| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. லோகந்தக³மனஸுத்தவண்ணனா
3. Lokantagamanasuttavaṇṇanā
116. லோகியந்தி எத்த² ஸத்தகாயபூ⁴தகா³மாதீ³தி லோகோ, சக்கவாளோ. ஸங்கா²ரோ பன லுஜ்ஜனபலுஜ்ஜனட்டே²ன லோகோ. அந்தந்தி ஓஸானங். ஸப்³ப³ஞ்ஞுதஞ்ஞாணேன ஸங்ஸந்தி³த்வாதி ஸப்³ப³ஞ்ஞுதஞ்ஞாணக³தியா ஸமானெத்வா அவிரோதெ⁴த்வா. தோ²மெஸ்ஸாமீதி பஸங்ஸிஸ்ஸாமி.
116. Lokiyanti ettha sattakāyabhūtagāmādīti loko, cakkavāḷo. Saṅkhāro pana lujjanapalujjanaṭṭhena loko. Antanti osānaṃ. Sabbaññutaññāṇena saṃsanditvāti sabbaññutaññāṇagatiyā samānetvā avirodhetvā. Thomessāmīti pasaṃsissāmi.
ஏவங்ஸம்பத்திகந்தி ஏவங்ஸம்பஜ்ஜனகங் ஏவங்பஸ்ஸிதப்³ப³ங் இத³ங் மம அஜ்ஜே²ஸனங். தேனாஹ ‘‘ஈதி³ஸந்தி அத்தோ²’’தி. ஜானங் ஜானாதீதி ஸப்³ப³ஞ்ஞுதஞ்ஞாணேன ஜானிதப்³ப³ங் ஜானாதி ஏவ. ந ஹி பதே³ஸஞ்ஞாணே டி²தோ ஜானிதப்³ப³ங் ஸப்³ப³ங் ஜானாதி. உக்கட்ட²னித்³தே³ஸேன ஹி அவிஸேஸக்³க³ஹணேன ச ‘‘ஜான’’ந்தி இமினா நிரவஸேஸங் ஞெய்யஜாதங் பரிக்³க³ய்ஹதீதி தப்³பி³ஸயாய ஜானநகிரியாய ஸப்³ப³ஞ்ஞுதஞ்ஞாணமேவ கரணங் ப⁴விதுங் யுத்தங். பகரணவஸேன ‘‘ப⁴க³வா’’தி பத³ஸன்னிதா⁴னேன ச அயமத்தோ² விபா⁴வேதப்³போ³. பஸ்ஸிதப்³ப³மேவ பஸ்ஸதீதி தி³ப்³ப³சக்கு²-பஞ்ஞாசக்கு²-த⁴ம்மசக்கு²-பு³த்³த⁴சக்கு²-ஸமந்தசக்கு²-ஸங்கா²தேஹி ஞாணசக்கூ²ஹி பஸ்ஸிதப்³ப³ங் பஸ்ஸதி ஏவ. அத² வா ஜானங் ஜானாதீதி யதா² அஞ்ஞே ஸவிபல்லாஸா காமரூபபரிஞ்ஞாவாதி³னோ ஜானந்தாபி விபல்லாஸவஸேன ஜானந்தி, ந ஏவங் ப⁴க³வா. ப⁴க³வா பன பஹீனவிபல்லாஸத்தா ஜானந்தோ ஜானாதி ஏவ, தி³ட்டி²த³ஸ்ஸனஸ்ஸ அபா⁴வா பஸ்ஸந்தோ பஸ்ஸதி ஏவாதி அத்தோ².
Evaṃsampattikanti evaṃsampajjanakaṃ evaṃpassitabbaṃ idaṃ mama ajjhesanaṃ. Tenāha ‘‘īdisanti attho’’ti. Jānaṃ jānātīti sabbaññutaññāṇena jānitabbaṃ jānāti eva. Na hi padesaññāṇe ṭhito jānitabbaṃ sabbaṃ jānāti. Ukkaṭṭhaniddesena hi avisesaggahaṇena ca ‘‘jāna’’nti iminā niravasesaṃ ñeyyajātaṃ pariggayhatīti tabbisayāya jānanakiriyāya sabbaññutaññāṇameva karaṇaṃ bhavituṃ yuttaṃ. Pakaraṇavasena ‘‘bhagavā’’ti padasannidhānena ca ayamattho vibhāvetabbo. Passitabbameva passatīti dibbacakkhu-paññācakkhu-dhammacakkhu-buddhacakkhu-samantacakkhu-saṅkhātehi ñāṇacakkhūhi passitabbaṃ passati eva. Atha vā jānaṃ jānātīti yathā aññe savipallāsā kāmarūpapariññāvādino jānantāpi vipallāsavasena jānanti, na evaṃ bhagavā. Bhagavā pana pahīnavipallāsattā jānanto jānāti eva, diṭṭhidassanassa abhāvā passanto passati evāti attho.
த³ஸ்ஸனபரிணாயகட்டே²னாதி யதா² சக்கு² ஸத்தானங் த³ஸ்ஸனத்த²ங் பரிணேதி ஸாதே⁴தி, ஏவங் லோகஸ்ஸ யாதா²வத³ஸ்ஸனஸாத⁴னதோபி த³ஸ்ஸனகிச்சபரிணாயகட்டே²ன சக்கு²பூ⁴தோ, பஞ்ஞாசக்கு²மயத்தா வா ஸயம்பூ⁴ஞாணேன பஞ்ஞாசக்கு²ங் பூ⁴தோ பத்தோதி வா சக்கு²பூ⁴தோ. ஞாணபூ⁴தோதி ஏதஸ்ஸ ச ஏவமேவ அத்தோ² த³ட்ட²ப்³போ³. த⁴ம்மா வா போ³தி⁴பக்கி²யா, தேஹி உப்பன்னத்தா லோகஸ்ஸ ச தது³ப்பாத³னதோ அனஞ்ஞஸாதா⁴ரணங் வா த⁴ம்மங் பத்தோ அதி⁴க³தோதி த⁴ம்மபூ⁴தோ. ‘‘ப்³ரஹ்மா’’வுச்சதி ஸெட்ட²ட்டே²ன மக்³க³ஞாணங், தேன உப்பன்னத்தா லோகஸ்ஸ ச தது³ப்பாத³னதோ தஞ்ச ஸயம்பூ⁴ஞாணேன பத்தோதி ப்³ரஹ்மபூ⁴தோ. சதுஸச்சத⁴ம்மங் வத³தீதி வத்தா. சிரங் ஸச்சபடிவேத⁴ங் பவத்தெந்தோ வத³தீதி பவத்தா. அத்த²ங் நீஹரித்வாதி து³க்கா²தி³அத்த²ங் உத்³த⁴ரித்வா. பரமத்த²ங் வா நிப்³பா³னங் பாபயிதா. அமதஸச்சி²கிரியங் ஸத்தேஸு உப்பாதெ³ந்தோ அமதங் த³தா³தீதி அமதஸ்ஸ தா³தா. போ³தி⁴பக்கி²யத⁴ம்மானங் ததா³யத்தபா⁴வதோ த⁴ம்மஸ்ஸாமீ. புனப்புனங் யாசாபெந்தோ பா⁴ரியங் கரொந்தோ க³ருங் கரோதி நாம, ததா² து³விஞ்ஞெய்யங் கத்வா கதெ²ந்தோபி.
Dassanapariṇāyakaṭṭhenāti yathā cakkhu sattānaṃ dassanatthaṃ pariṇeti sādheti, evaṃ lokassa yāthāvadassanasādhanatopi dassanakiccapariṇāyakaṭṭhena cakkhubhūto, paññācakkhumayattā vā sayambhūñāṇena paññācakkhuṃ bhūto pattoti vā cakkhubhūto. Ñāṇabhūtoti etassa ca evameva attho daṭṭhabbo. Dhammā vā bodhipakkhiyā, tehi uppannattā lokassa ca taduppādanato anaññasādhāraṇaṃ vā dhammaṃ patto adhigatoti dhammabhūto. ‘‘Brahmā’’vuccati seṭṭhaṭṭhena maggañāṇaṃ, tena uppannattā lokassa ca taduppādanato tañca sayambhūñāṇena pattoti brahmabhūto. Catusaccadhammaṃ vadatīti vattā. Ciraṃ saccapaṭivedhaṃ pavattento vadatīti pavattā. Atthaṃ nīharitvāti dukkhādiatthaṃ uddharitvā. Paramatthaṃ vā nibbānaṃ pāpayitā. Amatasacchikiriyaṃ sattesu uppādento amataṃ dadātīti amatassa dātā. Bodhipakkhiyadhammānaṃ tadāyattabhāvato dhammassāmī. Punappunaṃ yācāpento bhāriyaṃ karonto garuṃ karoti nāma, tathā duviññeyyaṃ katvā kathentopi.
சக்கு²னா விஜ்ஜமானேன லோகஸஞ்ஞீ ஹோதி, ந தஸ்மிங் அஸதி. ந ஹி அஜ்ஜ²த்திகாயதனவிரஹேன லோகஸமஞ்ஞா அத்தி². தேனாஹ ‘‘சக்கு²ஞ்ஹி லோகோ’’திஆதி³. அப்பஹீனதி³ட்டீ²தி அஸமூஹதஸக்காயதி³ட்டி²கோ க⁴னவினிப்³போ⁴க³ங் காதுங் அஸக்கொந்தோ ஸமுதா³யங் விய அவயவங் ‘‘லோகோ’’தி ஸஞ்ஜானாதி சேவ மஞ்ஞதி ச. ததா²தி இமினா ‘‘லோகோதி ஸஞ்ஜானாதி சேவ மஞ்ஞதி சா’’தி பத³த்தயங் ஆகட்³ட⁴தி. தஸ்ஸாதி புது²ஜ்ஜனஸ்ஸ, சக்கவாளலோகஸ்ஸ வா. சக்கா²தி³மேவ ஹி ஸஹோகாஸேன ‘‘சக்கவாளோ’’தி புது²ஜ்ஜனோ ஸஞ்ஜானாதி. க³மனேனாதி பத³ஸா க³மனேன. ந ஸக்கா தேஸங் அனந்தத்தா. லுஜ்ஜனட்டே²னாதி அபி⁴ஸங்கா²ரலோகவஸேன லோகஸ்ஸ அந்தங் த³ஸ்ஸேதுங் வுத்தங். தஸ்ஸ அந்தோ நாம நிப்³பா³னங். தங் பத்துங் ஸக்கா ஸம்மாபடிபத்தியா பத்தப்³ப³த்தா. சக்கவாளலோகஸ்ஸ பன அந்தோ நாம, நத்தி² தஸ்ஸ க³மனேன அப்பத்தப்³ப³த்தா.
Cakkhunā vijjamānena lokasaññī hoti, na tasmiṃ asati. Na hi ajjhattikāyatanavirahena lokasamaññā atthi. Tenāha ‘‘cakkhuñhi loko’’tiādi. Appahīnadiṭṭhīti asamūhatasakkāyadiṭṭhiko ghanavinibbhogaṃ kātuṃ asakkonto samudāyaṃ viya avayavaṃ ‘‘loko’’ti sañjānāti ceva maññati ca. Tathāti iminā ‘‘lokoti sañjānāti ceva maññati cā’’ti padattayaṃ ākaḍḍhati. Tassāti puthujjanassa, cakkavāḷalokassa vā. Cakkhādimeva hi sahokāsena ‘‘cakkavāḷo’’ti puthujjano sañjānāti. Gamanenāti padasā gamanena. Na sakkā tesaṃ anantattā. Lujjanaṭṭhenāti abhisaṅkhāralokavasena lokassa antaṃ dassetuṃ vuttaṃ. Tassa anto nāma nibbānaṃ. Taṃ pattuṃ sakkā sammāpaṭipattiyā pattabbattā. Cakkavāḷalokassa pana anto nāma, natthi tassa gamanena appattabbattā.
இமேஹி பதே³ஹீதி இமேஹி வாக்யவிபா⁴கே³ஹி பதே³ஹி. தானி பன அக்க²ரஸமுதா³யலக்க²ணானீதி ஆஹ ‘‘அக்க²ரஸம்பிண்ட³னேஹீ’’தி. பாடியேக்கஅக்க²ரேஹீதி தஸ்மிங் தஸ்மிங் பதே³ படினியதஸன்னிவேஸேஹி விஸுங் விஸுங் சித்தேன க³ய்ஹமானேஹி அக்க²ரேஹீதி அத்தோ².
Imehi padehīti imehi vākyavibhāgehi padehi. Tāni pana akkharasamudāyalakkhaṇānīti āha ‘‘akkharasampiṇḍanehī’’ti. Pāṭiyekkaakkharehīti tasmiṃ tasmiṃ pade paṭiniyatasannivesehi visuṃ visuṃ cittena gayhamānehi akkharehīti attho.
க³மனட்டே²ன ‘‘பண்டா³’’ வுச்சதி பஞ்ஞா, தாய இதோ க³தோ பத்தோதி பண்டி³தோ, பஞ்ஞவா. மஹாபஞ்ஞதா நாம படிஸம்பி⁴தா³வஸேன வேதி³தப்³பா³தி ஆஹ ‘‘மஹந்தே அத்தே²’’திஆதி³. யதா² தந்தி எத்த² தந்தி நிபாதமத்தங் பட²மவிகப்பே, து³தியவிகப்பே பன பச்சாமஸனந்தி ஆஹ ‘‘தங் ப்³யாகத’’ந்தி.
Gamanaṭṭhena ‘‘paṇḍā’’ vuccati paññā, tāya ito gato pattoti paṇḍito, paññavā. Mahāpaññatā nāma paṭisambhidāvasena veditabbāti āha ‘‘mahante atthe’’tiādi. Yathā tanti ettha tanti nipātamattaṃ paṭhamavikappe, dutiyavikappe pana paccāmasananti āha ‘‘taṃ byākata’’nti.
லோகந்தக³மனஸுத்தவண்ணனா நிட்டி²தா.
Lokantagamanasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. லோகந்தக³மனஸுத்தங் • 3. Lokantagamanasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. லோகந்தக³மனஸுத்தவண்ணனா • 3. Lokantagamanasuttavaṇṇanā
