| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
9. குஹஸுத்தவண்ணனா
9. Kuhasuttavaṇṇanā
108. நவமே குஹாதி ஸாமந்தஜப்பனாதி³னா குஹனவத்து²னா குஹகா, அஸந்தகு³ணஸம்பா⁴வனிச்சா²ய கோஹஞ்ஞங் கத்வா பரேஸங் விம்ஹாபகாதி அத்தோ². த²த்³தா⁴தி கோதே⁴ன ச மானேன ச த²த்³த⁴மானஸா. ‘‘கோத⁴னோ ஹோதி உபாயாஸப³ஹுலோ, அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதீ’’தி (அ॰ நி॰ 3.25; பு॰ ப॰ 101) ஏவங் வுத்தேன கோதே⁴ன ச, ‘‘து³ப்³ப³சோ ஹோதி தோ³வசஸ்ஸகரணேஹி த⁴ம்மேஹி ஸமன்னாக³தோ அக்க²மோ அப்பத³க்கி²ணக்³கா³ஹீ அனுஸாஸனி’’ந்தி (ம॰ நி॰ 1.181) ஏவங் வுத்தேன தோ³வசஸ்ஸேன ச, ‘‘ஜாதிமதோ³, கொ³த்தமதோ³, ஸிப்பமதோ³, ஆரொக்³யமதோ³, யொப்³ப³னமதோ³, ஜீவிதமதோ³’’தி (விப⁴॰ 832) ஏவங் வுத்தேன ஜாதிமதா³தி³பே⁴தே³ன மதே³ன ச க³ருகாதப்³பே³ஸு க³ரூஸு பரமனிபச்சகாரங் அகத்வா அயோஸலாகங் கி³லித்வா டி²தா விய அனோனதா ஹுத்வா விசரணகா. லபாதி உபலாபகா மிச்சா²ஜீவவஸேன குலஸங்கா³ஹகா பச்சயத்த²ங் பயுத்தவாசாவஸேன நிப்பேஸிகதாவஸேன ச லபகாதி வா அத்தோ².
108. Navame kuhāti sāmantajappanādinā kuhanavatthunā kuhakā, asantaguṇasambhāvanicchāya kohaññaṃ katvā paresaṃ vimhāpakāti attho. Thaddhāti kodhena ca mānena ca thaddhamānasā. ‘‘Kodhano hoti upāyāsabahulo, appampi vutto samāno abhisajjati kuppati byāpajjati patitthīyatī’’ti (a. ni. 3.25; pu. pa. 101) evaṃ vuttena kodhena ca, ‘‘dubbaco hoti dovacassakaraṇehi dhammehi samannāgato akkhamo appadakkhiṇaggāhī anusāsani’’nti (ma. ni. 1.181) evaṃ vuttena dovacassena ca, ‘‘jātimado, gottamado, sippamado, ārogyamado, yobbanamado, jīvitamado’’ti (vibha. 832) evaṃ vuttena jātimadādibhedena madena ca garukātabbesu garūsu paramanipaccakāraṃ akatvā ayosalākaṃ gilitvā ṭhitā viya anonatā hutvā vicaraṇakā. Lapāti upalāpakā micchājīvavasena kulasaṅgāhakā paccayatthaṃ payuttavācāvasena nippesikatāvasena ca lapakāti vā attho.
ஸிங்கீ³தி ‘‘தத்த² கதமங் ஸிங்க³ங்? யங் ஸிங்க³ங் ஸிங்கா³ரதா சாதுரதா சாதுரியங் பரிக்க²த்ததா பாரிக்க²த்திய’’ந்தி (விப⁴॰ 852) ஏவங் வுத்தேஹி ஸிங்க³ஸதி³ஸேஹி பாகடகிலேஸேஹி ஸமன்னாக³தா. உன்னளாதி உக்³க³தனளா, நளஸதி³ஸங் துச்ச²மானங் உக்கி²பித்வா விசரணகா. அஸமாஹிதாதி சித்தேகக்³க³தாமத்தஸ்ஸாபி அலாபி⁴னோ. ந மே தே, பி⁴க்க²வே, பி⁴க்கூ² மாமகாதி தே மய்ஹங் பி⁴க்கூ² மம ஸந்தகா ந ஹொந்தி. மேதி இத³ங் பத³ங் அத்தானங் உத்³தி³ஸ்ஸ பப்³ப³ஜிதத்தா ப⁴க³வதா வுத்தங். யஸ்மா பன தே குஹனாதி³யோக³தோ ந ஸம்மா படிபன்னா, தஸ்மா ‘‘ந மாமகா’’தி வுத்தா. அபக³தாதி யதி³பி தே மம ஸாஸனே பப்³ப³ஜிதா, யதா²னுஸிட்ட²ங் பன அப்படிபஜ்ஜனதோ அபக³தா ஏவ இமஸ்மா த⁴ம்மவினயா, இதோ தே ஸுவிதூ³ரவிதூ³ரே டி²தாதி த³ஸ்ஸேதி. வுத்தஞ்ஹேதங் –
Siṅgīti ‘‘tattha katamaṃ siṅgaṃ? Yaṃ siṅgaṃ siṅgāratā cāturatā cāturiyaṃ parikkhattatā pārikkhattiya’’nti (vibha. 852) evaṃ vuttehi siṅgasadisehi pākaṭakilesehi samannāgatā. Unnaḷāti uggatanaḷā, naḷasadisaṃ tucchamānaṃ ukkhipitvā vicaraṇakā. Asamāhitāti cittekaggatāmattassāpi alābhino. Na me te, bhikkhave, bhikkhū māmakāti te mayhaṃ bhikkhū mama santakā na honti. Meti idaṃ padaṃ attānaṃ uddissa pabbajitattā bhagavatā vuttaṃ. Yasmā pana te kuhanādiyogato na sammā paṭipannā, tasmā ‘‘na māmakā’’ti vuttā. Apagatāti yadipi te mama sāsane pabbajitā, yathānusiṭṭhaṃ pana appaṭipajjanato apagatā eva imasmā dhammavinayā, ito te suvidūravidūre ṭhitāti dasseti. Vuttañhetaṃ –
‘‘நப⁴ஞ்ச தூ³ரே பத²வீ ச தூ³ரே,
‘‘Nabhañca dūre pathavī ca dūre,
பாரங் ஸமுத்³த³ஸ்ஸ ததா³ஹு தூ³ரே;
Pāraṃ samuddassa tadāhu dūre;
ததோ ஹவே தூ³ரதரங் வத³ந்தி,
Tato have dūrataraṃ vadanti,
ஸதஞ்ச த⁴ம்மங் அஸதஞ்ச ராஜா’’தி. (அ॰ நி॰ 4.47; ஜா॰ 2.21.414);
Satañca dhammaṃ asatañca rājā’’ti. (a. ni. 4.47; jā. 2.21.414);
வுத்³தி⁴ங் விரூள்ஹிங் வேபுல்லங் ஆபஜ்ஜந்தீதி ஸீலாதி³கு³ணேஹி வட்³ட⁴னவஸேன வுத்³தி⁴ங், தத்த² நிச்சலபா⁴வேன விரூள்ஹிங், ஸப்³ப³த்த² பத்த²டபா⁴வேன ஸீலாதி³த⁴ம்மக்க²ந்த⁴பாரிபூரியா வேபுல்லங். ந ச தே குஹாதி³ஸபா⁴வா பி⁴க்கூ² ஆபஜ்ஜந்தி, ந ச பாபுணந்தீதி அத்தோ². தே கோ² மே, பி⁴க்க²வே, பி⁴க்கூ² மாமகாதி இதா⁴பி மேதி அத்தானங் உத்³தி³ஸ்ஸ பப்³ப³ஜிதத்தா வத³தி, ஸம்மா படிபன்னத்தா பன ‘‘மாமகா’’தி ஆஹ. வுத்தவிபரியாயேன ஸுக்கபக்கோ² வேதி³தப்³போ³. தத்த² யாவ அரஹத்தமக்³கா³ விரூஹந்தி நாம, அரஹத்தப²லே பன ஸம்பத்தே விரூள்ஹிங் வேபுல்லங் ஆபன்னா நாம. கா³தா² ஸுவிஞ்ஞெய்யா ஏவ.
Vuddhiṃ virūḷhiṃ vepullaṃ āpajjantīti sīlādiguṇehi vaḍḍhanavasena vuddhiṃ, tattha niccalabhāvena virūḷhiṃ, sabbattha patthaṭabhāvena sīlādidhammakkhandhapāripūriyā vepullaṃ. Na ca te kuhādisabhāvā bhikkhū āpajjanti, na ca pāpuṇantīti attho. Te kho me, bhikkhave, bhikkhū māmakāti idhāpi meti attānaṃ uddissa pabbajitattā vadati, sammā paṭipannattā pana ‘‘māmakā’’ti āha. Vuttavipariyāyena sukkapakkho veditabbo. Tattha yāva arahattamaggā virūhanti nāma, arahattaphale pana sampatte virūḷhiṃ vepullaṃ āpannā nāma. Gāthā suviññeyyā eva.
நவமஸுத்தவண்ணனா நிட்டி²தா.
Navamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 9. குஹஸுத்தங் • 9. Kuhasuttaṃ
