| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. குலக⁴ரணீஸுத்தவண்ணனா
8. Kulagharaṇīsuttavaṇṇanā
228. ஓகா³ஹப்பத்தோதி விஸ்ஸாஸவஸேன அனுப்பவேஸங் பத்தோ. அஞ்ஞதரங் குலந்தி தஸ்மிங் குலே ஜாயம்பதிங் ஸந்தா⁴ய வத³தி. ‘‘ப³ஹூபகாரங் மே ஏதங் குலங் சிரங் ஸப்பாயாஹாரதா³னாதி³னா; தஸ்மா இதா⁴ஹங் அக்³க³த³க்கி²ணெய்யோ ஜாதோ; இமேஸங்யேவ தெ³ய்யத⁴ம்மபடிக்³க³ண்ஹனேன புஞ்ஞங் வட்³டெ⁴ஸ்ஸாமீ’’தி சிந்தேஸி. தேனாஹ ‘‘அஞ்ஞத்த² க³ந்த்வா கிங் கரிஸ்ஸாமீ’’திஆதி³. ஸாதி தே³வதா. உபோ⁴பேதேதி தங் பி⁴க்கு²ஞ்ச க⁴ரணிஞ்ச ஸந்தா⁴ய வத³தி. படிகா³த⁴ப்பத்தாதி படிகா³த⁴ங் பத்தா அஞ்ஞமஞ்ஞஸ்மிங் பதிட்டி²தவிஸ்ஸாஸேன.
228.Ogāhappattoti vissāsavasena anuppavesaṃ patto. Aññataraṃ kulanti tasmiṃ kule jāyampatiṃ sandhāya vadati. ‘‘Bahūpakāraṃ me etaṃ kulaṃ ciraṃ sappāyāhāradānādinā; tasmā idhāhaṃ aggadakkhiṇeyyo jāto; imesaṃyeva deyyadhammapaṭiggaṇhanena puññaṃ vaḍḍhessāmī’’ti cintesi. Tenāha ‘‘aññattha gantvā kiṃ karissāmī’’tiādi. Sāti devatā. Ubhopeteti taṃ bhikkhuñca gharaṇiñca sandhāya vadati. Paṭigādhappattāti paṭigādhaṃ pattā aññamaññasmiṃ patiṭṭhitavissāsena.
விஸ்ஸமப்பத்திவஸேன ஸந்திட்ட²ந்தி எத்தா²தி ஸண்டா²னங், விஸ்ஸமனட்டா²னங். ஸமாக³ந்த்வாதி ஸன்னிபதித்வா. படிஞ்ஞூதா³ஹரணேஹி மந்தயதீதி மந்தனங், ஞாபகங் காரணங். படிலோமஸத்³தா³தி படிலோமபா⁴வேன பதிதத்தா அஸச்சவிபா⁴வனா படிகூலஸத்³தா³. தேன காரணேனாதி தேன காரணபடிரூபகேன மிச்சா²வசனேன. ந மங்குஹோதப்³ப³ங் அகாரகபா⁴வதோ. ஸத்³தே³ன பரிதஸ்ஸதீதி பரேஹி அத்தனி பயுத்தமிச்சா²ஸத்³த³மத்தேன பரிதஸ்ஸனஸீலோ. வதங் ந ஸம்பஜ்ஜதீதி யதா²ஸமாதி³ன்னவதங் லஹுசித்ததாய ந பாரிபூரிங் க³ச்ச²தி. ஸம்பன்னவதோதி பரிபுண்ணஸீலாதி³வதகு³ணோ
Vissamappattivasena santiṭṭhanti etthāti saṇṭhānaṃ, vissamanaṭṭhānaṃ. Samāgantvāti sannipatitvā. Paṭiññūdāharaṇehi mantayatīti mantanaṃ, ñāpakaṃ kāraṇaṃ. Paṭilomasaddāti paṭilomabhāvena patitattā asaccavibhāvanā paṭikūlasaddā. Tena kāraṇenāti tena kāraṇapaṭirūpakena micchāvacanena. Na maṅkuhotabbaṃ akārakabhāvato. Saddena paritassatīti parehi attani payuttamicchāsaddamattena paritassanasīlo. Vataṃ na sampajjatīti yathāsamādinnavataṃ lahucittatāya na pāripūriṃ gacchati. Sampannavatoti paripuṇṇasīlādivataguṇo
குலக⁴ரணீஸுத்தவண்ணனா நிட்டி²தா.
Kulagharaṇīsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. குலக⁴ரணீஸுத்தங் • 8. Kulagharaṇīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. குலக⁴ரணீஸுத்தவண்ணனா • 8. Kulagharaṇīsuttavaṇṇanā
