| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
6. லடுகிகோபமஸுத்தவண்ணனா
6. Laṭukikopamasuttavaṇṇanā
148. ஏவங் மே ஸுதந்தி லடுகிகோபமஸுத்தங். தத்த² யேன ஸோ வனஸண்டோ³தி அயம்பி மஹாஉதா³யித்தே²ரோ ப⁴க³வதா ஸத்³தி⁴ங்யேவ பிண்டா³ய பவிஸித்வா ஸத்³தி⁴ங் படிக்கமி. தஸ்மா யேன ஸோ ப⁴க³வதா உபஸங்கமந்தோ வனஸண்டோ³ தேனுபஸங்கமீதி வேதி³தப்³போ³. அபஹத்தாதி அபஹாரகோ. உபஹத்தாதி உபஹாரகோ. படிஸல்லானா வுட்டி²தோதி ப²லஸமாபத்திதோ வுட்டி²தோ.
148.Evaṃme sutanti laṭukikopamasuttaṃ. Tattha yena so vanasaṇḍoti ayampi mahāudāyitthero bhagavatā saddhiṃyeva piṇḍāya pavisitvā saddhiṃ paṭikkami. Tasmā yena so bhagavatā upasaṅkamanto vanasaṇḍo tenupasaṅkamīti veditabbo. Apahattāti apahārako. Upahattāti upahārako. Paṭisallānā vuṭṭhitoti phalasamāpattito vuṭṭhito.
149. யங் ப⁴க³வாதி யஸ்மிங் ஸமயே ப⁴க³வா. இங்கா⁴தி ஆணத்தியங் நிபாதோ. அஞ்ஞத²த்தந்தி சித்தஸ்ஸ அஞ்ஞத²த்தங். தஞ்ச கோ² ந ப⁴க³வந்தங் படிச்ச, ஏவரூபங் பன பணீதபோ⁴ஜனங் அலப⁴ந்தா கத²ங் யாபெஸ்ஸாமாதி ஏவங் பணீதபோ⁴ஜனங் படிச்ச அஹோஸீதி வேதி³தப்³ப³ங். பூ⁴தபுப்³ப³ந்தி இமினா ரத்திபோ⁴ஜனஸ்ஸ பணீதபா⁴வங் த³ஸ்ஸேதி. ஸூபெய்யந்தி ஸூபேன உபனேதப்³ப³ங் மச்ச²மங்ஸகளீராதி³. ஸமக்³கா³ பு⁴ஞ்ஜிஸ்ஸாமாதி ஏகதோ பு⁴ஞ்ஜிஸ்ஸாம. ஸங்க²தியோதி அபி⁴ஸங்கா²ரிககா²த³னீயானி. ஸப்³பா³ தா ரத்திந்தி ஸப்³பா³ தா ஸங்க²தியோ ரத்திங்யேவ ஹொந்தி, தி³வா பன அப்பா பரித்தா தோ²கிகா ஹொந்தீதி. மனுஸ்ஸா ஹி தி³வா யாகு³கஞ்ஜியாதீ³ஹி யாபெத்வாபி ரத்திங் யதா²ஸத்தி யதா²பணீதமேவ பு⁴ஞ்ஜந்தி.
149.Yaṃbhagavāti yasmiṃ samaye bhagavā. Iṅghāti āṇattiyaṃ nipāto. Aññathattanti cittassa aññathattaṃ. Tañca kho na bhagavantaṃ paṭicca, evarūpaṃ pana paṇītabhojanaṃ alabhantā kathaṃ yāpessāmāti evaṃ paṇītabhojanaṃ paṭicca ahosīti veditabbaṃ. Bhūtapubbanti iminā rattibhojanassa paṇītabhāvaṃ dasseti. Sūpeyyanti sūpena upanetabbaṃ macchamaṃsakaḷīrādi. Samaggā bhuñjissāmāti ekato bhuñjissāma. Saṅkhatiyoti abhisaṅkhārikakhādanīyāni. Sabbā tā rattinti sabbā tā saṅkhatiyo rattiṃyeva honti, divā pana appā parittā thokikā hontīti. Manussā hi divā yāgukañjiyādīhi yāpetvāpi rattiṃ yathāsatti yathāpaṇītameva bhuñjanti.
புன பூ⁴தபுப்³ப³ந்தி இமினா ரத்தி விகாலபோ⁴ஜனே ஆதீ³னவங் த³ஸ்ஸேதி. தத்த² அந்த⁴காரதிமிஸாயந்தி ப³ஹலந்த⁴காரே. மாணவேஹீதி சோரேஹி. கதகம்மேஹீதி கதசோரகம்மேஹி. சோரா கிர கதகம்மா யங் நேஸங் தே³வதங் ஆயாசித்வா கம்மங் நிப்ப²ன்னங், தஸ்ஸ உபஹாரத்தா²ய மனுஸ்ஸே மாரெத்வா க³லலோஹிதாதீ³னி க³ண்ஹந்தி. தே அஞ்ஞேஸு மனுஸ்ஸேஸு மாரியமானேஸு கோலாஹலா உப்பஜ்ஜிஸ்ஸந்தி, பப்³ப³ஜிதங் பரியேஸந்தோ நாம நத்தீ²தி மஞ்ஞமானா பி⁴க்கூ² க³ஹெத்வா மாரெந்தி. தங் ஸந்தா⁴யேதங் வுத்தங். அகதகம்மேஹீதி அடவிதோ கா³மங் ஆக³மனகாலே கம்மனிப்ப²ன்னத்த²ங் புரேதரங் ப³லிகம்மங் காதுகாமேஹி. அஸத்³த⁴ம்மேன நிமந்தேதீதி ‘‘ஏஹி பி⁴க்கு² அஜ்ஜேகரத்திங் இதே⁴வ பு⁴ஞ்ஜித்வா இத⁴ வஸித்வா ஸம்பத்திங் அனுப⁴வித்வா ஸ்வே க³மிஸ்ஸஸீ’’தி மேது²னத⁴ம்மேன நிமந்தேதி.
Puna bhūtapubbanti iminā ratti vikālabhojane ādīnavaṃ dasseti. Tattha andhakāratimisāyanti bahalandhakāre. Māṇavehīti corehi. Katakammehīti katacorakammehi. Corā kira katakammā yaṃ nesaṃ devataṃ āyācitvā kammaṃ nipphannaṃ, tassa upahāratthāya manusse māretvā galalohitādīni gaṇhanti. Te aññesu manussesu māriyamānesu kolāhalā uppajjissanti, pabbajitaṃ pariyesanto nāma natthīti maññamānā bhikkhū gahetvā mārenti. Taṃ sandhāyetaṃ vuttaṃ. Akatakammehīti aṭavito gāmaṃ āgamanakāle kammanipphannatthaṃ puretaraṃ balikammaṃ kātukāmehi. Asaddhammena nimantetīti ‘‘ehi bhikkhu ajjekarattiṃ idheva bhuñjitvā idha vasitvā sampattiṃ anubhavitvā sve gamissasī’’ti methunadhammena nimanteti.
புன பூ⁴தபுப்³ப³ந்தி இமினா அத்தனா தி³ட்ட²காரணங் கதே²தி. விஜ்ஜந்தரிகாயாதி விஜ்ஜுவிஜ்ஜோதனக்க²ணே . விஸ்ஸரமகாஸீதி மஹாஸத்³த³மகாஸி. அபு⁴ம்மேதி பூ⁴’தி வட்³டி⁴, அபூ⁴’தி அவட்³டி⁴, வினாஸோ மய்ஹந்தி அத்தோ². பிஸாசோ வத மந்தி பிஸாசோ மங் கா²தி³துங் ஆக³தோ வத. ஆதுமாரீ மாதுமாரீதி எத்த² ஆதூதி பிதா, மாதூதி மாதா. இத³ங் வுத்தங் ஹோதி – யஸ்ஸ பிதா வா மாதா வா அத்தி², தங் மாதாபிதரோ அம்ஹாகங் புத்தகோதி யதா² ததா² வா உப்பாதெ³த்வா யங்கிஞ்சி கா²த³னீயபோ⁴ஜனீயங் த³த்வா ஏகஸ்மிங் டா²னே ஸயாபெந்தி. ஸோ ஏவங் ரத்திங் பிண்டா³ய ந சரதி. துய்ஹங் பன மாதாபிதரோ மதா மஞ்ஞே, தேன ஏவங் சரஸீதி.
Puna bhūtapubbanti iminā attanā diṭṭhakāraṇaṃ katheti. Vijjantarikāyāti vijjuvijjotanakkhaṇe . Vissaramakāsīti mahāsaddamakāsi. Abhummeti bhū’ti vaḍḍhi, abhū’ti avaḍḍhi, vināso mayhanti attho. Pisāco vata manti pisāco maṃ khādituṃ āgato vata. Ātumārī mātumārīti ettha ātūti pitā, mātūti mātā. Idaṃ vuttaṃ hoti – yassa pitā vā mātā vā atthi, taṃ mātāpitaro amhākaṃ puttakoti yathā tathā vā uppādetvā yaṃkiñci khādanīyabhojanīyaṃ datvā ekasmiṃ ṭhāne sayāpenti. So evaṃ rattiṃ piṇḍāya na carati. Tuyhaṃ pana mātāpitaro matā maññe, tena evaṃ carasīti.
150. ஏவமேவாதி ஏவமேவ கிஞ்சி ஆனிஸங்ஸங் அபஸ்ஸந்தா நிக்காரணேனேவ. ஏவமாஹங்ஸூதி க³ரஹந்தோ ஆஹ. தத்த² ஆஹங்ஸூதி வத³ந்தி. கிங் பனிமஸ்ஸாதி இமஸ்ஸ அப்பமத்தகஸ்ஸ ஹேது கிங் வத்தப்³ப³ங் நாம, நனு அபஸ்ஸந்தேன விய அஸுணந்தேன விய ப⁴விதப்³ப³ந்தி. ஓரமத்தகஸ்ஸாதி பரித்தமத்தகஸ்ஸ. அதி⁴ஸல்லிக²தேவாயந்தி அயங் ஸமணோ நவனீதங் பிஸந்தோ விய பது³மனாளஸுத்தங் ககசேன ஓக்கந்தந்தோ விய அதிஸல்லேக²தி, அதிவாயாமங் கரோதி. ஸிக்கா²காமாதி ஸாரிபுத்தமொக்³க³ல்லானாத³யோ விய ஸிக்கா²காமா, தேஸு ச அப்பச்சயங் உபட்ட²பெந்தி. தேஸஞ்ஹி ஏவங் ஹோதி ‘‘ஸசே ஏதே ‘அப்பமத்தகமேதங், ஹரத² ப⁴க³வா’தி வதெ³ய்யுங், கிங் ஸத்தா² ந ஹரெய்ய. ஏவங் பன அவத்வா ப⁴க³வந்தங் பரிவாரெத்வா நிஸின்னா ‘ஏவங் ப⁴க³வா, ஸாது⁴ ப⁴க³வா, பஞ்ஞபேத² ப⁴க³வா’தி அதிரேகதரங் உஸ்ஸாஹங் படிலப⁴ந்தீ’’தி. தஸ்மா தேஸு அப்பச்சயங் உபட்ட²பெந்தி.
150.Evamevāti evameva kiñci ānisaṃsaṃ apassantā nikkāraṇeneva. Evamāhaṃsūti garahanto āha. Tattha āhaṃsūti vadanti. Kiṃ panimassāti imassa appamattakassa hetu kiṃ vattabbaṃ nāma, nanu apassantena viya asuṇantena viya bhavitabbanti. Oramattakassāti parittamattakassa. Adhisallikhatevāyanti ayaṃ samaṇo navanītaṃ pisanto viya padumanāḷasuttaṃ kakacena okkantanto viya atisallekhati, ativāyāmaṃ karoti. Sikkhākāmāti sāriputtamoggallānādayo viya sikkhākāmā, tesu ca appaccayaṃ upaṭṭhapenti. Tesañhi evaṃ hoti ‘‘sace ete ‘appamattakametaṃ, haratha bhagavā’ti vadeyyuṃ, kiṃ satthā na hareyya. Evaṃ pana avatvā bhagavantaṃ parivāretvā nisinnā ‘evaṃ bhagavā, sādhu bhagavā, paññapetha bhagavā’ti atirekataraṃ ussāhaṃ paṭilabhantī’’ti. Tasmā tesu appaccayaṃ upaṭṭhapenti.
தேஸந்தி தேஸங் ஏகச்சானங் மோக⁴புரிஸானங். தந்தி தங் அப்பமத்தகங் பஹாதப்³ப³ங். தூ²லோ கலிங்க³ரோதி க³லே ப³த்³த⁴ங் மஹாகட்ட²ங் விய ஹோதி. லடுகிகா ஸகுணிகாதி சாதகஸகுணிகா. ஸா கிர ரவஸதங் ரவித்வா நச்சஸதங் நச்சித்வா ஸகிங் கோ³சரங் க³ண்ஹாதி. ஆகாஸதோ பூ⁴மியங் பதிட்டி²தங் பன நங் தி³ஸ்வா வச்ச²பாலகாத³யோ கீளனத்த²ங் பூதிலதாய ப³ந்த⁴ந்தி. தங் ஸந்தா⁴யேதங் வுத்தங். ஆக³மேதீதி உபேதி. தஞ்ஹி தஸ்ஸாதி தங் பூதிலதாப³ந்த⁴னங் தஸ்ஸா அப்பஸரீரதாய சேவ அப்பதா²மதாய ச ப³லவப³ந்த⁴னங் நாம, மஹந்தங் நாளிகேரரஜ்ஜு விய து³ச்சி²ஜ்ஜங் ஹோதி. தேஸந்தி தேஸங் மோக⁴புரிஸானங் ஸத்³தா⁴மந்த³தாய ச பஞ்ஞாமந்த³தாய ச ப³லவங் ப³ந்த⁴னங் நாம, து³க்கடவத்து²மத்தகம்பி மஹந்தங் பாராஜிகவத்து² விய து³ப்பஜஹங் ஹோதி.
Tesanti tesaṃ ekaccānaṃ moghapurisānaṃ. Tanti taṃ appamattakaṃ pahātabbaṃ. Thūlo kaliṅgaroti gale baddhaṃ mahākaṭṭhaṃ viya hoti. Laṭukikā sakuṇikāti cātakasakuṇikā. Sā kira ravasataṃ ravitvā naccasataṃ naccitvā sakiṃ gocaraṃ gaṇhāti. Ākāsato bhūmiyaṃ patiṭṭhitaṃ pana naṃ disvā vacchapālakādayo kīḷanatthaṃ pūtilatāya bandhanti. Taṃ sandhāyetaṃ vuttaṃ. Āgametīti upeti. Tañhi tassāti taṃ pūtilatābandhanaṃ tassā appasarīratāya ceva appathāmatāya ca balavabandhanaṃ nāma, mahantaṃ nāḷikerarajju viya ducchijjaṃ hoti. Tesanti tesaṃ moghapurisānaṃ saddhāmandatāya ca paññāmandatāya ca balavaṃ bandhanaṃ nāma, dukkaṭavatthumattakampi mahantaṃ pārājikavatthu viya duppajahaṃ hoti.
151. ஸுக்கபக்கே² பஹாதப்³ப³ஸ்ஸாதி கிங் இமஸ்ஸ அப்பமத்தகஸ்ஸ பஹாதப்³ப³ஸ்ஸ ஹேது ப⁴க³வதா வத்தப்³ப³ங் அத்தி², யஸ்ஸ நோ ப⁴க³வா பஹானமாஹ. நனு ஏவங் ப⁴க³வதோ அதி⁴ப்பாயங் ஞத்வாபி பஹாதப்³ப³மேவாதி அத்தோ². அப்பொஸ்ஸுக்காதி அனுஸ்ஸுக்கா. பன்னலோமாதி பதிதலோமா, ந தஸ்ஸ பஹாதப்³ப³ப⁴யேன உத்³த⁴க்³க³லோமா. பரத³த்தவுத்தாதி பரேஹி தி³ன்னவுத்தினோ, பரதோ லத்³தே⁴ன யாபெந்தாதி அத்தோ². மிக³பூ⁴தேன சேதஸா விஹரந்தீதி அபச்சாஸீஸனபக்கே² டி²தா ஹுத்வா விஹரந்தி. மிகோ³ ஹி பஹாரங் லபி⁴த்வா மனுஸ்ஸாவாஸங் க³ந்த்வா பே⁴ஸஜ்ஜங் வா வணதேலங் வா லபி⁴ஸ்ஸாமீதி அஜ்ஜா²ஸயங் அகத்வா பஹாரங் லபி⁴த்வாவ அகா³மகங் அரஞ்ஞங் பவிஸித்வா பஹடட்டா²னங் ஹெட்டா² கத்வா நிபதித்வா பா²ஸுபூ⁴தகாலே உட்டா²ய க³ச்ச²தி. ஏவங் மிகா³ அபச்சாஸீஸனபக்கே² டி²தா. இத³ங் ஸந்தா⁴ய வுத்தங் ‘‘மிக³பூ⁴தேன சேதஸா விஹரந்தீ’’தி. தஞ்ஹி தஸ்ஸாதி தங் வரத்தப³ந்த⁴னங் தஸ்ஸ ஹத்தி²னாக³ஸ்ஸ மஹாஸரீரதாய சேவ மஹாதா²மதாய ச து³ப்³ப³லப³ந்த⁴னங் நாம. பூதிலதா விய ஸுசி²ஜ்ஜங் ஹோதி. தேஸங் தந்தி தேஸங் தங் குலபுத்தானங் ஸத்³தா⁴மஹந்ததாய ச பஞ்ஞாமஹந்ததாய ச மஹந்தங் பாராஜிகவத்து²பி து³க்கடவத்து²மத்தகங் விய ஸுப்பஜஹங் ஹோதி.
151. Sukkapakkhe pahātabbassāti kiṃ imassa appamattakassa pahātabbassa hetu bhagavatā vattabbaṃ atthi, yassa no bhagavā pahānamāha. Nanu evaṃ bhagavato adhippāyaṃ ñatvāpi pahātabbamevāti attho. Appossukkāti anussukkā. Pannalomāti patitalomā, na tassa pahātabbabhayena uddhaggalomā. Paradattavuttāti parehi dinnavuttino, parato laddhena yāpentāti attho. Migabhūtena cetasā viharantīti apaccāsīsanapakkhe ṭhitā hutvā viharanti. Migo hi pahāraṃ labhitvā manussāvāsaṃ gantvā bhesajjaṃ vā vaṇatelaṃ vā labhissāmīti ajjhāsayaṃ akatvā pahāraṃ labhitvāva agāmakaṃ araññaṃ pavisitvā pahaṭaṭṭhānaṃ heṭṭhā katvā nipatitvā phāsubhūtakāle uṭṭhāya gacchati. Evaṃ migā apaccāsīsanapakkhe ṭhitā. Idaṃ sandhāya vuttaṃ ‘‘migabhūtena cetasā viharantī’’ti. Tañhi tassāti taṃ varattabandhanaṃ tassa hatthināgassa mahāsarīratāya ceva mahāthāmatāya ca dubbalabandhanaṃ nāma. Pūtilatā viya suchijjaṃ hoti. Tesaṃ tanti tesaṃ taṃ kulaputtānaṃ saddhāmahantatāya ca paññāmahantatāya ca mahantaṃ pārājikavatthupi dukkaṭavatthumattakaṃ viya suppajahaṃ hoti.
152. த³லித்³தோ³தி தா³லித்³தி³யேன ஸமன்னாக³தோ. அஸ்ஸகோதி நிஸ்ஸகோ. அனாள்ஹியோதி அனட்³டோ⁴. அகா³ரகந்தி கு²த்³த³ககே³ஹங். ஓலுக்³க³விலுக்³க³ந்தி யஸ்ஸ கே³ஹயட்டி²யோ பிட்டி²வங்ஸதோ முச்சித்வா மண்ட³லே லக்³கா³, மண்ட³லதோ முச்சித்வா பூ⁴மியங் லக்³கா³. காகாதிதா³யிந்தி யத்த² கிஞ்சிதே³வ பு⁴ஞ்ஜிஸ்ஸாமாதி அந்தோ நிஸின்னகாலே விஸுங் த்³வாரகிச்சங் நாம நத்தி², ததோ ததோ காகா பவிஸித்வா பரிவாரெந்தி. ஸூரகாகா ஹி பலாயனகாலே ச யதா²ஸம்முக²ட்டா²னேனேவ நிக்க²மித்வா பலாயந்தி. நபரமரூபந்தி ந புஞ்ஞவந்தானங் கே³ஹங் விய உத்தமரூபங். க²டோபிகாதி விலீவமஞ்சகோ. ஓலுக்³க³விலுக்³கா³தி ஓணதுண்ணதா. த⁴ஞ்ஞஸமவாபகந்தி த⁴ஞ்ஞஞ்ச ஸமவாபகஞ்ச. தத்த² த⁴ஞ்ஞங் நாம குத்³ரூஸகோ. ஸமவாபகந்தி லாபு³பீ³ஜகும்ப⁴ண்ட³பீ³ஜகாதி³ பீ³ஜஜாதங். நபரமரூபந்தி யதா² புஞ்ஞவந்தானங் க³ந்த⁴ஸாலிபீ³ஜாதி³ பரிஸுத்³த⁴ங் பீ³ஜங், ந ஏவரூபங். ஜாயிகாதி கபணஜாயா. நபரமரூபாதி பச்சி²ஸீஸா லம்ப³த்த²னீ மஹோத³ரா பிஸாசா விய பீ³ப⁴ச்சா². ஸாமஞ்ஞந்தி ஸமணபா⁴வோ. ஸோ வதஸ்ஸங், யோஹந்தி ஸோ வதாஹங் புரிஸோ நாம அஸ்ஸங், யோ கேஸமஸ்ஸுங் ஓஹாரெத்வா பப்³ப³ஜெய்யந்தி.
152.Daliddoti dāliddiyena samannāgato. Assakoti nissako. Anāḷhiyoti anaḍḍho. Agārakanti khuddakagehaṃ. Oluggavilugganti yassa gehayaṭṭhiyo piṭṭhivaṃsato muccitvā maṇḍale laggā, maṇḍalato muccitvā bhūmiyaṃ laggā. Kākātidāyinti yattha kiñcideva bhuñjissāmāti anto nisinnakāle visuṃ dvārakiccaṃ nāma natthi, tato tato kākā pavisitvā parivārenti. Sūrakākā hi palāyanakāle ca yathāsammukhaṭṭhāneneva nikkhamitvā palāyanti. Naparamarūpanti na puññavantānaṃ gehaṃ viya uttamarūpaṃ. Khaṭopikāti vilīvamañcako. Oluggaviluggāti oṇatuṇṇatā. Dhaññasamavāpakanti dhaññañca samavāpakañca. Tattha dhaññaṃ nāma kudrūsako. Samavāpakanti lābubījakumbhaṇḍabījakādi bījajātaṃ. Naparamarūpanti yathā puññavantānaṃ gandhasālibījādi parisuddhaṃ bījaṃ, na evarūpaṃ. Jāyikāti kapaṇajāyā. Naparamarūpāti pacchisīsā lambatthanī mahodarā pisācā viya bībhacchā. Sāmaññanti samaṇabhāvo. So vatassaṃ, yohanti so vatāhaṃ puriso nāma assaṃ, yo kesamassuṃ ohāretvā pabbajeyyanti.
ஸோ ந ஸக்குணெய்யாதி ஸோ ஏவங் சிந்தெத்வாபி கே³ஹங் க³ந்த்வா – ‘‘பப்³ப³ஜ்ஜா நாம லாப⁴க³ருகா து³க்கரா து³ராஸதா³, ஸத்தபி அட்ட²பி கா³மே பிண்டா³ய சரித்வா யதா²தோ⁴தேனேவ பத்தேன ஆக³ந்தப்³ப³ம்பி ஹோதி , ஏவங் யாபேதுங் அஸக்கொந்தஸ்ஸ மே புன ஆக³தஸ்ஸ வஸனட்டா²னங் இச்சி²தப்³ப³ங், திணவல்லித³ப்³ப³ஸம்பா⁴ரா நாம து³ஸ்ஸமோதா⁴னியா, கிந்தி கரோமீ’’தி வீமங்ஸதி. அத²ஸ்ஸ தங் அகா³ரகங் வேஜயந்தபாஸாதோ³ விய உபட்டா²தி. அத²ஸ்ஸ க²டோபிகங் ஓலோகெத்வா – ‘‘மயி க³தே இமங் விஸங்க²ரித்வா உத்³த⁴னாலாதங் கரிஸ்ஸந்தி, புன அட்டனிபாத³விலீவாதீ³னி லத்³த⁴ப்³பா³னி ஹொந்தி, கிந்தி கரிஸ்ஸாமீ’’தி சிந்தேதி. அத²ஸ்ஸ ஸா ஸிரிஸயனங் விய உபட்டா²தி. ததோ த⁴ஞ்ஞகும்பி⁴ங் ஓலோகெத்வா – ‘‘மயி க³தே அயங் க⁴ரணீ இமங் த⁴ஞ்ஞங் தேன தேன ஸத்³தி⁴ங் பு⁴ஞ்ஜிஸ்ஸதி. புன ஆக³தேன ஜீவிதவுத்தி நாம லத்³த⁴ப்³பா³ ஹோதி, கிந்தி கரிஸ்ஸாமீ’’தி சிந்தேதி. அத²ஸ்ஸ ஸா அட்³ட⁴தேளஸானி கொட்டா²கா³ரஸதானி விய உபட்டா²தி. ததோ மாதுகா³மங் ஓலோகெத்வா – ‘‘மயி க³தே இமங் ஹத்தி²கோ³பகோ வா அஸ்ஸகோ³பகோ வா யோ கோசி பலோபெ⁴ஸ்ஸதி, புன ஆக³தேன ப⁴த்தபாசிகா நாம லத்³த⁴ப்³பா³ ஹோதி, கிந்தி கரிஸ்ஸாமீ’’தி சிந்தேதி. அத²ஸ்ஸ ஸா ரூபினீ தே³வீ விய உபட்டா²தி. இத³ங் ஸந்தா⁴ய ‘‘ஸோ ந ஸக்குணெய்யா’’திஆதி³ வுத்தங்.
So na sakkuṇeyyāti so evaṃ cintetvāpi gehaṃ gantvā – ‘‘pabbajjā nāma lābhagarukā dukkarā durāsadā, sattapi aṭṭhapi gāme piṇḍāya caritvā yathādhoteneva pattena āgantabbampi hoti , evaṃ yāpetuṃ asakkontassa me puna āgatassa vasanaṭṭhānaṃ icchitabbaṃ, tiṇavallidabbasambhārā nāma dussamodhāniyā, kinti karomī’’ti vīmaṃsati. Athassa taṃ agārakaṃ vejayantapāsādo viya upaṭṭhāti. Athassa khaṭopikaṃ oloketvā – ‘‘mayi gate imaṃ visaṅkharitvā uddhanālātaṃ karissanti, puna aṭṭanipādavilīvādīni laddhabbāni honti, kinti karissāmī’’ti cinteti. Athassa sā sirisayanaṃ viya upaṭṭhāti. Tato dhaññakumbhiṃ oloketvā – ‘‘mayi gate ayaṃ gharaṇī imaṃ dhaññaṃ tena tena saddhiṃ bhuñjissati. Puna āgatena jīvitavutti nāma laddhabbā hoti, kinti karissāmī’’ti cinteti. Athassa sā aḍḍhateḷasāni koṭṭhāgārasatāni viya upaṭṭhāti. Tato mātugāmaṃ oloketvā – ‘‘mayi gate imaṃ hatthigopako vā assagopako vā yo koci palobhessati, puna āgatena bhattapācikā nāma laddhabbā hoti, kinti karissāmī’’ti cinteti. Athassa sā rūpinī devī viya upaṭṭhāti. Idaṃ sandhāya ‘‘so na sakkuṇeyyā’’tiādi vuttaṃ.
153. நிக்க²க³ணானந்தி ஸுவண்ணனிக்க²ஸதானங். சயோதி ஸந்தானதோ கதஸன்னிசயோ. த⁴ஞ்ஞக³ணானந்தி த⁴ஞ்ஞஸகடஸதானங்.
153.Nikkhagaṇānanti suvaṇṇanikkhasatānaṃ. Cayoti santānato katasannicayo. Dhaññagaṇānanti dhaññasakaṭasatānaṃ.
154. சத்தாரோமே, உதா³யி, புக்³க³லாதி இத⁴ கிங் த³ஸ்ஸேதி? ஹெட்டா² ‘‘தே தஞ்சேவ பஜஹந்தி, தே தஞ்சேவ நப்பஜஹந்தீ’’தி பஜஹனகா ச அப்பஜஹனகா ச ராஸிவஸேன த³ஸ்ஸிதா, ந பாடியேக்கங் விப⁴த்தா. இதா³னி யதா² நாம த³ப்³ப³ஸம்பா⁴ரத்த²ங் க³தோ புரிஸோ படிபாடியா ருக்கே² சி²ந்தி³த்வா புன நிவத்தித்வா வங்கஞ்ச பஹாய கம்மே உபனேதப்³ப³யுத்தகமேவ க³ண்ஹாதி, ஏவமேவ அப்பஜஹனகே ச²ட்³டெ³த்வா அப்³போ³ஹாரிகே கத்வா பஜஹனகபுக்³க³லா சத்தாரோ ஹொந்தீதி த³ஸ்ஸேதுங் இமங் தே³ஸனங் ஆரபி⁴.
154.Cattārome, udāyi, puggalāti idha kiṃ dasseti? Heṭṭhā ‘‘te tañceva pajahanti, te tañceva nappajahantī’’ti pajahanakā ca appajahanakā ca rāsivasena dassitā, na pāṭiyekkaṃ vibhattā. Idāni yathā nāma dabbasambhāratthaṃ gato puriso paṭipāṭiyā rukkhe chinditvā puna nivattitvā vaṅkañca pahāya kamme upanetabbayuttakameva gaṇhāti, evameva appajahanake chaḍḍetvā abbohārike katvā pajahanakapuggalā cattāro hontīti dassetuṃ imaṃ desanaṃ ārabhi.
உபதி⁴பஹானாயாதி க²ந்து⁴பதி⁴கிலேஸுபதி⁴அபி⁴ஸங்கா²ருபதி⁴காமகு³ணூபதீ⁴தி இமேஸங் உபதீ⁴னங் பஹானாய. உபதி⁴படிஸங்யுத்தாதி உபதி⁴அனுதா⁴வனகா. ஸரஸங்கப்பாதி எத்த² ஸரந்தி தா⁴வந்தீதி ஸரா. ஸங்கப்பெந்தீதி ஸங்கப்பா. பத³த்³வயேனபி விதக்காயேவ வுத்தா. ஸமுதா³சரந்தீதி அபி⁴ப⁴வந்தி அஜ்ஜொ²த்த²ரித்வா வத்தந்தி. ஸங்யுத்தோதி கிலேஸேஹி ஸங்யுத்தோ. இந்த்³ரியவேமத்ததாதி இந்த்³ரியனானத்ததா . கதா³சி கரஹசீதி ப³ஹுகாலங் வீதிவத்தெத்வா. ஸதிஸம்மோஸாதி ஸதிஸம்மோஸேன. நிபாதோதி அயோகடாஹம்ஹி பதனங். எத்தாவதா ‘‘நப்பஜஹதி, பஜஹதி, கி²ப்பங் பஜஹதீ’’தி தயோ ராஸயோ த³ஸ்ஸிதா. தேஸு சத்தாரோ ஜனா நப்பஜஹந்தி நாம, சத்தாரோ பஜஹந்தி நாம, சத்தாரோ கி²ப்பங் பஜஹந்தி நாம.
Upadhipahānāyāti khandhupadhikilesupadhiabhisaṅkhārupadhikāmaguṇūpadhīti imesaṃ upadhīnaṃ pahānāya. Upadhipaṭisaṃyuttāti upadhianudhāvanakā. Sarasaṅkappāti ettha saranti dhāvantīti sarā. Saṅkappentīti saṅkappā. Padadvayenapi vitakkāyeva vuttā. Samudācarantīti abhibhavanti ajjhottharitvā vattanti. Saṃyuttoti kilesehi saṃyutto. Indriyavemattatāti indriyanānattatā . Kadāci karahacīti bahukālaṃ vītivattetvā. Satisammosāti satisammosena. Nipātoti ayokaṭāhamhi patanaṃ. Ettāvatā ‘‘nappajahati, pajahati, khippaṃ pajahatī’’ti tayo rāsayo dassitā. Tesu cattāro janā nappajahanti nāma, cattāro pajahanti nāma, cattāro khippaṃ pajahanti nāma.
தத்த² புது²ஜ்ஜனோ ஸோதாபன்னோ ஸகதா³கா³மீ அனாகா³மீதி இமே சத்தாரோ ஜனா நப்பஜஹந்தி நாம. புது²ஜ்ஜனாத³யோ தாவ மா பஜஹந்து, அனாகா³மீ கத²ங் ந பஜஹதீதி? ஸோபி ஹி யாவதே³வஸ்ஸ ப⁴வலோபோ⁴ அத்தி², தாவ அஹோஸுக²ங் அஹோஸுக²ந்தி அபி⁴னந்த³தி. தஸ்மா நப்பஜஹதி நாம. ஏதேயேவ பன சத்தாரோ ஜனா பஜஹந்தி நாம. ஸோதாபன்னாத³யோ தாவ பஜஹந்து, புது²ஜ்ஜனோ கத²ங் பஜஹதீதி? ஆரத்³த⁴விபஸ்ஸகோ ஹி ஸதிஸம்மோஸேன ஸஹஸா கிலேஸே உப்பன்னே ‘‘மாதி³ஸஸ்ஸ நாம பி⁴க்கு²னோ கிலேஸோ உப்பன்னோ’’தி ஸங்வேக³ங் கத்வா வீரியங் பக்³க³ய்ஹ விபஸ்ஸனங் வட்³டெ⁴த்வா மக்³கே³ன கிலேஸே ஸமுக்³கா⁴தேதி. இதி ஸோ பஜஹதி நாம. தேயேவ சத்தாரோ கி²ப்பங் பஜஹந்தி நாம. தத்த² இமஸ்மிங் ஸுத்தே, மஹாஹத்தி²பதோ³பமே (ம॰ நி॰ 1.288 ஆத³யோ), இந்த்³ரியபா⁴வனேதி (ம॰ நி॰ 3.453 ஆத³யோ) இமேஸு ஸுத்தேஸு கிஞ்சாபி ததியவாரோ க³ஹிதோ, பஞ்ஹோ பன து³தியவாரேனேவ கதி²தோதி வேதி³தப்³போ³.
Tattha puthujjano sotāpanno sakadāgāmī anāgāmīti ime cattāro janā nappajahanti nāma. Puthujjanādayo tāva mā pajahantu, anāgāmī kathaṃ na pajahatīti? Sopi hi yāvadevassa bhavalobho atthi, tāva ahosukhaṃ ahosukhanti abhinandati. Tasmā nappajahati nāma. Eteyeva pana cattāro janā pajahanti nāma. Sotāpannādayo tāva pajahantu, puthujjano kathaṃ pajahatīti? Āraddhavipassako hi satisammosena sahasā kilese uppanne ‘‘mādisassa nāma bhikkhuno kileso uppanno’’ti saṃvegaṃ katvā vīriyaṃ paggayha vipassanaṃ vaḍḍhetvā maggena kilese samugghāteti. Iti so pajahati nāma. Teyeva cattāro khippaṃ pajahanti nāma. Tattha imasmiṃ sutte, mahāhatthipadopame (ma. ni. 1.288 ādayo), indriyabhāvaneti (ma. ni. 3.453 ādayo) imesu suttesu kiñcāpi tatiyavāro gahito, pañho pana dutiyavāreneva kathitoti veditabbo.
உபதி⁴ து³க்க²ஸ்ஸ மூலந்தி எத்த² பஞ்ச க²ந்தா⁴ உபதி⁴ நாம. தங் து³க்க²ஸ்ஸ மூலந்தி இதி விதி³த்வா கிலேஸுபதி⁴னா நிருபதி⁴ ஹோதி, நிக்³க³ஹணோ நிதண்ஹோதி அத்தோ². உபதி⁴ஸங்க²யே விமுத்தோதி தண்ஹக்க²யே நிப்³பா³னே ஆரம்மணதோ விமுத்தோ.
Upadhidukkhassa mūlanti ettha pañca khandhā upadhi nāma. Taṃ dukkhassa mūlanti iti viditvā kilesupadhinā nirupadhi hoti, niggahaṇo nitaṇhoti attho. Upadhisaṅkhaye vimuttoti taṇhakkhaye nibbāne ārammaṇato vimutto.
155. ஏவங் சத்தாரோ புக்³க³லே வித்தா²ரெத்வா இதா³னி யே பஜஹந்தி, தே ‘‘இமே நாம எத்தகே கிலேஸே பஜஹந்தி’’. யே நப்பஜஹந்தி, தேபி ‘‘இமே நாம எத்தகே கிலேஸே நப்பஜஹந்தீ’’தி த³ஸ்ஸேதுங் பஞ்ச கோ² இமே உதா³யி காமகு³ணாதிஆதி³மாஹ. தத்த² மிள்ஹஸுக²ந்தி அஸுசிஸுக²ங். அனரியஸுக²ந்தி அனரியேஹி ஸேவிதஸுக²ங். பா⁴யிதப்³ப³ந்தி ஏதஸ்ஸ ஸுக²ஸ்ஸ படிலாப⁴தோபி விபாகதோபி பா⁴யிதப்³ப³ங். நெக்க²ம்மஸுக²ந்தி காமதோ நிக்க²ந்தஸுக²ங். பவிவேகஸுக²ந்தி க³ணதோபி கிலேஸதோபி பவிவித்தஸுக²ங். உபஸமஸுக²ந்தி ராகா³தி³வூபஸமத்தா²ய ஸுக²ங். ஸம்போ³த⁴ஸுக²ந்தி மக்³க³ஸங்கா²தஸ்ஸ ஸம்போ³த⁴ஸ்ஸ நிப்³ப³த்தனத்தா²ய ஸுக²ங். ந பா⁴யிதப்³ப³ந்தி ஏதஸ்ஸ ஸுக²ஸ்ஸ படிலாப⁴தோபி விபாகதோபி ந பா⁴யிதப்³ப³ங், பா⁴வேதப்³ப³மேவேதங்.
155. Evaṃ cattāro puggale vitthāretvā idāni ye pajahanti, te ‘‘ime nāma ettake kilese pajahanti’’. Ye nappajahanti, tepi ‘‘ime nāma ettake kilese nappajahantī’’ti dassetuṃ pañca kho ime udāyi kāmaguṇātiādimāha. Tattha miḷhasukhanti asucisukhaṃ. Anariyasukhanti anariyehi sevitasukhaṃ. Bhāyitabbanti etassa sukhassa paṭilābhatopi vipākatopi bhāyitabbaṃ. Nekkhammasukhanti kāmato nikkhantasukhaṃ. Pavivekasukhanti gaṇatopi kilesatopi pavivittasukhaṃ. Upasamasukhanti rāgādivūpasamatthāya sukhaṃ. Sambodhasukhanti maggasaṅkhātassa sambodhassa nibbattanatthāya sukhaṃ. Na bhāyitabbanti etassa sukhassa paṭilābhatopi vipākatopi na bhāyitabbaṃ, bhāvetabbamevetaṃ.
156. இஞ்ஜிதஸ்மிங் வதா³மீதி இஞ்ஜனங் சலனங் ப²ந்த³னந்தி வதா³மி. கிஞ்ச தத்த² இஞ்ஜிதஸ்மிந்தி கிஞ்ச தத்த² இஞ்ஜிதங். இத³ங் தத்த² இஞ்ஜிதஸ்மிந்தி யே ஏதே அனிருத்³தா⁴ விதக்கவிசாரா, இத³ங் தத்த² இஞ்ஜிதங். து³தியததியஜ்ஜா²னேஸுபி ஏஸேவ நயோ. அனிஞ்ஜிதஸ்மிங் வதா³மீதி இத³ங் சதுத்த²ஜ்ஜா²னங் அனிஞ்ஜனங் அசலனங் நிப்ப²ந்த³னந்தி வதா³மி.
156.Iñjitasmiṃvadāmīti iñjanaṃ calanaṃ phandananti vadāmi. Kiñca tattha iñjitasminti kiñca tattha iñjitaṃ. Idaṃ tattha iñjitasminti ye ete aniruddhā vitakkavicārā, idaṃ tattha iñjitaṃ. Dutiyatatiyajjhānesupi eseva nayo. Aniñjitasmiṃ vadāmīti idaṃ catutthajjhānaṃ aniñjanaṃ acalanaṃ nipphandananti vadāmi.
அனலந்தி வதா³மீதி அகத்தப்³ப³ஆலயந்தி வதா³மி, தண்ஹாலயோ எத்த² ந உப்பாதே³தப்³போ³தி த³ஸ்ஸேதி. அத² வா அனலங் அபரியத்தங், ந எத்தாவதா அலமேதந்தி ஸன்னிட்டா²னங் காதப்³ப³ந்தி வதா³மி. நேவஸஞ்ஞானாஸஞ்ஞாயதனஸ்ஸாபீதி ஏவரூபாயபி ஸந்தாய ஸமாபத்தியா பஹானமேவ வதா³மி. அணுங் வா தூ²லங் வாதி கு²த்³த³கங் வா மஹந்தங் வா அப்பஸாவஜ்ஜங் வா மஹாஸாவஜ்ஜங் வா. ஸேஸங் ஸப்³ப³த்த² உத்தானமேவ. தே³ஸனா பன நெய்யபுக்³க³லஸ்ஸ வஸேன அரஹத்தனிகூடேனேவ நிட்டா²பிதாதி.
Analanti vadāmīti akattabbaālayanti vadāmi, taṇhālayo ettha na uppādetabboti dasseti. Atha vā analaṃ apariyattaṃ, na ettāvatā alametanti sanniṭṭhānaṃ kātabbanti vadāmi. Nevasaññānāsaññāyatanassāpīti evarūpāyapi santāya samāpattiyā pahānameva vadāmi. Aṇuṃ vā thūlaṃ vāti khuddakaṃ vā mahantaṃ vā appasāvajjaṃ vā mahāsāvajjaṃ vā. Sesaṃ sabbattha uttānameva. Desanā pana neyyapuggalassa vasena arahattanikūṭeneva niṭṭhāpitāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
லடுகிகோபமஸுத்தவண்ணனா நிட்டி²தா.
Laṭukikopamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 6. லடுகிகோபமஸுத்தங் • 6. Laṭukikopamasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 6. லடுகிகோபமஸுத்தவண்ணனா • 6. Laṭukikopamasuttavaṇṇanā
