapiṇḍikaṃ gahapatiṃ te aññatitthiyā paribbājakā etadavocuṃ – ‘‘vadehi, gahapati, kiṃdiṭṭhiko samaṇo gotamo’’ti? ‘‘Na kho ahaṃ, bhante, bhagavato sabbaṃ diṭṭhiṃ jānāmī’’ti.
‘‘இதி கிர த்வங், க³ஹபதி, ந ஸமணஸ்ஸ கோ³தமஸ்ஸ ஸப்³ப³ங் தி³ட்டி²ங் ஜானாஸி; வதே³ஹி, க³ஹபதி, கிங்தி³ட்டி²கா பி⁴க்கூ²’’தி? ‘‘பி⁴க்கூ²னம்பி கோ² அஹங், ப⁴ந்தே, ந ஸப்³ப³ங் தி³ட்டி²ங் ஜானாமீ’’தி.
‘‘Iti kira tvaṃ, gahapati, na samaṇassa gotamassa sabbaṃ diṭṭhiṃ jānāsi; vadehi, gahapati, kiṃdiṭṭhikā bhikkhū’’ti? ‘‘Bhikkhūnampi kho ahaṃ, bhante, na sabbaṃ diṭṭhiṃ jānāmī’’ti.
‘‘இதி கிர த்வங், க³ஹபதி, ந ஸமணஸ்ஸ கோ³தமஸ்ஸ ஸப்³ப³ங் தி³ட்டி²ங் ஜானாஸி நபி பி⁴க்கூ²னங் ஸப்³ப³ங் தி³ட்டி²ங் ஜானாஸி; வதே³ஹி, க³ஹபதி, கிங்தி³ட்டி²கோஸி துவ’’ந்தி? ‘‘ஏதங் கோ², ப⁴ந்தே, அம்ஹேஹி ந து³க்கரங் ப்³யாகாதுங் யங்தி³ட்டி²கா மயங். இங்க⁴ தாவ ஆயஸ்மந்தோ யதா²ஸகானி தி³ட்டி²க³தானி ப்³யாகரொந்து, பச்சா²பேதங் அம்ஹேஹி ந து³க்கரங் ப⁴விஸ்ஸதி ப்³யாகாதுங் யங்தி³ட்டி²கா மய’’ந்தி.
‘‘Iti kira tvaṃ, gahapati, na samaṇassa gotamassa sabbaṃ diṭṭhiṃ jānāsi napi bhikkhūnaṃ sabbaṃ diṭṭhiṃ jānāsi; vadehi, gahapati, kiṃdiṭṭhikosi tuva’’nti? ‘‘Etaṃ kho, bhante, amhehi na dukkaraṃ byākātuṃ yaṃdiṭṭhikā mayaṃ. Iṅgha tāva āyasmanto yathāsakāni diṭṭhigatāni byākarontu, pacchāpetaṃ amhehi na dukkaraṃ bhavissati byākātuṃ yaṃdiṭṭhikā maya’’nti.
ஏவங் வுத்தே அஞ்ஞதரோ பரிப்³பா³ஜகோ அனாத²பிண்டி³கங் க³ஹபதிங் ஏதத³வோச – ‘‘ஸஸ்ஸதோ லோகோ, இத³மேவ ஸச்சங் மோக⁴மஞ்ஞந்தி – ஏவங்தி³ட்டி²கோ அஹங், க³ஹபதீ’’தி.
Evaṃ vutte aññataro paribbājako anāthapiṇḍikaṃ gahapatiṃ etadavoca – ‘‘sassato loko, idameva saccaṃ moghamaññanti – evaṃdiṭṭhiko ahaṃ, gahapatī’’ti.
அஞ்ஞதரோபி கோ² பரிப்³பா³ஜகோ அனாத²பிண்டி³கங் க³ஹபதிங் ஏதத³வோச – ‘‘அஸஸ்ஸதோ லோகோ, இத³மேவ ஸச்சங் மோக⁴மஞ்ஞந்தி – ஏவங்தி³ட்டி²கோ அஹங், க³ஹபதீ’’தி.
Aññataropi kho paribbājako anāthapiṇḍikaṃ gahapatiṃ etadavoca – ‘‘asassato loko, idameva saccaṃ moghamaññanti – evaṃdiṭṭhiko ahaṃ, gahapatī’’ti.
அஞ்ஞதரோபி கோ² பரிப்³பா³ஜகோ அனாத²பிண்டி³கங் க³ஹபதிங் ஏதத³வோச – ‘‘அந்தவா லோகோ…பே॰… அனந்தவா லோகோ… தங் ஜீவங் தங் ஸரீரங்… அஞ்ஞங் ஜீவங் அஞ்ஞங் ஸரீரங்… ஹோதி ததா²க³தோ பரங் மரணா… ந ஹோதி ததா²க³தோ பரங் மரணா… ஹோதி ச ந ச ஹோதி ததா²க³தோ பரங் மரணா… நேவ ஹோதி ந ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞந்தி – ஏவங்தி³ட்டி²கோ அஹங், க³ஹபதீ’’தி.
Aññataropi kho paribbājako anāthapiṇḍikaṃ gahapatiṃ etadavoca – ‘‘antavā loko…pe… anantavā loko… taṃ jīvaṃ taṃ sarīraṃ… aññaṃ jīvaṃ aññaṃ sarīraṃ… hoti tathāgato paraṃ maraṇā… na hoti tathāgato paraṃ maraṇā… hoti ca na ca hoti tathāgato paraṃ maraṇā… neva hoti na na hoti tathāgato paraṃ maraṇā, idameva saccaṃ moghamaññanti – evaṃdiṭṭhiko ahaṃ, gahapatī’’ti.
ஏவங் வுத்தே அனாத²பிண்டி³கோ க³ஹபதி தே பரிப்³பா³ஜகே ஏதத³வோச – ‘‘ய்வாயங், ப⁴ந்தே, ஆயஸ்மா ஏவமாஹ – ‘ஸஸ்ஸதோ லோகோ, இத³மேவ ஸச்சங் மோக⁴மஞ்ஞந்தி – ஏவங்தி³ட்டி²கோ அஹங், க³ஹபதீ’தி , இமஸ்ஸ அயமாயஸ்மதோ தி³ட்டி² அத்தனோ வா அயோனிஸோமனஸிகாரஹேது உப்பன்னா பரதோகோ⁴ஸபச்சயா வா. ஸா கோ² பனேஸா தி³ட்டி² பூ⁴தா ஸங்க²தா சேதயிதா படிச்சஸமுப்பன்னா. யங் கோ² பன கிஞ்சி பூ⁴தங் ஸங்க²தங் சேதயிதங் படிச்சஸமுப்பன்னங் தத³னிச்சங். யத³னிச்சங் தங் து³க்க²ங். யங் து³க்க²ங் ததே³வேஸோ ஆயஸ்மா அல்லீனோ, ததே³வேஸோ ஆயஸ்மா அஜ்ஜு²பக³தோ.
Evaṃ vutte anāthapiṇḍiko gahapati te paribbājake etadavoca – ‘‘yvāyaṃ, bhante, āyasmā evamāha – ‘sassato loko, idameva saccaṃ moghamaññanti – evaṃdiṭṭhiko ahaṃ, gahapatī’ti , imassa ayamāyasmato diṭṭhi attano vā ayonisomanasikārahetu uppannā paratoghosapaccayā vā. Sā kho panesā diṭṭhi bhūtā saṅkhatā cetayitā paṭiccasamuppannā. Yaṃ kho pana kiñci bhūtaṃ saṅkhataṃ cetayitaṃ paṭiccasamuppannaṃ tadaniccaṃ. Yadaniccaṃ taṃ dukkhaṃ. Yaṃ dukkhaṃ tadeveso āyasmā allīno, tadeveso āyasmā ajjhupagato.
‘‘யோபாயங் , ப⁴ந்தே, ஆயஸ்மா ஏவமாஹ – ‘அஸஸ்ஸதோ லோகோ, இத³மேவ ஸச்சங் மோக⁴மஞ்ஞந்தி – ஏவங்தி³ட்டி²கோ அஹங், க³ஹபதீ’தி, இமஸ்ஸாபி அயமாயஸ்மதோ தி³ட்டி² அத்தனோ வா அயோனிஸோமனஸிகாரஹேது உப்பன்னா பரதோகோ⁴ஸபச்சயா வா. ஸா கோ² பனேஸா தி³ட்டி² பூ⁴தா ஸங்க²தா சேதயிதா படிச்சஸமுப்பன்னா. யங் கோ² பன கிஞ்சி பூ⁴தங் ஸங்க²தங் சேதயிதங் படிச்சஸமுப்பன்னங் தத³னிச்சங். யத³னிச்சங் தங் து³க்க²ங். யங் து³க்க²ங் ததே³வேஸோ ஆயஸ்மா அல்லீனோ, ததே³வேஸோ ஆயஸ்மா அஜ்ஜு²பக³தோ.
‘‘Yopāyaṃ , bhante, āyasmā evamāha – ‘asassato loko, idameva saccaṃ moghamaññanti – evaṃdiṭṭhiko ahaṃ, gahapatī’ti, imassāpi ayamāyasmato diṭṭhi attano vā ayonisomanasikārahetu uppannā paratoghosapaccayā vā. Sā kho panesā diṭṭhi bhūtā saṅkhatā cetayitā paṭiccasamuppannā. Yaṃ kho pana kiñci bhūtaṃ saṅkhataṃ cetayitaṃ paṭiccasamuppannaṃ tadaniccaṃ. Yadaniccaṃ taṃ dukkhaṃ. Yaṃ dukkhaṃ tadeveso āyasmā allīno, tadeveso āyasmā ajjhupagato.
‘‘யோபாயங், ப⁴ந்தே, ஆயஸ்மா ஏவமாஹ – ‘அந்தவா லோகோ …பே॰… அனந்தவா லோகோ… தங் ஜீவங் தங் ஸரீரங்… அஞ்ஞங் ஜீவங் அஞ்ஞங் ஸரீரங்… ஹோதி ததா²க³தோ பரங் மரணா… ந ஹோதி ததா²க³தோ பரங் மரணா… ஹோதி ச ந ச ஹோதி ததா²க³தோ பரங் மரணா… நேவ ஹோதி ந ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞந்தி – ஏவங்தி³ட்டி²கோ அஹங், க³ஹபதீ’தி, இமஸ்ஸாபி அயமாயஸ்மதோ தி³ட்டி² அத்தனோ வா அயோனிஸோமனஸிகாரஹேது உப்பன்னா பரதோகோ⁴ஸபச்சயா வா. ஸா கோ² பனேஸா தி³ட்டி² பூ⁴தா ஸங்க²தா சேதயிதா படிச்சஸமுப்பன்னா. யங் கோ² பன கிஞ்சி பூ⁴தங் ஸங்க²தங் சேதயிதங் படிச்சஸமுப்பன்னங் தத³னிச்சங். யத³னிச்சங் தங் து³க்க²ங். யங் து³க்க²ங் ததே³வேஸோ ஆயஸ்மா அல்லீனோ, ததே³வேஸோ ஆயஸ்மா அஜ்ஜு²பக³தோ’’தி.
‘‘Yopāyaṃ, bhante, āyasmā evamāha – ‘antavā loko …pe… anantavā loko… taṃ jīvaṃ taṃ sarīraṃ… aññaṃ jīvaṃ aññaṃ sarīraṃ… hoti tathāgato paraṃ maraṇā… na hoti tathāgato paraṃ maraṇā… hoti ca na ca hoti tathāgato paraṃ maraṇā… neva hoti na na hoti tathāgato paraṃ maraṇā, idameva saccaṃ moghamaññanti – evaṃdiṭṭhiko ahaṃ, gahapatī’ti, imassāpi ayamāyasmato diṭṭhi attano vā ayonisomanasikārahetu uppannā paratoghosapaccayā vā. Sā kho panesā diṭṭhi bhūtā saṅkhatā cetayitā paṭiccasamuppannā. Yaṃ kho pana kiñci bhūtaṃ saṅkhataṃ cetayitaṃ paṭiccasamuppannaṃ tadaniccaṃ. Yadaniccaṃ taṃ dukkhaṃ. Yaṃ dukkhaṃ tadeveso āyasmā allīno, tadeveso āyasmā ajjhupagato’’ti.
ஏவங் வுத்தே தே பரிப்³பா³ஜகா அனாத²பிண்டி³கங் க³ஹபதிங் ஏதத³வோசுங் – ‘‘ப்³யாகதானி கோ², க³ஹபதி, அம்ஹேஹி ஸப்³பே³ஹேவ யதா²ஸகானி தி³ட்டி²க³தானி. வதே³ஹி, க³ஹபதி, கிங்தி³ட்டி²கோஸி துவ’’ந்தி? ‘‘யங் கோ², ப⁴ந்தே, கிஞ்சி பூ⁴தங் ஸங்க²தங் சேதயிதங் படிச்சஸமுப்பன்னங் தத³னிச்சங். யத³னிச்சங் தங் து³க்க²ங். ‘யங் து³க்க²ங் தங் நேதங் மம, நேஸோஹமஸ்மி, ந மேஸோ அத்தா’தி – ஏவங்தி³ட்டி²கோ அஹங், ப⁴ந்தே’’தி.
Evaṃ vutte te paribbājakā anāthapiṇḍikaṃ gahapatiṃ etadavocuṃ – ‘‘byākatāni kho, gahapati, amhehi sabbeheva yathāsakāni diṭṭhigatāni. Vadehi, gahapati, kiṃdiṭṭhikosi tuva’’nti? ‘‘Yaṃ kho, bhante, kiñci bhūtaṃ saṅkhataṃ cetayitaṃ paṭiccasamuppannaṃ tadaniccaṃ. Yadaniccaṃ taṃ dukkhaṃ. ‘Yaṃ dukkhaṃ taṃ netaṃ mama, nesohamasmi, na meso attā’ti – evaṃdiṭṭhiko ahaṃ, bhante’’ti.
‘‘யங் கோ², க³ஹபதி, கிஞ்சி பூ⁴தங் ஸங்க²தங் சேதயிதங் படிச்சஸமுப்பன்னங் தத³னிச்சங். யத³னிச்சங் தங் து³க்க²ங். யங் து³க்க²ங் ததே³வ த்வங், க³ஹபதி, அல்லீனோ, ததே³வ த்வங், க³ஹபதி, அஜ்ஜு²பக³தோ’’தி.
‘‘Yaṃ kho, gahapati, kiñci bhūtaṃ saṅkhataṃ cetayitaṃ paṭiccasamuppannaṃ tadaniccaṃ. Yadaniccaṃ taṃ dukkhaṃ. Yaṃ dukkhaṃ tadeva tvaṃ, gahapati, allīno, tadeva tvaṃ, gahapati, ajjhupagato’’ti.
‘‘யங் கோ², ப⁴ந்தே, கிஞ்சி பூ⁴தங் ஸங்க²தங் சேதயிதங் படிச்சஸமுப்பன்னங் தத³னிச்சங். யத³னிச்சங் தங் து³க்க²ங். ‘யங் து³க்க²ங் தங் நேதங் மம, நேஸோஹமஸ்மி, நமேஸோ அத்தா’தி – ஏவமேதங் யதா²பூ⁴தங் ஸம்மப்பஞ்ஞாய ஸுதி³ட்ட²ங் . தஸ்ஸ ச உத்தரி நிஸ்ஸரணங் யதா²பூ⁴தங் பஜானாமீ’’தி.
‘‘Yaṃ kho, bhante, kiñci bhūtaṃ saṅkhataṃ cetayitaṃ paṭiccasamuppannaṃ tadaniccaṃ. Yadaniccaṃ taṃ dukkhaṃ. ‘Yaṃ dukkhaṃ taṃ netaṃ mama, nesohamasmi, nameso attā’ti – evametaṃ yathābhūtaṃ sammappaññāya sudiṭṭhaṃ . Tassa ca uttari nissaraṇaṃ yathābhūtaṃ pajānāmī’’ti.
ஏவங் வுத்தே தே பரிப்³பா³ஜகா துண்ஹீபூ⁴தா மங்குபூ⁴தா பத்தக்க²ந்தா⁴ அதோ⁴முகா² பஜ்ஜா²யந்தா அப்படிபா⁴னா நிஸீதி³ங்ஸு. அத² கோ² அனாத²பிண்டி³கோ க³ஹபதி தே பரிப்³பா³ஜகே துண்ஹீபூ⁴தே மங்குபூ⁴தே பத்தக்க²ந்தே⁴ அதோ⁴முகே² பஜ்ஜா²யந்தே அப்படிபா⁴னே விதி³த்வா உட்டா²யாஸனா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² அனாத²பிண்டி³கோ க³ஹபதி யாவதகோ அஹோஸி தேஹி அஞ்ஞதித்தி²யேஹி பரிப்³பா³ஜகேஹி ஸத்³தி⁴ங் கதா²ஸல்லாபோ தங் ஸப்³ப³ங் ப⁴க³வதோ ஆரோசேஸி. ‘‘ஸாது⁴ ஸாது⁴, க³ஹபதி! ஏவங் கோ² தே, க³ஹபதி, மோக⁴புரிஸா காலேன காலங் ஸஹத⁴ம்மேன ஸுனிக்³க³ஹிதங் நிக்³க³ஹேதப்³பா³’’தி.
Evaṃ vutte te paribbājakā tuṇhībhūtā maṅkubhūtā pattakkhandhā adhomukhā pajjhāyantā appaṭibhānā nisīdiṃsu. Atha kho anāthapiṇḍiko gahapati te paribbājake tuṇhībhūte maṅkubhūte pattakkhandhe adhomukhe pajjhāyante appaṭibhāne viditvā uṭṭhāyāsanā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho anāthapiṇḍiko gahapati yāvatako ahosi tehi aññatitthiyehi paribbājakehi saddhiṃ kathāsallāpo taṃ sabbaṃ bhagavato ārocesi. ‘‘Sādhu sādhu, gahapati! Evaṃ kho te, gahapati, moghapurisā kālena kālaṃ sahadhammena suniggahitaṃ niggahetabbā’’ti.
அத² கோ² ப⁴க³வா அனாத²பிண்டி³கங் க³ஹபதிங் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி. அத² கோ² அனாத²பிண்டி³கோ க³ஹபதி ப⁴க³வதா த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹங்ஸிதோ உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி.
Atha kho bhagavā anāthapiṇḍikaṃ gahapatiṃ dhammiyā kathāya sandassesi samādapesi samuttejesi sampahaṃsesi. Atha kho anāthapiṇḍiko gahapati bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi.
அத² கோ² ப⁴க³வா அசிரபக்கந்தே அனாத²பிண்டி³கே க³ஹபதிம்ஹி பி⁴க்கூ² ஆமந்தேஸி – ‘‘யோபி ஸோ, பி⁴க்க²வே, பி⁴க்கு² வஸ்ஸஸதுபஸம்பன்னோ 1 இமஸ்மிங் த⁴ம்மவினயே, ஸோபி ஏவமேவங் அஞ்ஞதித்தி²யே பரிப்³பா³ஜகே ஸஹத⁴ம்மேன ஸுனிக்³க³ஹிதங் நிக்³க³ண்ஹெய்ய யதா² தங் அனாத²பிண்டி³கேன க³ஹபதினா நிக்³க³ஹிதா’’தி. ததியங்.
Atha kho bhagavā acirapakkante anāthapiṇḍike gahapatimhi bhikkhū āmantesi – ‘‘yopi so, bhikkhave, bhikkhu vassasatupasampanno 2 imasmiṃ dhammavinaye, sopi evamevaṃ aññatitthiye paribbājake sahadhammena suniggahitaṃ niggaṇheyya yathā taṃ anāthapiṇḍikena gahapatinā niggahitā’’ti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. கிங்தி³ட்டி²கஸுத்தவண்ணனா • 3. Kiṃdiṭṭhikasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-4. காமபோ⁴கீ³ஸுத்தாதி³வண்ணனா • 1-4. Kāmabhogīsuttādivaṇṇanā
