| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
3. கிந்திஸுத்தவண்ணனா
3. Kintisuttavaṇṇanā
34. ஏவங் மே ஸுதந்தி கிந்திஸுத்தங். தத்த² பிஸினாராயந்தி ஏவங்னாமகே மண்ட³லபதே³ஸே. ப³லிஹரணேதி தஸ்மிங் வனஸண்டே³ பூ⁴தானங் ப³லிங் ஆஹரந்தி, தஸ்மா ஸோ ப³லிஹரணந்தி வுத்தோ. சீவரஹேதூதி சீவரகாரணா, சீவரங் பச்சாஸீஸமானோதி அத்தோ². இதிப⁴வாப⁴வஹேதூதி ஏவங் இமங் தே³ஸனாமயங் புஞ்ஞகிரியவத்து²ங் நிஸ்ஸாய தஸ்மிங் தஸ்மிங் ப⁴வே ஸுக²ங் வேதி³ஸ்ஸாமீதி த⁴ம்மங் தே³ஸேதீதி கிங் தும்ஹாகங் ஏவங் ஹோதீதி அத்தோ².
34.Evaṃme sutanti kintisuttaṃ. Tattha pisinārāyanti evaṃnāmake maṇḍalapadese. Baliharaṇeti tasmiṃ vanasaṇḍe bhūtānaṃ baliṃ āharanti, tasmā so baliharaṇanti vutto. Cīvarahetūti cīvarakāraṇā, cīvaraṃ paccāsīsamānoti attho. Itibhavābhavahetūti evaṃ imaṃ desanāmayaṃ puññakiriyavatthuṃ nissāya tasmiṃ tasmiṃ bhave sukhaṃ vedissāmīti dhammaṃ desetīti kiṃ tumhākaṃ evaṃ hotīti attho.
35. சத்தாரோ ஸதிபட்டா²னாதிஆத³யோ ஸத்ததிங்ஸ போ³தி⁴பக்கி²யத⁴ம்மா லோகியலோகுத்தராவ கதி²தா. தத்தா²தி தேஸு ஸத்ததிங்ஸாய த⁴ம்மேஸு. ஸியங்ஸூதி ப⁴வெய்யுங். அபி⁴த⁴ம்மேதி விஸிட்டே² த⁴ம்மே, இமேஸு ஸத்ததிங்ஸபோ³தி⁴பக்கி²யத⁴ம்மேஸூதி அத்தோ². தத்ர சேதி இத³ம்பி போ³தி⁴பக்கி²யத⁴ம்மெஸ்வேவ பு⁴ம்மங். அத்த²தோ சேவ நானங் ப்³யஞ்ஜனதோ சாதி எத்த² ‘‘காயோவ ஸதிபட்டா²னங் வேத³னாவ ஸதிபட்டா²ன’’ந்தி வுத்தே அத்த²தோ நானங் ஹோதி , ‘‘ஸதிபட்டா²னா’’தி வுத்தே பன ப்³யஞ்ஜனதோ நானங் நாம ஹோதி. தத³மினாபீதி தங் தும்ஹே இமினாபி காரணேன ஜானாதா²தி அத்த²ஞ்ச ப்³யஞ்ஜனஞ்ச ஸமானெத்வா அத²ஸ்ஸ ச அஞ்ஞதா² க³ஹிதபா⁴வோ ப்³யஞ்ஜனஸ்ஸ ச மிச்சா² ரோபிதபா⁴வோ த³ஸ்ஸேதப்³போ³. யோ த⁴ம்மோ யோ வினயோதி எத்த² அத்த²ஞ்ச ப்³யஞ்ஜனஞ்ச விஞ்ஞாபனகாரணமேவ த⁴ம்மோ ச வினயோ ச.
35.Cattāro satipaṭṭhānātiādayo sattatiṃsa bodhipakkhiyadhammā lokiyalokuttarāva kathitā. Tatthāti tesu sattatiṃsāya dhammesu. Siyaṃsūti bhaveyyuṃ. Abhidhammeti visiṭṭhe dhamme, imesu sattatiṃsabodhipakkhiyadhammesūti attho. Tatra ceti idampi bodhipakkhiyadhammesveva bhummaṃ. Atthato ceva nānaṃ byañjanato cāti ettha ‘‘kāyova satipaṭṭhānaṃ vedanāva satipaṭṭhāna’’nti vutte atthato nānaṃ hoti , ‘‘satipaṭṭhānā’’ti vutte pana byañjanato nānaṃ nāma hoti. Tadamināpīti taṃ tumhe imināpi kāraṇena jānāthāti atthañca byañjanañca samānetvā athassa ca aññathā gahitabhāvo byañjanassa ca micchā ropitabhāvo dassetabbo. Yo dhammo yo vinayoti ettha atthañca byañjanañca viññāpanakāraṇameva dhammo ca vinayo ca.
37. அத்த²தோ ஹி கோ² ஸமேதீதி ஸதியேவ ஸதிபட்டா²னந்தி க³ஹிதா. ப்³யஞ்ஜனதோ நானந்தி கேவலங் ப்³யஞ்ஜனமேவ ஸதிபட்டா²னோதி வா ஸதிபட்டா²னாதி வா மிச்சா² ரோபேத². அப்பமத்தகங் கோ²தி ஸுத்தந்தங் பத்வா ப்³யஞ்ஜனங் அப்பமத்தகங் நாம ஹோதி. பரித்தமத்தங் த⁴னிதங் கத்வா ரோபிதேபி ஹி நிப்³பு³திங் பத்துங் ஸக்கா ஹோதி.
37.Atthato hi kho sametīti satiyeva satipaṭṭhānanti gahitā. Byañjanato nānanti kevalaṃ byañjanameva satipaṭṭhānoti vā satipaṭṭhānāti vā micchā ropetha. Appamattakaṃ khoti suttantaṃ patvā byañjanaṃ appamattakaṃ nāma hoti. Parittamattaṃ dhanitaṃ katvā ropitepi hi nibbutiṃ pattuṃ sakkā hoti.
தத்ரித³ங் வத்து² – விஜயாராமவிஹாரவாஸீ கிரேகோ கீ²ணாஸவத்தே²ரோ த்³வின்னங் பி⁴க்கூ²னங் ஸுத்தங் ஆஹரித்வா கம்மட்டா²னங் கதெ²ந்தோ – ‘‘ஸமுத்³தோ⁴ ஸமுத்³தோ⁴தி, பி⁴க்க²வே, அஸ்ஸுதவா புது²ஜ்ஜனோ பா⁴ஸதீ’’தி த⁴னிதங் கத்வா ஆஹ. ஏகோ பி⁴க்கு² ‘‘ஸமுத்³தோ⁴ நாம, ப⁴ந்தே’’தி ஆஹ. ஆவுஸோ, ஸமுத்³தோ⁴தி வுத்தேபி ஸமுத்³தோ³தி வுத்தேபி மயங் லோணஸாக³ரமேவ ஜானாம, தும்ஹே பன நோ அத்த²க³வேஸகா, ப்³யஞ்ஜனக³வேஸகா, க³ச்ச²த² மஹாவிஹாரே பகு³ணப்³யஞ்ஜனானங் பி⁴க்கூ²னங் ஸந்திகே ப்³யஞ்ஜனங் ஸோதா⁴பேதா²தி கம்மட்டா²னங் அகதெ²த்வாவ உட்டா²பேஸி. ஸோ அபரபா⁴கே³ மஹாவிஹாரே பே⁴ரிங் பஹராபெத்வா பி⁴க்கு²ஸங்க⁴ஸ்ஸ சதூஸு மக்³கே³ஸு பஞ்ஹங் கதெ²த்வாவ பரினிப்³பு³தோ. ஏவங் ஸுத்தந்தங் பத்வா ப்³யஞ்ஜனங் அப்பமத்தகங் நாம ஹோதி.
Tatridaṃ vatthu – vijayārāmavihāravāsī kireko khīṇāsavatthero dvinnaṃ bhikkhūnaṃ suttaṃ āharitvā kammaṭṭhānaṃ kathento – ‘‘samuddho samuddhoti, bhikkhave, assutavā puthujjano bhāsatī’’ti dhanitaṃ katvā āha. Eko bhikkhu ‘‘samuddho nāma, bhante’’ti āha. Āvuso, samuddhoti vuttepi samuddoti vuttepi mayaṃ loṇasāgarameva jānāma, tumhe pana no atthagavesakā, byañjanagavesakā, gacchatha mahāvihāre paguṇabyañjanānaṃ bhikkhūnaṃ santike byañjanaṃ sodhāpethāti kammaṭṭhānaṃ akathetvāva uṭṭhāpesi. So aparabhāge mahāvihāre bheriṃ paharāpetvā bhikkhusaṅghassa catūsu maggesu pañhaṃ kathetvāva parinibbuto. Evaṃ suttantaṃ patvā byañjanaṃ appamattakaṃ nāma hoti.
வினயங் பன பத்வா நோ அப்பமத்தகங். ஸாமணேரபப்³ப³ஜ்ஜாபி ஹி உப⁴தோஸுத்³தி⁴தோ வட்டதி, உபஸம்பதா³தி³கம்மானிபி ஸிதி²லாதீ³னங் த⁴னிதாதி³கரணமத்தேனேவ குப்பந்தி. இத⁴ பன ஸுத்தந்தப்³யஞ்ஜனங் ஸந்தா⁴யேதங் வுத்தங்.
Vinayaṃ pana patvā no appamattakaṃ. Sāmaṇerapabbajjāpi hi ubhatosuddhito vaṭṭati, upasampadādikammānipi sithilādīnaṃ dhanitādikaraṇamatteneva kuppanti. Idha pana suttantabyañjanaṃ sandhāyetaṃ vuttaṃ.
38. அத² சதுத்த²வாரே விவாதோ³ கஸ்மா? ஸஞ்ஞாய விவாதோ³. ‘‘அஹங் ஸதிமேவ ஸதிபட்டா²னங் வதா³மி, அயங் ‘காயோ ஸதிபட்டா²ன’ந்தி வத³தீ’’தி ஹி நேஸங் ஸஞ்ஞா ஹோதி. ப்³யஞ்ஜனேபி ஏஸேவ நயோ.
38. Atha catutthavāre vivādo kasmā? Saññāya vivādo. ‘‘Ahaṃ satimeva satipaṭṭhānaṃ vadāmi, ayaṃ ‘kāyo satipaṭṭhāna’nti vadatī’’ti hi nesaṃ saññā hoti. Byañjanepi eseva nayo.
39. ந சோத³னாய தரிதப்³ப³ந்தி ந சோத³னத்தா²ய வேகா³யிதப்³ப³ங். ஏகச்சோ ஹி புக்³க³லோ ‘‘நலாடே தே ஸாஸபமத்தா பிளகா’’தி வுத்தோ ‘‘மய்ஹங் நலாடே ஸாஸபமத்தங் பிளகங் பஸ்ஸஸி, அத்தனோ நலாடே தாலபக்கமத்தங் மஹாக³ண்ட³ங் ந பஸ்ஸஸீ’’தி வத³தி. தஸ்மா புக்³க³லோ உபபரிக்கி²தப்³போ³. அத³ள்ஹதி³ட்டீ²தி அனாதா³னதி³ட்டீ² ஸுங்ஸுமாரங் ஹத³யே பக்கி²பந்தோ விய த³ள்ஹங் ந க³ண்ஹாதி.
39.Nacodanāya taritabbanti na codanatthāya vegāyitabbaṃ. Ekacco hi puggalo ‘‘nalāṭe te sāsapamattā piḷakā’’ti vutto ‘‘mayhaṃ nalāṭe sāsapamattaṃ piḷakaṃ passasi, attano nalāṭe tālapakkamattaṃ mahāgaṇḍaṃ na passasī’’ti vadati. Tasmā puggalo upaparikkhitabbo. Adaḷhadiṭṭhīti anādānadiṭṭhī suṃsumāraṃ hadaye pakkhipanto viya daḷhaṃ na gaṇhāti.
உபகா⁴தோதி சண்ட³பா⁴வேன வணக⁴ட்டிதஸ்ஸ விய து³க்கு²ப்பத்தி. ஸுப்படினிஸ்ஸக்³கீ³தி ‘‘கிங் நாம அஹங் ஆபன்னோ, கதா³ ஆபன்னோ’’தி வா ‘‘த்வங் ஆபன்னோ, தவ உபஜ்ஜா²யோ ஆபன்னோ’’தி வா ஏகங் த்³வே வாரே வத்வாபி ‘‘அஸுகங் நாம அஸுகதி³வஸே நாம, ப⁴ந்தே, ஆபன்னத்த², ஸணிகங் அனுஸ்ஸரதா²’’தி ஸரித்வா தாவதே³வ விஸ்ஸஜ்ஜேதி. விஹேஸாதி ப³ஹுங் அத்த²ஞ்ச காரணஞ்ச ஆஹரந்தஸ்ஸ காயசித்தகிலமதோ². ஸக்கோமீதி ஏவரூபோ ஹி புக்³க³லோ ஓகாஸங் காரெத்வா ‘‘ஆபத்திங் ஆபன்னத்த², ப⁴ந்தே’’தி வுத்தோ ‘‘கதா³ கிஸ்மிங் வத்து²ஸ்மி’’ந்தி வத்வா ‘‘அஸுகதி³வஸே அஸுகஸ்மிங் வத்து²ஸ்மி’’ந்தி வுத்தே ‘‘ந ஸராமி, ஆவுஸோ’’தி வத³தி, ததோ ‘‘ஸணிகங், ப⁴ந்தே, ஸரதா²’’தி ப³ஹுங் வத்வா ஸாரிதோ ஸரித்வா விஸ்ஸஜ்ஜேதி. தேனாஹ ‘‘ஸக்கோமீ’’தி. இமினா நயேன ஸப்³ப³த்த² அத்தோ² வேதி³தப்³போ³.
Upaghātoti caṇḍabhāvena vaṇaghaṭṭitassa viya dukkhuppatti. Suppaṭinissaggīti ‘‘kiṃ nāma ahaṃ āpanno, kadā āpanno’’ti vā ‘‘tvaṃ āpanno, tava upajjhāyo āpanno’’ti vā ekaṃ dve vāre vatvāpi ‘‘asukaṃ nāma asukadivase nāma, bhante, āpannattha, saṇikaṃ anussarathā’’ti saritvā tāvadeva vissajjeti. Vihesāti bahuṃ atthañca kāraṇañca āharantassa kāyacittakilamatho. Sakkomīti evarūpo hi puggalo okāsaṃ kāretvā ‘‘āpattiṃ āpannattha, bhante’’ti vutto ‘‘kadā kismiṃ vatthusmi’’nti vatvā ‘‘asukadivase asukasmiṃ vatthusmi’’nti vutte ‘‘na sarāmi, āvuso’’ti vadati, tato ‘‘saṇikaṃ, bhante, sarathā’’ti bahuṃ vatvā sārito saritvā vissajjeti. Tenāha ‘‘sakkomī’’ti. Iminā nayena sabbattha attho veditabbo.
உபெக்கா² நாதிமஞ்ஞிதப்³பா³தி உபெக்கா² ந அதிக்கமிதப்³பா³, கத்தப்³பா³ ஜனேதப்³பா³தி அத்தோ². யோ ஹி ஏவரூபங் புக்³க³லங் டி²தகங்யேவ பஸ்ஸாவங் கரொந்தங் தி³ஸ்வாபி ‘‘நனு, ஆவுஸோ, நிஸீதி³தப்³ப³’’ந்தி வத³தி, ஸோ உபெக்க²ங் அதிமஞ்ஞதி நாம.
Upekkhā nātimaññitabbāti upekkhā na atikkamitabbā, kattabbā janetabbāti attho. Yo hi evarūpaṃ puggalaṃ ṭhitakaṃyeva passāvaṃ karontaṃ disvāpi ‘‘nanu, āvuso, nisīditabba’’nti vadati, so upekkhaṃ atimaññati nāma.
40. வசீஸங்ஹாரோதி வசனஸஞ்சாரோ. இமேஹி கதி²தங் அமூஸங் அந்தரங் பவேஸெய்ய, தும்ஹே இமேஹி இத³ஞ்சித³ஞ்ச வுத்தாதி அமூஹி கதி²தங் இமேஸங் அந்தரங் பவேஸெய்யாதி அத்தோ². தி³ட்டி²பளாஸோதிஆதீ³ஹி சித்தஸ்ஸ அனாராத⁴னியபா⁴வோ கதி²தோ. தங் ஜானமானோ ஸமானோ க³ரஹெய்யாதி தங் ஸத்தா² ஜானமானோ ஸமானோ நிந்தெ³ய்ய அம்ஹேதி. ஏதங் பனாவுஸோ, த⁴ம்மந்தி ஏதங் கலஹப⁴ண்ட³னத⁴ம்மங்.
40.Vacīsaṃhāroti vacanasañcāro. Imehi kathitaṃ amūsaṃ antaraṃ paveseyya, tumhe imehi idañcidañca vuttāti amūhi kathitaṃ imesaṃ antaraṃ paveseyyāti attho. Diṭṭhipaḷāsotiādīhi cittassa anārādhaniyabhāvo kathito. Taṃ jānamāno samāno garaheyyāti taṃ satthā jānamāno samāno nindeyya amheti. Etaṃpanāvuso, dhammanti etaṃ kalahabhaṇḍanadhammaṃ.
தஞ்சேதி தங் ஸஞ்ஞத்திகாரகங் பி⁴க்கு²ங். ஏவங் ப்³யாகரெய்யாதி மயா ஏதே ஸுத்³த⁴ந்தே பதிட்டா²பிதாதி அவத்வா யேன காரணேன ஸஞ்ஞத்தி கதா, ததே³வ த³ஸ்ஸெந்தோ ஏவங் ப்³யாகரெய்ய. தாஹங் த⁴ம்மங் ஸுத்வாதி எத்த² த⁴ம்மோதி ஸாரணீயத⁴ம்மோ அதி⁴ப்பேதோ. ந சேவ அத்தானந்திஆதீ³ஸு ‘‘ப்³ரஹ்மலோகப்பமாணோ ஹேஸ அக்³கி³ உட்டா²ஸி, கோ ஏதமஞ்ஞத்ர மயா நிப்³பா³பேதுங் ஸமத்தோ²’’தி ஹி வத³ந்தோ அத்தானங் உக்கங்ஸேதி நாம. ‘‘எத்தகா ஜனா விசரந்தி, ஓகாஸோ லத்³து⁴ங் ந ஸக்கா, ஏகோபி எத்தகமத்தங் நிப்³பா³பேதுங் ஸமத்தோ² நாம நத்தீ²’’தி வத³மானோ பரங் வம்பே⁴தி நாம. தது³ப⁴யம்பேஸ ந கரோதி. த⁴ம்மோ பனெத்த² ஸம்மாஸம்பு³த்³த⁴ஸ்ஸ ப்³யாகரணங், தேஸங் பி⁴க்கூ²னங் ஸஞ்ஞத்திகரணங் அனுத⁴ம்மோ, ததே³வ ப்³யாகரோதி நாம. ந ச கோசி ஸஹத⁴ம்மிகோதி அஞ்ஞோ சஸ்ஸ கோசி ஸஹேதுகோ பரேஹி வுத்தோ வாதோ³ வா அனுவாதோ³ வா க³ரஹிதப்³ப³பா⁴வங் ஆக³ச்ச²ந்தோ நாம நத்தி². ஸேஸங் ஸப்³ப³த்த² உத்தானமேவாதி.
Tañceti taṃ saññattikārakaṃ bhikkhuṃ. Evaṃ byākareyyāti mayā ete suddhante patiṭṭhāpitāti avatvā yena kāraṇena saññatti katā, tadeva dassento evaṃ byākareyya. Tāhaṃ dhammaṃ sutvāti ettha dhammoti sāraṇīyadhammo adhippeto. Na ceva attānantiādīsu ‘‘brahmalokappamāṇo hesa aggi uṭṭhāsi, ko etamaññatra mayā nibbāpetuṃ samattho’’ti hi vadanto attānaṃ ukkaṃseti nāma. ‘‘Ettakā janā vicaranti, okāso laddhuṃ na sakkā, ekopi ettakamattaṃ nibbāpetuṃ samattho nāma natthī’’ti vadamāno paraṃ vambheti nāma. Tadubhayampesa na karoti. Dhammo panettha sammāsambuddhassa byākaraṇaṃ, tesaṃ bhikkhūnaṃ saññattikaraṇaṃ anudhammo, tadeva byākaroti nāma. Na ca koci sahadhammikoti añño cassa koci sahetuko parehi vutto vādo vā anuvādo vā garahitabbabhāvaṃ āgacchanto nāma natthi. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
கிந்திஸுத்தவண்ணனா நிட்டி²தா.
Kintisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. கிந்திஸுத்தங் • 3. Kintisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 3. கிந்திஸுத்தவண்ணனா • 3. Kintisuttavaṇṇanā
