| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૩. કિસાગોતમીસુત્તવણ્ણના
3. Kisāgotamīsuttavaṇṇanā
૧૬૪. ‘‘કિસાગોતમી’’તિ એત્થ કા પનાયં કિસાગોતમી, કિસ્સ અયં ભિક્ખુની હુત્વા સમણધમ્મં મત્થકં પાપેસીતિ તમત્થં વિભાવેતું ‘‘પુબ્બે કિરા’’તિઆદિમારદ્ધં. અઙ્ગારાવાતિ અદ્દારિટ્ઠકવણ્ણઅઙ્ગારા એવ જાતા. દારુસાકન્તિ અદ્ધમાસકેન દારું સાકઞ્ચ આહરિસ્સામીતિ અન્તરાપણે અન્તરવીથિં ગતા.
164. ‘‘Kisāgotamī’’ti ettha kā panāyaṃ kisāgotamī, kissa ayaṃ bhikkhunī hutvā samaṇadhammaṃ matthakaṃ pāpesīti tamatthaṃ vibhāvetuṃ ‘‘pubbe kirā’’tiādimāraddhaṃ. Aṅgārāvāti addāriṭṭhakavaṇṇaaṅgārā eva jātā. Dārusākanti addhamāsakena dāruṃ sākañca āharissāmīti antarāpaṇe antaravīthiṃ gatā.
સિદ્ધત્થકન્તિ સાસપં. સાલાયન્તિ અનાથસાલાયં. ખુરગ્ગેયેવાતિ ખુરસિખે એવ, કેસોરોહનક્ખણે એવાતિ અત્થો.
Siddhatthakanti sāsapaṃ. Sālāyanti anāthasālāyaṃ. Khuraggeyevāti khurasikhe eva, kesorohanakkhaṇe evāti attho.
એકમાસીતિ એત્થ મ-કારો પદસન્ધિકરો. સંહિતાવસેન ચ પુરિમપદે વા રસ્સત્તં. પરપદે વા દીઘત્તન્તિ આહ ‘‘એકા આસી’’તિ. ભાવનપુંસકમેતં ‘‘એકમન્તં નિસીદી’’તિઆદીસુ વિય. પુત્તમરણં અન્તં અતીતં ઇદાનિ પુત્તમરણસ્સ અભાવતો. તેનેવાહ ‘‘પુત્તમરણં નામ નત્થી’’તિ. પુરિસં ગવેસિતુન્તિ યથા મય્હં પુરિસગવેસના નામ સબ્બસો નત્થિ, તથા એવ પુત્તગવેસનાપિ નત્થિ, તસ્મા મે પુત્તમરણં એતદન્તં, સબ્બેસુ ખન્ધાદીસુ ભવાદીસુ ચ તણ્હાનન્દિયા અભાવકથનેન સબ્બસત્તેસુ તણ્હા સબ્બસો વિસોસિતા, તસ્સાયેવ કારકઅવિજ્જાક્ખન્ધો પદાલિતોતિ અત્તનો નિક્કિલેસતં પવેદેન્તી થેરી સીહનાદં નદીતિ.
Ekamāsīti ettha ma-kāro padasandhikaro. Saṃhitāvasena ca purimapade vā rassattaṃ. Parapade vā dīghattanti āha ‘‘ekā āsī’’ti. Bhāvanapuṃsakametaṃ ‘‘ekamantaṃ nisīdī’’tiādīsu viya. Puttamaraṇaṃ antaṃ atītaṃ idāni puttamaraṇassa abhāvato. Tenevāha ‘‘puttamaraṇaṃ nāma natthī’’ti. Purisaṃ gavesitunti yathā mayhaṃ purisagavesanā nāma sabbaso natthi, tathā eva puttagavesanāpi natthi, tasmā me puttamaraṇaṃ etadantaṃ, sabbesu khandhādīsu bhavādīsu ca taṇhānandiyā abhāvakathanena sabbasattesu taṇhā sabbaso visositā, tassāyeva kārakaavijjākkhandho padālitoti attano nikkilesataṃ pavedentī therī sīhanādaṃ nadīti.
કિસાગોતમીસુત્તવણ્ણના નિટ્ઠિતા.
Kisāgotamīsuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૩. કિસાગોતમીસુત્તં • 3. Kisāgotamīsuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૩. કિસાગોતમીસુત્તવણ્ણના • 3. Kisāgotamīsuttavaṇṇanā
