| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. லோகாயதிகஸுத்தவண்ணனா
8. Lokāyatikasuttavaṇṇanā
48. ஆயதிங் ஹிதங் தேன லோகோ ந யததி ந ஈஹதீதி லோகாயதங். ந ஹி தங் லத்³தி⁴ங் நிஸ்ஸாய ஸத்தா புஞ்ஞகிரியாய சித்தம்பி உப்பாதெ³ந்தி, குதோ பயோகோ³, தங் ஏதஸ்ஸ அத்தி², தத்த² வா நியுத்தோதி லோகாயதிகோ. பட²மஸத்³தோ³ ஆதி³அத்த²வாசகத்தா ஜெட்ட²வேவசனோதி ஆஹ ‘‘பட²மங் லோகாயத’’ந்தி. ஸாதா⁴ரணவசனோபி லோகஸத்³தோ³ விஸிட்ட²விஸயோ இதா⁴தி⁴ப்பேதோதி ஆஹ ‘‘பா³லபுது²ஜ்ஜனலோகஸ்ஸா’’தி. இத்தரபா⁴வேன லகுண்ட³கபா⁴வேன தஸ்ஸ விபுலாதி³பா⁴வேன பா³லானங் உபட்டா²னமத்தந்தி த³ஸ்ஸெந்தோ ‘‘ஆயதங் மஹந்த’’ந்திஆதி³மாஹ. பரித்தந்தி கு²த்³த³கங். ஏகஸபா⁴வந்தி ஏகங் ஸபா⁴வங். அவிபரிணாமத⁴ம்மதாயாதி ஆஹ ‘‘நிச்சஸபா⁴வமேவாதி புச்ச²தீ’’தி. புரிமஸபா⁴வேன நானாஸபா⁴வந்தி புரிமஸபா⁴வதோ பி⁴ன்னஸபா⁴வங். பச்சா² ந ஹோதீதி பச்சா² கிஞ்சி ந ஹோதி ஸப்³ப³ஸோ ஸமுச்சி²ஜ்ஜனதோ. தேனாஹ ‘‘உச்சே²த³ங் ஸந்தா⁴ய புச்ச²தீ’’தி. ஏகத்தந்தி ஸப்³ப³காலங் அத்தஸம்ப⁴வங். ததா² சேவ க³ஹணேன த்³வேபி வாதா³ ஸஸ்ஸததி³ட்டி²யோ ஹொந்தி. நத்தி² ந ஹோதி. புது²த்தங் நானாஸபா⁴வங், ஏகரூபங் ந ஹோதீதி வா க³ஹணேன த்³வேபி வாதா³ உச்சே²த³தி³ட்டி²யோதி.
48. Āyatiṃ hitaṃ tena loko na yatati na īhatīti lokāyataṃ. Na hi taṃ laddhiṃ nissāya sattā puññakiriyāya cittampi uppādenti, kuto payogo, taṃ etassa atthi, tattha vā niyuttoti lokāyatiko. Paṭhamasaddo ādiatthavācakattā jeṭṭhavevacanoti āha ‘‘paṭhamaṃ lokāyata’’nti. Sādhāraṇavacanopi lokasaddo visiṭṭhavisayo idhādhippetoti āha ‘‘bālaputhujjanalokassā’’ti. Ittarabhāvena lakuṇḍakabhāvena tassa vipulādibhāvena bālānaṃ upaṭṭhānamattanti dassento ‘‘āyataṃ mahanta’’ntiādimāha. Parittanti khuddakaṃ. Ekasabhāvanti ekaṃ sabhāvaṃ. Avipariṇāmadhammatāyāti āha ‘‘niccasabhāvamevāti pucchatī’’ti. Purimasabhāvena nānāsabhāvanti purimasabhāvato bhinnasabhāvaṃ. Pacchā na hotīti pacchā kiñci na hoti sabbaso samucchijjanato. Tenāha ‘‘ucchedaṃ sandhāya pucchatī’’ti. Ekattanti sabbakālaṃ attasambhavaṃ. Tathā ceva gahaṇena dvepi vādā sassatadiṭṭhiyo honti. Natthi na hoti. Puthuttaṃ nānāsabhāvaṃ, ekarūpaṃ na hotīti vā gahaṇena dvepi vādā ucchedadiṭṭhiyoti.
லோகாயதிகஸுத்தவண்ணனா நிட்டி²தா.
Lokāyatikasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. லோகாயதிகஸுத்தங் • 8. Lokāyatikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. லோகாயதிகஸுத்தவண்ணனா • 8. Lokāyatikasuttavaṇṇanā
