| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. கிங்ஸுகோபமஸுத்தவண்ணனா
8. Kiṃsukopamasuttavaṇṇanā
245. சதுன்னங் அரியஸச்சானங் பரிஞ்ஞாபி⁴ஸமயாதி³வஸேன விவித⁴த³ஸ்ஸனந்தி கிச்சவஸேன நானாத³ஸ்ஸனங் ஹோதீதி வுத்தங், ‘‘த³ஸ்ஸனந்தி பட²மமக்³க³ஸ்ஸேதங் அதி⁴வசன’’ந்தி . தயித³ங் உபரிமக்³கே³ஸு பா⁴வனாபரியாயஸ்ஸ நிருள்ஹத்தா பட²மமக்³க³ஸ்ஸ பட²மங் நிப்³பா³னத³ஸ்ஸனதோ. தேனாஹ ‘‘பட²மமக்³கோ³ ஹீ’’திஆதி³ . கோசி யதா²வுத்தங் அவிபரீதங் அத்த²ங் அஜானந்தோ ஞாணத³ஸ்ஸனங் நாம ஆரம்மணகரணஸ்ஸ வஸேன அதிப்பஸங்க³ங் ஆஸங்கெய்யாதி தங் நிவத்தேதுங் ‘‘கொ³த்ரபூ⁴ பனா’’திஆதி³ வுத்தங். ந த³ஸ்ஸனந்தி வுச்சதீதி எத்த² ராஜத³ஸ்ஸனங் உதா³ஹரந்தி. சத்தாரோபி மக்³கா³ த³ஸ்ஸனமேவ யதா²வுத்தேனத்தே²ன, பா⁴வனாபரியாயோ பன உபரி திண்ணங் மக்³கா³னங் பட²மமக்³க³உபாயஸ்ஸ பா⁴வனாகாரேன பவத்தனதோ. த³ஸ்ஸனங் விஸுத்³தி⁴ எத்தா²தி த³ஸ்ஸனவிஸுத்³தி⁴கங், நிப்³பா³னங். ப²ஸ்ஸாயதனங் கம்மட்டா²னங் அஸ்ஸ அத்தீ²தி ப²ஸ்ஸாயதனகம்மட்டா²னிகோ. ஏஸ நயோ ஸேஸேஸுபி பதே³ஸு.
245. Catunnaṃ ariyasaccānaṃ pariññābhisamayādivasena vividhadassananti kiccavasena nānādassanaṃ hotīti vuttaṃ, ‘‘dassananti paṭhamamaggassetaṃ adhivacana’’nti . Tayidaṃ uparimaggesu bhāvanāpariyāyassa niruḷhattā paṭhamamaggassa paṭhamaṃ nibbānadassanato. Tenāha ‘‘paṭhamamaggo hī’’tiādi . Koci yathāvuttaṃ aviparītaṃ atthaṃ ajānanto ñāṇadassanaṃ nāma ārammaṇakaraṇassa vasena atippasaṅgaṃ āsaṅkeyyāti taṃ nivattetuṃ ‘‘gotrabhū panā’’tiādi vuttaṃ. Na dassananti vuccatīti ettha rājadassanaṃ udāharanti. Cattāropi maggā dassanameva yathāvuttenatthena, bhāvanāpariyāyo pana upari tiṇṇaṃ maggānaṃ paṭhamamaggaupāyassa bhāvanākārena pavattanato. Dassanaṃ visuddhi etthāti dassanavisuddhikaṃ, nibbānaṃ. Phassāyatanaṃ kammaṭṭhānaṃ assa atthīti phassāyatanakammaṭṭhāniko. Esa nayo sesesupi padesu.
பதே³ஸஸங்கா²ரேஸூதி ஸங்கா²ரேகதே³ஸேஸு. ஹெட்டி²மபரிச்சே²தே³ன பத²விஆதி³கே த⁴ம்மமத்தே தி³ட்டே² ரூபபரிக்³க³ஹோ, சக்கு²விஞ்ஞாணாதி³கே தங்ஸஹக³தத⁴ம்மமத்தே தி³ட்டே² அரூபபரிக்³க³ஹோ ச ஸிஜ்ஜ²தீதி வத³ந்தி.
Padesasaṅkhāresūti saṅkhārekadesesu. Heṭṭhimaparicchedena pathaviādike dhammamatte diṭṭhe rūpapariggaho, cakkhuviññāṇādike taṃsahagatadhammamatte diṭṭhe arūpapariggaho ca sijjhatīti vadanti.
அதி⁴க³தமக்³க³மேவ கதே²ஸீதி யேன முகே²ன விபஸ்ஸனாபி⁴னிவேஸங் அகாஸி, தமேவஸ்ஸ முக²ங் கதே²ஸி. அயங் பனாதி கம்மட்டா²னங் புச்ச²ந்தோ பி⁴க்கு². இமேஸந்தி ப²ஸ்ஸாயதனகம்மட்டா²னிகபஞ்சக்க²ந்த⁴கம்மட்டா²னிகானங் வசனங். ‘‘அஞ்ஞமஞ்ஞங் ந ஸமேதீ’’தி வத்வா தமேவத்த²ங் பாகடங் கரோதி ‘‘பட²மேனா’’திஆதி³னா. பஞ்சக்க²ந்த⁴விமுத்தஸ்ஸ ஸங்கா²ரஸ்ஸ அபா⁴வா ‘‘நிப்பதே³ஸேஸூ’’தி வுத்தங். ததே²வாதி யதே²வ ப²ஸ்ஸாயதனகம்மட்டா²னிகங், ததே²வ தங் பஞ்சக்க²ந்த⁴கம்மட்டா²னிகங் புச்சி²த்வா.
Adhigatamaggameva kathesīti yena mukhena vipassanābhinivesaṃ akāsi, tamevassa mukhaṃ kathesi. Ayaṃ panāti kammaṭṭhānaṃ pucchanto bhikkhu. Imesanti phassāyatanakammaṭṭhānikapañcakkhandhakammaṭṭhānikānaṃ vacanaṃ. ‘‘Aññamaññaṃ na sametī’’ti vatvā tamevatthaṃ pākaṭaṃ karoti ‘‘paṭhamenā’’tiādinā. Pañcakkhandhavimuttassa saṅkhārassa abhāvā ‘‘nippadesesū’’ti vuttaṃ. Tathevāti yatheva phassāyatanakammaṭṭhānikaṃ, tatheva taṃ pañcakkhandhakammaṭṭhānikaṃ pucchitvā.
ஸமப்பவத்தா தா⁴துயோதி ரஸாத³யோ ஸரீரதா⁴துயோ ஸமப்பவத்தா, ந விஸமாகாரஸண்டி²தா அஹேஸுங். தேனாஹ ‘‘கல்லஸரீரங் ப³லப்பத்த’’ந்தி. ‘‘அதீதா ஸங்கா²ரா’’திஆதி³ விபஸ்ஸனாபி⁴னிவேஸவஸேன வுத்தங். ஸம்மஸனங் ஸப்³ப³த்த²கமேவ இச்சி²தப்³ப³ங். சாரிபூ⁴மிந்தி கோ³சரட்டா²னங்.
Samappavattā dhātuyoti rasādayo sarīradhātuyo samappavattā, na visamākārasaṇṭhitā ahesuṃ. Tenāha ‘‘kallasarīraṃ balappatta’’nti. ‘‘Atītā saṅkhārā’’tiādi vipassanābhinivesavasena vuttaṃ. Sammasanaṃ sabbatthakameva icchitabbaṃ. Cāribhūminti gocaraṭṭhānaṃ.
காரகபா⁴வந்தி பா⁴வனானுயுஞ்ஜனபா⁴வங். பண்டு³ரோக³புரிஸோதி பண்டு³ரோகீ³ புரிஸோ. அரிட்ட²ந்தி ஸுத்தங். பே⁴ஸஜ்ஜங் கத்வாதி பே⁴ஸஜ்ஜபயோக³ங் கத்வா. கரிஸ்ஸாமீதி பே⁴ஸஜ்ஜங் கரிஸ்ஸாமி. ஜா²மது²ணோ வியாதி த³ட்³ட⁴து²ணோ விய கா²ரகஜாலனத்³த⁴த்தா தருணமகுலஸந்தானஸஞ்ச²ன்னத்தா.
Kārakabhāvanti bhāvanānuyuñjanabhāvaṃ. Paṇḍurogapurisoti paṇḍurogī puriso. Ariṭṭhanti suttaṃ. Bhesajjaṃ katvāti bhesajjapayogaṃ katvā. Karissāmīti bhesajjaṃ karissāmi. Jhāmathuṇo viyāti daḍḍhathuṇo viya khārakajālanaddhattā taruṇamakulasantānasañchannattā.
த³க்கி²ணத்³வாரகா³மேதி த³க்கி²ணத்³வாரஸமீபே கா³மே. லோஹிதகோதி லோஹிதவண்ணோ. ஓசிரகஜாதோதி ஜாதஓலம்ப³மானசிரகோ விய. ஆதி³ன்னஸிபாடிகோதி க³ஹிதப²லபோதகோ. ஸந்த³ச்சா²யோதி ப³ஹலச்சா²யோ. யஸ்மா தஸ்ஸ ருக்க²ஸ்ஸ ஸாகா² அவிரளா க⁴னப்பத்தா அஞ்ஞமஞ்ஞங் ஸங்ஸந்தி³த்வா டி²தா, தஸ்மா சா²யாபிஸ்ஸ தாதி³ஸீதி வுத்தங் ‘‘ஸந்த³ச்சா²யோ நாம ஸங்ஸந்தி³த்வா டி²தச்சா²யோ’’தி, க⁴னச்சா²யோதி அத்தோ². தத்தா²திஆதி³ உபமாஸங்ஸந்த³னங்.
Dakkhiṇadvāragāmeti dakkhiṇadvārasamīpe gāme. Lohitakoti lohitavaṇṇo. Ocirakajātoti jātaolambamānacirako viya. Ādinnasipāṭikoti gahitaphalapotako. Sandacchāyoti bahalacchāyo. Yasmā tassa rukkhassa sākhā aviraḷā ghanappattā aññamaññaṃ saṃsanditvā ṭhitā, tasmā chāyāpissa tādisīti vuttaṃ ‘‘sandacchāyo nāma saṃsanditvā ṭhitacchāyo’’ti, ghanacchāyoti attho. Tatthātiādi upamāsaṃsandanaṃ.
யேன யேனாகாரேன அதி⁴முத்தானந்தி ச²ப²ஸ்ஸாயதனாதி³முகே²ன யேன யேன விபஸ்ஸனாபி⁴னிவேஸேன விபஸ்ஸந்தானங் நிப்³பா³னஞ்ச அதி⁴முத்தானங். ஸுட்டு² விஸுத்³த⁴ங் பரிஞ்ஞாதிஸமயாதி³ஸித்³தி⁴யா. தேன தேனேவாகாரேனாதி அத்தனாதி⁴முத்தாகாரேன. இதா³னி தங் தங் ஆகாரங் உபமாய ஸத்³தி⁴ங் யோஜெத்வா த³ஸ்ஸேதுங் ‘‘யதா² ஹீ’’திஆதி³ ஆரத்³த⁴ங். தங் ஸுவிஞ்ஞெய்யமேவ.
Yenayenākārena adhimuttānanti chaphassāyatanādimukhena yena yena vipassanābhinivesena vipassantānaṃ nibbānañca adhimuttānaṃ. Suṭṭhu visuddhaṃ pariññātisamayādisiddhiyā. Tena tenevākārenāti attanādhimuttākārena. Idāni taṃ taṃ ākāraṃ upamāya saddhiṃ yojetvā dassetuṃ ‘‘yathā hī’’tiādi āraddhaṃ. Taṃ suviññeyyameva.
இத³ந்தி நக³ரோபமங். தங் ஸல்லக்கி²தந்தி கிங்ஸுகோபமதீ³பிதங் அத்த²ஜாதங் ஸசே ஸல்லக்கி²தங். அஸ்ஸ பி⁴க்கு²னோ. த⁴ம்மதே³ஸனத்த²ந்தி யதா²ஸல்லக்கி²தஸ்ஸ அத்த²ஸ்ஸ வஸேன லத்³த⁴விஸேஸஸ்ஸ உபப்³ரூஹனாய. தஸ்ஸேவத்த²ஸ்ஸாதி தஸ்ஸ த³ஸ்ஸனவிஸுத்³தி⁴ஸங்கா²தஸ்ஸ அத்த²ஸ்ஸ. சோராஸங்கா ந ஹொந்தி மஜ்ஜி²மதே³ஸரஜ்ஜஸ்ஸ பஸன்னபா⁴வதோ. திபுரிஸுப்³பே³தா⁴னீதி உப்³பே³தே⁴ன திபுரிஸப்பமாணானி நானாபி⁴த்திவிசித்தானி த²ம்பா⁴னங் உபரி விவித⁴மாலாகம்மாதி³விசித்தத⁴னுராகாரலக்கி²தானி மனோரமானி. தேனாஹ ‘‘நக³ரஸ்ஸ அலங்காரத்த²’’ந்தி. நக³ரத்³வாரஸ்ஸ தி²ரபா⁴வாபாத³னவஸேன ட²பேதப்³ப³த்தா வுத்தங் ‘‘சோரனிவாரணத்தா²னிபி ஹொந்தியேவா’’தி. பிட்ட²ஸங்கா⁴தஸ்ஸாதி த்³வாரபா³ஹஸ்ஸ. ‘‘இமே ஆவாஸிகா, இமே ஆக³ந்துகா, தத்தா²பி ச இமேஹி நக³ரஸ்ஸ நக³ரஸாமிகஸ்ஸ ச அத்தோ². இமேஸங் வஸேன அனத்தோ² ஸியா’’தி ஜானநஞாணஸங்கா²தேன பண்டி³ச்சேன ஸமன்னாக³தோ. அஞ்ஞாதனிவாரணே படுபா⁴வஸங்கா²தேன வெய்யத்தியேன ஸமன்னாக³தோ. டா²னுப்பத்திகபஞ்ஞாஸங்கா²தாயாதி தஸ்மிங் தஸ்மிங் அத்த²கிச்சே தங்க²ணுப்பஜ்ஜனகபடிபா⁴னஸங்கா²தாய.
Idanti nagaropamaṃ. Taṃ sallakkhitanti kiṃsukopamadīpitaṃ atthajātaṃ sace sallakkhitaṃ. Assa bhikkhuno. Dhammadesanatthanti yathāsallakkhitassa atthassa vasena laddhavisesassa upabrūhanāya. Tassevatthassāti tassa dassanavisuddhisaṅkhātassa atthassa. Corāsaṅkā na honti majjhimadesarajjassa pasannabhāvato. Tipurisubbedhānīti ubbedhena tipurisappamāṇāni nānābhittivicittāni thambhānaṃ upari vividhamālākammādivicittadhanurākāralakkhitāni manoramāni. Tenāha ‘‘nagarassa alaṅkārattha’’nti. Nagaradvārassa thirabhāvāpādanavasena ṭhapetabbattā vuttaṃ ‘‘coranivāraṇatthānipi hontiyevā’’ti. Piṭṭhasaṅghātassāti dvārabāhassa. ‘‘Ime āvāsikā, ime āgantukā, tatthāpi ca imehi nagarassa nagarasāmikassa ca attho. Imesaṃ vasena anattho siyā’’ti jānanañāṇasaṅkhātena paṇḍiccena samannāgato. Aññātanivāraṇe paṭubhāvasaṅkhātena veyyattiyena samannāgato. Ṭhānuppattikapaññāsaṅkhātāyāti tasmiṃ tasmiṃ atthakicce taṅkhaṇuppajjanakapaṭibhānasaṅkhātāya.
ரஞ்ஞா ஆயுத்தோ நியோஜிதோ ராஜாயுத்தோ, தத்த² தத்த² ரஞ்ஞோ காதப்³ப³கிச்சே ட²பிதபுரிஸோ. கதிபாஹேயேவாதி கதிபயதி³வஸேயேவ அகிச்சகரணேன தஸ்ஸ டா²னங் விப்³ப⁴மோ ஜாதோதி கத்வா வுத்தங் – ‘‘ஸப்³பா³னி வினிச்ச²யட்டா²னாதீ³னி ஹாரெத்வா’’தி.
Raññā āyutto niyojito rājāyutto, tattha tattha rañño kātabbakicce ṭhapitapuriso. Katipāheyevāti katipayadivaseyeva akiccakaraṇena tassa ṭhānaṃ vibbhamo jātoti katvā vuttaṃ – ‘‘sabbāni vinicchayaṭṭhānādīni hāretvā’’ti.
ஸீஸமஸ்ஸ சி²ந்தா³ஹீதி ஸீஸபூ⁴தங் உத்தமங்க³ட்டா²னியங் தத்த² தஸ்ஸ ராஜகிச்சங் சி²ந்தா³தி அத்தோ². அஞ்ஞதா² தஸ்ஸ பாகதிகே அத்தே² க³ய்ஹமானே பாணாதிபாதோ ஆணத்தோ நாம ஸியா. ந ஹி சக்கவத்திராஜா தாதி³ஸங் ஆணாபேதி, அஞ்ஞேஸம்பி ததோ நிவாரகத்தா. அத² வா சி²ந்தா³ஹீதி மம ஆணாய அஸ்ஸ ஸீஸங் சி²ந்த³ந்தோ விய அத்தானங் த³ஸ்ஸேஹி, ஏவங் ஸோ தத்தோ²வாத³படிகரத்தபத்தோ ஓத³மெய்யாதி, ததா² சேவ உபரி படிபத்தி ஆக³தா. தத்தா²தி ஏதஸ்மிங் பச்சந்திமனக³ரே.
Sīsamassa chindāhīti sīsabhūtaṃ uttamaṅgaṭṭhāniyaṃ tattha tassa rājakiccaṃ chindāti attho. Aññathā tassa pākatike atthe gayhamāne pāṇātipāto āṇatto nāma siyā. Na hi cakkavattirājā tādisaṃ āṇāpeti, aññesampi tato nivārakattā. Atha vā chindāhīti mama āṇāya assa sīsaṃ chindanto viya attānaṃ dassehi, evaṃ so tatthovādapaṭikarattapatto odameyyāti, tathā ceva upari paṭipatti āgatā. Tatthāti etasmiṃ paccantimanagare.
உப்பன்னேனாதி ஸமத²கம்மட்டா²னே உப்பன்னேன.
Uppannenāti samathakammaṭṭhāne uppannena.
தஸ்ஸேவாதி ஸக்காயஸங்கா²தஸ்ஸ நக³ரஸ்ஸ ‘‘த்³வாரானீ’’தி வுத்தானீதி ஆனெத்வா ஸம்ப³ந்தோ⁴. ‘‘ஸீக⁴ங் தூ³தயுக³’’ந்தி வுத்தாதி யோஜனா. ஹத³யவத்து²ரூபஸ்ஸ மஜ்ஜே² ஸிங்கா⁴டகபா⁴வேன க³ஹிதத்தா ‘‘ஹத³யவத்து²ஸ்ஸ நிஸ்ஸயபூ⁴தானங் மஹாபூ⁴தான’’ந்தி வுத்தங். யதி³ ஏவங் வத்து²ரூபமேவ க³ஹேதப்³ப³ங், ததே³வெத்த² அக்³க³ஹெத்வா கஸ்மா மஹாபூ⁴தக்³க³ஹணந்தி ஆஹ ‘‘வத்து²ரூபஸ்ஸ ஹீ’’திஆதி³. யாதி³ஸோதி ஸம்மாதி³ட்டி²ஆதீ³னங் வஸேன யாதி³ஸோ ஏவ புப்³பே³ ஆக³தவிபஸ்ஸனாமக்³கோ³. ‘‘அயம்பி அட்ட²ங்க³ஸமன்னாக³தத்தா தாதி³ஸோ ஏவா’’தி வத்வா அரியமக்³கோ³ ‘‘யதா²க³தமக்³கோ³’’தி வுத்தோ. இத³ங் தாவெத்தா²தி எத்த² ஏதஸ்மிங் ஸுத்தே த⁴ம்மதே³ஸனத்த²ங் ஆப⁴தாய யதா²வுத்தஉபமாய இத³ங் ஸங்ஸந்த³னங்.
Tassevāti sakkāyasaṅkhātassa nagarassa ‘‘dvārānī’’ti vuttānīti ānetvā sambandho. ‘‘Sīghaṃ dūtayuga’’nti vuttāti yojanā. Hadayavatthurūpassa majjhe siṅghāṭakabhāvena gahitattā ‘‘hadayavatthussa nissayabhūtānaṃ mahābhūtāna’’nti vuttaṃ. Yadi evaṃ vatthurūpameva gahetabbaṃ, tadevettha aggahetvā kasmā mahābhūtaggahaṇanti āha ‘‘vatthurūpassa hī’’tiādi. Yādisoti sammādiṭṭhiādīnaṃ vasena yādiso eva pubbe āgatavipassanāmaggo. ‘‘Ayampi aṭṭhaṅgasamannāgatattā tādiso evā’’ti vatvā ariyamaggo ‘‘yathāgatamaggo’’ti vutto. Idaṃ tāvetthāti ettha etasmiṃ sutte dhammadesanatthaṃ ābhatāya yathāvuttaupamāya idaṃ saṃsandanaṃ.
இத³ங் ஸங்ஸந்த³னந்தி இதா³னி வக்க²மானங் உபமாய ஸங்ஸந்த³னங். நக³ரஸாமிஉபமா பஞ்சக்க²ந்த⁴வஸேன த³ஸ்ஸனவிஸுத்³தி⁴பத்தங் கீ²ணாஸவங் த³ஸ்ஸேதுங் ஆப⁴தா. ஸிங்கா⁴டகூபமா சதுமஹாபூ⁴தவஸேன த³ஸ்ஸனவிஸுத்³தி⁴பத்தங் கீ²ணாஸவங் த³ஸ்ஸேதுங் ஆப⁴தாதி யோஜனா. ‘‘சதுஸச்சமேவ கதி²த’’ந்தி வத்வா தானி ஸச்சானி நித்³தா⁴ரெத்வா த³ஸ்ஸேதுங் ‘‘ஸகலேனபி ஹீ’’திஆதி³ வுத்தங். இத⁴ நக³ரஸம்பா⁴ரோ ச²த்³வாராத³யோ. தேன ஹி ச²ப²ஸ்ஸாயதனாத³யோ உபமிதா. தே பன து³க்க²ஸச்சபரியாபன்னாதி வுத்தங் ‘‘நக³ரஸம்பா⁴ரேன து³க்க²ஸச்சமேவ கதி²த’’ந்தி.
Idaṃ saṃsandananti idāni vakkhamānaṃ upamāya saṃsandanaṃ. Nagarasāmiupamā pañcakkhandhavasena dassanavisuddhipattaṃ khīṇāsavaṃ dassetuṃ ābhatā. Siṅghāṭakūpamā catumahābhūtavasena dassanavisuddhipattaṃ khīṇāsavaṃ dassetuṃ ābhatāti yojanā. ‘‘Catusaccameva kathita’’nti vatvā tāni saccāni niddhāretvā dassetuṃ ‘‘sakalenapi hī’’tiādi vuttaṃ. Idha nagarasambhāro chadvārādayo. Tena hi chaphassāyatanādayo upamitā. Te pana dukkhasaccapariyāpannāti vuttaṃ ‘‘nagarasambhārena dukkhasaccameva kathita’’nti.
கிங்ஸுகோபமஸுத்தவண்ணனா நிட்டி²தா.
Kiṃsukopamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. கிங்ஸுகோபமஸுத்தங் • 8. Kiṃsukopamasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. கிங்ஸுகோபமஸுத்தவண்ணனா • 8. Kiṃsukopamasuttavaṇṇanā
