| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
7. குக்குரவதிகஸுத்தவண்ணனா
7. Kukkuravatikasuttavaṇṇanā
78. ஏவங் மே ஸுதந்தி குக்குரவதிகஸுத்தங். தத்த² கோலியேஸூதி ஏவங்னாமகே ஜனபதே³. ஸோ ஹி ஏகோபி கோலனக³ரே பதிட்டி²தானங் கோலியானங் ராஜகுமாரானங் நிவாஸட்டா²னத்தா ஏவங் வுச்சதி. தஸ்மிங் கோலியேஸு ஜனபதே³. ஹலித்³த³வஸனந்தி தஸ்ஸ கிர நிக³மஸ்ஸ மாபிதகாலே பீதகவத்த²னிவத்தா² மனுஸ்ஸா நக்க²த்தங் கீளிங்ஸு. தே நக்க²த்தகீளாவஸானே நிக³மஸ்ஸ நாமங் ஆரோபெந்தா ஹலித்³த³வஸனந்தி நாமங் அகங்ஸு. தங் கோ³சரகா³மங் கத்வா விஹரதீதி அத்தோ². விஹாரோ பனெத்த² கிஞ்சாபி ந நியாமிதோ, ததா²பி பு³த்³தா⁴னங் அனுச்ச²விகே ஸேனாஸனேயேவ விஹாஸீதி வேதி³தப்³போ³. கோ³வதிகோதி ஸமாதி³ன்னகோ³வதோ, ஸீஸே ஸிங்கா³னி ட²பெத்வா நங்கு³ட்ட²ங் ப³ந்தி⁴த்வா கா³வீஹி ஸத்³தி⁴ங் திணானி கா²த³ந்தோ விய சரதி. அசேலோதி நக்³கோ³ நிச்சேலோ. ஸேனியோதி தஸ்ஸ நாமங்.
78.Evaṃme sutanti kukkuravatikasuttaṃ. Tattha koliyesūti evaṃnāmake janapade. So hi ekopi kolanagare patiṭṭhitānaṃ koliyānaṃ rājakumārānaṃ nivāsaṭṭhānattā evaṃ vuccati. Tasmiṃ koliyesu janapade. Haliddavasananti tassa kira nigamassa māpitakāle pītakavatthanivatthā manussā nakkhattaṃ kīḷiṃsu. Te nakkhattakīḷāvasāne nigamassa nāmaṃ āropentā haliddavasananti nāmaṃ akaṃsu. Taṃ gocaragāmaṃ katvā viharatīti attho. Vihāro panettha kiñcāpi na niyāmito, tathāpi buddhānaṃ anucchavike senāsaneyeva vihāsīti veditabbo. Govatikoti samādinnagovato, sīse siṅgāni ṭhapetvā naṅguṭṭhaṃ bandhitvā gāvīhi saddhiṃ tiṇāni khādanto viya carati. Aceloti naggo niccelo. Seniyoti tassa nāmaṃ.
குக்குரவதிகோதி ஸமாதி³ன்னகுக்குரவதோ, ஸப்³ப³ங் ஸுனக²கிரியங் கரோதி. உபோ⁴பேதே ஸஹபங்ஸுகீளிகா ஸஹாயகா. குக்குரோவ பலிகுஜ்ஜித்வாதி ஸுனகோ² நாம ஸாமிகஸ்ஸ ஸந்திகே நிஸீத³ந்தோ த்³வீஹி பாதே³ஹி பூ⁴மியங் விலேகி²த்வா குக்குரகூஜிதங் கூஜந்தோ நிஸீத³தி, அயம்பி ‘‘குக்குரகிரியங் கரிஸ்ஸாமீ’’தி ப⁴க³வதா ஸத்³தி⁴ங் ஸம்மோதி³த்வா த்³வீஹி ஹத்தே²ஹி பூ⁴மியங் விலேகி²த்வா ஸீஸங் விது⁴னந்தோ ‘பூ⁴ பூ⁴’தி கத்வா ஹத்த²பாதே³ ஸமிஞ்ஜித்வா ஸுனகோ² விய நிஸீதி³. ச²மானிக்கி²த்தந்தி பூ⁴மியங் ட²பிதங். ஸமத்தங் ஸமாதி³ன்னந்தி பரிபுண்ணங் கத்வா க³ஹிதங். கா க³தீதி கா நிப்ப²த்தி. கோ அபி⁴ஸம்பராயோதி அபி⁴ஸம்பராயம்ஹி கத்த² நிப்³ப³த்தி. அலந்தி தஸ்ஸ அப்பியங் ப⁴விஸ்ஸதீதி யாவததியங் படிபா³ஹதி. குக்குரவதந்தி குக்குரவதஸமாதா³னங்.
Kukkuravatikoti samādinnakukkuravato, sabbaṃ sunakhakiriyaṃ karoti. Ubhopete sahapaṃsukīḷikā sahāyakā. Kukkurova palikujjitvāti sunakho nāma sāmikassa santike nisīdanto dvīhi pādehi bhūmiyaṃ vilekhitvā kukkurakūjitaṃ kūjanto nisīdati, ayampi ‘‘kukkurakiriyaṃ karissāmī’’ti bhagavatā saddhiṃ sammoditvā dvīhi hatthehi bhūmiyaṃ vilekhitvā sīsaṃ vidhunanto ‘bhū bhū’ti katvā hatthapāde samiñjitvā sunakho viya nisīdi. Chamānikkhittanti bhūmiyaṃ ṭhapitaṃ. Samattaṃ samādinnanti paripuṇṇaṃ katvā gahitaṃ. Kā gatīti kā nipphatti. Ko abhisamparāyoti abhisamparāyamhi kattha nibbatti. Alanti tassa appiyaṃ bhavissatīti yāvatatiyaṃ paṭibāhati. Kukkuravatanti kukkuravatasamādānaṃ.
79. பா⁴வேதீதி வட்³டே⁴தி. பரிபுண்ணந்தி அனூனங். அப்³போ³கிண்ணந்தி நிரந்தரங். குக்குரஸீலந்தி குக்குராசாரங். குக்குரசித்தந்தி ‘‘அஜ்ஜ பட்டா²ய குக்குரேஹி காதப்³ப³ங் கரிஸ்ஸாமீ’’தி ஏவங் உப்பன்னசித்தங். குக்குராகப்பந்தி குக்குரானங் க³மனாகாரோ அத்தி², திட்ட²னாகாரோ அத்தி², நிஸீத³னாகாரோ அத்தி², ஸயனாகாரோ அத்தி², உச்சாரபஸ்ஸாவகரணாகாரோ அத்தி², அஞ்ஞே குக்குரே தி³ஸ்வா த³ந்தே விவரித்வா க³மனாகாரோ அத்தி², அயங் குக்குராகப்போ நாம, தங் பா⁴வேதீதி அத்தோ² . இமினாஹங் ஸீலேனாதிஆதீ³ஸு அஹங் இமினா ஆசாரேன வா வதஸமாதா³னேன வா து³க்கரதபசரணேன வா மேது²னவிரதிப்³ரஹ்மசரியேன வாதி அத்தோ². தே³வோதி ஸக்கஸுயாமாதீ³ஸு அஞ்ஞதரோ. தே³வஞ்ஞதரோதி தேஸங் து³தியததியட்டா²னாதீ³ஸு அஞ்ஞதரதே³வோ. மிச்சா²தி³ட்டீ²தி அதே³வலோககா³மிமக்³க³மேவ தே³வலோககா³மிமக்³கோ³தி க³ஹெத்வா உப்பன்னதாய ஸா அஸ்ஸ மிச்சா²தி³ட்டி² நாம ஹோதி. அஞ்ஞதரங் க³திங் வதா³மீதி தஸ்ஸ ஹி நிரயதோ வா திரச்சா²னயோனிதோ வா அஞ்ஞா க³தி நத்தி², தஸ்மா ஏவமாஹ. ஸம்பஜ்ஜமானந்தி தி³ட்டி²யா அஸம்மிஸ்ஸங் ஹுத்வா நிபஜ்ஜமானங்.
79.Bhāvetīti vaḍḍheti. Paripuṇṇanti anūnaṃ. Abbokiṇṇanti nirantaraṃ. Kukkurasīlanti kukkurācāraṃ. Kukkuracittanti ‘‘ajja paṭṭhāya kukkurehi kātabbaṃ karissāmī’’ti evaṃ uppannacittaṃ. Kukkurākappanti kukkurānaṃ gamanākāro atthi, tiṭṭhanākāro atthi, nisīdanākāro atthi, sayanākāro atthi, uccārapassāvakaraṇākāro atthi, aññe kukkure disvā dante vivaritvā gamanākāro atthi, ayaṃ kukkurākappo nāma, taṃ bhāvetīti attho . Imināhaṃ sīlenātiādīsu ahaṃ iminā ācārena vā vatasamādānena vā dukkaratapacaraṇena vā methunaviratibrahmacariyena vāti attho. Devoti sakkasuyāmādīsu aññataro. Devaññataroti tesaṃ dutiyatatiyaṭṭhānādīsu aññataradevo. Micchādiṭṭhīti adevalokagāmimaggameva devalokagāmimaggoti gahetvā uppannatāya sā assa micchādiṭṭhi nāma hoti. Aññataraṃ gatiṃ vadāmīti tassa hi nirayato vā tiracchānayonito vā aññā gati natthi, tasmā evamāha. Sampajjamānanti diṭṭhiyā asammissaṃ hutvā nipajjamānaṃ.
நாஹங், ப⁴ந்தே, ஏதங் ரோதா³மி, யங் மங் ப⁴க³வா ஏவமாஹாதி யங் மங், ப⁴ந்தே, ப⁴க³வா ஏவமாஹ, அஹமேதங் ப⁴க³வதோ ப்³யாகரணங் ந ரோதா³மி ந பரிதே³வாமி, ந அனுத்து²னாமீதி அத்தோ². ஏவங் ஸகம்மகவஸேனெத்த² அத்தோ² வேதி³தப்³போ³, ந அஸ்ஸுமுஞ்சனமத்தேன.
Nāhaṃ, bhante, etaṃ rodāmi, yaṃ maṃ bhagavā evamāhāti yaṃ maṃ, bhante, bhagavā evamāha, ahametaṃ bhagavato byākaraṇaṃ na rodāmi na paridevāmi, na anutthunāmīti attho. Evaṃ sakammakavasenettha attho veditabbo, na assumuñcanamattena.
‘‘மதங் வா அம்ம ரோத³ந்தி, யோ வா ஜீவங் ந தி³ஸ்ஸதி;
‘‘Mataṃ vā amma rodanti, yo vā jīvaṃ na dissati;
ஜீவந்தங் அம்ம பஸ்ஸந்தீ, கஸ்மா மங் அம்ம ரோத³ஸீ’’தி. (ஸங்॰ நி॰ 1.239) –
Jīvantaṃ amma passantī, kasmā maṃ amma rodasī’’ti. (saṃ. ni. 1.239) –
அயஞ்செத்த² பயோகோ³. அபிச மே இத³ங், ப⁴ந்தேதி அபிச கோ² மே இத³ங், ப⁴ந்தே, குக்குரவதங் தீ³க⁴ரத்தங் ஸமாதி³ன்னங், தஸ்மிங் ஸம்பஜ்ஜந்தேபி வுத்³தி⁴ நத்தி², விபஜ்ஜந்தேபி. இதி ‘‘எத்தகங் காலங் மயா கதகம்மங் மோக⁴ங் ஜாத’’ந்தி அத்தனோ விபத்திங் பச்சவெக்க²மானோ ரோதா³மி, ப⁴ந்தேதி.
Ayañcettha payogo. Apica me idaṃ, bhanteti apica kho me idaṃ, bhante, kukkuravataṃ dīgharattaṃ samādinnaṃ, tasmiṃ sampajjantepi vuddhi natthi, vipajjantepi. Iti ‘‘ettakaṃ kālaṃ mayā katakammaṃ moghaṃ jāta’’nti attano vipattiṃ paccavekkhamāno rodāmi, bhanteti.
80. கோ³வதந்திஆதீ³னி குக்குரவதாதீ³ஸு வுத்தனயேனேவ வேதி³தப்³பா³னி. க³வாகப்பந்தி கோ³ஆகப்பங். ஸேஸங் குக்குராகப்பே வுத்தஸதி³ஸமேவ. யதா² பன தத்த² அஞ்ஞே குக்குரே தி³ஸ்வா த³ந்தே விவரித்வா க³மனாகாரோ, ஏவமித⁴ அஞ்ஞே கா³வோ தி³ஸ்வா கண்ணே உக்கி²பித்வா க³மனாகாரோ வேதி³தப்³போ³. ஸேஸங் தாதி³ஸமேவ.
80.Govatantiādīni kukkuravatādīsu vuttanayeneva veditabbāni. Gavākappanti goākappaṃ. Sesaṃ kukkurākappe vuttasadisameva. Yathā pana tattha aññe kukkure disvā dante vivaritvā gamanākāro, evamidha aññe gāvo disvā kaṇṇe ukkhipitvā gamanākāro veditabbo. Sesaṃ tādisameva.
81. சத்தாரிமானி புண்ண கம்மானீதி கஸ்மா இமங் தே³ஸனங் ஆரபி⁴? அயஞ்ஹி தே³ஸனா ஏகச்சகம்மகிரியவஸேன ஆக³தா, இமஸ்மிஞ்ச கம்மசதுக்கே கதி²தே இமேஸங் கிரியா பாகடா ப⁴விஸ்ஸதீதி இமங் தே³ஸனங் ஆரபி⁴. அபிச இமங் கம்மசதுக்கமேவ தே³ஸியமானங் இமே ஸஞ்ஜானிஸ்ஸந்தி , ததோ ஏகோ ஸரணங் க³மிஸ்ஸதி, ஏகோ பப்³ப³ஜித்வா அரஹத்தங் பாபுணிஸ்ஸதீதி அயமேவ ஏதேஸங் ஸப்பாயாதி ஞத்வாபி இமங் தே³ஸனங் ஆரபி⁴.
81.Cattārimānipuṇṇa kammānīti kasmā imaṃ desanaṃ ārabhi? Ayañhi desanā ekaccakammakiriyavasena āgatā, imasmiñca kammacatukke kathite imesaṃ kiriyā pākaṭā bhavissatīti imaṃ desanaṃ ārabhi. Apica imaṃ kammacatukkameva desiyamānaṃ ime sañjānissanti , tato eko saraṇaṃ gamissati, eko pabbajitvā arahattaṃ pāpuṇissatīti ayameva etesaṃ sappāyāti ñatvāpi imaṃ desanaṃ ārabhi.
தத்த² கண்ஹந்தி காளகங் த³ஸஅகுஸலகம்மபத²கம்மங். கண்ஹவிபாகந்தி அபாயே நிப்³ப³த்தனதோ காளகவிபாகங். ஸுக்கந்தி பண்ட³ரங் த³ஸகுஸலகம்மபத²கம்மங். ஸுக்கவிபாகந்தி ஸக்³கே³ நிப்³ப³த்தனதோ பண்ட³ரவிபாகங். கண்ஹஸுக்கந்தி வோமிஸ்ஸககம்மங். கண்ஹஸுக்கவிபாகந்தி ஸுக²து³க்க²விபாகங். மிஸ்ஸககம்மஞ்ஹி கத்வா அகுஸலேன திரச்சா²னயோனியங் மங்க³லஹத்தி²ட்டா²னாதீ³ஸு உப்பன்னோ குஸலேன பவத்தே ஸுக²ங் வேதி³யதி. குஸலேன ராஜகுலேபி நிப்³ப³த்தோ அகுஸலேன பவத்தே து³க்க²ங் வேதி³யதி. அகண்ஹங் அஸுக்கந்தி கம்மக்க²யகரங் சதுமக்³க³சேதனாகம்மங் அதி⁴ப்பேதங். தஞ்ஹி யதி³ கண்ஹங் ப⁴வெய்ய, கண்ஹவிபாகங் த³தெ³ய்ய. யதி³ ஸுக்கங் ப⁴வெய்ய, ஸுக்கவிபாகங் த³தெ³ய்ய. உப⁴யவிபாகஸ்ஸ பன அதா³னதோ அகண்ஹாஸுக்கவிபாகத்தா ‘‘அகண்ஹங் அஸுக்க’’ந்தி வுத்தங். அயங் தாவ உத்³தே³ஸே அத்தோ².
Tattha kaṇhanti kāḷakaṃ dasaakusalakammapathakammaṃ. Kaṇhavipākanti apāye nibbattanato kāḷakavipākaṃ. Sukkanti paṇḍaraṃ dasakusalakammapathakammaṃ. Sukkavipākanti sagge nibbattanato paṇḍaravipākaṃ. Kaṇhasukkanti vomissakakammaṃ. Kaṇhasukkavipākanti sukhadukkhavipākaṃ. Missakakammañhi katvā akusalena tiracchānayoniyaṃ maṅgalahatthiṭṭhānādīsu uppanno kusalena pavatte sukhaṃ vediyati. Kusalena rājakulepi nibbatto akusalena pavatte dukkhaṃ vediyati. Akaṇhaṃ asukkanti kammakkhayakaraṃ catumaggacetanākammaṃ adhippetaṃ. Tañhi yadi kaṇhaṃ bhaveyya, kaṇhavipākaṃ dadeyya. Yadi sukkaṃ bhaveyya, sukkavipākaṃ dadeyya. Ubhayavipākassa pana adānato akaṇhāsukkavipākattā ‘‘akaṇhaṃ asukka’’nti vuttaṃ. Ayaṃ tāva uddese attho.
நித்³தே³ஸே பன ஸப்³யாப³ஜ்ஜ²ந்தி ஸது³க்க²ங். காயஸங்கா²ராதீ³ஸு காயத்³வாரே க³ஹணாதி³வஸேன சோபனப்பத்தா த்³வாத³ஸ அகுஸலசேதனா ஸப்³யாப³ஜ்ஜ²காயஸங்கா²ரோ நாம. வசீத்³வாரே ஹனுஸஞ்சோபனவஸேன வசீபே⁴த³பவத்திகா தாயேவ த்³வாத³ஸ வசீஸங்கா²ரோ நாம. உப⁴யசோபனங் அப்பத்தா ரஹோ சிந்தயந்தஸ்ஸ மனொத்³வாரே பவத்தா மனோஸங்கா²ரோ நாம. இதி தீஸுபி த்³வாரேஸு காயது³ச்சரிதாதி³பே⁴தா³ அகுஸலசேதனாவ ஸங்கா²ராதி வேதி³தப்³பா³. இமஸ்மிஞ்ஹி ஸுத்தே சேதனா து⁴ரங், உபாலிஸுத்தே கம்மங். அபி⁴ஸங்க²ரித்வாதி ஸங்கட்³டி⁴த்வா, பிண்ட³ங் கத்வாதி அத்தோ². ஸப்³யாப³ஜ்ஜ²ங் லோகந்தி ஸது³க்க²ங் லோகங் உபபஜ்ஜந்தி. ஸப்³யாப³ஜ்ஜா² ப²ஸ்ஸா பு²ஸந்தீதி ஸது³க்கா² விபாகப²ஸ்ஸா பு²ஸந்தி. ஏகந்தது³க்க²ந்தி நிரந்தரது³க்க²ங். பூ⁴தாதி ஹெத்வத்தே² நிஸ்ஸக்கவசனங், பூ⁴தகம்மதோ பூ⁴தஸ்ஸ ஸத்தஸ்ஸ உப்பத்தி ஹோதி. இத³ங் வுத்தங் ஹோதி – யதா²பூ⁴தங் கம்மங் ஸத்தா கரொந்தி, ததா²பூ⁴தேன கம்மேன கம்மஸபா⁴க³வஸேன தேஸங் உபபத்தி ஹோதி. தேனேவாஹ ‘‘யங் கரோதி தேன உபபஜ்ஜதீ’’தி. எத்த² ச தேனாதி கம்மேன விய வுத்தா, உபபத்தி ச நாம விபாகேன ஹோதி. யஸ்மா பன விபாகஸ்ஸ கம்மங் ஹேது, தஸ்மா தேன மூலஹேதுபூ⁴தேன கம்மேன நிப்³ப³த்ததீதி அயமெத்த² அத்தோ². ப²ஸ்ஸா பு²ஸந்தீதி யேன கம்மவிபாகேன நிப்³ப³த்தோ, தங்கம்மவிபாகப²ஸ்ஸா பு²ஸந்தி. கம்மதா³யாதா³தி கம்மதா³யஜ்ஜா கம்மமேவ நேஸங் தா³யஜ்ஜங் ஸந்தகந்தி வதா³மி.
Niddese pana sabyābajjhanti sadukkhaṃ. Kāyasaṅkhārādīsu kāyadvāre gahaṇādivasena copanappattā dvādasa akusalacetanā sabyābajjhakāyasaṅkhāro nāma. Vacīdvāre hanusañcopanavasena vacībhedapavattikā tāyeva dvādasa vacīsaṅkhāro nāma. Ubhayacopanaṃ appattā raho cintayantassa manodvāre pavattā manosaṅkhāro nāma. Iti tīsupi dvāresu kāyaduccaritādibhedā akusalacetanāva saṅkhārāti veditabbā. Imasmiñhi sutte cetanā dhuraṃ, upālisutte kammaṃ. Abhisaṅkharitvāti saṅkaḍḍhitvā, piṇḍaṃ katvāti attho. Sabyābajjhaṃ lokanti sadukkhaṃ lokaṃ upapajjanti. Sabyābajjhā phassā phusantīti sadukkhā vipākaphassā phusanti. Ekantadukkhanti nirantaradukkhaṃ. Bhūtāti hetvatthe nissakkavacanaṃ, bhūtakammato bhūtassa sattassa uppatti hoti. Idaṃ vuttaṃ hoti – yathābhūtaṃ kammaṃ sattā karonti, tathābhūtena kammena kammasabhāgavasena tesaṃ upapatti hoti. Tenevāha ‘‘yaṃ karoti tena upapajjatī’’ti. Ettha ca tenāti kammena viya vuttā, upapatti ca nāma vipākena hoti. Yasmā pana vipākassa kammaṃ hetu, tasmā tena mūlahetubhūtena kammena nibbattatīti ayamettha attho. Phassā phusantīti yena kammavipākena nibbatto, taṃkammavipākaphassā phusanti. Kammadāyādāti kammadāyajjā kammameva nesaṃ dāyajjaṃ santakanti vadāmi.
அப்³யாப³ஜ்ஜ²ந்தி நித்³து³க்க²ங் . இமஸ்மிங் வாரே காயத்³வாரே பவத்தா அட்ட² காமாவசரகுஸலசேதனா காயஸங்கா²ரோ நாம. தாயேவ வசீத்³வாரே பவத்தா வசீஸங்கா²ரோ நாம. மனொத்³வாரே பவத்தா தாயேவ அட்ட², திஸ்ஸோ ச ஹெட்டி²மஜா²னசேதனா அப்³யாப³ஜ்ஜ²மனோஸங்கா²ரோ நாம. ஜா²னசேதனா தாவ ஹோது, காமாவசரா கிந்தி அப்³யாப³ஜ்ஜ²மனோஸங்கா²ரோ நாம ஜாதாதி. கஸிணஸஜ்ஜனகாலே ச கஸிணாஸேவனகாலே ச லப்³ப⁴ந்தி. காமாவசரசேதனா பட²மஜ்ஜா²னசேதனாய க⁴டிதா, சதுத்த²ஜ்ஜா²னசேதனா ததியஜ்ஜா²னசேதனாய க⁴டிதா. இதி தீஸுபி த்³வாரேஸு காயஸுசரிதாதி³பே⁴தா³ குஸலசேதனாவ ஸங்கா²ராதி வேதி³தப்³போ³. ததியவாரோ உப⁴யமிஸ்ஸகவஸேன வேதி³தப்³பா³.
Abyābajjhanti niddukkhaṃ . Imasmiṃ vāre kāyadvāre pavattā aṭṭha kāmāvacarakusalacetanā kāyasaṅkhāro nāma. Tāyeva vacīdvāre pavattā vacīsaṅkhāro nāma. Manodvāre pavattā tāyeva aṭṭha, tisso ca heṭṭhimajhānacetanā abyābajjhamanosaṅkhāro nāma. Jhānacetanā tāva hotu, kāmāvacarā kinti abyābajjhamanosaṅkhāro nāma jātāti. Kasiṇasajjanakāle ca kasiṇāsevanakāle ca labbhanti. Kāmāvacaracetanā paṭhamajjhānacetanāya ghaṭitā, catutthajjhānacetanā tatiyajjhānacetanāya ghaṭitā. Iti tīsupi dvāresu kāyasucaritādibhedā kusalacetanāva saṅkhārāti veditabbo. Tatiyavāro ubhayamissakavasena veditabbā.
ஸெய்யதா²பி மனுஸ்ஸாதிஆதீ³ஸு மனுஸ்ஸானங் தாவ காலேன ஸுக²ங் காலேன து³க்க²ங் பாகடமேவ, தே³வேஸு பன பு⁴ம்மதே³வதானங், வினிபாதிகேஸு வேமானிகபேதானங் காலேன ஸுக²ங் காலேன து³க்க²ங் ஹோதீதி வேதி³தப்³ப³ங். ஹத்தி²ஆதீ³ஸு திரச்சா²னேஸுபி லப்³ப⁴தியேவ.
Seyyathāpi manussātiādīsu manussānaṃ tāva kālena sukhaṃ kālena dukkhaṃ pākaṭameva, devesu pana bhummadevatānaṃ, vinipātikesu vemānikapetānaṃ kālena sukhaṃ kālena dukkhaṃ hotīti veditabbaṃ. Hatthiādīsu tiracchānesupi labbhatiyeva.
தத்ராதி தேஸு தீஸு கம்மேஸு. தஸ்ஸ பஹானாய யா சேதனாதி தஸ்ஸ பஹானத்தா²ய மக்³க³சேதனா. கம்மங் பத்வாவ மக்³க³சேதனாய அஞ்ஞோ பண்ட³ரதரோ த⁴ம்மோ நாம நத்தி². இத³ங் பன கம்மசதுக்கங் பத்வா த்³வாத³ஸ அகுஸலசேதனா கண்ஹா நாம, தேபூ⁴மககுஸலசேதனா ஸுக்கா நாம, மக்³க³சேதனா அகண்ஹா அஸுக்காதி ஆக³தா.
Tatrāti tesu tīsu kammesu. Tassa pahānāya yā cetanāti tassa pahānatthāya maggacetanā. Kammaṃ patvāva maggacetanāya añño paṇḍarataro dhammo nāma natthi. Idaṃ pana kammacatukkaṃ patvā dvādasa akusalacetanā kaṇhā nāma, tebhūmakakusalacetanā sukkā nāma, maggacetanā akaṇhā asukkāti āgatā.
82. ‘‘லபெ⁴ய்யாஹங், ப⁴ந்தே’’தி இத³ங் ஸோ ‘‘சிரங் வத மே அனிய்யானிகபக்கே² யோஜெத்வா அத்தா கிலமிதோ, ‘ஸுக்க²னதீ³தீரே ந்ஹாயிஸ்ஸாமீ’தி ஸம்பரிவத்தெந்தேன விய து²ஸே கொட்டெந்தேன விய ச ந கோசி அத்தோ² நிப்பா²தி³தோ, ஹந்தா³ஹங் அத்தானங் யோகே³ யோஜேமீ’’தி சிந்தெத்வா ஆஹ. அத² ப⁴க³வா யோனேன க²ந்த⁴கே தித்தி²யபரிவாஸோ பஞ்ஞத்தோ, யங் அஞ்ஞதித்தி²யபுப்³போ³ ஸாமணேரபூ⁴மியங் டி²தோ – ‘‘அஹங், ப⁴ந்தே, இத்த²ன்னாமோ அஞ்ஞதித்தி²யபுப்³போ³ இமஸ்மிங் த⁴ம்மவினயே ஆகங்கா²மி உபஸம்பத³ங், ஸ்வாஹங், ப⁴ந்தே, ஸங்க⁴ங் சத்தாரோ மாஸே பரிவாஸங் யாசாமீ’’திஆதி³னா (மஹாவ॰ 86) நயேன ஸமாதி³யித்வா பரிவஸதி, தங் ஸந்தா⁴ய ‘‘யோ கோ², ஸேனிய, அஞ்ஞதித்தி²யபுப்³போ³’’திஆதி³மாஹ.
82.‘‘Labheyyāhaṃ, bhante’’ti idaṃ so ‘‘ciraṃ vata me aniyyānikapakkhe yojetvā attā kilamito, ‘sukkhanadītīre nhāyissāmī’ti samparivattentena viya thuse koṭṭentena viya ca na koci attho nipphādito, handāhaṃ attānaṃ yoge yojemī’’ti cintetvā āha. Atha bhagavā yonena khandhake titthiyaparivāso paññatto, yaṃ aññatitthiyapubbo sāmaṇerabhūmiyaṃ ṭhito – ‘‘ahaṃ, bhante, itthannāmo aññatitthiyapubbo imasmiṃ dhammavinaye ākaṅkhāmi upasampadaṃ, svāhaṃ, bhante, saṅghaṃ cattāro māse parivāsaṃ yācāmī’’tiādinā (mahāva. 86) nayena samādiyitvā parivasati, taṃ sandhāya ‘‘yo kho, seniya, aññatitthiyapubbo’’tiādimāha.
தத்த² பப்³ப³ஜ்ஜந்தி வசனஸிலிட்ட²தாவஸேனேவ வுத்தங். அபரிவஸித்வாயேவ ஹி பப்³ப³ஜ்ஜங் லப⁴தி. உபஸம்பத³த்தி²கேன பன நாதிகாலேன கா³மப்பவேஸனாதீ³னி அட்ட² வத்தானி பூரெந்தேன பரிவஸிதப்³ப³ங் . ஆரத்³த⁴சித்தாதி அட்ட²வத்தபூரணேன துட்ட²சித்தா. அயமெத்த² ஸங்கே²போ. வித்தா²ரதோ பனேஸ தித்தி²யபரிவாஸோ ஸமந்தபாஸாதி³காய வினயட்ட²கதா²ய பப்³ப³ஜ்ஜக²ந்த⁴கவண்ணனாயங் (மஹாவ॰ அட்ட²॰ 86) வுத்தனயேனேவ வேதி³தப்³போ³ . அபிச மெத்தா²தி அபிச மே எத்த². புக்³க³லவேமத்ததா விதி³தாதி புக்³க³லனானத்தங் விதி³தங். அயங் புக்³க³லோ பரிவாஸாரஹோ, அயங் ந பரிவாஸாரஹோதி இத³ங் மய்ஹங் பாகடந்தி த³ஸ்ஸேதி.
Tattha pabbajjanti vacanasiliṭṭhatāvaseneva vuttaṃ. Aparivasitvāyeva hi pabbajjaṃ labhati. Upasampadatthikena pana nātikālena gāmappavesanādīni aṭṭha vattāni pūrentena parivasitabbaṃ . Āraddhacittāti aṭṭhavattapūraṇena tuṭṭhacittā. Ayamettha saṅkhepo. Vitthārato panesa titthiyaparivāso samantapāsādikāya vinayaṭṭhakathāya pabbajjakhandhakavaṇṇanāyaṃ (mahāva. aṭṭha. 86) vuttanayeneva veditabbo . Apica metthāti apica me ettha. Puggalavemattatā viditāti puggalanānattaṃ viditaṃ. Ayaṃ puggalo parivāsāraho, ayaṃ na parivāsārahoti idaṃ mayhaṃ pākaṭanti dasseti.
ததோ ஸேனியோ சிந்தேஸி – ‘‘அஹோ அச்ச²ரியங் பு³த்³த⁴ஸாஸனங், யத்த² ஏவங் க⁴ங்ஸித்வா கொட்டெத்வா யுத்தமேவ க³ண்ஹந்தி, அயுத்தங் ச²ட்³டெ³ந்தீ’’தி. ததோ ஸுட்டு²தரங் பப்³ப³ஜ்ஜாய ஸஞ்ஜாதுஸ்ஸாஹோ ஸசே, ப⁴ந்தேதிஆதி³மாஹ. அத² ப⁴க³வா தஸ்ஸ திப்³ப³ச்ச²ந்த³தங் விதி³த்வா ந ஸேனியோ பரிவாஸங் அரஹதீதி அஞ்ஞதரங் பி⁴க்கு²ங் ஆமந்தேஸி – ‘‘க³ச்ச² த்வங், பி⁴க்கு², ஸேனியங் ந்ஹாபெத்வா பப்³பா³ஜெத்வா ஆனேஹீ’’தி. ஸோ ததா² கத்வா தங் பப்³பா³ஜெத்வா ப⁴க³வதோ ஸந்திகங் ஆனயி. ப⁴க³வா க³ணே நிஸீதி³த்வா உபஸம்பாதே³ஸி. தேன வுத்தங் – ‘‘அலத்த² கோ² அசேலோ ஸேனியோ ப⁴க³வதோ ஸந்திகே பப்³ப³ஜ்ஜங் அலத்த² உபஸம்பத³’’ந்தி.
Tato seniyo cintesi – ‘‘aho acchariyaṃ buddhasāsanaṃ, yattha evaṃ ghaṃsitvā koṭṭetvā yuttameva gaṇhanti, ayuttaṃ chaḍḍentī’’ti. Tato suṭṭhutaraṃ pabbajjāya sañjātussāho sace, bhantetiādimāha. Atha bhagavā tassa tibbacchandataṃ viditvā na seniyo parivāsaṃ arahatīti aññataraṃ bhikkhuṃ āmantesi – ‘‘gaccha tvaṃ, bhikkhu, seniyaṃ nhāpetvā pabbājetvā ānehī’’ti. So tathā katvā taṃ pabbājetvā bhagavato santikaṃ ānayi. Bhagavā gaṇe nisīditvā upasampādesi. Tena vuttaṃ – ‘‘alattha kho acelo seniyo bhagavato santike pabbajjaṃ alattha upasampada’’nti.
அசிரூபஸம்பன்னோதி உபஸம்பன்னோ ஹுத்வா நசிரமேவ. வூபகட்டோ²தி வத்து²காமகிலேஸகாமேஹி காயேன ச சித்தேன ச வூபகட்டோ². அப்பமத்தோதி கம்மட்டா²னே ஸதிங் அவிஜஹந்தோ. ஆதாபீதி காயிகசேதஸிகஸங்கா²தேன வீரியாதாபேன ஆதாபீ. பஹிதத்தோதி காயே ச ஜீவிதே ச அனபெக்க²தாய பேஸிதத்தோ விஸ்ஸட்ட²அத்தபா⁴வோ. யஸ்ஸத்தா²யாதி யஸ்ஸ அத்தா²ய. குலபுத்தாதி ஆசாரகுலபுத்தா. ஸம்மதே³வாதி ஹேதுனாவ காரணேனேவ. தத³னுத்தரந்தி தங் அனுத்தரங். ப்³ரஹ்மசரியபரியோஸானந்தி மக்³க³ப்³ரஹ்மசரியபரியோஸானபூ⁴தங் அரஹத்தப²லங். தஸ்ஸ ஹி அத்தா²ய குலபுத்தா பப்³ப³ஜந்தி. தி³ட்டே²வ த⁴ம்மேதி இமஸ்மிங்யேவ அத்தபா⁴வே. ஸயங் அபி⁴ஞ்ஞா ஸச்சி²கத்வாதி அத்தனாயேவ பஞ்ஞாய பச்சக்க²ங் கத்வா, அபரப்பச்சயங் ஞத்வாதி அத்தோ². உபஸம்பஜ்ஜ விஹாஸீதி பாபுணித்வா ஸம்பாதெ³த்வா விஹாஸி. ஏவங் விஹரந்தோவ கீ²ணா ஜாதி…பே॰… அப்³ப⁴ஞ்ஞாஸி.
Acirūpasampannoti upasampanno hutvā nacirameva. Vūpakaṭṭhoti vatthukāmakilesakāmehi kāyena ca cittena ca vūpakaṭṭho. Appamattoti kammaṭṭhāne satiṃ avijahanto. Ātāpīti kāyikacetasikasaṅkhātena vīriyātāpena ātāpī. Pahitattoti kāye ca jīvite ca anapekkhatāya pesitatto vissaṭṭhaattabhāvo. Yassatthāyāti yassa atthāya. Kulaputtāti ācārakulaputtā. Sammadevāti hetunāva kāraṇeneva. Tadanuttaranti taṃ anuttaraṃ. Brahmacariyapariyosānanti maggabrahmacariyapariyosānabhūtaṃ arahattaphalaṃ. Tassa hi atthāya kulaputtā pabbajanti. Diṭṭheva dhammeti imasmiṃyeva attabhāve. Sayaṃ abhiññā sacchikatvāti attanāyeva paññāya paccakkhaṃ katvā, aparappaccayaṃ ñatvāti attho. Upasampajja vihāsīti pāpuṇitvā sampādetvā vihāsi. Evaṃ viharantova khīṇā jāti…pe… abbhaññāsi.
ஏவமஸ்ஸ பச்சவெக்க²ணபூ⁴மிங் த³ஸ்ஸெத்வா அரஹத்தனிகூடேனேவ தே³ஸனங் நிட்டா²பேதுங் ‘‘அஞ்ஞதரோ கோ² பனாயஸ்மா ஸேனியோ அரஹதங் அஹோஸீ’’தி வுத்தங். தத்த² அஞ்ஞதரோதி ஏகோ. அரஹதந்தி அரஹந்தானங், ப⁴க³வதோ ஸாவகானங் அரஹந்தானங் அப்³ப⁴ந்தரோ அஹோஸீதி அயமேவத்த² அதி⁴ப்பாயோ. ஸேஸங் ஸப்³ப³த்த² உத்தானமேவாதி.
Evamassa paccavekkhaṇabhūmiṃ dassetvā arahattanikūṭeneva desanaṃ niṭṭhāpetuṃ ‘‘aññataro kho panāyasmā seniyo arahataṃ ahosī’’ti vuttaṃ. Tattha aññataroti eko. Arahatanti arahantānaṃ, bhagavato sāvakānaṃ arahantānaṃ abbhantaro ahosīti ayamevattha adhippāyo. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
குக்குரவதிகஸுத்தவண்ணனா நிட்டி²தா.
Kukkuravatikasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. குக்குரவதிகஸுத்தங் • 7. Kukkuravatikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 7. குக்குரவதிகஸுத்தவண்ணனா • 7. Kukkuravatikasuttavaṇṇanā
