සංයුත්ත නිකාය 14.22

2. දුතියවග්ග

කුසීතමූලකසුත්ත

සාවත්ථියං විහරති.

“ධාතුසෝව, භික්ඛවේ, සත්තා සංසන්දන්ති සමේන්ති. කුසීතා කුසීතේහි සද්ධිං සංසන්දන්ති සමේන්ති; මුට්ඨස්සතිනෝ මුට්ඨස්සතීහි සද්ධිං සංසන්දන්ති සමේන්ති; දුප්පඤ්ඤා දුප්පඤ්ඤේහි සද්ධිං සංසන්දන්ති සමේන්ති; ආරද්ධවීරියා ආරද්ධවීරියේහි සද්ධිං සංසන්දන්ති සමේන්ති; උපට්ඨිතස්සතිනෝ උපට්ඨිතස්සතීහි සද්ධිං සංසන්දන්ති සමේන්ති; පඤ්ඤවන්තෝ පඤ්ඤවන්තේහි සද්ධිං සංසන්දන්ති සමේන්තී”ති …පේ….

ද්වාදසමං.

(සබ්බත්ථ අතීතානාගතපච්චුප්පන්නං කාතබ්බං.)

දුතියෝ වග්ගෝ.

තස්සුද්දානං

සත්තිමා සනිදානඤ්ච, ගිඤ්ජකාවසථේන ච; හීනාධිමුත්ති චඞ්කමං, සගාථා අස්සද්ධසත්තමං.

අස්සද්ධමූලකා පඤ්ච, චත්තාරෝ අහිරිකමූලකා; අනෝත්තප්පමූලකා තීණි, දුවේ අප්පස්සුතේන ච.

කුසීතං ඒකකං වුත්තං, සුත්තන්තා තීණි පඤ්චකා; බාවීසති වුත්තා සුත්තා, දුතියෝ වග්ගෝ පවුච්චතීති.