| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
9. குலஸுத்தவண்ணனா
9. Kulasuttavaṇṇanā
361. ஏவங் பவத்தஈஹிதிகாதி ஏவங் த்³விதா⁴ பவத்தஈஹிதிகா. த்³வீஹிதிகா து³க்கரஜீவிகபயோகா³. ஸலாகமத்தங் வுத்தங் எத்தா²தி ஸலாகா வுத்தா, புரிமபதே³ உத்தரபத³லோபோ. உப⁴தோகோடிகந்தி யதி³ ‘‘குலானுத³யங் ந வண்ணேமீ’’தி வத³தி, ‘‘பூ⁴தா நிக்கருணா ஸமண தும்ஹே’’தி வாத³ங் ஆரோபேஹி. அத² ஸப்³ப³தா³பி ‘‘குலானுத³யங் வண்ணேமீ’’தி வத³தி. ஏவங் ஸந்தே ‘‘கஸ்மா ஏவங் து³ப்³பி⁴க்கே² காலே மஹதியா பரிஸாய பரிவுதோ ஜனபத³சாரிகங் சரந்தா குலூபச்சே²தா³ய படிபஜ்ஜதா²’’தி ஏவங் உப⁴தோகோடிகங் வாத³ங் ஆரோபேஹீதி கா³மணிங் உய்யோஜேஸி.
361.Evaṃ pavattaīhitikāti evaṃ dvidhā pavattaīhitikā. Dvīhitikā dukkarajīvikapayogā. Salākamattaṃ vuttaṃ etthāti salākā vuttā, purimapade uttarapadalopo. Ubhatokoṭikanti yadi ‘‘kulānudayaṃ na vaṇṇemī’’ti vadati, ‘‘bhūtā nikkaruṇā samaṇa tumhe’’ti vādaṃ āropehi. Atha sabbadāpi ‘‘kulānudayaṃ vaṇṇemī’’ti vadati. Evaṃ sante ‘‘kasmā evaṃ dubbhikkhe kāle mahatiyā parisāya parivuto janapadacārikaṃ carantā kulūpacchedāya paṭipajjathā’’ti evaṃ ubhatokoṭikaṃ vādaṃ āropehīti gāmaṇiṃ uyyojesi.
த்³வே அந்தேதி உபோ⁴ கோடியோ. ப³ஹி நீஹரிதுந்தி ந வண்ணேமி வண்ணேமீதி த்³வே அந்தே மோசெந்தோ தங் புச்சி²தமத்த²ங் ப³ஹி நீஹரதி நாம. தத்த² தோ³ஸங் த³த்வா சோதெ³ந்தோ தங் அபுச்ச²ங் கரொந்தோ கி³லித்வா விய அந்தோ பவேஸேதி நாம.
Dve anteti ubho koṭiyo. Bahi nīharitunti na vaṇṇemi vaṇṇemīti dve ante mocento taṃ pucchitamatthaṃ bahi nīharati nāma. Tattha dosaṃ datvā codento taṃ apucchaṃ karonto gilitvā viya anto paveseti nāma.
இதோ ஸோ கா³மணீதிஆதி³ அத்தனோ பி⁴க்கூ²னங் அஞ்ஞேஸஞ்ச அத்த²காமானங் பி⁴க்க²ப்பதா³னேன அனிட்ட²ப்பத்திஅபா⁴வத³ஸ்ஸனத்த²ங் ஆரத்³த⁴ங். தா³னேன ஸம்பூ⁴தானீதி தா³னமயேன புஞ்ஞகிரியவத்து²னா ஸம்மதே³வ பூ⁴திங் வட்³டி⁴ங் பத்தானி. ஸச்சேன அரியவோஹாரேன ஸம்மதே³வ பூ⁴தானி உப்பன்னானி ஸச்சஸம்பூ⁴தானீதி ஆஹ ‘‘ஸச்சங் நாம ஸச்சவாதி³தா’’தி. ஸேஸஸீலந்தி அட்ட²வித⁴அரியவோஹாரதோ அஞ்ஞஸீலங். நிஹிதந்தி தஸ்மிங் குலே புப்³ப³புரிஸேஹி நிதா⁴னபா⁴வேன நிஹிதங். து³ப்பயுத்தாதி கஸிவாணிஜ்ஜாதி³வஸேன து³ட்டு² பயுத்தா கம்மந்தா. விபஜ்ஜந்தீதி நஸ்ஸந்தி. குலங்கா³ரோதி குலஸ்ஸ அங்கா³ரஸதி³ஸோ வினாஸகபுக்³க³லோ. அனிச்சதாதி மரணங். தஸ்மிங் குலே பதா⁴னபுரிஸானங் போ⁴கா³னங் வா ஸப்³ப³ஸோ வினாஸோ. தேனாஹ ‘‘ஹுத்வா அபா⁴வோ’’திஆதி³.
Ito so gāmaṇītiādi attano bhikkhūnaṃ aññesañca atthakāmānaṃ bhikkhappadānena aniṭṭhappattiabhāvadassanatthaṃ āraddhaṃ. Dānena sambhūtānīti dānamayena puññakiriyavatthunā sammadeva bhūtiṃ vaḍḍhiṃ pattāni. Saccena ariyavohārena sammadeva bhūtāni uppannāni saccasambhūtānīti āha ‘‘saccaṃ nāma saccavāditā’’ti. Sesasīlanti aṭṭhavidhaariyavohārato aññasīlaṃ. Nihitanti tasmiṃ kule pubbapurisehi nidhānabhāvena nihitaṃ. Duppayuttāti kasivāṇijjādivasena duṭṭhu payuttā kammantā. Vipajjantīti nassanti. Kulaṅgāroti kulassa aṅgārasadiso vināsakapuggalo. Aniccatāti maraṇaṃ. Tasmiṃ kule padhānapurisānaṃ bhogānaṃ vā sabbaso vināso. Tenāha ‘‘hutvā abhāvo’’tiādi.
குலஸுத்தவண்ணனா நிட்டி²தா.
Kulasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. குலஸுத்தங் • 9. Kulasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. குலஸுத்தவண்ணனா • 9. Kulasuttavaṇṇanā
