| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
10. பி⁴க்கு²ஸங்யுத்தங்
10. Bhikkhusaṃyuttaṃ
1. கோலிதஸுத்தவண்ணனா
1. Kolitasuttavaṇṇanā
235. ஸாவகானங் ஆலாபோதி ஸாவகானங் ஸப்³ரஹ்மசாரிங் உத்³தி³ஸ்ஸ ஆலாபோ. பு³த்³தே⁴ஹி ஸதி³ஸா மா ஹோமாதி பு³த்³தா⁴சிண்ணங் ஸமுதா³சாரங் அகதெ²ந்தேஹி ஸாவகேஹி, ‘‘ஆவுஸோ பி⁴க்க²வே’’தி ஆலபிதா பி⁴க்கூ², ‘‘ஆவுஸோ’’தி படிவசனங் தெ³ந்தி, ந, ‘‘ப⁴ந்தே’’தி. து³தியஜ்ஜா²னே விதக்கவிசாரா நிருஜ்ஜ²ந்தி தேஸங் நிரோதே⁴னேவ தஸ்ஸ ஜா²னஸ்ஸ உப்பாதே³தப்³ப³தோ. யேஸங் நிரோதா⁴தி யேஸங் வசீஸங்கா³ரானங் விதக்கவிசாரானங் நிருஜ்ஜ²னேன ஸுவிக்க²ம்பி⁴தபா⁴வேன ஸத்³தா³யதனங் அப்பவத்திங் க³ச்ச²தி காரணஸ்ஸ தூ³ரதோ பஸ்ஸம்பி⁴தத்தா. அரியோதி நித்³தோ³ஸோ. பரிஸுத்³தோ⁴ துண்ஹீபா⁴வோ, ந தித்தி²யானங் மூக³ப்³ப³தக்³க³ஹணங் விய அபரிஸுத்³தோ⁴தி அதி⁴ப்பாயோ. பட²மஜ்ஜா²னாதீ³னீதி ஆதி³-ஸத்³தே³ன ததியஜ்ஜா²னாதீ³னி ஸங்க³ண்ஹாதி.
235.Sāvakānaṃālāpoti sāvakānaṃ sabrahmacāriṃ uddissa ālāpo. Buddhehi sadisā mā homāti buddhāciṇṇaṃ samudācāraṃ akathentehi sāvakehi, ‘‘āvuso bhikkhave’’ti ālapitā bhikkhū, ‘‘āvuso’’ti paṭivacanaṃ denti, na, ‘‘bhante’’ti. Dutiyajjhāne vitakkavicārā nirujjhanti tesaṃ nirodheneva tassa jhānassa uppādetabbato. Yesaṃ nirodhāti yesaṃ vacīsaṅgārānaṃ vitakkavicārānaṃ nirujjhanena suvikkhambhitabhāvena saddāyatanaṃ appavattiṃ gacchati kāraṇassa dūrato passambhitattā. Ariyoti niddoso. Parisuddho tuṇhībhāvo, na titthiyānaṃ mūgabbataggahaṇaṃ viya aparisuddhoti adhippāyo. Paṭhamajjhānādīnīti ādi-saddena tatiyajjhānādīni saṅgaṇhāti.
ஆரம்மணபூ⁴தேன விதக்கேன ஸஹ க³தா பவத்தாதி விதக்கஸஹக³தாதி ஆஹ ‘‘விதக்காரம்மணா’’தி. விதக்காரம்மணதா ச ஸஞ்ஞாமனஸிகாரானங் ஸுகு²மஆரம்மணக்³க³ஹணவஸேன த³ட்ட²ப்³பா³. தேனாஹ ‘‘ந ஸந்ததோ உபட்ட²ஹிங்ஸூ’’தி. ந பகு³ணங் ஸம்மதே³வ வஸீபா⁴வஸ்ஸ அனாபாதி³தத்தா. ஸஞ்ஞாமனஸிகாராபீதி ததியஜ்ஜா²னாதி⁴க³மாய பவத்தியமானா ஸஞ்ஞாமனஸிகாராபி ஹானபா⁴கி³யாவ அஹேஸுங், ந விஸேஸபா⁴கி³யா. ஸம்மா ட²பேஹீதி ப³ஹித்³தா⁴ விக்கே²பங் பஹாய ஸம்மா அஜ்ஜ²த்தமேவ சித்தங் ட²பேஹி. ஏகக்³க³ங் கரோஹீதி தேனேவ விக்கே²பபடிபா³ஹனேன அவிஹதமானஸதாய சித்தஸமாதா⁴னவஸேன ஏகக்³க³ங் கரோஹி. ஆரோபேஹீதி ஈஸகம்பி ப³ஹும்பி அபதிதங் கத்வா கம்மட்டா²னாரம்மணே ஆரோபேஹி. து³தியஅக்³க³ஸாவகபூ⁴மியா பாரிபூரியா ஆயஸ்மா மஹாபி⁴ஞ்ஞோ, ந யதா² ததா²தி ஆஹ ‘‘மஹாபி⁴ஞ்ஞதந்தி ச²ளபி⁴ஞ்ஞத’’ந்தி. இமினா உபாயேனாதி இமினா ‘‘அத² கோ² மங், ஆவுஸோ’’திஆதி³னா வுத்தேன உபாயேன. வட்³டெ⁴த்வாதி உத்தரி உத்தரி விஸேஸபா⁴கி³யபா⁴வாபாத³னேன ஸமாதி⁴ங் பஞ்ஞஞ்ச ப்³ரூஹெத்வா ப்³ரூஹெத்வா.
Ārammaṇabhūtena vitakkena saha gatā pavattāti vitakkasahagatāti āha ‘‘vitakkārammaṇā’’ti. Vitakkārammaṇatā ca saññāmanasikārānaṃ sukhumaārammaṇaggahaṇavasena daṭṭhabbā. Tenāha ‘‘na santato upaṭṭhahiṃsū’’ti. Na paguṇaṃ sammadeva vasībhāvassa anāpāditattā. Saññāmanasikārāpīti tatiyajjhānādhigamāya pavattiyamānā saññāmanasikārāpi hānabhāgiyāva ahesuṃ, na visesabhāgiyā. Sammā ṭhapehīti bahiddhā vikkhepaṃ pahāya sammā ajjhattameva cittaṃ ṭhapehi. Ekaggaṃ karohīti teneva vikkhepapaṭibāhanena avihatamānasatāya cittasamādhānavasena ekaggaṃ karohi. Āropehīti īsakampi bahumpi apatitaṃ katvā kammaṭṭhānārammaṇe āropehi. Dutiyaaggasāvakabhūmiyā pāripūriyā āyasmā mahābhiñño, na yathā tathāti āha ‘‘mahābhiññatanti chaḷabhiññata’’nti. Iminā upāyenāti iminā ‘‘atha kho maṃ, āvuso’’tiādinā vuttena upāyena. Vaḍḍhetvāti uttari uttari visesabhāgiyabhāvāpādanena samādhiṃ paññañca brūhetvā brūhetvā.
கோலிதஸுத்தவண்ணனா நிட்டி²தா.
Kolitasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. கோலிதஸுத்தங் • 1. Kolitasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. கோலிதஸுத்தவண்ணனா • 1. Kolitasuttavaṇṇanā
