| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
1. ஏககனிபாதோ
1. Ekakanipāto
1. பட²மவக்³கோ³
1. Paṭhamavaggo
1. லோப⁴ஸுத்தவண்ணனா
1. Lobhasuttavaṇṇanā
1. இதா³னி ஏகத⁴ம்மங், பி⁴க்க²வே, பஜஹதா²திஆதி³னா நயேன ப⁴க³வதா நிக்கி²த்தஸ்ஸ ஸுத்தஸ்ஸ வண்ணனாய ஓகாஸோ அனுப்பத்தோ. ஸா பனேஸா அத்த²வண்ணனா யஸ்மா ஸுத்தனிக்கே²பங் விசாரெத்வா வுச்சமானா பாகடா ஹோதி, தஸ்மா ஸுத்தனிக்கே²பங் தாவ விசாரெஸ்ஸாம. சத்தாரோ ஹி ஸுத்தனிக்கே²பா – அத்தஜ்ஜா²ஸயோ, பரஜ்ஜா²ஸயோ, புச்சா²வஸிகோ, அட்டு²ப்பத்திகோதி. யதா² ஹி அனேகஸதஅனேகஸஹஸ்ஸபே⁴தா³னிபி ஸுத்தந்தானி ஸங்கிலேஸபா⁴கி³யாதி³பட்டா²னநயேன ஸோளஸவித⁴தங் நாதிவத்தந்தி, ஏவங் அத்தஜ்ஜா²ஸயாதி³ஸுத்தனிக்கே²பவஸேன சதுப்³பி³த⁴தங் நாதிவத்தந்தீதி. தத்த² யதா² அத்தஜ்ஜா²ஸயஸ்ஸ அட்டு²ப்பத்தியா ச பரஜ்ஜா²ஸயபுச்சா²வஸிகேஹி ஸத்³தி⁴ங் ஸங்ஸக்³க³பே⁴தோ³ ஸம்ப⁴வதி அத்தஜ்ஜா²ஸயோ ச பரஜ்ஜா²ஸயோ ச, அத்தஜ்ஜா²ஸயோ ச புச்சா²வஸிகோ ச, அட்டு²ப்பத்திகோ ச பரஜ்ஜா²ஸயோ ச, அட்டு²ப்பத்திகோ ச புச்சா²வஸிகோ சாதி அஜ்ஜா²ஸயபுச்சா²னுஸந்தி⁴ஸம்ப⁴வதோ; ஏவங் யதி³பி அட்டு²ப்பத்தியா அத்தஜ்ஜா²ஸயேனபி ஸங்ஸக்³க³பே⁴தோ³ ஸம்ப⁴வதி, அத்தஜ்ஜா²ஸயாதீ³ஹி பன புரதோ டி²தேஹி அட்டு²ப்பத்தியா ஸங்ஸக்³கோ³ நத்தீ²தி நிரவஸேஸோ பட்டா²னநயோ ந ஸம்ப⁴வதி. தத³ந்தோக³த⁴த்தா வா ஸம்ப⁴வந்தானங் ஸேஸனிக்கே²பானங் மூலனிக்கே²பவஸேன சத்தாரோ ஸுத்தனிக்கே²பா வுத்தாதி வேதி³தப்³ப³ங்.
1. Idāni ekadhammaṃ, bhikkhave, pajahathātiādinā nayena bhagavatā nikkhittassa suttassa vaṇṇanāya okāso anuppatto. Sā panesā atthavaṇṇanā yasmā suttanikkhepaṃ vicāretvā vuccamānā pākaṭā hoti, tasmā suttanikkhepaṃ tāva vicāressāma. Cattāro hi suttanikkhepā – attajjhāsayo, parajjhāsayo, pucchāvasiko, aṭṭhuppattikoti. Yathā hi anekasataanekasahassabhedānipi suttantāni saṃkilesabhāgiyādipaṭṭhānanayena soḷasavidhataṃ nātivattanti, evaṃ attajjhāsayādisuttanikkhepavasena catubbidhataṃ nātivattantīti. Tattha yathā attajjhāsayassa aṭṭhuppattiyā ca parajjhāsayapucchāvasikehi saddhiṃ saṃsaggabhedo sambhavati attajjhāsayo ca parajjhāsayo ca, attajjhāsayo ca pucchāvasiko ca, aṭṭhuppattiko ca parajjhāsayo ca, aṭṭhuppattiko ca pucchāvasiko cāti ajjhāsayapucchānusandhisambhavato; evaṃ yadipi aṭṭhuppattiyā attajjhāsayenapi saṃsaggabhedo sambhavati, attajjhāsayādīhi pana purato ṭhitehi aṭṭhuppattiyā saṃsaggo natthīti niravaseso paṭṭhānanayo na sambhavati. Tadantogadhattā vā sambhavantānaṃ sesanikkhepānaṃ mūlanikkhepavasena cattāro suttanikkhepā vuttāti veditabbaṃ.
தத்ராயங் வசனத்தோ² – நிக்கி²பீயதீதி நிக்கே²போ, ஸுத்தங் ஏவ நிக்கே²போ ஸுத்தனிக்கே²போ. அத² வா நிக்கி²பனங் நிக்கே²போ, ஸுத்தஸ்ஸ நிக்கே²போ ஸுத்தனிக்கே²போ, ஸுத்ததே³ஸனாதி அத்தோ². அத்தனோ அஜ்ஜா²ஸயோ அத்தஜ்ஜா²ஸயோ, ஸோ அஸ்ஸ அத்தி² காரணபூ⁴தோதி அத்தஜ்ஜா²ஸயோ, அத்தனோ அஜ்ஜா²ஸயோ ஏதஸ்ஸாதி வா அத்தஜ்ஜா²ஸயோ. பரஜ்ஜா²ஸயேபி ஏஸேவ நயோ. புச்சா²ய வஸோதி புச்சா²வஸோ. ஸோ ஏதஸ்ஸ அத்தீ²தி புச்சா²வஸிகோ. ஸுத்ததே³ஸனாய வத்து²பூ⁴தஸ்ஸ அத்த²ஸ்ஸ உப்பத்தி அத்து²ப்பத்தி , அத்து²ப்பத்தி ஏவ அட்டு²ப்பத்தி த²-காரஸ்ஸ ட²-காரங் கத்வா, ஸா ஏதஸ்ஸ அத்தீ²தி அட்டு²ப்பத்திகோ . அத² வா நிக்கி²பீயதி ஸுத்தங் ஏதேனாதி நிக்கே²போ, அத்தஜ்ஜா²ஸயாதி³ ஏவ. ஏதஸ்மிங் பன அத்த²விகப்பே அத்தனோ அஜ்ஜா²ஸயோ அத்தஜ்ஜா²ஸயோ. பரேஸங் அஜ்ஜா²ஸயோ பரஜ்ஜா²ஸயோ. புச்சீ²யதீதி புச்சா², புச்சி²தப்³போ³ அத்தோ², புச்சா²வஸேன பவத்தங் த⁴ம்மப்படிக்³கா³ஹகானங் வசனங் புச்சா²வஸங், ததே³வ நிக்கே²பஸத்³தா³பெக்கா²ய புச்சா²வஸிகோதி புல்லிங்க³வஸேன வுத்தங். ததா² அட்டு²ப்பத்தி ஏவ அட்டு²ப்பத்திகோதி ஏவமெத்த² அத்தோ² வேதி³தப்³போ³.
Tatrāyaṃ vacanattho – nikkhipīyatīti nikkhepo, suttaṃ eva nikkhepo suttanikkhepo. Atha vā nikkhipanaṃ nikkhepo, suttassa nikkhepo suttanikkhepo, suttadesanāti attho. Attano ajjhāsayo attajjhāsayo, so assa atthi kāraṇabhūtoti attajjhāsayo, attano ajjhāsayo etassāti vā attajjhāsayo. Parajjhāsayepi eseva nayo. Pucchāya vasoti pucchāvaso. So etassa atthīti pucchāvasiko. Suttadesanāya vatthubhūtassa atthassa uppatti atthuppatti , atthuppatti eva aṭṭhuppatti tha-kārassa ṭha-kāraṃ katvā, sā etassa atthīti aṭṭhuppattiko. Atha vā nikkhipīyati suttaṃ etenāti nikkhepo, attajjhāsayādi eva. Etasmiṃ pana atthavikappe attano ajjhāsayo attajjhāsayo. Paresaṃ ajjhāsayo parajjhāsayo. Pucchīyatīti pucchā, pucchitabbo attho, pucchāvasena pavattaṃ dhammappaṭiggāhakānaṃ vacanaṃ pucchāvasaṃ, tadeva nikkhepasaddāpekkhāya pucchāvasikoti pulliṅgavasena vuttaṃ. Tathā aṭṭhuppatti eva aṭṭhuppattikoti evamettha attho veditabbo.
அபிச பரேஸங் இந்த்³ரியபரிபாகாதி³காரணனிரபெக்க²த்தா அத்தஜ்ஜா²ஸயஸ்ஸ விஸுங் ஸுத்தனிக்கே²பபா⁴வோ யுத்தோ, கேவலங் அத்தனோ அஜ்ஜா²ஸயேனேவ த⁴ம்மதந்திட²பனத்த²ங் பவத்திததே³ஸனத்தா. பரஜ்ஜா²ஸயபுச்சா²வஸிகானங் பன பரேஸங் அஜ்ஜா²ஸயபுச்சா²னங் தே³ஸனாபவத்திஹேதுபூ⁴தானங் உப்பத்தியங் பவத்திதானங் கத²ங் அட்டு²ப்பத்தியங் அனவரோதோ⁴, புச்சா²வஸிகட்டு²ப்பத்திகானங் வா பரஜ்ஜா²ஸயானுரோதே⁴ன பவத்திதானங் கத²ங் பரஜ்ஜா²ஸயே அனவரோதோ⁴தி? ந சோதே³தப்³ப³மேதங். பரேஸஞ்ஹி அபி⁴னீஹாரபரிபுச்சா²தி³வினிமுத்தஸ்ஸேவ ஸுத்ததே³ஸனாகாரணுப்பாத³ஸ்ஸ அட்டு²ப்பத்திபா⁴வேன க³ஹிதத்தா பரஜ்ஜா²ஸயபுச்சா²வஸிகானங் விஸுங் க³ஹணங். ததா² ஹி ப்³ரஹ்மஜாலத⁴ம்மதா³யாத³ஸுத்தாதீ³னங் (தீ³॰ ந॰ 1.1 ஆத³யோ) வண்ணாவண்ணஆமிஸுப்பாதா³தி³தே³ஸனானிமித்தங் அட்டு²ப்பத்தி வுச்சதி. பரேஸங் புச்ச²ங் வினா அஜ்ஜா²ஸயமேவ நிமித்தங் கத்வா தே³ஸிதோ பரஜ்ஜா²ஸயோ, புச்சா²வஸேன தே³ஸிதோ புச்சா²வஸிகோதி பாகடோயமத்தோ²தி.
Apica paresaṃ indriyaparipākādikāraṇanirapekkhattā attajjhāsayassa visuṃ suttanikkhepabhāvo yutto, kevalaṃ attano ajjhāsayeneva dhammatantiṭhapanatthaṃ pavattitadesanattā. Parajjhāsayapucchāvasikānaṃ pana paresaṃ ajjhāsayapucchānaṃ desanāpavattihetubhūtānaṃ uppattiyaṃ pavattitānaṃ kathaṃ aṭṭhuppattiyaṃ anavarodho, pucchāvasikaṭṭhuppattikānaṃ vā parajjhāsayānurodhena pavattitānaṃ kathaṃ parajjhāsaye anavarodhoti? Na codetabbametaṃ. Paresañhi abhinīhāraparipucchādivinimuttasseva suttadesanākāraṇuppādassa aṭṭhuppattibhāvena gahitattā parajjhāsayapucchāvasikānaṃ visuṃ gahaṇaṃ. Tathā hi brahmajāladhammadāyādasuttādīnaṃ (dī. na. 1.1 ādayo) vaṇṇāvaṇṇaāmisuppādādidesanānimittaṃ aṭṭhuppatti vuccati. Paresaṃ pucchaṃ vinā ajjhāsayameva nimittaṃ katvā desito parajjhāsayo, pucchāvasena desito pucchāvasikoti pākaṭoyamatthoti.
யானி ப⁴க³வா பரேஹி அனஜ்ஜி²ட்டோ² கேவலங் அத்தனோ அஜ்ஜா²ஸயேனேவ கதே²தி, ஸெய்யதி²த³ங் – ஆகங்கெ²ய்யஸுத்தங், துவட்டகஸுத்தந்திஏவமாதீ³னி (ஸு॰ நி॰ 921 ஆத³யோ; ம॰ நி॰ 1.64 ஆத³யோ), தேஸங் அத்தஜ்ஜா²ஸயோ நிக்கே²போ.
Yāni bhagavā parehi anajjhiṭṭho kevalaṃ attano ajjhāsayeneva katheti, seyyathidaṃ – ākaṅkheyyasuttaṃ, tuvaṭṭakasuttantievamādīni (su. ni. 921 ādayo; ma. ni. 1.64 ādayo), tesaṃ attajjhāsayo nikkhepo.
யானி பன ‘‘பரிபக்கா கோ² ராஹுலஸ்ஸ விமுத்திபரிபாசனீயா த⁴ம்மா, யங்னூனாஹங் ராஹுலங் உத்தரிங் ஆஸவானங் க²யே வினெய்ய’’ந்தி ஏவங் பரேஸங் அஜ்ஜா²ஸயங் க²ந்திங் அபி⁴னீஹாரங் பு³ஜ்ஜ²னபா⁴வஞ்ச ஓலோகெத்வா பரஜ்ஜா²ஸயவஸேன கதி²தானி, ஸெய்யதி²த³ங் – ராஹுலோவாத³ஸுத்தங், த⁴ம்மசக்கப்பவத்தனஸுத்தந்திஏவமாதீ³னி (ம॰ நி॰ 2.107 ஆத³யோ; 3.416 ஆத³யோ; ஸங்॰ நி॰ 3.59; மஹாவ॰ 19-20), தேஸங் பரஜ்ஜா²ஸயோ நிக்கே²போ.
Yāni pana ‘‘paripakkā kho rāhulassa vimuttiparipācanīyā dhammā, yaṃnūnāhaṃ rāhulaṃ uttariṃ āsavānaṃ khaye vineyya’’nti evaṃ paresaṃ ajjhāsayaṃ khantiṃ abhinīhāraṃ bujjhanabhāvañca oloketvā parajjhāsayavasena kathitāni, seyyathidaṃ – rāhulovādasuttaṃ, dhammacakkappavattanasuttantievamādīni (ma. ni. 2.107 ādayo; 3.416 ādayo; saṃ. ni. 3.59; mahāva. 19-20), tesaṃ parajjhāsayo nikkhepo.
ப⁴க³வந்தங் பன உபஸங்கமித்வா தே³வா மனுஸ்ஸா சதஸ்ஸோ பரிஸா சத்தாரோ வண்ணா ச ததா² ததா² பஞ்ஹங் புச்ச²ந்தி ‘‘பொ³ஜ்ஜ²ங்கா³ பொ³ஜ்ஜ²ங்கா³தி, ப⁴ந்தே, வுச்சந்தி, நீவரணா நீவரணாதி வுச்சந்தீ’’திஆதி³னா , ஏவங் புட்டே²ன ப⁴க³வதா யானி கதி²தானி பொ³ஜ்ஜ²ங்க³ஸங்யுத்தாதீ³னி (ஸங்॰ நி॰ 5.186) தேஸங் புச்சா²வஸிகோ நிக்கே²போ.
Bhagavantaṃ pana upasaṅkamitvā devā manussā catasso parisā cattāro vaṇṇā ca tathā tathā pañhaṃ pucchanti ‘‘bojjhaṅgā bojjhaṅgāti, bhante, vuccanti, nīvaraṇā nīvaraṇāti vuccantī’’tiādinā , evaṃ puṭṭhena bhagavatā yāni kathitāni bojjhaṅgasaṃyuttādīni (saṃ. ni. 5.186) tesaṃ pucchāvasiko nikkhepo.
யானி பன தானி உப்பன்னங் காரணங் படிச்ச கதி²தானி, ஸெய்யதி²த³ங் – த⁴ம்மதா³யாத³ங், புத்தமங்ஸூபமங், தா³ருக்க²ந்தூ⁴பமந்திஏவமாதீ³னி (ம॰ நி॰ 1.29; ஸங்॰ நி॰ 2.63), தேஸங் அட்டு²ப்பத்திகோ நிக்கே²போ.
Yāni pana tāni uppannaṃ kāraṇaṃ paṭicca kathitāni, seyyathidaṃ – dhammadāyādaṃ, puttamaṃsūpamaṃ, dārukkhandhūpamantievamādīni (ma. ni. 1.29; saṃ. ni. 2.63), tesaṃ aṭṭhuppattiko nikkhepo.
ஏவமிமேஸு சதூஸு ஸுத்தனிக்கே²பேஸு இமஸ்ஸ ஸுத்தஸ்ஸ பரஜ்ஜா²ஸயோ நிக்கே²போ. பரஜ்ஜா²ஸயவஸேன ஹேதங் நிக்கி²த்தங். கேஸங் அஜ்ஜா²ஸயேன? லோபே⁴ ஆதீ³னவத³ஸ்ஸீனங் புக்³க³லானங். கேசி பன ‘‘அத்தஜ்ஜா²ஸயோ’’தி வத³ந்தி.
Evamimesu catūsu suttanikkhepesu imassa suttassa parajjhāsayo nikkhepo. Parajjhāsayavasena hetaṃ nikkhittaṃ. Kesaṃ ajjhāsayena? Lobhe ādīnavadassīnaṃ puggalānaṃ. Keci pana ‘‘attajjhāsayo’’ti vadanti.
தத்த² ஏகத⁴ம்மங், பி⁴க்க²வேதிஆதீ³ஸு ஏகஸத்³தோ³ அத்தே²வ அஞ்ஞத்தே² ‘‘ஸஸ்ஸதோ அத்தா ச லோகோ ச, இத³மேவ ஸச்சங் மோக⁴மஞ்ஞந்தி இத்தே²கே அபி⁴வத³ந்தீ’’திஆதீ³ஸு (ம॰ நி॰ 3.27). அத்தி² ஸெட்டே² ‘‘சேதஸோ ஏகோதி³பா⁴வ’’ந்திஆதீ³ஸு (தீ³॰ நி॰ 1.228; பாரா॰ 11). அத்தி² அஸஹாயே ‘‘ஏகோ வூபகட்டோ²’’திஆதீ³ஸு (தீ³॰ நி॰ 1.405). அத்தி² ஸங்கா²யங் ‘‘ஏகோவ கோ², பி⁴க்க²வே, க²ணோ ச ஸமயோ ச ப்³ரஹ்மசரியவாஸாயா’’திஆதீ³ஸு (அ॰ நி॰ 8.29). இதா⁴பி ஸங்கா²யமேவ த³ட்ட²ப்³போ³.
Tattha ekadhammaṃ, bhikkhavetiādīsu ekasaddo attheva aññatthe ‘‘sassato attā ca loko ca, idameva saccaṃ moghamaññanti ittheke abhivadantī’’tiādīsu (ma. ni. 3.27). Atthi seṭṭhe ‘‘cetaso ekodibhāva’’ntiādīsu (dī. ni. 1.228; pārā. 11). Atthi asahāye ‘‘eko vūpakaṭṭho’’tiādīsu (dī. ni. 1.405). Atthi saṅkhāyaṃ ‘‘ekova kho, bhikkhave, khaṇo ca samayo ca brahmacariyavāsāyā’’tiādīsu (a. ni. 8.29). Idhāpi saṅkhāyameva daṭṭhabbo.
த⁴ம்ம-ஸத்³தோ³ பரியத்திஸச்சஸமாதி⁴பஞ்ஞாபகதிபுஞ்ஞாபத்திஸுஞ்ஞதாஞெய்யஸபா⁴வாதீ³ஸு தி³ஸ்ஸதி. ததா² ஹிஸ்ஸ ‘‘இத⁴ பி⁴க்கு² த⁴ம்மங் பரியாபுணாதீ’’திஆதீ³ஸு (அ॰ நி॰ 5.73) பரியத்தி அத்தோ². ‘‘தி³ட்ட²த⁴ம்மோ’’திஆதீ³ஸு (தீ³॰ நி॰ 1.299) ஸச்சானி. ‘‘ஏவங்த⁴ம்மா தே ப⁴க³வந்தோ அஹேஸு’’ந்திஆதீ³ஸு (தீ³॰ நி॰ 2.13; 3.142) ஸமாதி⁴. ‘‘ஸச்சங் த⁴ம்மோ தி⁴தி சாகோ³, ஸவே பேச்ச ந ஸோசதீ’’திஆதீ³ஸு (ஜா॰ 1.1.57) பஞ்ஞா. ‘‘ஜாதித⁴ம்மானங், பி⁴க்க²வே, ஸத்தானங் ஏவங் இச்சா² உப்பஜ்ஜதீ’’திஆதீ³ஸு (தீ³॰ நி॰ 2.398) பகதி. ‘‘த⁴ம்மோ ஹவே ரக்க²தி த⁴ம்மசாரி’’ந்திஆதீ³ஸு (ஜா॰ 1.10.102) புஞ்ஞங். ‘‘திண்ணங் த⁴ம்மானங் அஞ்ஞதரேன வதெ³ய்ய பாராஜிகேன வா ஸங்கா⁴தி³ஸேஸேன வா பாசித்தியேன வா’’திஆதீ³ஸு (பாரா॰ 444) ஆபத்தி. ‘‘தஸ்மிங் கோ² பன ஸமயே த⁴ம்மா ஹொந்தீ’’திஆதீ³ஸு (த⁴॰ ஸ॰ 121) ஸுஞ்ஞதா. ‘‘ஸப்³பே³ த⁴ம்மா ஸப்³பா³காரேன பு³த்³த⁴ஸ்ஸ ப⁴க³வதோ ஞாணமுகே² ஆபாத²ங் ஆக³ச்ச²ந்தீ’’திஆதீ³ஸு (மஹானி॰ 156; சூளனி॰ மோக⁴ராஜமாணவபுச்சா²னித்³தே³ஸ 85) ஞெய்யோ. ‘‘குஸலா த⁴ம்மா அகுஸலா த⁴ம்மா’’திஆதீ³ஸு (த⁴॰ ஸ॰ திகமாதிகா 1) ஸபா⁴வோ அத்தோ² . இதா⁴பி ஸபா⁴வோ. தஸ்மா ஏகத⁴ம்மந்தி ஏகங் ஸங்கிலேஸஸபா⁴வந்தி அதி⁴ப்பாயோ. ஏகோ ச ஸோ த⁴ம்மோ சாதி ஏகத⁴ம்மோ, தங் ஏகத⁴ம்மங்.
Dhamma-saddo pariyattisaccasamādhipaññāpakatipuññāpattisuññatāñeyyasabhāvādīsu dissati. Tathā hissa ‘‘idha bhikkhu dhammaṃ pariyāpuṇātī’’tiādīsu (a. ni. 5.73) pariyatti attho. ‘‘Diṭṭhadhammo’’tiādīsu (dī. ni. 1.299) saccāni. ‘‘Evaṃdhammā te bhagavanto ahesu’’ntiādīsu (dī. ni. 2.13; 3.142) samādhi. ‘‘Saccaṃ dhammo dhiti cāgo, save pecca na socatī’’tiādīsu (jā. 1.1.57) paññā. ‘‘Jātidhammānaṃ, bhikkhave, sattānaṃ evaṃ icchā uppajjatī’’tiādīsu (dī. ni. 2.398) pakati. ‘‘Dhammo have rakkhati dhammacāri’’ntiādīsu (jā. 1.10.102) puññaṃ. ‘‘Tiṇṇaṃ dhammānaṃ aññatarena vadeyya pārājikena vā saṅghādisesena vā pācittiyena vā’’tiādīsu (pārā. 444) āpatti. ‘‘Tasmiṃ kho pana samaye dhammā hontī’’tiādīsu (dha. sa. 121) suññatā. ‘‘Sabbe dhammā sabbākārena buddhassa bhagavato ñāṇamukhe āpāthaṃ āgacchantī’’tiādīsu (mahāni. 156; cūḷani. mogharājamāṇavapucchāniddesa 85) ñeyyo. ‘‘Kusalā dhammā akusalā dhammā’’tiādīsu (dha. sa. tikamātikā 1) sabhāvo attho . Idhāpi sabhāvo. Tasmā ekadhammanti ekaṃ saṃkilesasabhāvanti adhippāyo. Eko ca so dhammo cāti ekadhammo, taṃ ekadhammaṃ.
பி⁴க்க²வேதி பி⁴க்கூ² ஆலபதி. கிமத்த²ங் பன ப⁴க³வா த⁴ம்மங் தே³ஸெந்தோ பி⁴க்கூ² ஆலபதி, ந த⁴ம்மமேவ தே³ஸேதீதி? ஸதிஜனநத்த²ங். பி⁴க்கூ² ஹி அஞ்ஞங் சிந்தெந்தாபி த⁴ம்மங் பச்சவெக்க²ந்தாபி கம்மட்டா²னங் மனஸி கரொந்தாபி நிஸின்னா ஹொந்தி. தே பட²மங் அனாலபித்வா த⁴ம்மே தே³ஸியமானே ‘‘அயங் தே³ஸனா கிங்னிதா³னா, கிங்பச்சயா’’தி ஸல்லக்கே²துங் ந ஸக்கொந்தி. ஆலபிதே பன ஸதிங் உபட்ட²பெத்வா ஸல்லக்கே²துங் ஸக்கொந்தி, தஸ்மா ஸதிஜனநத்த²ங் ‘‘பி⁴க்க²வே’’தி ஆலபதி. தேன ச தேஸங் பி⁴க்க²னஸீலதாதி³கு³ணயோக³ஸித்³தே⁴ன வசனேன ஹீனாதி⁴கஜனஸேவிதங் வுத்திங் பகாஸெந்தோ உத்³த⁴ததீ³னபா⁴வனிக்³க³ஹங் கரோதி. ‘‘பி⁴க்க²வே’’தி இமினா கருணாவிப்பா²ரஸொம்மஹத³யனயனநிபாதபுப்³ப³ங்க³மேன வசனேன தே அத்தனோ முகா²பி⁴முகே² கரொந்தோ தேன ச கதே²துகம்யதாதீ³பகேன வசனேன நேஸங் ஸோதுகம்யதங் ஜனேதி. தேனேவ ச ஸம்போ³த⁴னத்தே²ன ஸாது⁴கங் ஸவனமனஸிகாரேபி நியோஜேதி. ஸாது⁴கங் ஸவனமனஸிகாராயத்தா ஹி ஸாஸனஸம்பத்தி.
Bhikkhaveti bhikkhū ālapati. Kimatthaṃ pana bhagavā dhammaṃ desento bhikkhū ālapati, na dhammameva desetīti? Satijananatthaṃ. Bhikkhū hi aññaṃ cintentāpi dhammaṃ paccavekkhantāpi kammaṭṭhānaṃ manasi karontāpi nisinnā honti. Te paṭhamaṃ anālapitvā dhamme desiyamāne ‘‘ayaṃ desanā kiṃnidānā, kiṃpaccayā’’ti sallakkhetuṃ na sakkonti. Ālapite pana satiṃ upaṭṭhapetvā sallakkhetuṃ sakkonti, tasmā satijananatthaṃ ‘‘bhikkhave’’ti ālapati. Tena ca tesaṃ bhikkhanasīlatādiguṇayogasiddhena vacanena hīnādhikajanasevitaṃ vuttiṃ pakāsento uddhatadīnabhāvaniggahaṃ karoti. ‘‘Bhikkhave’’ti iminā karuṇāvipphārasommahadayanayananipātapubbaṅgamena vacanena te attano mukhābhimukhe karonto tena ca kathetukamyatādīpakena vacanena nesaṃ sotukamyataṃ janeti. Teneva ca sambodhanatthena sādhukaṃ savanamanasikārepi niyojeti. Sādhukaṃ savanamanasikārāyattā hi sāsanasampatti.
அஞ்ஞேஸுபி தே³வமனுஸ்ஸேஸு பரிஸபரியாபன்னேஸு விஜ்ஜமானேஸு கஸ்மா பி⁴க்கூ² ஏவ ஆமந்தேஸீதி? ஜெட்ட²ஸெட்டா²ஸன்னஸதா³ஸன்னிஹிதபா⁴வதோ. ஸப்³ப³பரிஸஸாதா⁴ரணா ஹி ப⁴க³வதோ த⁴ம்மதே³ஸனா, பரிஸாய ச ஜெட்டா² பி⁴க்கூ² பட²முப்பன்னத்தா, ஸெட்டா² அனகா³ரியபா⁴வங் ஆதி³ங் கத்வா ஸத்து² சரியானுவிதா⁴யகத்தா ஸகலஸாஸனபடிக்³கா³ஹகத்தா ச, ஆஸன்னா தத்த² நிஸின்னேஸு ஸமீபவுத்தியா, ஸதா³ஸன்னிஹிதா ஸத்து²ஸந்திகாவசரத்தா. அபிச தே த⁴ம்மதே³ஸனாய பா⁴ஜனங் யதா²னுஸிட்ட²ங் படிபத்திஸப்³பா⁴வதோ, விஸேஸதோ ச ஏகச்சே பி⁴க்கூ² ஸந்தா⁴ய அயங் தே³ஸனாதி தே ஏவ ஆலபி.
Aññesupi devamanussesu parisapariyāpannesu vijjamānesu kasmā bhikkhū eva āmantesīti? Jeṭṭhaseṭṭhāsannasadāsannihitabhāvato. Sabbaparisasādhāraṇā hi bhagavato dhammadesanā, parisāya ca jeṭṭhā bhikkhū paṭhamuppannattā, seṭṭhā anagāriyabhāvaṃ ādiṃ katvā satthu cariyānuvidhāyakattā sakalasāsanapaṭiggāhakattā ca, āsannā tattha nisinnesu samīpavuttiyā, sadāsannihitā satthusantikāvacarattā. Apica te dhammadesanāya bhājanaṃ yathānusiṭṭhaṃ paṭipattisabbhāvato, visesato ca ekacce bhikkhū sandhāya ayaṃ desanāti te eva ālapi.
பஜஹதா²தி எத்த² பஹானங் நாம தத³ங்க³ப்பஹானங், விக்க²ம்ப⁴னப்பஹானங், ஸமுச்சே²த³ப்பஹானங், படிப்பஸ்ஸத்³தி⁴ப்பஹானங், நிஸ்ஸரணப்பஹானந்தி பஞ்சவித⁴ங். தத்த² யங் தீ³பாலோகேனேவ தமஸ்ஸ படிபக்க²பா⁴வதோ அலோபா⁴தீ³ஹி லோபா⁴தி³கஸ்ஸ, நாமரூபபரிச்சே²தா³தி³விபஸ்ஸனாஞாணேஹி தஸ்ஸ தஸ்ஸ அனத்த²ஸ்ஸ பஹானங். ஸெய்யதி²த³ங் – பரிச்சாகே³ன லோபா⁴தி³மலஸ்ஸ, ஸீலேன பாணாதிபாதாதி³து³ஸ்ஸீல்யஸ்ஸ, ஸத்³தா⁴தீ³ஹி அஸ்ஸத்³தி⁴யாதி³கஸ்ஸ, நாமரூபவவத்தா²னேன ஸக்காயதி³ட்டி²யா, பச்சயபரிக்³க³ஹேன அஹேதுவிஸமஹேதுதி³ட்டீ²னங், தஸ்ஸேவ அபரபா⁴கே³ன கங்கா²விதரணேன கத²ங்கதீ²பா⁴வஸ்ஸ, கலாபஸம்மஸனேன ‘‘அஹங் மமா’’தி கா³ஹஸ்ஸ, மக்³கா³மக்³க³வவத்தா²னேன அமக்³கே³ மக்³க³ஸஞ்ஞாய, உத³யத³ஸ்ஸனேன உச்சே²த³தி³ட்டி²யா, வயத³ஸ்ஸனேன ஸஸ்ஸததி³ட்டி²யா, ப⁴யத³ஸ்ஸனேன ஸப⁴யேஸு அப⁴யஸஞ்ஞாய, ஆதீ³னவத³ஸ்ஸனேன அஸ்ஸாத³ஸஞ்ஞாய, நிப்³பி³தா³னுபஸ்ஸனேன அபி⁴ரதிஸஞ்ஞாய, முச்சிதுகம்யதாஞாணேன அமுச்சிதுகம்யதாய உபெக்கா²ஞாணேன அனுபெக்கா²ய, அனுலோமேன த⁴ம்மட்டி²தியா, நிப்³பா³னேன படிலோமபா⁴வஸ்ஸ, கொ³த்ரபு⁴னா ஸங்கா²ரனிமித்தக்³கா³ஹஸ்ஸ பஹானங், ஏதங் தத³ங்க³ப்பஹானங் நாம.
Pajahathāti ettha pahānaṃ nāma tadaṅgappahānaṃ, vikkhambhanappahānaṃ, samucchedappahānaṃ, paṭippassaddhippahānaṃ, nissaraṇappahānanti pañcavidhaṃ. Tattha yaṃ dīpālokeneva tamassa paṭipakkhabhāvato alobhādīhi lobhādikassa, nāmarūpaparicchedādivipassanāñāṇehi tassa tassa anatthassa pahānaṃ. Seyyathidaṃ – pariccāgena lobhādimalassa, sīlena pāṇātipātādidussīlyassa, saddhādīhi assaddhiyādikassa, nāmarūpavavatthānena sakkāyadiṭṭhiyā, paccayapariggahena ahetuvisamahetudiṭṭhīnaṃ, tasseva aparabhāgena kaṅkhāvitaraṇena kathaṃkathībhāvassa, kalāpasammasanena ‘‘ahaṃ mamā’’ti gāhassa, maggāmaggavavatthānena amagge maggasaññāya, udayadassanena ucchedadiṭṭhiyā, vayadassanena sassatadiṭṭhiyā, bhayadassanena sabhayesu abhayasaññāya, ādīnavadassanena assādasaññāya, nibbidānupassanena abhiratisaññāya, muccitukamyatāñāṇena amuccitukamyatāya upekkhāñāṇena anupekkhāya, anulomena dhammaṭṭhitiyā, nibbānena paṭilomabhāvassa, gotrabhunā saṅkhāranimittaggāhassa pahānaṃ, etaṃ tadaṅgappahānaṃ nāma.
யங் பன உபசாரப்பனாபே⁴தே³ன ஸமாதி⁴னா பவத்திபா⁴வனிவாரணதோ க⁴டப்பஹாரேனேவ உத³கபிட்டே² ஸேவாலஸ்ஸ தேஸங் தேஸங் நீவரணாதி³த⁴ம்மானங் பஹானங், ஏதங் விக்க²ம்ப⁴னப்பஹானங் நாம. யங் சதுன்னங் அரியமக்³கா³னங் பா⁴விதத்தா தங்தங்மக்³க³வதோ அத்தனோ ஸந்தானே ‘‘தி³ட்டி²க³தானங் பஹானாயா’’திஆதி³னா (த⁴॰ ஸ॰ 277; விப⁴॰ 628) நயேன வுத்தஸ்ஸ ஸமுத³யபக்கி²யஸ்ஸ கிலேஸக³ணஸ்ஸ அச்சந்தங் அப்பவத்திபா⁴வேன ஸமுச்சி²ந்த³னங், இத³ங் ஸமுச்சே²த³ப்பஹானங் நாம. யங் பன ப²லக்க²ணே படிப்பஸ்ஸத்³த⁴த்தங் கிலேஸானங், ஏதங் படிப்பஸ்ஸத்³தி⁴ப்பஹானங் நாம. யங் பன ஸப்³ப³ஸங்க²தனிஸ்ஸடத்தா பஹீனஸப்³ப³ஸங்க²தங் நிப்³பா³னங், ஏதங் நிஸ்ஸரணப்பஹானங் நாம. ஏவங் பஞ்சவிதே⁴ பஹானே அனாகா³மிகபா⁴வகரஸ்ஸ பஹானஸ்ஸ அதி⁴ப்பேதத்தா இத⁴ ஸமுச்சே²த³ப்பஹானந்தி வேதி³தப்³ப³ங். தஸ்மா பஜஹதா²தி பரிச்சஜத², ஸமுச்சி²ந்த³தா²தி அத்தோ².
Yaṃ pana upacārappanābhedena samādhinā pavattibhāvanivāraṇato ghaṭappahāreneva udakapiṭṭhe sevālassa tesaṃ tesaṃ nīvaraṇādidhammānaṃ pahānaṃ, etaṃ vikkhambhanappahānaṃ nāma. Yaṃ catunnaṃ ariyamaggānaṃ bhāvitattā taṃtaṃmaggavato attano santāne ‘‘diṭṭhigatānaṃ pahānāyā’’tiādinā (dha. sa. 277; vibha. 628) nayena vuttassa samudayapakkhiyassa kilesagaṇassa accantaṃ appavattibhāvena samucchindanaṃ, idaṃ samucchedappahānaṃ nāma. Yaṃ pana phalakkhaṇe paṭippassaddhattaṃ kilesānaṃ, etaṃ paṭippassaddhippahānaṃ nāma. Yaṃ pana sabbasaṅkhatanissaṭattā pahīnasabbasaṅkhataṃ nibbānaṃ, etaṃ nissaraṇappahānaṃ nāma. Evaṃ pañcavidhe pahāne anāgāmikabhāvakarassa pahānassa adhippetattā idha samucchedappahānanti veditabbaṃ. Tasmā pajahathāti pariccajatha, samucchindathāti attho.
அஹந்தி ப⁴க³வா அத்தானங் நித்³தி³ஸதி. வோதி அயங் வோஸத்³தோ³ பச்சத்தஉபயோக³கரணஸாமிவசனபத³பூரணஸம்பதா³னேஸு தி³ஸ்ஸதி. ததா² ஹி ‘‘கச்சி, பன வோ அனுருத்³தா⁴, ஸமக்³கா³ ஸம்மோத³மானா’’திஆதீ³ஸு (ம॰ நி॰ 1.326) பச்சத்தே ஆக³தோ. ‘‘க³ச்ச²த², பி⁴க்க²வே, பணாமேமி வோ’’திஆதீ³ஸு (ம॰ நி॰ 2.157) உபயோகே³. ‘‘ந வோ மம ஸந்திகே வத்த²ப்³ப³’’ந்திஆதீ³ஸு (ம॰ நி॰ 2.157) கரணே. ‘‘ஸப்³பே³ஸங் வோ, ஸாரிபுத்த, ஸுபா⁴ஸித’’ந்திஆதீ³ஸு (ம॰ நி॰ 1.345) ஸாமிவசனே. ‘‘யே ஹி வோ அரியா பரிஸுத்³த⁴காயகம்மந்தா’’திஆதீ³ஸு (ம॰ நி॰ 1.35) பத³பூரணே. ‘‘வனபத்த²பரியாயங் வோ, பி⁴க்க²வே, தே³ஸெஸ்ஸாமீ’’திஆதீ³ஸு (ம॰ நி॰ 1.190) ஸம்பதா³னே. இதா⁴பி ஸம்பதா³னே ஏவ த³ட்ட²ப்³போ³.
Ahanti bhagavā attānaṃ niddisati. Voti ayaṃ vosaddo paccattaupayogakaraṇasāmivacanapadapūraṇasampadānesu dissati. Tathā hi ‘‘kacci, pana vo anuruddhā, samaggā sammodamānā’’tiādīsu (ma. ni. 1.326) paccatte āgato. ‘‘Gacchatha, bhikkhave, paṇāmemi vo’’tiādīsu (ma. ni. 2.157) upayoge. ‘‘Na vo mama santike vatthabba’’ntiādīsu (ma. ni. 2.157) karaṇe. ‘‘Sabbesaṃ vo, sāriputta, subhāsita’’ntiādīsu (ma. ni. 1.345) sāmivacane. ‘‘Ye hi vo ariyā parisuddhakāyakammantā’’tiādīsu (ma. ni. 1.35) padapūraṇe. ‘‘Vanapatthapariyāyaṃ vo, bhikkhave, desessāmī’’tiādīsu (ma. ni. 1.190) sampadāne. Idhāpi sampadāne eva daṭṭhabbo.
பாடிபோ⁴கோ³தி படிபூ⁴. ஸோ ஹி தா⁴ரணகங் படிச்ச த⁴னிகஸ்ஸ, த⁴னிகங் படிச்ச தா⁴ரணகஸ்ஸ படினிதி⁴பூ⁴தோ த⁴னிகஸந்தகஸ்ஸ ததோ ஹரணாதி³ஸங்கா²தேன பு⁴ஞ்ஜனேன போ⁴கோ³தி படிபோ⁴கோ³, படிபோ⁴கோ³ ஏவ பாடிபோ⁴கோ³. அனாகா³மிதாயாதி அனாகா³மிபா⁴வத்தா²ய. படிஸந்தி⁴க்³க³ஹணவஸேன ஹி காமப⁴வஸ்ஸ அனாக³மனதோ அனாகா³மீ. யோ யஸ்ஸ த⁴ம்மஸ்ஸ அதி⁴க³மேன அனாகா³மீதி வுச்சதி, ஸப²லோ ஸோ ததியமக்³கோ³ அனாகா³மிதா நாம. இதி ப⁴க³வா வேனெய்யத³மனகுஸலோ வேனெய்யஜ்ஜா²ஸயானுகூலங் ததியமக்³கா³தி⁴க³மங் லஹுனா உபாயேன ஏகத⁴ம்மபூரணதாமத்தேன தி²ரங் கத்வா த³ஸ்ஸேஸி யதா² தங் ஸம்மாஸம்பு³த்³தோ⁴. பி⁴ன்னபூ⁴மிகாபி ஹி படிக⁴ஸங்யோஜனாத³யோ ததியமக்³க³வஜ்ஜா² கிலேஸா காமராக³ப்பஹானங் நாதிவத்தந்தீதி.
Pāṭibhogoti paṭibhū. So hi dhāraṇakaṃ paṭicca dhanikassa, dhanikaṃ paṭicca dhāraṇakassa paṭinidhibhūto dhanikasantakassa tato haraṇādisaṅkhātena bhuñjanena bhogoti paṭibhogo, paṭibhogo eva pāṭibhogo. Anāgāmitāyāti anāgāmibhāvatthāya. Paṭisandhiggahaṇavasena hi kāmabhavassa anāgamanato anāgāmī. Yo yassa dhammassa adhigamena anāgāmīti vuccati, saphalo so tatiyamaggo anāgāmitā nāma. Iti bhagavā veneyyadamanakusalo veneyyajjhāsayānukūlaṃ tatiyamaggādhigamaṃ lahunā upāyena ekadhammapūraṇatāmattena thiraṃ katvā dassesi yathā taṃ sammāsambuddho. Bhinnabhūmikāpi hi paṭighasaṃyojanādayo tatiyamaggavajjhā kilesā kāmarāgappahānaṃ nātivattantīti.
கஸ்மா பனெத்த² ப⁴க³வா அத்தானங் பாடிபோ⁴க³பா⁴வே ட²பேஸி? தேஸங் பி⁴க்கூ²னங் அனாகா³மிமக்³கா³தி⁴க³மாய உஸ்ஸாஹஜனநத்த²ங். பஸ்ஸதி ஹி ப⁴க³வா ‘‘மயா ‘ஏகத⁴ம்மங், பி⁴க்க²வே, பஜஹத², அஹங் வோ பாடிபோ⁴கோ³ அனாகா³மிதாயா’தி வுத்தே இமே பி⁴க்கூ² அத்³தா⁴ தங் ஏகத⁴ம்மங் பஹாய ஸக்கா ததியபூ⁴மிங் ஸமதி⁴க³ந்துங், யதோ த⁴ம்மஸ்ஸாமி பட²மமாஹ ‘அஹங் பாடிபோ⁴கோ³’தி உஸ்ஸாஹஜாதா தத³த்தா²ய படிபஜ்ஜிதப்³ப³ங் மஞ்ஞிஸ்ஸந்தீ’’தி. தஸ்மா உஸ்ஸாஹஜனநத்த²ங் அனாகா³மிதாய தேஸங் பி⁴க்கூ²னங் அத்தானங் பாடிபோ⁴க³பா⁴வே ட²பேஸி.
Kasmā panettha bhagavā attānaṃ pāṭibhogabhāve ṭhapesi? Tesaṃ bhikkhūnaṃ anāgāmimaggādhigamāya ussāhajananatthaṃ. Passati hi bhagavā ‘‘mayā ‘ekadhammaṃ, bhikkhave, pajahatha, ahaṃ vo pāṭibhogo anāgāmitāyā’ti vutte ime bhikkhū addhā taṃ ekadhammaṃ pahāya sakkā tatiyabhūmiṃ samadhigantuṃ, yato dhammassāmi paṭhamamāha ‘ahaṃ pāṭibhogo’ti ussāhajātā tadatthāya paṭipajjitabbaṃ maññissantī’’ti. Tasmā ussāhajananatthaṃ anāgāmitāya tesaṃ bhikkhūnaṃ attānaṃ pāṭibhogabhāve ṭhapesi.
கதமங் ஏகத⁴ம்மந்தி எத்த² கதமந்தி புச்சா²வசனங். புச்சா² ச நாமேஸா பஞ்சவிதா⁴ – அதி³ட்ட²ஜோதனாபுச்சா², தி³ட்ட²ஸங்ஸந்த³னாபுச்சா², விமதிச்சே²த³னாபுச்சா², அனுமதிபுச்சா² , கதே²துகம்யதாபுச்சா²தி. தத்த² பகதியா லக்க²ணங் அஞ்ஞாதங் ஹோதி அதி³ட்ட²ங் அதுலிதங் அதீரிதங் அவிபூ⁴தங் அவிபா⁴விதங், தஸ்ஸ ஞாணாய த³ஸ்ஸனாய துலனாய தீரணாய விபூ⁴தத்தா²ய விபா⁴வனத்தா²ய பஞ்ஹங் புச்ச²தி, அயங் அதி³ட்ட²ஜோதனாபுச்சா². பகதியா லக்க²ணங் ஞாதங் ஹோதி தி³ட்ட²ங் துலிதங் தீரிதங் விபூ⁴தங் விபா⁴விதங். ஸோ அஞ்ஞேஹி பண்டி³தேஹி ஸத்³தி⁴ங் ஸங்ஸந்த³னத்தா²ய பஞ்ஹங் புச்ச²தி, அயங் தி³ட்ட²ஸங்ஸந்த³னாபுச்சா². பகதியா ஸங்ஸயபக்க²ந்தோ³ ஹோதி விமதிபக்க²ந்தோ³ த்³வெள்ஹகஜாதோ – ‘‘ஏவங் நு கோ², ந நு கோ², கிங் நு கோ², கத²ங் நு கோ²’’தி, ஸோ விமதிச்சே²த³னத்தா²ய பஞ்ஹங் புச்ச²தி, அயங் விமதிச்சே²த³னாபுச்சா². ப⁴க³வா ஹி அனுமதிக்³க³ஹணத்த²ங் பஞ்ஹங் புச்ச²தி – ‘‘தங் கிங் மஞ்ஞத², பி⁴க்க²வே, ரூபங் நிச்சங் வா அனிச்சங் வா’’திஆதி³னா (ஸங்॰ நி॰ 3.59; மஹாவ॰ 21), அயங் அனுமதிபுச்சா². ப⁴க³வா பி⁴க்கூ²னங் கதே²துகம்யதாய பஞ்ஹங் புச்ச²தி – ‘‘சத்தாரோமே, பி⁴க்க²வே, ஆஹாரா பூ⁴தானங் வா ஸத்தானங் டி²தியா ஸம்ப⁴வேஸீனங் வா அனுக்³க³ஹாய. கதமே சத்தாரோ’’தி (ஸங்॰ நி॰ 2.11) அயங் கதே²துகம்யதாபுச்சா².
Katamaṃ ekadhammanti ettha katamanti pucchāvacanaṃ. Pucchā ca nāmesā pañcavidhā – adiṭṭhajotanāpucchā, diṭṭhasaṃsandanāpucchā, vimaticchedanāpucchā, anumatipucchā , kathetukamyatāpucchāti. Tattha pakatiyā lakkhaṇaṃ aññātaṃ hoti adiṭṭhaṃ atulitaṃ atīritaṃ avibhūtaṃ avibhāvitaṃ, tassa ñāṇāya dassanāya tulanāya tīraṇāya vibhūtatthāya vibhāvanatthāya pañhaṃ pucchati, ayaṃ adiṭṭhajotanāpucchā. Pakatiyā lakkhaṇaṃ ñātaṃ hoti diṭṭhaṃ tulitaṃ tīritaṃ vibhūtaṃ vibhāvitaṃ. So aññehi paṇḍitehi saddhiṃ saṃsandanatthāya pañhaṃ pucchati, ayaṃ diṭṭhasaṃsandanāpucchā. Pakatiyā saṃsayapakkhando hoti vimatipakkhando dveḷhakajāto – ‘‘evaṃ nu kho, na nu kho, kiṃ nu kho, kathaṃ nu kho’’ti, so vimaticchedanatthāya pañhaṃ pucchati, ayaṃ vimaticchedanāpucchā. Bhagavā hi anumatiggahaṇatthaṃ pañhaṃ pucchati – ‘‘taṃ kiṃ maññatha, bhikkhave, rūpaṃ niccaṃ vā aniccaṃ vā’’tiādinā (saṃ. ni. 3.59; mahāva. 21), ayaṃ anumatipucchā. Bhagavā bhikkhūnaṃ kathetukamyatāya pañhaṃ pucchati – ‘‘cattārome, bhikkhave, āhārā bhūtānaṃ vā sattānaṃ ṭhitiyā sambhavesīnaṃ vā anuggahāya. Katame cattāro’’ti (saṃ. ni. 2.11) ayaṃ kathetukamyatāpucchā.
தத்த² புரிமா திஸ்ஸோ புச்சா² பு³த்³தா⁴னங் நத்தி². கஸ்மா? தீஸு ஹி அத்³தா⁴ஸு கிஞ்சி ஸங்க²தங் அத்³தா⁴விமுத்தங் வா அஸங்க²தங் ஸம்மாஸம்பு³த்³தா⁴னங் அதி³ட்ட²ங் அதுலிதங் அதீரிதங் அவிபூ⁴தங் அவிபா⁴விதங் நாம நத்தி². தேன நேஸங் அதி³ட்ட²ஜோதனாபுச்சா² நத்தி². யங் பன தேஹி அத்தனோ ஞாணேன படிவித்³த⁴ங், தஸ்ஸ அஞ்ஞேன ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா ஸத்³தி⁴ங் ஸங்ஸந்த³னகிச்சங் நத்தி², தேன நேஸங் தி³ட்ட²ஸங்ஸந்த³னாபுச்சா²பி நத்தி². யஸ்மா பன பு³த்³தா⁴ ப⁴க³வந்தோ அகத²ங்கதீ² திண்ணவிசிகிச்சா² ஸப்³ப³த⁴ம்மேஸு விக³தஸங்ஸயா, தேன நேஸங் விமதிச்சே²த³னாபுச்சா²பி நத்தி². இதரா பன த்³வே புச்சா² அத்தி², தாஸு அயங் கதே²துகம்யதாபுச்சா²தி வேதி³தப்³பா³.
Tattha purimā tisso pucchā buddhānaṃ natthi. Kasmā? Tīsu hi addhāsu kiñci saṅkhataṃ addhāvimuttaṃ vā asaṅkhataṃ sammāsambuddhānaṃ adiṭṭhaṃ atulitaṃ atīritaṃ avibhūtaṃ avibhāvitaṃ nāma natthi. Tena nesaṃ adiṭṭhajotanāpucchā natthi. Yaṃ pana tehi attano ñāṇena paṭividdhaṃ, tassa aññena samaṇena vā brāhmaṇena vā devena vā mārena vā brahmunā vā saddhiṃ saṃsandanakiccaṃ natthi, tena nesaṃ diṭṭhasaṃsandanāpucchāpi natthi. Yasmā pana buddhā bhagavanto akathaṃkathī tiṇṇavicikicchā sabbadhammesu vigatasaṃsayā, tena nesaṃ vimaticchedanāpucchāpi natthi. Itarā pana dve pucchā atthi, tāsu ayaṃ kathetukamyatāpucchāti veditabbā.
இதா³னி தாய புச்சா²ய புட்ட²மத்த²ங் ஸரூபதோ த³ஸ்ஸெந்தோ ‘‘லோப⁴ங், பி⁴க்க²வே, ஏகத⁴ம்ம’’ந்திஆதி³மாஹ. தத்த² லுப்³ப⁴ந்தி தேன, ஸயங் வா லுப்³ப⁴தி, லுப்³ப⁴னமத்தமேவ வா தந்தி லோபோ⁴. ஸ்வாயங் ஆரம்மணக்³க³ஹணலக்க²ணோ மக்கடாலேபோ விய, அபி⁴ஸங்க³ரஸோ தத்தகபாலே பக்கி²த்தமங்ஸபேஸி விய, அபரிச்சாக³பச்சுபட்டா²னோ தேலஞ்ஜனராகோ³ விய, ஸங்யோஜனியேஸு த⁴ம்மேஸு அஸ்ஸாத³த³ஸ்ஸனபத³ட்டா²னோ, தண்ஹானதி³பா⁴வேன வட்³ட⁴மானோ யத்த² ஸமுப்பன்னோ, ஸீக⁴ஸோதா நதீ³ விய மஹாஸமுத்³த³ங் அபாயமேவ தங் ஸத்தங் க³ஹெத்வா க³ச்ச²தீதி த³ட்ட²ப்³போ³. கிஞ்சாபி அயங் லோப⁴ஸத்³தோ³ ஸப்³ப³லோப⁴ஸாமஞ்ஞவசனோ, இத⁴ பன காமராக³வசனோதி வேதி³தப்³போ³. ஸோ ஹி அனாகா³மிமக்³க³வஜ்ஜோ².
Idāni tāya pucchāya puṭṭhamatthaṃ sarūpato dassento ‘‘lobhaṃ, bhikkhave, ekadhamma’’ntiādimāha. Tattha lubbhanti tena, sayaṃ vā lubbhati, lubbhanamattameva vā tanti lobho. Svāyaṃ ārammaṇaggahaṇalakkhaṇo makkaṭālepo viya, abhisaṅgaraso tattakapāle pakkhittamaṃsapesi viya, apariccāgapaccupaṭṭhāno telañjanarāgo viya, saṃyojaniyesu dhammesu assādadassanapadaṭṭhāno, taṇhānadibhāvena vaḍḍhamāno yattha samuppanno, sīghasotā nadī viya mahāsamuddaṃ apāyameva taṃ sattaṃ gahetvā gacchatīti daṭṭhabbo. Kiñcāpi ayaṃ lobhasaddo sabbalobhasāmaññavacano, idha pana kāmarāgavacanoti veditabbo. So hi anāgāmimaggavajjho.
புன பி⁴க்க²வேதி ஆலபனங் த⁴ம்மஸ்ஸ படிக்³கா³ஹகபா⁴வேன அபி⁴முகீ²பூ⁴தானங் தத்த² ஆத³ரஜனநத்த²ங். பஜஹதா²தி இமினா பஹானாபி⁴ஸமயோ விஹிதோ, ஸோ ச பரிஞ்ஞாஸச்சி²கிரியாபா⁴வனாபி⁴ஸமயேஹி ஸத்³தி⁴ங் ஏவ பவத்ததி, ந விஸுந்தி சதுஸச்சாதி⁴ட்டா²னானி சத்தாரிபி ஸம்மாதி³ட்டி²யா கிச்சானி விஹிதானேவ ஹொந்தி. யதா² ச ‘‘லோப⁴ங் பஜஹதா²’’தி வுத்தே பஹானேகட்ட²பா⁴வதோ தோ³ஸாதீ³னம்பி பஹானங் அத்த²தோ வுத்தமேவ ஹோதி, ஏவங் ஸமுத³யஸச்சவிஸயே ஸம்மாதி³ட்டி²கிச்சே பஹானாபி⁴ஸமயே வுத்தே தஸ்ஸா ஸஹகாரீகாரணபூ⁴தானங் ஸம்மாஸங்கப்பாதீ³னங் ஸேஸமக்³க³ங்கா³னம்பி ஸமுத³யஸச்சவிஸயகிச்சங் அத்த²தோ வுத்தமேவ ஹோதீதி பரிபுண்ணோ அரியமக்³க³ப்³யாபாரோ இத⁴ கதி²தோதி த³ட்ட²ப்³போ³. இமினா நயேன ஸதிபட்டா²னாதீ³னம்பி போ³தி⁴பக்கி²யத⁴ம்மானங் ப்³யாபாரஸ்ஸ இத⁴ வுத்தபா⁴வோ யதா²ரஹங் வித்தா²ரேதப்³போ³.
Puna bhikkhaveti ālapanaṃ dhammassa paṭiggāhakabhāvena abhimukhībhūtānaṃ tattha ādarajananatthaṃ. Pajahathāti iminā pahānābhisamayo vihito, so ca pariññāsacchikiriyābhāvanābhisamayehi saddhiṃ eva pavattati, na visunti catusaccādhiṭṭhānāni cattāripi sammādiṭṭhiyā kiccāni vihitāneva honti. Yathā ca ‘‘lobhaṃ pajahathā’’ti vutte pahānekaṭṭhabhāvato dosādīnampi pahānaṃ atthato vuttameva hoti, evaṃ samudayasaccavisaye sammādiṭṭhikicce pahānābhisamaye vutte tassā sahakārīkāraṇabhūtānaṃ sammāsaṅkappādīnaṃ sesamaggaṅgānampi samudayasaccavisayakiccaṃ atthato vuttameva hotīti paripuṇṇo ariyamaggabyāpāro idha kathitoti daṭṭhabbo. Iminā nayena satipaṭṭhānādīnampi bodhipakkhiyadhammānaṃ byāpārassa idha vuttabhāvo yathārahaṃ vitthāretabbo.
அபிசெத்த² லோப⁴ங் பஜஹதா²தி ஏதேன பஹானபரிஞ்ஞா வுத்தா. ஸா ச தீரணபரிஞ்ஞாதி⁴ட்டா²னா, தீரணபரிஞ்ஞா ச ஞாதபரிஞ்ஞாதி⁴ட்டா²னாதி அவினாபா⁴வேன திஸ்ஸோபி பரிஞ்ஞா போ³தி⁴தா ஹொந்தி. ஏவமெத்த² ஸஹ ப²லேன சதுஸச்சகம்மட்டா²னங் பரிபுண்ணங் கத்வா பகாஸிதந்தி த³ட்ட²ப்³ப³ங். அத² வா லோப⁴ங் பஜஹதா²தி ஸஹ ப²லேன ஞாணத³ஸ்ஸனவிஸுத்³தி⁴ தே³ஸிதா. ஸா ச படிபதா³ஞாணத³ஸ்ஸனவிஸுத்³தி⁴ஸன்னிஸ்ஸயா…பே॰… சித்தவிஸுத்³தி⁴ஸீலவிஸுத்³தி⁴ஸன்னிஸ்ஸயா சாதி நானந்தரிகபா⁴வேன ஸஹ ப²லேன ஸப்³பா³பி ஸத்த விஸுத்³தி⁴யோ விபா⁴விதாதி வேதி³தப்³ப³ங்.
Apicettha lobhaṃ pajahathāti etena pahānapariññā vuttā. Sā ca tīraṇapariññādhiṭṭhānā, tīraṇapariññā ca ñātapariññādhiṭṭhānāti avinābhāvena tissopi pariññā bodhitā honti. Evamettha saha phalena catusaccakammaṭṭhānaṃ paripuṇṇaṃ katvā pakāsitanti daṭṭhabbaṃ. Atha vā lobhaṃ pajahathāti saha phalena ñāṇadassanavisuddhi desitā. Sā ca paṭipadāñāṇadassanavisuddhisannissayā…pe… cittavisuddhisīlavisuddhisannissayā cāti nānantarikabhāvena saha phalena sabbāpi satta visuddhiyo vibhāvitāti veditabbaṃ.
ஏவமேதாய விஸுத்³தி⁴க்கமபா⁴வனாய பரிஞ்ஞாத்தயஸம்பாத³னேன லோப⁴ங் பஜஹிதுகாமேன –
Evametāya visuddhikkamabhāvanāya pariññāttayasampādanena lobhaṃ pajahitukāmena –
‘‘அனத்த²ஜனநோ லோபோ⁴, லோபோ⁴ சித்தப்பகோபனோ;
‘‘Anatthajanano lobho, lobho cittappakopano;
ப⁴யமந்தரதோ ஜாதங், தங் ஜனோ நாவபு³ஜ்ஜ²தி.
Bhayamantarato jātaṃ, taṃ jano nāvabujjhati.
‘‘லுத்³தோ⁴ அத்த²ங் ந ஜானாதி, லுத்³தோ⁴ த⁴ம்மங் ந பஸ்ஸதி;
‘‘Luddho atthaṃ na jānāti, luddho dhammaṃ na passati;
அந்த⁴தமங் ததா³ ஹோதி, யங் லோபோ⁴ ஸஹதே நரங்’’. (இதிவு॰ 88);
Andhatamaṃ tadā hoti, yaṃ lobho sahate naraṃ’’. (itivu. 88);
ரத்தோ கோ², ஆவுஸோ, ராகே³ன அபி⁴பூ⁴தோ பரியாதி³ன்னசித்தோ பாணம்பி ஹனதி, அதி³ன்னம்பி ஆதி³யதி, ஸந்தி⁴ம்பி சி²ந்த³தி, நில்லோபம்பி ஹரதி, ஏகாகா³ரிகம்பி கரோதி, பரிபந்தே²பி திட்ட²தி, பரதா³ரம்பி க³ச்ச²தி, முஸாபி ப⁴ணதி. தத³பி தேஸங் ப⁴வதங் ஸமணப்³ராஹ்மணானங் அஜானதங் அபஸ்ஸதங் அவேத³யதங் தண்ஹானுக³தானங் பரிதஸ்ஸிதங் விப்ப²ந்தி³தமேவ (அ॰ நி॰ 3.54).
Ratto kho, āvuso, rāgena abhibhūto pariyādinnacitto pāṇampi hanati, adinnampi ādiyati, sandhimpi chindati, nillopampi harati, ekāgārikampi karoti, paripanthepi tiṭṭhati, paradārampi gacchati, musāpi bhaṇati. Tadapi tesaṃ bhavataṃ samaṇabrāhmaṇānaṃ ajānataṃ apassataṃ avedayataṃ taṇhānugatānaṃ paritassitaṃ vipphanditameva (a. ni. 3.54).
‘‘தண்ஹாது³தியோ புரிஸோ, தீ³க⁴மத்³தா⁴ன ஸங்ஸரங்;
‘‘Taṇhādutiyo puriso, dīghamaddhāna saṃsaraṃ;
இத்த²பா⁴வஞ்ஞதா²பா⁴வங், ஸங்ஸாரங் நாதிவத்ததி’’. (இதிவு॰ 15, 105);
Itthabhāvaññathābhāvaṃ, saṃsāraṃ nātivattati’’. (itivu. 15, 105);
‘‘நத்தி² ராக³ஸமோ அக்³கி³, நத்தி² தோ³ஸஸமோ கலி’’. (த⁴॰ ப॰ 202, 251);
‘‘Natthi rāgasamo aggi, natthi dosasamo kali’’. (dha. pa. 202, 251);
‘‘காமராகே³ன ட³ய்ஹாமி, சித்தங் மே பரிட³ய்ஹதி’’. (ஸங்॰ நி॰ 1.212);
‘‘Kāmarāgena ḍayhāmi, cittaṃ me pariḍayhati’’. (saṃ. ni. 1.212);
‘‘யே ராக³ரத்தானுபதந்தி ஸோதங், ஸயங்கதங் மக்கடகோவ ஜால’’ந்தி. (த⁴॰ ப॰ 347) ச –
‘‘Ye rāgarattānupatanti sotaṃ, sayaṃkataṃ makkaṭakova jāla’’nti. (dha. pa. 347) ca –
ஏவமாதி³ஸுத்தபதா³னுஸாரேன நானானயேஹி லோப⁴ஸ்ஸ ஆதீ³னவங் பச்சவெக்கி²த்வா தஸ்ஸ பஹானாய படிபஜ்ஜிதப்³ப³ங்.
Evamādisuttapadānusārena nānānayehi lobhassa ādīnavaṃ paccavekkhitvā tassa pahānāya paṭipajjitabbaṃ.
அபிச ச² த⁴ம்மா காமராக³ஸ்ஸ பஹானாய ஸங்வத்தந்தி, அஸுப⁴னிமித்தஸ்ஸ உக்³க³ஹோ, அஸுப⁴பா⁴வனானுயோகோ³, இந்த்³ரியேஸு கு³த்தத்³வாரதா, போ⁴ஜனே மத்தஞ்ஞுதா, கல்யாணமித்ததா, ஸப்பாயகதா²தி. த³ஸவித⁴ஞ்ஹி அஸுப⁴னிமித்தங் உக்³க³ண்ஹந்தஸ்ஸாபி காமராகோ³ பஹீயதி, காயக³தாஸதிபா⁴வனாவஸேன ஸவிஞ்ஞாணகே உத்³து⁴மாதகாதி³வஸேன அவிஞ்ஞாணகே அஸுபே⁴ அஸுப⁴பா⁴வனானுயோக³மனுயுத்தஸ்ஸாபி, மனச்ச²ட்டே²ஸு இந்த்³ரியேஸு ஸங்வரணவஸேன ஸதிகவாடேன பிஹிதத்³வாரஸ்ஸாபி , சதுன்னங் பஞ்சன்னங் வா ஆலோபானங் ஓகாஸே ஸதி உத³கங் பிவித்வா யாபனஸீலதாய போ⁴ஜனே மத்தஞ்ஞுனோபி. தேனேவாஹ –
Apica cha dhammā kāmarāgassa pahānāya saṃvattanti, asubhanimittassa uggaho, asubhabhāvanānuyogo, indriyesu guttadvāratā, bhojane mattaññutā, kalyāṇamittatā, sappāyakathāti. Dasavidhañhi asubhanimittaṃ uggaṇhantassāpi kāmarāgo pahīyati, kāyagatāsatibhāvanāvasena saviññāṇake uddhumātakādivasena aviññāṇake asubhe asubhabhāvanānuyogamanuyuttassāpi, manacchaṭṭhesu indriyesu saṃvaraṇavasena satikavāṭena pihitadvārassāpi , catunnaṃ pañcannaṃ vā ālopānaṃ okāse sati udakaṃ pivitvā yāpanasīlatāya bhojane mattaññunopi. Tenevāha –
‘‘சத்தாரோ பஞ்ச ஆலோபே, அபு⁴த்வா உத³கங் பிவே;
‘‘Cattāro pañca ālope, abhutvā udakaṃ pive;
அலங் பா²ஸுவிஹாராய, பஹிதத்தஸ்ஸ பி⁴க்கு²னோ’’தி. (தே²ரகா³॰ 983);
Alaṃ phāsuvihārāya, pahitattassa bhikkhuno’’ti. (theragā. 983);
அஸுப⁴கம்மட்டா²னபா⁴வனாரதே கல்யாணமித்தே ஸேவந்தஸ்ஸாபி, டா²னநிஸஜ்ஜாதீ³ஸு த³ஸஅஸுப⁴னிஸ்ஸிதஸப்பாயகதா²யபி பஹீயதி. தேனேவாஹ –
Asubhakammaṭṭhānabhāvanārate kalyāṇamitte sevantassāpi, ṭhānanisajjādīsu dasaasubhanissitasappāyakathāyapi pahīyati. Tenevāha –
‘‘அத்தி², பி⁴க்க²வே, அஸுப⁴னிமித்தங், தத்த² யோனிஸோமனஸிகாரப³ஹுலீகாரோ, அயமாஹாரோ அனுப்பன்னஸ்ஸ வா காமச்ச²ந்த³ஸ்ஸ அனுப்பாதா³ய உப்பன்னஸ்ஸ வா காமச்ச²ந்த³ஸ்ஸ பஹானாயா’’தி.
‘‘Atthi, bhikkhave, asubhanimittaṃ, tattha yonisomanasikārabahulīkāro, ayamāhāro anuppannassa vā kāmacchandassa anuppādāya uppannassa vā kāmacchandassa pahānāyā’’ti.
ஏவங் புப்³ப³பா⁴கே³ காமராக³ஸங்கா²தஸ்ஸ லோப⁴ஸ்ஸ பஹானாய படிபன்னோ விபஸ்ஸனங் உஸ்ஸுக்காபெத்வா ததியமக்³கே³ன தங் அனவஸேஸதோ ஸமுச்சி²ந்த³தி. தேன வுத்தங் ‘‘லோப⁴ங், பி⁴க்க²வே, ஏகத⁴ம்மங் பஜஹத², அஹங் வோ பாடிபோ⁴கோ³ அனாகா³மிதாயா’’தி.
Evaṃ pubbabhāge kāmarāgasaṅkhātassa lobhassa pahānāya paṭipanno vipassanaṃ ussukkāpetvā tatiyamaggena taṃ anavasesato samucchindati. Tena vuttaṃ ‘‘lobhaṃ, bhikkhave, ekadhammaṃ pajahatha, ahaṃ vo pāṭibhogo anāgāmitāyā’’ti.
எத்தா²ஹ ‘‘கோ பனெத்த² லோபோ⁴ பஹீயதி, கிங் அதீதோ, அத² அனாக³தோ, உதா³ஹு பச்சுப்பன்னோ’’தி? கிஞ்செத்த² – ந தாவ அதீதோ லோபோ⁴ பஹீயெய்ய, ந அனாக³தோ வா தேஸங் அபா⁴வதோ. ந ஹி நிருத்³த⁴ங் அனுப்பன்னங் வா அத்தீ²தி வுச்சதி, வாயாமோ ச அப²லோ ஆபஜ்ஜதி. அத² பச்சுப்பன்னோ, ஏவம்பி அப²லோ வாயாமோ தஸ்ஸ ஸரஸப⁴ங்க³த்தா, ஸங்கிலிட்டா² ச மக்³க³பா⁴வனா ஆபஜ்ஜதி, சித்தவிப்பயுத்தோ வா லோபோ⁴ ஸியா, ந சாயங் நயோ இச்சி²தோதி. வுச்சதே – ந வுத்தனயேன அதீதானாக³தபச்சுப்பன்னோ லோபோ⁴ பஹீயதி. ஸெய்யதா²பி இத⁴ தருணருக்கோ² அஸஞ்ஜாதப²லோ, தங் புரிஸோ குடா²ரியா மூலே சி²ந்தெ³ய்ய, தஸ்ஸ ருக்க²ஸ்ஸ சே²தே³ அஸதி யானி ப²லானி நிப்³ப³த்தெய்யுங், தானி ருக்க²ஸ்ஸ சி²ன்னத்தா அஜாதானி ஏவ ந ஜாயெய்யுங், ஏவமேவ அரியமக்³கா³தி⁴க³மே அஸதி உப்பஜ்ஜனாரஹோ லோபோ⁴ அரியமக்³கா³தி⁴க³மேன பச்சயகா⁴தஸ்ஸ கதத்தா ந உப்பஜ்ஜதி. அயஞ்ஹி அட்ட²கதா²ஸு ‘‘பூ⁴மிலத்³து⁴ப்பன்னோ’’தி வுச்சதி. விபஸ்ஸனாய ஹி ஆரம்மணபூ⁴தா பஞ்சக்க²ந்தா⁴ தஸ்ஸ உப்பஜ்ஜனட்டா²னதாய பூ⁴மி நாம. ஸா பூ⁴மி தேன லத்³தா⁴தி கத்வா பூ⁴மிலத்³து⁴ப்பன்னோ. ஆரம்மணாதி⁴க்³க³ஹிதுப்பன்னோ அவிக்க²ம்பி⁴துப்பன்னோ அஸமூஹதுப்பன்னோதி ச அயமேவ வுச்சதி.
Etthāha ‘‘ko panettha lobho pahīyati, kiṃ atīto, atha anāgato, udāhu paccuppanno’’ti? Kiñcettha – na tāva atīto lobho pahīyeyya, na anāgato vā tesaṃ abhāvato. Na hi niruddhaṃ anuppannaṃ vā atthīti vuccati, vāyāmo ca aphalo āpajjati. Atha paccuppanno, evampi aphalo vāyāmo tassa sarasabhaṅgattā, saṃkiliṭṭhā ca maggabhāvanā āpajjati, cittavippayutto vā lobho siyā, na cāyaṃ nayo icchitoti. Vuccate – na vuttanayena atītānāgatapaccuppanno lobho pahīyati. Seyyathāpi idha taruṇarukkho asañjātaphalo, taṃ puriso kuṭhāriyā mūle chindeyya, tassa rukkhassa chede asati yāni phalāni nibbatteyyuṃ, tāni rukkhassa chinnattā ajātāni eva na jāyeyyuṃ, evameva ariyamaggādhigame asati uppajjanāraho lobho ariyamaggādhigamena paccayaghātassa katattā na uppajjati. Ayañhi aṭṭhakathāsu ‘‘bhūmiladdhuppanno’’ti vuccati. Vipassanāya hi ārammaṇabhūtā pañcakkhandhā tassa uppajjanaṭṭhānatāya bhūmi nāma. Sā bhūmi tena laddhāti katvā bhūmiladdhuppanno. Ārammaṇādhiggahituppanno avikkhambhituppanno asamūhatuppannoti ca ayameva vuccati.
தத்தா²தி தஸ்மிங் ஸுத்தே. ஏதந்தி ஏதங் அத்த²ஜாதங். இதா³னி கா³தா²ப³ந்த⁴வஸேன வுச்சமானங். இதி வுச்சதீதி கேன பன வுச்சதி? ப⁴க³வதா வ. அஞ்ஞேஸு ஹி தாதி³ஸேஸு டா²னேஸு ஸங்கீ³திகாரேஹி உபனிப³ந்த⁴கா³தா² ஹொந்தி, இத⁴ பன ப⁴க³வதா வ கா³தா²ருசிகானங் புக்³க³லானங் அஜ்ஜா²ஸயவஸேன வுத்தமேவத்த²ங் ஸங்க³ஹெத்வா கா³தா² பா⁴ஸிதா.
Tatthāti tasmiṃ sutte. Etanti etaṃ atthajātaṃ. Idāni gāthābandhavasena vuccamānaṃ. Iti vuccatīti kena pana vuccati? Bhagavatā va. Aññesu hi tādisesu ṭhānesu saṅgītikārehi upanibandhagāthā honti, idha pana bhagavatā va gāthārucikānaṃ puggalānaṃ ajjhāsayavasena vuttamevatthaṃ saṅgahetvā gāthā bhāsitā.
தத்த² யேன லோபே⁴ன லுத்³தா⁴ஸே, ஸத்தா க³ச்ச²ந்தி து³க்³க³திந்தி யேன ஆரம்மணக்³க³ஹணலக்க²ணேன ததோ ஏவ அபி⁴ஸங்க³ரஸேன லோபே⁴ன லுத்³தா⁴ அஜ்ஜ²த்திகபா³ஹிரேஸு ஆயதனேஸு கி³த்³தா⁴ க³தி⁴தா. ஸேதி ஹி நிபாதமத்தங். அக்க²ரசிந்தகா பன ஈதி³ஸேஸு டா²னேஸு ஸே-காராக³மங் இச்ச²ந்தி. ததா² லுத்³த⁴த்தா ஏவ காயஸுசரிதாதீ³ஸு கிஞ்சி ஸுசரிதங் அகத்வா காயது³ச்சரிதாதீ³னி ச உபசினித்வா ரூபாதீ³ஸு ஸத்தவிஸத்ததாய ஸத்தாதி லத்³த⁴னாமா பாணினோ து³க்க²ஸ்ஸ நிப்³ப³த்திட்டா²னதாய து³க்³க³தீதி ஸங்க²ங் க³தங் நிரயங் திரச்சா²னயோனிங் பெத்திவிஸயஞ்ச படிஸந்தி⁴க்³க³ஹணவஸேன க³ச்ச²ந்தி உபபஜ்ஜந்தி.
Tattha yena lobhena luddhāse, sattā gacchanti duggatinti yena ārammaṇaggahaṇalakkhaṇena tato eva abhisaṅgarasena lobhena luddhā ajjhattikabāhiresu āyatanesu giddhā gadhitā. Seti hi nipātamattaṃ. Akkharacintakā pana īdisesu ṭhānesu se-kārāgamaṃ icchanti. Tathā luddhattā eva kāyasucaritādīsu kiñci sucaritaṃ akatvā kāyaduccaritādīni ca upacinitvā rūpādīsu sattavisattatāya sattāti laddhanāmā pāṇino dukkhassa nibbattiṭṭhānatāya duggatīti saṅkhaṃ gataṃ nirayaṃ tiracchānayoniṃ pettivisayañca paṭisandhiggahaṇavasena gacchanti upapajjanti.
தங் லோப⁴ங் ஸம்மத³ஞ்ஞாய, பஜஹந்தி விபஸ்ஸினோதி தங் யதா²வுத்தங் லோப⁴ங் ஸபா⁴வதோ ஸமுத³யதோ அத்த²ங்க³மதோ அஸ்ஸாத³தோ ஆதீ³னவதோ நிஸ்ஸரணதோதி இமேஹி ஆகாரேஹி ஸம்மா அவிபரீதங் ஹேதுனா ஞாயேன அஞ்ஞாய ஞாததீரணபரிஞ்ஞாஸங்கா²தாய பஞ்ஞாய ஜானித்வா ரூபாதி³கே பஞ்சுபாதா³னக்க²ந்தே⁴ அனிச்சாதீ³ஹி விவிதே⁴ஹி ஆகாரேஹி பஸ்ஸனதோ விபஸ்ஸினோ அவஸிட்ட²கிலேஸே விபஸ்ஸனாபஞ்ஞாபுப்³ப³ங்க³மாய மக்³க³பஞ்ஞாய ஸமுச்சே²த³ப்பஹானவஸேன பஜஹந்தி, ந புன அத்தனோ ஸந்தானே உப்பஜ்ஜிதுங் தெ³ந்தி. பஹாய ந புனாயந்தி, இமங் லோகங் குதா³சனந்தி ஏவங் ஸஹஜேகட்ட²பஹானேகட்டே²ஹி அவஸிட்ட²கிலேஸேஹி ஸத்³தி⁴ங் தங் லோப⁴ங் அனாகா³மிமக்³கே³ன பஜஹித்வா புன பச்சா² இமங் காமதா⁴துஸங்கா²தங் லோகங் படிஸந்தி⁴க்³க³ஹணவஸேன கதா³சிபி ந ஆக³ச்ச²ந்தி ஓரம்பா⁴கி³யானங் ஸங்யோஜனானங் ஸுப்பஹீனத்தா. இதி ப⁴க³வா அனாகா³மிப²லேன தே³ஸனங் நிட்டா²பேஸி.
Taṃ lobhaṃ sammadaññāya, pajahanti vipassinoti taṃ yathāvuttaṃ lobhaṃ sabhāvato samudayato atthaṅgamato assādato ādīnavato nissaraṇatoti imehi ākārehi sammā aviparītaṃ hetunā ñāyena aññāya ñātatīraṇapariññāsaṅkhātāya paññāya jānitvā rūpādike pañcupādānakkhandhe aniccādīhi vividhehi ākārehi passanato vipassino avasiṭṭhakilese vipassanāpaññāpubbaṅgamāya maggapaññāya samucchedappahānavasena pajahanti, na puna attano santāne uppajjituṃ denti. Pahāyana punāyanti, imaṃ lokaṃ kudācananti evaṃ sahajekaṭṭhapahānekaṭṭhehi avasiṭṭhakilesehi saddhiṃ taṃ lobhaṃ anāgāmimaggena pajahitvā puna pacchā imaṃ kāmadhātusaṅkhātaṃ lokaṃ paṭisandhiggahaṇavasena kadācipi na āgacchanti orambhāgiyānaṃ saṃyojanānaṃ suppahīnattā. Iti bhagavā anāgāmiphalena desanaṃ niṭṭhāpesi.
அயம்பி அத்தோ²தி நிதா³னாவஸானதோ பபு⁴தி யாவ கா³தா²பரியோஸானா இமினா ஸுத்தேன பகாஸிதோ அத்தோ². அபி-ஸத்³தோ³ இதா³னி வக்க²மானஸுத்தத்த²ஸம்பிண்ட³னோ. ஸேஸங் வுத்தனயமேவ. இமஸ்மிங் ஸுத்தே ஸமுத³யஸச்சங் ஸரூபேனேவ ஆக³தங், பஹானாபதே³ஸேன மக்³க³ஸச்சங். இதரங் ஸச்சத்³வயஞ்ச தது³ப⁴யஹேதுதாய நித்³தா⁴ரேதப்³ப³ங். கா³தா²ய பன து³க்க²ஸமுத³யமக்³க³ஸச்சானி யதா²ருதவஸேனேவ ஞாயந்தி, இதரங் நித்³தா⁴ரேதப்³ப³ங். ஏஸேவ நயோ இதோ பரேஸுபி ஸுத்தேஸு.
Ayampi atthoti nidānāvasānato pabhuti yāva gāthāpariyosānā iminā suttena pakāsito attho. Api-saddo idāni vakkhamānasuttatthasampiṇḍano. Sesaṃ vuttanayameva. Imasmiṃ sutte samudayasaccaṃ sarūpeneva āgataṃ, pahānāpadesena maggasaccaṃ. Itaraṃ saccadvayañca tadubhayahetutāya niddhāretabbaṃ. Gāthāya pana dukkhasamudayamaggasaccāni yathārutavaseneva ñāyanti, itaraṃ niddhāretabbaṃ. Eseva nayo ito paresupi suttesu.
பரமத்த²தீ³பனியா கு²த்³த³கனிகாய-அட்ட²கதா²ய
Paramatthadīpaniyā khuddakanikāya-aṭṭhakathāya
இதிவுத்தகவண்ணனாய பட²மஸுத்தவண்ணனா நிட்டி²தா.
Itivuttakavaṇṇanāya paṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 1. லோப⁴ஸுத்தங் • 1. Lobhasuttaṃ
