| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
10. கீடாகி³ரிஸுத்தவண்ணனா
10. Kīṭāgirisuttavaṇṇanā
174. ஏவங் மே ஸுதந்தி கீடாகி³ரிஸுத்தங். தத்த² காஸீஸூதி ஏவங்னாமகே ஜனபதே³. ஏத² தும்ஹேபி, பி⁴க்க²வேதி ஏத² தும்ஹேபி, பி⁴க்க²வே, இமே பஞ்ச ஆனிஸங்ஸே ஸம்பஸ்ஸமானா அஞ்ஞத்ரேவ ரத்திபோ⁴ஜனா பு⁴ஞ்ஜத². இதி ப⁴க³வா ரத்திங் விகாலபோ⁴ஜனங், தி³வா விகாலபோ⁴ஜனந்தி இமானி த்³வே போ⁴ஜனானி ஏகப்பஹாரேன அஜஹாபெத்வா ஏகஸ்மிங் ஸமயே தி³வா விகாலபோ⁴ஜனமேவ ஜஹாபேஸி, புன காலங் அதினாமெத்வா ரத்திங் விகாலபோ⁴ஜனங் ஜஹாபெந்தோ ஏவமாஹ. கஸ்மா? இமானி ஹி த்³வே போ⁴ஜனானி வத்தமானானி வட்டே ஆசிண்ணானி ஸமாசிண்ணானி நதி³ங் ஓதிண்ணஉத³கங் விய அனுபக்க²ந்தா³னி, நிவாதேஸு ச க⁴ரேஸு ஸுபோ⁴ஜனானி பு⁴ஞ்ஜித்வா வட்³டி⁴தா ஸுகு²மாலா குலபுத்தா த்³வே போ⁴ஜனானி ஏகப்பஹாரேன பஜஹந்தா கிலமந்தி. தஸ்மா ஏகப்பஹாரேன அஜஹாபெத்வா ப⁴த்³தா³லிஸுத்தே தி³வா விகாலபோ⁴ஜனங் ஜஹாபேஸி, இத⁴ ரத்திங் விகாலபோ⁴ஜனங். ஜஹாபெந்தோ பன ந தஜ்ஜித்வா வா நிக்³க³ண்ஹித்வா வா, தேஸங் பஹானபச்சயா பன அப்பாபா³த⁴தஞ்ச ஸஞ்ஜானிஸ்ஸதா²தி ஏவங் ஆனிஸங்ஸங் த³ஸ்ஸெத்வாவ ஜஹாபேஸி. கீடாகி³ரீதி தஸ்ஸ நிக³மஸ்ஸ நாமங்.
174.Evaṃme sutanti kīṭāgirisuttaṃ. Tattha kāsīsūti evaṃnāmake janapade. Etha tumhepi, bhikkhaveti etha tumhepi, bhikkhave, ime pañca ānisaṃse sampassamānā aññatreva rattibhojanā bhuñjatha. Iti bhagavā rattiṃ vikālabhojanaṃ, divā vikālabhojananti imāni dve bhojanāni ekappahārena ajahāpetvā ekasmiṃ samaye divā vikālabhojanameva jahāpesi, puna kālaṃ atināmetvā rattiṃ vikālabhojanaṃ jahāpento evamāha. Kasmā? Imāni hi dve bhojanāni vattamānāni vaṭṭe āciṇṇāni samāciṇṇāni nadiṃ otiṇṇaudakaṃ viya anupakkhandāni, nivātesu ca gharesu subhojanāni bhuñjitvā vaḍḍhitā sukhumālā kulaputtā dve bhojanāni ekappahārena pajahantā kilamanti. Tasmā ekappahārena ajahāpetvā bhaddālisutte divā vikālabhojanaṃ jahāpesi, idha rattiṃ vikālabhojanaṃ. Jahāpento pana na tajjitvā vā niggaṇhitvā vā, tesaṃ pahānapaccayā pana appābādhatañca sañjānissathāti evaṃ ānisaṃsaṃ dassetvāva jahāpesi. Kīṭāgirīti tassa nigamassa nāmaṃ.
175. அஸ்ஸஜிபுனப்³ப³ஸுகாதி அஸ்ஸஜி ச புனப்³ப³ஸுகோ ச ச²ஸு ச²ப்³ப³க்³கி³யேஸு த்³வே க³ணாசரியா. பண்டு³கோ லோஹிதகோ மெத்தியோ பு⁴ம்மஜகோ அஸ்ஸஜி புனப்³ப³ஸுகோதி இமே ச² ஜனா ச²ப்³ப³க்³கி³யா நாம. தேஸு பண்டு³கலோஹிதகா அத்தனோ பரிஸங் க³ஹெத்வா ஸாவத்தி²யங் வஸந்தி, மெத்தியபு⁴ம்மஜகா ராஜக³ஹே, இமே த்³வே ஜனா கீடாகி³ரிஸ்மிங் ஆவாஸிகா ஹொந்தி. ஆவாஸிகாதி நிப³த்³த⁴வாஸினோ, தங்னிப³ந்தா⁴ அகதங் ஸேனாஸனங் கரொந்தி, ஜிண்ணங் படிஸங்க²ரொந்தி, கதே இஸ்ஸரா ஹொந்தி. காலிகந்தி அனாக³தே காலே பத்தப்³ப³ங் ஆனிஸங்ஸங்.
175.Assajipunabbasukāti assaji ca punabbasuko ca chasu chabbaggiyesu dve gaṇācariyā. Paṇḍuko lohitako mettiyo bhummajako assaji punabbasukoti ime cha janā chabbaggiyā nāma. Tesu paṇḍukalohitakā attano parisaṃ gahetvā sāvatthiyaṃ vasanti, mettiyabhummajakā rājagahe, ime dve janā kīṭāgirismiṃ āvāsikā honti. Āvāsikāti nibaddhavāsino, taṃnibandhā akataṃ senāsanaṃ karonti, jiṇṇaṃ paṭisaṅkharonti, kate issarā honti. Kālikanti anāgate kāle pattabbaṃ ānisaṃsaṃ.
178. மயா சேதங், பி⁴க்க²வேதி இத⁴ கிங் த³ஸ்ஸேதி? பி⁴க்க²வே, தி³வஸஸ்ஸ தயோ வாரே பு⁴ஞ்ஜித்வா ஸுக²வேத³னங்யேவ உப்பாதெ³ந்தோ ந இமஸ்மிங் ஸாஸனே கிச்சகாரீ நாம ஹோதி, எத்தகா பன வேத³னா ஸேவிதப்³பா³, எத்தகா ந ஸேவிதப்³பா³தி ஏதமத்த²ங் த³ஸ்ஸேதுங் இமங் தே³ஸனங் ஆரபி⁴. ஏவரூபங் ஸுக²வேத³னங் பஜஹதா²தி இத³ஞ்ச கே³ஹஸ்ஸிதஸோமனஸ்ஸவஸேன வுத்தங், உபஸம்பஜ்ஜ விஹரதா²தி இத³ஞ்ச நெக்க²ம்மஸிதஸோமனஸ்ஸவஸேன . இதோ பரேஸுபி த்³வீஸு வாரேஸு கே³ஹஸ்ஸிதனெக்க²ம்மஸிதானங்யேவ தோ³மனஸ்ஸானஞ்ச உபெக்கா²னஞ்ச வஸேன அத்தோ² வேதி³தப்³போ³.
178.Mayā cetaṃ, bhikkhaveti idha kiṃ dasseti? Bhikkhave, divasassa tayo vāre bhuñjitvā sukhavedanaṃyeva uppādento na imasmiṃ sāsane kiccakārī nāma hoti, ettakā pana vedanā sevitabbā, ettakā na sevitabbāti etamatthaṃ dassetuṃ imaṃ desanaṃ ārabhi. Evarūpaṃ sukhavedanaṃ pajahathāti idañca gehassitasomanassavasena vuttaṃ, upasampajja viharathāti idañca nekkhammasitasomanassavasena . Ito paresupi dvīsu vāresu gehassitanekkhammasitānaṃyeva domanassānañca upekkhānañca vasena attho veditabbo.
181. ஏவங் ஸேவிதப்³பா³ஸேவிதப்³ப³வேத³னங் த³ஸ்ஸெத்வா இதா³னி யேஸங் அப்பமாதே³ன கிச்சங் கத்தப்³ப³ங், யேஸஞ்ச ந கத்தப்³ப³ங், தே த³ஸ்ஸேதுங் நாஹங், பி⁴க்க²வே , ஸப்³பே³ஸங்யேவாதிஆதி³மாஹ. தத்த² கதங் தேஸங் அப்பமாதே³னாதி தேஸங் யங் அப்பமாதே³ன கத்தப்³ப³ங், தங் கதங். அனுலோமிகானீதி படிபத்திஅனுலோமானி கம்மட்டா²னஸப்பாயானி, யத்த² வஸந்தேன ஸக்கா ஹொந்தி மக்³க³ப²லானி பாபுணிதுங். இந்த்³ரியானி ஸமன்னானயமானாதி ஸத்³தா⁴தீ³னி இந்த்³ரியானி ஸமானங் குருமானா.
181. Evaṃ sevitabbāsevitabbavedanaṃ dassetvā idāni yesaṃ appamādena kiccaṃ kattabbaṃ, yesañca na kattabbaṃ, te dassetuṃ nāhaṃ, bhikkhave, sabbesaṃyevātiādimāha. Tattha kataṃ tesaṃ appamādenāti tesaṃ yaṃ appamādena kattabbaṃ, taṃ kataṃ. Anulomikānīti paṭipattianulomāni kammaṭṭhānasappāyāni, yattha vasantena sakkā honti maggaphalāni pāpuṇituṃ. Indriyānisamannānayamānāti saddhādīni indriyāni samānaṃ kurumānā.
182. ஸத்திமே, பி⁴க்க²வே, புக்³க³லாதி இத⁴ கிங் த³ஸ்ஸேதி? யேஸங் அப்பமாதே³ன கரணீயங் நத்தி², தே த்³வே ஹொந்தி. யேஸங் அத்தி², தே பஞ்சாதி ஏவங் ஸப்³பே³பி இமே ஸத்த புக்³க³லா ஹொந்தீதி இமமத்த²ங் த³ஸ்ஸேதி.
182.Sattime, bhikkhave, puggalāti idha kiṃ dasseti? Yesaṃ appamādena karaṇīyaṃ natthi, te dve honti. Yesaṃ atthi, te pañcāti evaṃ sabbepi ime satta puggalā hontīti imamatthaṃ dasseti.
தத்த² உப⁴தோபா⁴க³விமுத்தோதி த்³வீஹி பா⁴கே³ஹி விமுத்தோ. அரூபஸமாபத்தியா ரூபகாயதோ விமுத்தோ, மக்³கே³ன நாமகாயதோ. ஸோ சதுன்னங் அரூபஸமாபத்தீனங் ஏகேகதோ வுட்டா²ய ஸங்கா²ரே ஸம்மஸித்வா அரஹத்தங் பத்தானங் சதுன்னங், நிரோதா⁴ வுட்டா²ய அரஹத்தங் பத்தஅனாகா³மினோ ச வஸேன பஞ்சவிதோ⁴ ஹோதி. பாளி பனெத்த² – ‘‘கதமோ ச புக்³க³லோ உப⁴தோபா⁴க³விமுத்தோ, இதே⁴கச்சோ புக்³க³லோ அட்ட² விமொக்கே² காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹொந்தீ’’தி (பு॰ ப॰ 208) ஏவங் அபி⁴த⁴ம்மே அட்ட²விமொக்க²லாபி⁴னோ வஸேன ஆக³தா.
Tattha ubhatobhāgavimuttoti dvīhi bhāgehi vimutto. Arūpasamāpattiyā rūpakāyato vimutto, maggena nāmakāyato. So catunnaṃ arūpasamāpattīnaṃ ekekato vuṭṭhāya saṅkhāre sammasitvā arahattaṃ pattānaṃ catunnaṃ, nirodhā vuṭṭhāya arahattaṃ pattaanāgāmino ca vasena pañcavidho hoti. Pāḷi panettha – ‘‘katamo ca puggalo ubhatobhāgavimutto, idhekacco puggalo aṭṭha vimokkhe kāyena phusitvā viharati, paññāya cassa disvā āsavā parikkhīṇā hontī’’ti (pu. pa. 208) evaṃ abhidhamme aṭṭhavimokkhalābhino vasena āgatā.
பஞ்ஞாவிமுத்தோதி பஞ்ஞாய விமுத்தோ. ஸோ ஸுக்க²விபஸ்ஸகோ, சதூஹி ஜா²னேஹி வுட்டா²ய அரஹத்தங் பத்தா சத்தாரோ சாதி இமேஸங் வஸேன பஞ்சவிதோ⁴வ ஹோதி. பாளி பனெத்த² அட்ட²விமொக்க²படிக்கே²பவஸேனேவ ஆக³தா. யதா²ஹ – ‘‘ந ஹேவ கோ² அட்ட² விமொக்கே² காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹொந்தி. அயங் வுச்சதி புக்³க³லோ பஞ்ஞாவிமுத்தோ’’தி.
Paññāvimuttoti paññāya vimutto. So sukkhavipassako, catūhi jhānehi vuṭṭhāya arahattaṃ pattā cattāro cāti imesaṃ vasena pañcavidhova hoti. Pāḷi panettha aṭṭhavimokkhapaṭikkhepavaseneva āgatā. Yathāha – ‘‘na heva kho aṭṭha vimokkhe kāyena phusitvā viharati, paññāya cassa disvā āsavā parikkhīṇā honti. Ayaṃ vuccati puggalo paññāvimutto’’ti.
பு²ட்ட²ந்தங் ஸச்சி²கரோதீதி காயஸக்கீ². யோ ஜா²னப²ஸ்ஸங் பட²மங் பு²ஸதி, பச்சா² நிரோத⁴ங் நிப்³பா³னங் ஸச்சி²கரோதி, ஸோ ஸோதாபத்திப²லட்ட²ங் ஆதி³ங் கத்வா யாவ அரஹத்தமக்³க³ட்டா² ச²ப்³பி³தோ⁴ ஹொந்தீதி வேதி³தப்³போ³. தேனேவாஹ – ‘‘இதே⁴கச்சோ புக்³க³லோ அட்ட² விமொக்கே² காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஏகச்சே ஆஸவா பரிக்கீ²ணா ஹொந்தி. அயங் வுச்சதி புக்³க³லோ காயஸக்கீ²’’தி.
Phuṭṭhantaṃ sacchikarotīti kāyasakkhī. Yo jhānaphassaṃ paṭhamaṃ phusati, pacchā nirodhaṃ nibbānaṃ sacchikaroti, so sotāpattiphalaṭṭhaṃ ādiṃ katvā yāva arahattamaggaṭṭhā chabbidho hontīti veditabbo. Tenevāha – ‘‘idhekacco puggalo aṭṭha vimokkhe kāyena phusitvā viharati, paññāya cassa disvā ekacce āsavā parikkhīṇā honti. Ayaṃ vuccati puggalo kāyasakkhī’’ti.
தி³ட்ட²ந்தங் பத்தோதி தி³ட்டி²ப்பத்தோ. தத்ரித³ங் ஸங்கே²பலக்க²ணங் – து³க்கா² ஸங்கா²ரா, ஸுகோ² நிரோதோ⁴தி ஞாதங் ஹோதி தி³ட்ட²ங் விதி³தங் ஸச்சி²கதங் பு²ஸிதங் பஞ்ஞாயாதி தி³ட்டி²ப்பத்தோ. வித்தா²ரதோ பனேஸோபி காயஸக்கி² விய ச²ப்³பி³தோ⁴ ஹோதி. தேனேவாஹ – ‘‘இதே⁴கச்சோ புக்³க³லோ இத³ங் து³க்க²ந்தி யதா²பூ⁴தங் பஜானாதி…பே॰… அயங் து³க்க²னிரோத⁴கா³மினீ படிபதா³தி யதா²பூ⁴தங் பஜானாதி, ததா²க³தப்பவேதி³தா சஸ்ஸ த⁴ம்மா பஞ்ஞாய வோதி³ட்டா² ஹொந்தி வோசரிதா…பே॰… அயங் வுச்சதி புக்³க³லோ தி³ட்டி²ப்பத்தோ’’தி (பு॰ ப॰ 208).
Diṭṭhantaṃ pattoti diṭṭhippatto. Tatridaṃ saṅkhepalakkhaṇaṃ – dukkhā saṅkhārā, sukho nirodhoti ñātaṃ hoti diṭṭhaṃ viditaṃ sacchikataṃ phusitaṃ paññāyāti diṭṭhippatto. Vitthārato panesopi kāyasakkhi viya chabbidho hoti. Tenevāha – ‘‘idhekacco puggalo idaṃ dukkhanti yathābhūtaṃ pajānāti…pe… ayaṃ dukkhanirodhagāminī paṭipadāti yathābhūtaṃ pajānāti, tathāgatappaveditā cassa dhammā paññāya vodiṭṭhā honti vocaritā…pe… ayaṃ vuccati puggalo diṭṭhippatto’’ti (pu. pa. 208).
ஸத்³தா⁴விமுத்தோதி ஸத்³தா⁴ய விமுத்தோ. ஸோபி வுத்தனயேனேவ ச²ப்³பி³தோ⁴ ஹோதி. தேனேவாஹ – ‘‘இதே⁴கச்சோ புக்³க³லோ இத³ங் து³க்க²ந்தி – யதா²பூ⁴தங் பஜானாதி…பே॰… அயங் து³க்க²னிரோத⁴கா³மினீ படிபதா³தி யதா²பூ⁴தங் பஜானாதி . ததா²க³தப்பவேதி³தா சஸ்ஸ த⁴ம்மா பஞ்ஞாய வோதி³ட்டா² ஹொந்தி வோசரிதா…பே॰… நோ ச கோ² யதா² தி³ட்டி²ப்பத்தஸ்ஸ. அயங் வுச்சதி புக்³க³லோ ஸத்³தா⁴விமுத்தோ’’தி (பு॰ ப॰ 208). ஏதேஸு ஹி ஸத்³தா⁴விமுத்தஸ்ஸ புப்³ப³பா⁴க³மக்³க³க்க²ணே ஸத்³த³ஹந்தஸ்ஸ விய ஓகப்பெந்தஸ்ஸ விய அதி⁴முச்சந்தஸ்ஸ விய ச கிலேஸக்க²யோ ஹோதி, தி³ட்டி²ப்பத்தஸ்ஸ புப்³ப³பா⁴க³மக்³க³க்க²ணே கிலேஸச்சே²த³கஞாணங் அத³ந்த⁴ங் திகி²ணங் ஸூரங் ஹுத்வா வஹதி. தஸ்மா யதா² நாம நாதிதிகி²ணேன அஸினா கத³லிங் சி²ந்த³ந்தஸ்ஸ சி²ன்னட்டா²னங் ந மட்ட²ங் ஹோதி, அஸி ந ஸீக⁴ங் வஹதி, ஸத்³தோ³ ஸுய்யதி, ப³லவதரோ வாயாமோ காதப்³போ³ ஹோதி, ஏவரூபா ஸத்³தா⁴விமுத்தஸ்ஸ புப்³ப³பா⁴க³மக்³க³பா⁴வனா. யதா² பன நிஸிதஅஸினா கத³லிங் சி²ந்த³ந்தஸ்ஸ சி²ன்னட்டா²னங் மட்ட²ங் ஹோதி, அஸி ஸீக⁴ங் வஹதி, ஸத்³தோ³ ந ஸுய்யதி, ப³லவவாயாமகிச்சங் ந ஹோதி, ஏவரூபா பஞ்ஞாவிமுத்தஸ்ஸ புப்³ப³பா⁴க³மக்³க³பா⁴வனா வேதி³தப்³பா³.
Saddhāvimuttoti saddhāya vimutto. Sopi vuttanayeneva chabbidho hoti. Tenevāha – ‘‘idhekacco puggalo idaṃ dukkhanti – yathābhūtaṃ pajānāti…pe… ayaṃ dukkhanirodhagāminī paṭipadāti yathābhūtaṃ pajānāti . Tathāgatappaveditā cassa dhammā paññāya vodiṭṭhā honti vocaritā…pe… no ca kho yathā diṭṭhippattassa. Ayaṃ vuccati puggalo saddhāvimutto’’ti (pu. pa. 208). Etesu hi saddhāvimuttassa pubbabhāgamaggakkhaṇe saddahantassa viya okappentassa viya adhimuccantassa viya ca kilesakkhayo hoti, diṭṭhippattassa pubbabhāgamaggakkhaṇe kilesacchedakañāṇaṃ adandhaṃ tikhiṇaṃ sūraṃ hutvā vahati. Tasmā yathā nāma nātitikhiṇena asinā kadaliṃ chindantassa chinnaṭṭhānaṃ na maṭṭhaṃ hoti, asi na sīghaṃ vahati, saddo suyyati, balavataro vāyāmo kātabbo hoti, evarūpā saddhāvimuttassa pubbabhāgamaggabhāvanā. Yathā pana nisitaasinā kadaliṃ chindantassa chinnaṭṭhānaṃ maṭṭhaṃ hoti, asi sīghaṃ vahati, saddo na suyyati, balavavāyāmakiccaṃ na hoti, evarūpā paññāvimuttassa pubbabhāgamaggabhāvanā veditabbā.
த⁴ம்மங் அனுஸ்ஸரதீதி த⁴ம்மானுஸாரீ. த⁴ம்மோதி பஞ்ஞா, பஞ்ஞாபுப்³ப³ங்க³மங் மக்³க³ங் பா⁴வேதீதி அத்தோ². ஸத்³தா⁴னுஸாரிம்ஹி ச ஏஸேவ நயோ. உபோ⁴ பனேதே ஸோதாபத்திமக்³க³ட்டா²யேவ. வுத்தம்பி சேதங் – ‘‘யஸ்ஸ புக்³க³லஸ்ஸ ஸோதாபத்திப²லஸச்சி²கிரியாய படிபன்னஸ்ஸ பஞ்ஞிந்த்³ரியங் அதி⁴மத்தங் ஹோதி, பஞ்ஞாவாஹிங் பஞ்ஞாபுப்³ப³ங்க³மங் அரியமக்³க³ங் பா⁴வேதி . அயங் வுச்சதி புக்³க³லோ த⁴ம்மானுஸாரீ’’தி (பு॰ ப॰ 208). ததா² – ‘‘யஸ்ஸ புக்³க³லஸ்ஸ ஸோதாபத்திப²லஸச்சி²கிரியாய படிபன்னஸ்ஸ ஸத்³தி⁴ந்த்³ரியங் அதி⁴மத்தங் ஹோதி, ஸத்³தா⁴வாஹிங் ஸத்³தா⁴புப்³ப³ங்க³மங் அரியமக்³க³ங் பா⁴வேதி. அயங் வுச்சதி புக்³க³லோ ஸத்³தா⁴னுஸாரீ’’தி. அயமெத்த² ஸங்கே²போ. வித்தா²ரதோ பனேஸா உப⁴தோபா⁴க³விமுத்தாதி³கதா² விஸுத்³தி⁴மக்³கே³ பஞ்ஞாபா⁴வனாதி⁴காரே வுத்தா. தஸ்மா தத்த² வுத்தனயேனேவ வேதி³தப்³பா³. யா பனேஸா ஏதேஸங் விபா⁴க³த³ஸ்ஸனத்த²ங் இத⁴ பாளி ஆக³தா, தத்த² யஸ்மா ரூபஸமாபத்தியா வினா அரூபஸமாபத்தியோ நாம நத்தி², தஸ்மா ஆருப்பாதி வுத்தேபி அட்ட² விமொக்கா² வுத்தாவ ஹொந்தீதி வேதி³தப்³பா³.
Dhammaṃ anussaratīti dhammānusārī. Dhammoti paññā, paññāpubbaṅgamaṃ maggaṃ bhāvetīti attho. Saddhānusārimhi ca eseva nayo. Ubho panete sotāpattimaggaṭṭhāyeva. Vuttampi cetaṃ – ‘‘yassa puggalassa sotāpattiphalasacchikiriyāya paṭipannassa paññindriyaṃ adhimattaṃ hoti, paññāvāhiṃ paññāpubbaṅgamaṃ ariyamaggaṃ bhāveti . Ayaṃ vuccati puggalo dhammānusārī’’ti (pu. pa. 208). Tathā – ‘‘yassa puggalassa sotāpattiphalasacchikiriyāya paṭipannassa saddhindriyaṃ adhimattaṃ hoti, saddhāvāhiṃ saddhāpubbaṅgamaṃ ariyamaggaṃ bhāveti. Ayaṃ vuccati puggalo saddhānusārī’’ti. Ayamettha saṅkhepo. Vitthārato panesā ubhatobhāgavimuttādikathā visuddhimagge paññābhāvanādhikāre vuttā. Tasmā tattha vuttanayeneva veditabbā. Yā panesā etesaṃ vibhāgadassanatthaṃ idha pāḷi āgatā, tattha yasmā rūpasamāpattiyā vinā arūpasamāpattiyo nāma natthi, tasmā āruppāti vuttepi aṭṭha vimokkhā vuttāva hontīti veditabbā.
காயேன பு²ஸித்வாதி ஸஹஜாதனாமகாயேன பு²ஸித்வா. பஞ்ஞாய சஸ்ஸ தி³ஸ்வாதி பஞ்ஞாய ச ஏதஸ்ஸ அரியஸச்சத⁴ம்மே தி³ஸ்வா. ஏகச்சே ஆஸவாதி பட²மமக்³கா³தீ³ஹி பஹாதப்³பா³ ஏகதே³ஸஆஸவா. ததா²க³தப்பவேதி³தாதி ததா²க³தேன பவேதி³தா சதுஸச்சத⁴ம்மா. பஞ்ஞாய வோதி³ட்டா² ஹொந்தீதி இமஸ்மிங் டா²னே ஸீலங் கதி²தங், இமஸ்மிங் ஸமாதி⁴, இமஸ்மிங் விபஸ்ஸனா, இமஸ்மிங் மக்³கோ³, இமஸ்மிங் ப²லந்தி ஏவங் அத்தே²ன அத்தே² காரணேன காரணே சிண்ணசரிதத்தா மக்³க³பஞ்ஞாய ஸுதி³ட்டா² ஹொந்தி. வோசரிதாதி விசரிதா. ஸத்³தா⁴ நிவிட்டா² ஹோதீதி ஓகப்பனஸத்³தா⁴ பதிட்டி²தா ஹோதி. மத்தஸோ நிஜ்ஜா²னங் க²மந்தீதி மத்தாய ஓலோகனங் க²மந்தி. ஸத்³தா⁴மத்தந்தி ஸத்³தா⁴யேவ, இதரங் தஸ்ஸேவ வேவசனங்
Kāyena phusitvāti sahajātanāmakāyena phusitvā. Paññāya cassa disvāti paññāya ca etassa ariyasaccadhamme disvā. Ekacce āsavāti paṭhamamaggādīhi pahātabbā ekadesaāsavā. Tathāgatappaveditāti tathāgatena paveditā catusaccadhammā. Paññāya vodiṭṭhā hontīti imasmiṃ ṭhāne sīlaṃ kathitaṃ, imasmiṃ samādhi, imasmiṃ vipassanā, imasmiṃ maggo, imasmiṃ phalanti evaṃ atthena atthe kāraṇena kāraṇe ciṇṇacaritattā maggapaññāya sudiṭṭhā honti. Vocaritāti vicaritā. Saddhā niviṭṭhā hotīti okappanasaddhā patiṭṭhitā hoti. Mattaso nijjhānaṃ khamantīti mattāya olokanaṃ khamanti. Saddhāmattanti saddhāyeva, itaraṃ tasseva vevacanaṃ
இதி இமேஸு அப்பமாதே³ன கரணீயேஸு புக்³க³லேஸு தயோ படிவித்³த⁴மக்³க³ப²லா ஸேகா². தேஸு அனுலோமஸேனாஸனங் ஸேவமானா கல்யாணமித்தே ப⁴ஜமானா இந்த்³ரியானி ஸமன்னானயமானா அனுபுப்³பே³ன அரஹத்தங் க³ண்ஹந்தி. தஸ்மா தேஸங் யதா²டி²தோவ பாளிஅத்தோ². அவஸானே பன த்³வே ஸோதாபத்திமக்³க³ஸமங்கி³னோ. தேஹி தஸ்ஸ மக்³க³ஸ்ஸ அனுலோமஸேனாஸனங் ஸேவிதங், கல்யாணமித்தா ப⁴ஜிதா, இந்த்³ரியானி ஸமன்னானீதானி. உபரி பன திண்ணங் மக்³கா³னங் அத்தா²ய ஸேவமானா ப⁴ஜமானா ஸமன்னானயமானா அனுபுப்³பே³ன அரஹத்தங் பாபுணிஸ்ஸந்தீதி அயமெத்த² பாளிஅத்தோ².
Iti imesu appamādena karaṇīyesu puggalesu tayo paṭividdhamaggaphalā sekhā. Tesu anulomasenāsanaṃ sevamānā kalyāṇamitte bhajamānā indriyāni samannānayamānā anupubbena arahattaṃ gaṇhanti. Tasmā tesaṃ yathāṭhitova pāḷiattho. Avasāne pana dve sotāpattimaggasamaṅgino. Tehi tassa maggassa anulomasenāsanaṃ sevitaṃ, kalyāṇamittā bhajitā, indriyāni samannānītāni. Upari pana tiṇṇaṃ maggānaṃ atthāya sevamānā bhajamānā samannānayamānā anupubbena arahattaṃ pāpuṇissantīti ayamettha pāḷiattho.
விதண்ட³வாதீ³ பன இமமேவ பாளிங் க³ஹெத்வா – ‘‘லோகுத்தரமக்³கோ³ ந ஏகசித்தக்க²ணிகோ, ப³ஹுசித்தக்க²ணிகோ’’தி வத³தி. ஸோ வத்தப்³போ³ – ‘‘யதி³ அஞ்ஞேன சித்தேன ஸேனாஸனங் படிஸேவதி, அஞ்ஞேன கல்யாணமித்தே ப⁴ஜதி, அஞ்ஞேன இந்த்³ரியானி ஸமன்னானேதி, அஞ்ஞங் மக்³க³சித்தந்தி ஸந்தா⁴ய த்வங் ‘ந ஏகசித்தக்க²ணிகோ மக்³கோ³, ப³ஹுசித்தக்க²ணிகோ’தி வத³ஸி, ஏவங் ஸந்தே ஸேனாஸனங் ஸேவமானோ நீலோபா⁴ஸங் பப்³ப³தங் பஸ்ஸதி, வனங் பஸ்ஸதி, மிக³பக்கீ²னங் ஸத்³த³ங் ஸுணாதி, புப்ப²ப²லானங் க³ந்த⁴ங் கா⁴யதி, பானீயங் பிவந்தோ ரஸங் ஸாயதி, நிஸீத³ந்தோ நிபஜ்ஜந்தோ ப²ஸ்ஸங் பு²ஸதி. ஏவங் தே பஞ்சவிஞ்ஞாணஸமங்கீ³பி லோகுத்தரத⁴ம்மஸமங்கீ³யேவ ப⁴விஸ்ஸதி. ஸசே பனேதங் ஸம்படிச்ச²ஸி, ஸத்தா²ரா ஸத்³தி⁴ங் படிவிருஜ்ஜ²ஸி. ஸத்தா²ரா ஹி பஞ்சவிஞ்ஞாணகாயா ஏகந்தங் அப்³யாகதாவ வுத்தா, தங்ஸமங்கி³ஸ்ஸ குஸலாகுஸலங் படிக்கி²த்தங், லோகுத்தரமக்³கோ³ ச ஏகந்தகுஸலோ. தஸ்மா பஜஹேதங் வாத³’’ந்தி பஞ்ஞபேதப்³போ³. ஸசே பஞ்ஞத்திங் ந உபக³ச்ச²தி, ‘‘க³ச்ச² பாதோவ விஹாரங் பவிஸித்வா யாகு³ங் பிவாஹீ’’தி உய்யோஜேதப்³போ³.
Vitaṇḍavādī pana imameva pāḷiṃ gahetvā – ‘‘lokuttaramaggo na ekacittakkhaṇiko, bahucittakkhaṇiko’’ti vadati. So vattabbo – ‘‘yadi aññena cittena senāsanaṃ paṭisevati, aññena kalyāṇamitte bhajati, aññena indriyāni samannāneti, aññaṃ maggacittanti sandhāya tvaṃ ‘na ekacittakkhaṇiko maggo, bahucittakkhaṇiko’ti vadasi, evaṃ sante senāsanaṃ sevamāno nīlobhāsaṃ pabbataṃ passati, vanaṃ passati, migapakkhīnaṃ saddaṃ suṇāti, pupphaphalānaṃ gandhaṃ ghāyati, pānīyaṃ pivanto rasaṃ sāyati, nisīdanto nipajjanto phassaṃ phusati. Evaṃ te pañcaviññāṇasamaṅgīpi lokuttaradhammasamaṅgīyeva bhavissati. Sace panetaṃ sampaṭicchasi, satthārā saddhiṃ paṭivirujjhasi. Satthārā hi pañcaviññāṇakāyā ekantaṃ abyākatāva vuttā, taṃsamaṅgissa kusalākusalaṃ paṭikkhittaṃ, lokuttaramaggo ca ekantakusalo. Tasmā pajahetaṃ vāda’’nti paññapetabbo. Sace paññattiṃ na upagacchati, ‘‘gaccha pātova vihāraṃ pavisitvā yāguṃ pivāhī’’ti uyyojetabbo.
183. நாஹங் , பி⁴க்க²வே, ஆதி³கேனேவாதி அஹங், பி⁴க்க²வே, பட²மமேவ மண்டூ³கஸ்ஸ உப்பதித்வா க³மனங் விய அஞ்ஞாராத⁴னங் அரஹத்தே பதிட்டா²னங் ந வதா³மி. அனுபுப்³ப³ஸிக்கா²தி கரணத்தே² பச்சத்தவசனங். பரதோ பத³த்³வயேபி ஏஸேவ நயோ. ஸத்³தா⁴ஜாதோதி ஓகப்பனியஸத்³தா⁴ய ஜாதஸத்³தோ⁴. உபஸங்கமதீதி க³ரூனங் ஸமீபங் க³ச்ச²தி. பயிருபாஸதீதி ஸந்திகே நிஸீத³தி. தா⁴ரேதீதி ஸாது⁴கங் கத்வா தா⁴ரேதி. ச²ந்தோ³ ஜாயதீதி கத்துகம்யதாகுஸலச்ச²ந்தோ³ ஜாயதி. உஸ்ஸஹதீதி வீரியங் கரோதி. துலேதீதி அனிச்சங் து³க்க²ங் அனத்தாதி துலயதி. துலயித்வா பத³ஹதீதி ஏவங் தீரணவிபஸ்ஸனாய துலயந்தோ மக்³க³பதா⁴னங் பத³ஹதி. பஹிதத்தோதி பேஸிதசித்தோ. காயேன சேவ பரமஸச்சந்தி நாமகாயேன நிப்³பா³னஸச்சங் ஸச்சி²கரோதி. பஞ்ஞாய சாதி நாமகாயஸம்பயுத்தாய மக்³க³பஞ்ஞாய படிவிஜ்ஜ²தி பஸ்ஸதி.
183.Nāhaṃ, bhikkhave, ādikenevāti ahaṃ, bhikkhave, paṭhamameva maṇḍūkassa uppatitvā gamanaṃ viya aññārādhanaṃ arahatte patiṭṭhānaṃ na vadāmi. Anupubbasikkhāti karaṇatthe paccattavacanaṃ. Parato padadvayepi eseva nayo. Saddhājātoti okappaniyasaddhāya jātasaddho. Upasaṅkamatīti garūnaṃ samīpaṃ gacchati. Payirupāsatīti santike nisīdati. Dhāretīti sādhukaṃ katvā dhāreti. Chando jāyatīti kattukamyatākusalacchando jāyati. Ussahatīti vīriyaṃ karoti. Tuletīti aniccaṃ dukkhaṃ anattāti tulayati. Tulayitvā padahatīti evaṃ tīraṇavipassanāya tulayanto maggapadhānaṃ padahati. Pahitattoti pesitacitto. Kāyena ceva paramasaccanti nāmakāyena nibbānasaccaṃ sacchikaroti. Paññāya cāti nāmakāyasampayuttāya maggapaññāya paṭivijjhati passati.
இதா³னி யஸ்மா தே ஸத்து² ஆக³மனங் ஸுத்வா பச்சுக்³க³மனமத்தம்பி ந அகங்ஸு, தஸ்மா தேஸங் சரியங் க³ரஹந்தோ ஸாபி நாம, பி⁴க்க²வே, ஸத்³தா⁴ நாஹோஸீதிஆதி³மாஹ. தத்த² கீவதூ³ரேவிமேதி கித்தகங் தூ³ரே டா²னே. யோஜனஸதம்பி யோஜனஸஹஸ்ஸம்பி அபக்கந்தாதி வத்துங் வட்டதி, ந பன கிஞ்சி ஆஹ. சதுப்பத³ங் வெய்யாகரணந்தி சதுஸச்சப்³யாகரணங் ஸந்தா⁴ய வுத்தங்.
Idāni yasmā te satthu āgamanaṃ sutvā paccuggamanamattampi na akaṃsu, tasmā tesaṃ cariyaṃ garahanto sāpi nāma, bhikkhave, saddhā nāhosītiādimāha. Tattha kīvadūrevimeti kittakaṃ dūre ṭhāne. Yojanasatampi yojanasahassampi apakkantāti vattuṃ vaṭṭati, na pana kiñci āha. Catuppadaṃ veyyākaraṇanti catusaccabyākaraṇaṃ sandhāya vuttaṃ.
184. யஸ்ஸுத்³தி³ட்ட²ஸ்ஸாதி யஸ்ஸ உத்³தி³ட்ட²ஸ்ஸ. யோபி ஸோ, பி⁴க்க²வே, ஸத்தா²தி பா³ஹிரகஸத்தா²ரங் த³ஸ்ஸேதி. ஏவரூபீதி ஏவங்ஜாதிகா. பணோபணவியாதி பணவியா ச ஓபணவியா ச . ந உபேதீதி ந ஹோதி. கயவிக்கயகாலே விய அக்³க⁴வட்³ட⁴னஹாபனங் ந ஹோதீதி அத்தோ². அயங் கோ³ணோ கிங் அக்³க⁴தி, வீஸதி அக்³க⁴தீதி ப⁴ணந்தோ பணதி நாம. ந வீஸதி அக்³க⁴தி, த³ஸ அக்³க⁴தீதி ப⁴ணந்தோ ஓபணதி நாம. இத³ங் படிஸேதெ⁴ந்தோ ஆஹ ‘‘பணோபணவியா ந உபேதீ’’தி. இதா³னி தங் பணோபணவியங் த³ஸ்ஸேதுங் ஏவஞ்ச நோ அஸ்ஸ, அத² நங் கரெய்யாம, ந ச நோ ஏவமஸ்ஸ, ந நங் கரெய்யாமாதி ஆஹ.
184.Yassuddiṭṭhassāti yassa uddiṭṭhassa. Yopiso, bhikkhave, satthāti bāhirakasatthāraṃ dasseti. Evarūpīti evaṃjātikā. Paṇopaṇaviyāti paṇaviyā ca opaṇaviyā ca . Na upetīti na hoti. Kayavikkayakāle viya agghavaḍḍhanahāpanaṃ na hotīti attho. Ayaṃ goṇo kiṃ agghati, vīsati agghatīti bhaṇanto paṇati nāma. Na vīsati agghati, dasa agghatīti bhaṇanto opaṇati nāma. Idaṃ paṭisedhento āha ‘‘paṇopaṇaviyā na upetī’’ti. Idāni taṃ paṇopaṇaviyaṃ dassetuṃ evañca no assa, atha naṃ kareyyāma, na ca no evamassa, na naṃ kareyyāmāti āha.
கிங் பன, பி⁴க்க²வேதி, பி⁴க்க²வே, யங் ததா²க³தோ ஸப்³ப³ஸோ ஆமிஸேஹி விஸங்ஸட்டோ² விஹரதி, ஏவங் விஸங்ஸட்ட²ஸ்ஸ ஸத்து²னோ ஏவரூபா பணோபணவியா கிங் யுஜ்ஜிஸ்ஸதி? பரியோகா³ஹிய வத்ததோதி பரியோகா³ஹித்வா உக்கி²பித்வா க³ஹெத்வா வத்தந்தஸ்ஸ. அயமனுத⁴ம்மோதி அயங் ஸபா⁴வோ. ஜானாதி ப⁴க³வா, நாஹங் ஜானாமீதி ப⁴க³வா ஏகாஸனபோ⁴ஜனே ஆனிஸங்ஸங் ஜானாதி, அஹங் ந ஜானாமீதி மயி ஸத்³தா⁴ய தி³வஸஸ்ஸ தயோ வாரே போ⁴ஜனங் பஹாய ஏகாஸனபோ⁴ஜனங் பு⁴ஞ்ஜதி. ருளஹனீயந்தி ரோஹனீயங். ஓஜவந்தந்தி ஸினேஹவந்தங். காமங் தசோ சாதி இமினா சதுரங்க³வீரியங் த³ஸ்ஸேதி. எத்த² ஹி தசோ ஏகங் அங்க³ங், ந்ஹாரு ஏகங், அட்டி² ஏகங், மங்ஸலோஹிதங் ஏகந்தி ஏவங் சதுரங்க³ஸமன்னாக³தங் வீரியங் அதி⁴ட்ட²ஹித்வா அரஹத்தங் அப்பத்வா ந வுட்ட²ஹிஸ்ஸாமீதி ஏவங் படிபஜ்ஜதீதி த³ஸ்ஸேதி. ஸேஸங் ஸப்³ப³த்த² உத்தானமேவ. தே³ஸனங் பன ப⁴க³வா நெய்யபுக்³க³லஸ்ஸ வஸேன அரஹத்தனிகூடேன நிட்டா²பேஸீதி.
Kiṃ pana, bhikkhaveti, bhikkhave, yaṃ tathāgato sabbaso āmisehi visaṃsaṭṭho viharati, evaṃ visaṃsaṭṭhassa satthuno evarūpā paṇopaṇaviyā kiṃ yujjissati? Pariyogāhiya vattatoti pariyogāhitvā ukkhipitvā gahetvā vattantassa. Ayamanudhammoti ayaṃ sabhāvo. Jānāti bhagavā, nāhaṃ jānāmīti bhagavā ekāsanabhojane ānisaṃsaṃ jānāti, ahaṃ na jānāmīti mayi saddhāya divasassa tayo vāre bhojanaṃ pahāya ekāsanabhojanaṃ bhuñjati. Ruḷahanīyanti rohanīyaṃ. Ojavantanti sinehavantaṃ. Kāmaṃ taco cāti iminā caturaṅgavīriyaṃ dasseti. Ettha hi taco ekaṃ aṅgaṃ, nhāru ekaṃ, aṭṭhi ekaṃ, maṃsalohitaṃ ekanti evaṃ caturaṅgasamannāgataṃ vīriyaṃ adhiṭṭhahitvā arahattaṃ appatvā na vuṭṭhahissāmīti evaṃ paṭipajjatīti dasseti. Sesaṃ sabbattha uttānameva. Desanaṃ pana bhagavā neyyapuggalassa vasena arahattanikūṭena niṭṭhāpesīti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
கீடாகி³ரிஸுத்தவண்ணனா நிட்டி²தா.
Kīṭāgirisuttavaṇṇanā niṭṭhitā.
து³தியவக்³க³வண்ணனா நிட்டி²தா.
Dutiyavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. கீடாகி³ரிஸுத்தங் • 10. Kīṭāgirisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 10. கீடாகி³ரிஸுத்தவண்ணனா • 10. Kīṭāgirisuttavaṇṇanā
