| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
9. கொண்ட³ஞ்ஞஸுத்தவண்ணனா
9. Koṇḍaññasuttavaṇṇanā
217. ஏவங்க³ஹிதனாமோதி ‘‘அஞ்ஞாஸி வத, போ⁴, கொண்ட³ஞ்ஞோ’’தி ஸத்து² வசனங் நிஸ்ஸாய பி⁴க்கூ²ஹி அஞ்ஞேஹி கொண்ட³ஞ்ஞனாமகேஹி விஸேஸனத்த²ங் ஏவங்க³ஹிதனாமோ. த்³வாத³ஸன்னங் ஸங்வச்ச²ரானங் வஸேன சிரஸ்ஸங். ச²த்³த³ந்தப⁴வனேதி ச²த்³த³ந்தனாக³ராஜப⁴வனட்டா²னே. பஞ்ஞவா மஹாஸாவகோ ரத்தஞ்ஞுதாய. ‘‘த³ஸஸஹஸ்ஸசக்கவாளே தே³வமனுஸ்ஸானந்தி த³ஸஸஹஸ்ஸசக்கவாளே தே³வானங், இமஸ்மிங் சக்கவாளே தே³வமனுஸ்ஸானஞ்சாதி ஏவங் த³ஸஸஹஸ்ஸசக்கவாளே தே³வமனுஸ்ஸான’’ந்தி வத³ந்தி. அக்³க³ந்திஆதி³தோ. தத்தா²தி மந்தா³கினிதீரே.
217.Evaṃgahitanāmoti ‘‘aññāsi vata, bho, koṇḍañño’’ti satthu vacanaṃ nissāya bhikkhūhi aññehi koṇḍaññanāmakehi visesanatthaṃ evaṃgahitanāmo. Dvādasannaṃ saṃvaccharānaṃ vasena cirassaṃ. Chaddantabhavaneti chaddantanāgarājabhavanaṭṭhāne. Paññavā mahāsāvako rattaññutāya. ‘‘Dasasahassacakkavāḷe devamanussānanti dasasahassacakkavāḷe devānaṃ, imasmiṃ cakkavāḷe devamanussānañcāti evaṃ dasasahassacakkavāḷe devamanussāna’’nti vadanti. Aggantiādito. Tatthāti mandākinitīre.
வஸ்ஸக்³கே³னாதி வஸ்ஸபடிபாடியா. தந்தி அஞ்ஞாஸிகொண்ட³ஞ்ஞத்தே²ரங். மஹாப்³ரஹ்மானங் விய லோகியமனுஸ்ஸா ஹராயந்தி. பாமொக்க²பூ⁴தோ ஆயஸ்மா தே²ரோ அந்தரந்தரா தத்த² தத்த² ஜனபதே³ வஸித்வா தத³னுக்கமேன மந்தா³கினிதீரங் உபக³தோ, தஸ்மா வுத்தங் – ‘‘இச்சா²மஹங், ப⁴ந்தே, ஜனபதே³ வஸிது’’ந்தி.
Vassaggenāti vassapaṭipāṭiyā. Tanti aññāsikoṇḍaññattheraṃ. Mahābrahmānaṃ viya lokiyamanussā harāyanti. Pāmokkhabhūto āyasmā thero antarantarā tattha tattha janapade vasitvā tadanukkamena mandākinitīraṃ upagato, tasmā vuttaṃ – ‘‘icchāmahaṃ, bhante, janapade vasitu’’nti.
ஆனுபா⁴வஸம்பன்னா தி³ப்³பா³யுகா தே ஹத்தி²னாகா³தி வுத்தங் ‘‘புப்³பே³ பச்சேகபு³த்³தா⁴னங் பாரிசரியாய கதபரிசயா’’தி. தே²ரஸ்ஸ ஸஞ்சரணட்டா²னே ஆவரணஸாகா² ஹரித்வா அபனெத்வா. முகோ²த³கஞ்சேவ த³ந்தகட்ட²ஞ்ச ட²பேதீதி ஸளலதே³வதா³ருகட்டா²தீ³னி அஞ்ஞமஞ்ஞங் க⁴ங்ஸித்வா அக்³கி³ங் நிப்³ப³த்தெத்வா ஜாலெத்வா தத்த² பாஸாணக²ண்டா³னி தாபெத்வா தானி த³ண்ட³கேஹி வட்டெத்வா தளாகாஸு உத³கஸொண்டீ³ஸு கி²பித்வா உத³கஸ்ஸ தத்தபா⁴வங் ஞத்வா நாக³லதாத³ந்தகட்ட²ங் உபனெந்தோ முகோ²த³கஞ்ச ட²பேதி. வத்தங் கரோதீதி அந்தோகுடியா ப³ஹி ச பமுகே²பி அங்க³ணேபி ஸாகா²ப⁴ங்கே³ஹி ஸம்மஜ்ஜந்தோ வக்க²மானநயேன ஆஹாரங் உபனெந்தோ வத்தங் கரோதி.
Ānubhāvasampannā dibbāyukā te hatthināgāti vuttaṃ ‘‘pubbe paccekabuddhānaṃ pāricariyāya kataparicayā’’ti. Therassa sañcaraṇaṭṭhāne āvaraṇasākhā haritvā apanetvā. Mukhodakañceva dantakaṭṭhañca ṭhapetīti saḷaladevadārukaṭṭhādīni aññamaññaṃ ghaṃsitvā aggiṃ nibbattetvā jāletvā tattha pāsāṇakhaṇḍāni tāpetvā tāni daṇḍakehi vaṭṭetvā taḷākāsu udakasoṇḍīsu khipitvā udakassa tattabhāvaṃ ñatvā nāgalatādantakaṭṭhaṃ upanento mukhodakañca ṭhapeti. Vattaṃ karotīti antokuṭiyā bahi ca pamukhepi aṅgaṇepi sākhābhaṅgehi sammajjanto vakkhamānanayena āhāraṃ upanento vattaṃ karoti.
பதிட்ட²ப்பமாணேதி கடிப்பமாணே, அயமேவ வா பாடோ² தாவ மஹந்தமேவாதி யாவ மஹந்தங் ஸேதபது³மவனங் , தாவ மஹந்தமேவ. ஏஸேவ நயோ ரத்தகுமுத³வனாதீ³ஸு. கா²த³ந்தா மனுஸ்ஸா. பக்கபயோக⁴னிகா வியாதி ஸுபக்கபயோக⁴னங் விய. க⁴னபா⁴வேன பன பக்கி²த்தகு²த்³த³மது⁴ விய ஹோதி. தேனாஹ ‘‘ஏதங் பொக்க²ரமது⁴ நாமா’’தி. முளாலந்தி ஸேதபது³மானங் மூலங். பி⁴ஸந்தி தேஸங்யேவ கந்த³ங். ஏகஸ்மிங் பப்³பே³தி ஏகேகஸ்மிங் பப்³ப³ந்தரே. பாத³க⁴டகந்தி தோ³ணஸ்ஸ சதுபா⁴கோ³ ஸண்டா²னதோ கு²த்³த³கோ, தஸ்மா பாத³க⁴டகப்பமாணந்தி தும்ப³மத்தங். ஸொண்டி³ஆவாடேதி கு²த்³த³கஸொண்டி³யோ சேவ கு²த்³த³கஆவாடே ச.
Patiṭṭhappamāṇeti kaṭippamāṇe, ayameva vā pāṭho tāva mahantamevāti yāva mahantaṃ setapadumavanaṃ , tāva mahantameva. Eseva nayo rattakumudavanādīsu. Khādantā manussā. Pakkapayoghanikā viyāti supakkapayoghanaṃ viya. Ghanabhāvena pana pakkhittakhuddamadhu viya hoti. Tenāha ‘‘etaṃ pokkharamadhu nāmā’’ti. Muḷālanti setapadumānaṃ mūlaṃ. Bhisanti tesaṃyeva kandaṃ. Ekasmiṃ pabbeti ekekasmiṃ pabbantare. Pādaghaṭakanti doṇassa catubhāgo saṇṭhānato khuddako, tasmā pādaghaṭakappamāṇanti tumbamattaṃ. Soṇḍiāvāṭeti khuddakasoṇḍiyo ceva khuddakaāvāṭe ca.
ஏதங் போ⁴ஜனந்தி யதா²வுத்தங் நிருத³கபாயஸபோ⁴ஜனங். கேசி ஸஞ்ஜானந்தி யே தே²ரா வுட்³ட⁴தரா. கேசி ந ஸஞ்ஜானந்தி யே நவா அசிரபப்³ப³ஜிதா.
Etaṃ bhojananti yathāvuttaṃ nirudakapāyasabhojanaṃ. Keci sañjānanti ye therā vuḍḍhatarā. Keci na sañjānanti ye navā acirapabbajitā.
பு³த்³தா⁴னுபு³த்³தோ⁴தி பு³த்³த⁴ஸ்ஸ அனுபு³த்³தோ⁴. பா³ள்ஹவீரியோதி சதுன்னங் ஸம்மப்பதா⁴னானங் வஸேன சிரனிசிதவீரியோ. திண்ணங் விவேகானந்தி காயசித்தஉபதி⁴விவேகானங் லாபீ⁴தி யோஜனா. சதஸ்ஸோ வத³தி வங்கீ³ஸத்தே²ரோ ஸயங்படிபா⁴னங், ந ஸேஸாபி⁴ஞ்ஞானங் அபா⁴வதோதி ஆஹ ‘‘இதரா’’திஆதி³. பரிஸா ஸன்னிஸீதி³ நிஸ்ஸத்³த³பா⁴வேன துண்ஹீ அஹோஸீதி அத்தோ². அனுஜானாபேஸீதி பட²மங் அத்தனா ஞாதங் உபட்டி²தங் அத்தனோ பரினிப்³பா³னகாலங் அனு பச்சா² ஸத்தா²ரங் ஜானாபேஸீதி ஏவங் எத்த² அத்தோ² த³ட்ட²ப்³போ³.
Buddhānubuddhoti buddhassa anubuddho. Bāḷhavīriyoti catunnaṃ sammappadhānānaṃ vasena ciranicitavīriyo. Tiṇṇaṃ vivekānanti kāyacittaupadhivivekānaṃ lābhīti yojanā. Catasso vadati vaṅgīsatthero sayaṃpaṭibhānaṃ, na sesābhiññānaṃ abhāvatoti āha ‘‘itarā’’tiādi. Parisā sannisīdi nissaddabhāvena tuṇhī ahosīti attho. Anujānāpesīti paṭhamaṃ attanā ñātaṃ upaṭṭhitaṃ attano parinibbānakālaṃ anu pacchā satthāraṃ jānāpesīti evaṃ ettha attho daṭṭhabbo.
தந்தி ஆஸாள்ஹிபுண்ணமாய இஸிபதனே யங் த³ஸ்ஸனங், யங் வா து³க்கரசரியாயங் தும்ஹாகங் உபட்டா²னங் ஆதி³தோ த³ஸ்ஸனங், தங், ப⁴ந்தே, பட²மத³ஸ்ஸனங். ஓனதவினதாதி ஹெட்டா² உபரி ச ஓனதா வினதா. கம்பெத்வாதி தோ²கங் சாலெத்வா த³ஸ்ஸனத்த²ங் ஏகனின்னாதோ³ தேஸங் ஹத்தி²னாகா³னஞ்சேவ நாக³யக்க²கும்ப⁴ண்டா³னங் தே³வதானஞ்ச ஸத்³தே³ன. ப்³ரஹ்மானோ தே³வானங் அத³ங்ஸூதி ஸம்ப³ந்தோ⁴.
Tanti āsāḷhipuṇṇamāya isipatane yaṃ dassanaṃ, yaṃ vā dukkaracariyāyaṃ tumhākaṃ upaṭṭhānaṃ ādito dassanaṃ, taṃ, bhante, paṭhamadassanaṃ. Onatavinatāti heṭṭhā upari ca onatā vinatā. Kampetvāti thokaṃ cāletvā dassanatthaṃ ekaninnādo tesaṃ hatthināgānañceva nāgayakkhakumbhaṇḍānaṃ devatānañca saddena. Brahmāno devānaṃ adaṃsūti sambandho.
ஸஜ்ஜா²யமகங்ஸு பஸாத³னீயேஸு பஸாத³வஸேன ஸன்னிபதிதபரிஸாய பஸாத³ஜனநத்த²ங் ப⁴க³வதி நிக்க²மித்வாதி ப⁴க³வதி க³ந்த⁴குடிதோ நிக்க²மித்வா. த⁴ரதியேவாதி அது³ட்ட²தங் பத்வா திட்ட²தேவ.
Sajjhāyamakaṃsu pasādanīyesu pasādavasena sannipatitaparisāya pasādajananatthaṃ bhagavati nikkhamitvāti bhagavati gandhakuṭito nikkhamitvā. Dharatiyevāti aduṭṭhataṃ patvā tiṭṭhateva.
கொண்ட³ஞ்ஞஸுத்தவண்ணனா நிட்டி²தா.
Koṇḍaññasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. கொண்ட³ஞ்ஞஸுத்தங் • 9. Koṇḍaññasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. கொண்ட³ஞ்ஞஸுத்தவண்ணனா • 9. Koṇḍaññasuttavaṇṇanā
