| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. கிஸாகோ³தமீஸுத்தவண்ணனா
3. Kisāgotamīsuttavaṇṇanā
164. ‘‘கிஸாகோ³தமீ’’தி எத்த² கா பனாயங் கிஸாகோ³தமீ, கிஸ்ஸ அயங் பி⁴க்கு²னீ ஹுத்வா ஸமணத⁴ம்மங் மத்த²கங் பாபேஸீதி தமத்த²ங் விபா⁴வேதுங் ‘‘புப்³பே³ கிரா’’திஆதி³மாரத்³த⁴ங். அங்கா³ராவாதி அத்³தா³ரிட்ட²கவண்ணஅங்கா³ரா ஏவ ஜாதா. தா³ருஸாகந்தி அத்³த⁴மாஸகேன தா³ருங் ஸாகஞ்ச ஆஹரிஸ்ஸாமீதி அந்தராபணே அந்தரவீதி²ங் க³தா.
164. ‘‘Kisāgotamī’’ti ettha kā panāyaṃ kisāgotamī, kissa ayaṃ bhikkhunī hutvā samaṇadhammaṃ matthakaṃ pāpesīti tamatthaṃ vibhāvetuṃ ‘‘pubbe kirā’’tiādimāraddhaṃ. Aṅgārāvāti addāriṭṭhakavaṇṇaaṅgārā eva jātā. Dārusākanti addhamāsakena dāruṃ sākañca āharissāmīti antarāpaṇe antaravīthiṃ gatā.
ஸித்³த⁴த்த²கந்தி ஸாஸபங். ஸாலாயந்தி அனாத²ஸாலாயங். கு²ரக்³கே³யேவாதி கு²ரஸிகே² ஏவ, கேஸோரோஹனக்க²ணே ஏவாதி அத்தோ².
Siddhatthakanti sāsapaṃ. Sālāyanti anāthasālāyaṃ. Khuraggeyevāti khurasikhe eva, kesorohanakkhaṇe evāti attho.
ஏகமாஸீதி எத்த² ம-காரோ பத³ஸந்தி⁴கரோ. ஸங்ஹிதாவஸேன ச புரிமபதே³ வா ரஸ்ஸத்தங். பரபதே³ வா தீ³க⁴த்தந்தி ஆஹ ‘‘ஏகா ஆஸீ’’தி. பா⁴வனபுங்ஸகமேதங் ‘‘ஏகமந்தங் நிஸீதீ³’’திஆதீ³ஸு விய. புத்தமரணங் அந்தங் அதீதங் இதா³னி புத்தமரணஸ்ஸ அபா⁴வதோ. தேனேவாஹ ‘‘புத்தமரணங் நாம நத்தீ²’’தி. புரிஸங் க³வேஸிதுந்தி யதா² மய்ஹங் புரிஸக³வேஸனா நாம ஸப்³ப³ஸோ நத்தி², ததா² ஏவ புத்தக³வேஸனாபி நத்தி², தஸ்மா மே புத்தமரணங் ஏதத³ந்தங், ஸப்³பே³ஸு க²ந்தா⁴தீ³ஸு ப⁴வாதீ³ஸு ச தண்ஹானந்தி³யா அபா⁴வகத²னேன ஸப்³ப³ஸத்தேஸு தண்ஹா ஸப்³ப³ஸோ விஸோஸிதா, தஸ்ஸாயேவ காரகஅவிஜ்ஜாக்க²ந்தோ⁴ பதா³லிதோதி அத்தனோ நிக்கிலேஸதங் பவேதெ³ந்தீ தே²ரீ ஸீஹனாத³ங் நதீ³தி.
Ekamāsīti ettha ma-kāro padasandhikaro. Saṃhitāvasena ca purimapade vā rassattaṃ. Parapade vā dīghattanti āha ‘‘ekā āsī’’ti. Bhāvanapuṃsakametaṃ ‘‘ekamantaṃ nisīdī’’tiādīsu viya. Puttamaraṇaṃ antaṃ atītaṃ idāni puttamaraṇassa abhāvato. Tenevāha ‘‘puttamaraṇaṃ nāma natthī’’ti. Purisaṃ gavesitunti yathā mayhaṃ purisagavesanā nāma sabbaso natthi, tathā eva puttagavesanāpi natthi, tasmā me puttamaraṇaṃ etadantaṃ, sabbesu khandhādīsu bhavādīsu ca taṇhānandiyā abhāvakathanena sabbasattesu taṇhā sabbaso visositā, tassāyeva kārakaavijjākkhandho padālitoti attano nikkilesataṃ pavedentī therī sīhanādaṃ nadīti.
கிஸாகோ³தமீஸுத்தவண்ணனா நிட்டி²தா.
Kisāgotamīsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. கிஸாகோ³தமீஸுத்தங் • 3. Kisāgotamīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. கிஸாகோ³தமீஸுத்தவண்ணனா • 3. Kisāgotamīsuttavaṇṇanā
